Цефтриаксон-БХФЗ (1000 мг) (Ceftriaxone)
Инструкция
-
русский
-
қазақша
Саудалық атауы
Цефтриаксон-БХФЗ
Халықаралық патенттелмеген атауы
Цефтриаксон
Дәрілік түрі
Инъекция үшін ерітінді дайындауға арналған ұнтақ, 1000 мг
Құрамы
белсенді зат – 1000 мг цефтриаксон (стерильді цефтриаксонның натрий тұзы түрінде)
Сипаттамасы
Ақ дерлік немесе сарғыш түсті кристалды ұнтақ, аздап гигроскопиялы.
Фармакотерапиялық тобы
Жүйелі қолдануға арналған бактерияға қарсы препараттар. Бета-лактамдық бактерияға қарсы басқа да препараттар. Үшінші буынды цефалоспориндер. Цефтриаксон.
АТX коды J01DD04
Фармакологиялық қасиеттері
Фармакокинетикасы
Бұлшықет ішіне енгізгеннен кейінгі цефтриаксонның биожетімділігі 100% құрайды, оның ең жоғары концентрациясы қан плазмасында 2-3 сағаттан кейін байқалады. Көктамыр ішіне енгізгеннен кейін препарат тіндік сұйықтықтарға тез өтеді, онда сезімтал микроорганизмдерге қатысты бактерицидтік концентрациялары 24 сағат бойы сақталады. Плазма ақуыздарымен 85-95%-ға байланысады, мұндайда байланысу дәрежесі концентрацияның артуымен азаяды. Цефтриаксон организмнің ағзалары мен сұйықтықтарына (перитонеальді, плевральді, жұлын-ми, синовиальді), сүйек тіндеріне жақсы өтеді, плацента арқылы енеді, аздаған мөлшерде (3-4%) емшек сүтіне бөлініп шығады. Балалардағы, соның ішінде жаңа туған нәрестелердегі менингитте, препарат қабынған ми қабықтарына өтеді, мұндайда оның жұлын-ми сұйықтығындағы концентрациясы қан плазмасындағы концентрацияның 17%-ын құрайды.
Препарат өзгермеген күйінде 50-60%-ы бүйректер арқылы және 40-50%-ы өтпен бірге бөлініп шығады. Бүйрек жеткіліксіздігінде препараттың фармакокинетикасы мүлдем өзгермейді, тек жартылай шығарылу кезеңінің аздап артқаны білінеді. Дені сау ересектерде жартылай шығарылу кезеңі 8 сағатқа жуықты, дүниеге келгеніне 8 күн толмаған жаңа туған нәрестелерде және 75 жастан асқандарда 2-3 есе артады.
Фармакодинамикасы
Цефтриаксон – бета-лактамдар тобының жартылай синтетикалық антибиотигі, ІІІ буынды цефалоспорин, бактерицидтік әсері бар, оның механизмі транспептидаза ферментінің белсенділігінің тежелуімен, микроорганизмдердің жасушалық қабырғасындағы пептидогликан биосинтезінің бұзылуымен байланысты; әсер ету ауқымы кең.
Грамоң аэробтарға қатысты белсенді: Staphylococcus aureus (пенициллиназаны өндіретін штаммдарды қоса есептегенде), Staphylococcus epidermidis, Streptococcus pneumoniae, А тобының бета-гемолитикалық стрептококктары (S.pyogenes), В тобының стрептококктары (S.agalactiсae), Viridans топтары, D тобы энтерококктік емес стрептококктары; грамтеріс аэробтар: E.coli, Haemophilus influenzae, Haemophilus parainfluenzae, Klebsiella spp. (K.pneumoniae қоса есептегенде), Morganella morganii, Neisseria gonorrhoeae (пенициллиназаны түзетін штаммдарды қоса есептегенде), Neisseria meningitidis, Proteus mirabilis, Proteus vulgaris, Providencia spp., Pseudomonas aeruginosa, Salmonella spp. (соның ішінде S.typhi), Serratia spp. ( S.marcescens қоса есептегенде), Shigella spp., Yersinia spp. (соның ішінде Y.enterocolitica), Treponema pallidum; анаэробтар: Bacteroides spp. (кейбір B.fragilis штаммдарын қоса есептегенде), Clostridium spp. (алайда C.difficile штаммдарының көбісі төзімді), Peptococcus spp., Peptostreptococcus spp., Fusobacterium spp. (F.mortiferum және F.varium басқасында). Препарат пенициллиндерге, бірінші буынды цефалоспориндерге, аминогликозидтерге төзімді микроорганизмдерге қатысты белсенді.
Препараттың әсеріне мыналар төзімді: метициллинге төзімді стафилококктар; энтерококктардың көптеген штаммдары (соның ішінде St.faecalis) және D тобы стрептококктары; бета-лактамазаны өндіретін Bacteroides spp. көптеген штаммдары (B.fragilis).
Қолданылуы
- сепсисте, менингитте
- жоғарғы және төменгі тыныс жолдарының жұқпаларында
- ЛОР-ағзалардың жұқпаларында
- құрсақ қуысындағы ағзалардың жұқпаларында (перитонитте, өт жолдарының және асқазан-ішек жолдарының жұқпаларында)
- сүйектердің, буындардың, жұмсақ тіндердің, терінің жұқпаларында, сондай-ақ жара жұқпаларында
- бүйректердің және несеп шығару жолдарының жұқпаларында
- жыныс ағзаларының жұқпаларында, созды қоса есептегенде
- иммунитеті әлсіреген науқастардағы жұқпаларда
- операция алдында жұқпалардың алдын алуға.
Қолдану тәсілдері және дозалары
Цефтриаксон-БХФЗ препаратын көктамыр ішіне және бұлшықет ішіне енгізеді.
Бұлшықет ішіне енгізу үшін, инъекция жасалған жерде ауыруды болдырмау мақсатында, препаратты 3,5 мл 1% лидокаин ерітіндісінде ерітеді. Бөксе бұлшықетіне терең етіп енгізеді. Бір бөксеге 1 г-ден артық енгізуге болмайды.
12 жасқа дейінгі балаларға еріткіш ретінде лидокаин рұсқат етілмейді.
Құрамында лидокаин бар ерітіндіні көктамыр ішіне енгізуге болмайды!
Көктамыр ішіне сорғалатып енгізу үшін 1 г препаратты инъекцияға арналған стерильді 10 мл суда ерітеді. 2-4 минут бойы баяу енгізеді.
Көктамырішілік инфузияға арналған ерітінді дайындау үшін 2 г Цефтриаксон-БХФЗ препаратын кальций иондарынан бос мына ерітінділердің 40 мл-де ерітеді: 0,9% натрий хлориді ерітіндісі, 0,45% натрий хлориді ерітіндісі + 2,5% глюкоза ерітіндісі, 5% глюкоза ерітіндісі, 10% глюкоза ерітіндісі, глюкоза ерітіндісіндегі 6% декстран ерітіндісі, инъекцияға арналған стерильді ерітінді.
≥ 50 мг/кг дозадағы инфузия ұзақтығы – кем дегенде 30 минут.
Ересектерге және 12 жастан асқан балаларға тәуліктік 1-2 г дозада тағайындайды (тәулігіне 1 рет немесе жарты дозадан тәулігіне 2 рет енгізеді). Ауыр жағдайларда тәуліктік дозаны 4 г-ге дейін арттыруға және 12 сағаттық аралықпен 2 рет енгізуге болады.
Жаңа туған балалар (туғанына 14 күн толмаған) және шала туған балалар (жасы түзетілген 41 аптадан бастап ) цефтриаксон-БХФЗ препаратының тәуліктік дозасы дене салмағының әр кг-ге шаққанда 20-50 мг құрайды, билирубиннің қан альбуминімен байланысынан ығысып шығуына жол бермеу және билирубиндік энцефалопатияның потенциалды қаупін азайту үшін тәулігіне 1 рет ең кемінде 60 минут бойы енгізіледі.
15 күннен 12 жасқа дейінгі балалар үшін – тәулігіне 1 рет 20-80 мг/кг.
Дене салмағының әр кг шаққанда 80 мг-ден асатын дозаны, өт преципитаттарының пайда болу қаупіне байланысты, (менингиттен басқасында) қолданбаған жөн.
Дене салмағы 50 кг асатын балаларға ересектерге арналған дозаны тағайындайды.
Егде жастағы емделушілер үшін доза, бауыр және бүйрек функциялары қанағаттанарлықтай болған жағдайда, ересектерге арналған дозаға сәйкес келеді.
Бүйрек функциясы бұзылған емделушілерге − егер бауыр қызметі қалыпты күйінде сақталса, дозаны азайту қажет емес. Тек бүйрек функциясының жеткіліксіздігі жағдайында (креатинин клиренсі минутына 10 мл-ден аз) цефтриаксонның тәуліктік дозасы 2 г-ден аспауы тиіс.
Бауыр функциясы бұзылған емделушілерге – егер бүйрек функциясы қалыпты күйінде сақталса, дозаны азайту қажет емес.
Бүйрек және бауыр функциясының ауыр жеткіліксіздігі бір мезгілде болғанда цефтриаксонның қан плазмасындағы концентрациясын жүйелі түрде анықтап отырған жөн.
Гемодиализдегі емделушілерде диализден кейін препаратты қосымша енгізудің қажеті жоқ. Дозаны мүмкіндігінше түзету үшін қан сарысуындағы цефтриаксон концентрациясын бақылап отырған жөн, өйткені осы емделушілерде оның шығарылу жылдамдығы төмендеуі мүмкін.
Операциядан кейінгі асқынулардың алдын алу үшін операциядан 30-90 минут бұрын бір реттік 1-2 г (жұқпа жұқтыру қаупінің дәрежесіне байланысты) енгізіледі.
Асқынбаған созда көктамыр ішіне/бұлшықет ішіне бір рет 0,25 г препарат енгізеді.
Бактериялық менингитте емшектегі балаларда және 15 күндіктен 12 жасқа дейінгі балаларда емдеуді тәулігіне 1 рет 100 мг/кг (бірақ 4 г-ден асырмай) дозадан бастайды. Қоздырғышты идентификациялағаннан және оның сезімталдығын анықтағаннан кейін дозаны тиісінше азайту керек. Туғанына 2 апта толмаған нәрестелер үшін доза тәулігіне дене салмағының әр кг шаққанда 50 мг-ден аспауы тиіс.
Мынадай емдеу ұзақтығында өте жақсы нәтижелерге қол жеткізілді:
Neisseria meningitidis – 4 күн
Haemophilus influenzae – 6 күн
Streptococcus pneumoniae – 7 күн.
цефтриаксон-БХФЗ препаратымен емдеу ұзақтығы патологиялық үдерістің сипатына және ауырлық дәрежесіне, бактериологиялық зерттеу деректеріне байланысты және әдетте 4-14 тәулікті құрайды, бірақ ауыр жұқпалы ауруларда ұзағырақ емдеуді қажет етуі мүмкін. Препаратты қолдану (кез келген антибиотиктермен емдеген кездегідей) ауру симптомдары жоғалғаннан кейін және бактериологиялық әсерін талдау нәтижелері дәлелденгеннен кейін кемінде тағы да 48-72 сағатқа созылуы тиіс.
Цефтриаксон-БХФЗ препаратын құрамында кальций бар препараттармен бір инфузиялық жүйеде енгізуге болмайды!
Жағымсыз әсерлері
Жиі
- аллергиялық реакциялар: қызба, тері бөртпесі, есекжем, қышыну, эритема
Сирек
- ісінулер, сарысу құю ауруы, қалтырау
- жергілікті реакциялар: көктамыр ішіне енгізгенде – флебиттер, көктамырды бойлай ауыру; бұлшықет ішіне енгізгенде – енгізген жердің аурушаңдығы
- псевдохолелитиаз («sludge» - синдромы), дисбактериоз, кандидамикоз және басқа да асқынжұқпалар
- анемия, лимфопения, гранулоцитопения, нейтропения, базофилия, тромбоцитопения, тромбоцитоз, мұрыннан қан кету, гемолитикалық анемия
Кейде
- эозинофилия
- бас ауыру, бас айналу, қан кернеулер, тершеңдік
- олигурия, анурия
- дәмнің бұзылуы, стоматит, глоссит, жүректің айнуы, құсу, іштің ауыруы, метеоризм, диарея, іш қату
- лейкопения, лейкоцитоз
- протромбинді уақыттың артуы (азаюы), «бауыр» трансаминазалары және сілтілік фосфатаза белсенділігінің жоғарылауы, гипербилирубинемия, гиперкреатининемия, мочевина концентрациясының жоғарылауы, гематурия, глюкозурия
Өте сирек
- жалған жарғақшалы колит
- бүйректерде, негізінен 3 жастан асқан, препараттың тәуліктік көп дозасын (тәулігіне 80 мг/кг) немесе 10 г-ден астам жиынтық дозасын қабылдайтын, сондай-ақ қосымша қауіп факторлары бар (сұйықтықтың қажеттілігін шектелген, төсек тартып қалған және т.б.) балаларда конкременттердің түзілуі
Жекелеген жағдайларда
- агранулоцитоз (1 мкл-де < 500 жасуша), әрі олардың көбісі 10 күн емдегеннен кейін және жиынтығы 20 г және одан көп дозаларда қолданғанда пайда болды
- экссудативті мультиформалы эритема, Стивенс-Джонсон синдромы, Лайелл синдромы, анафилактикалық шок
Қолдануға болмайтын жағдайлар
- сыртартқыда цефалоспоринді қатардың антибиотиктеріне және басқа да бета-лактамдық антибиотиктерге, лидокаинге аса жоғары сезімталдық (бұлшықет ішіне енгізу)
- шала туған нәрестелерге түзетілген 41 апталық жасында (жүктілік аптасы + өмір сүру аптасы)
- жетіліп туған нәрестелерде (туғанына 28 күн болған) сарғаю немесе гипоальбуминемия, ацидоз болғанда (мұндай жағдайларда билирубиннің ақуыздармен байланысуы төмендейді және билирубиндік энцефалопатия қаупі артады)
- барлық емделушілерде тіпті әртүрлі инфузиялық желі арқылы құрамында кальций бар препараттармен және ерітінділермен (Рингер ерітіндісі және т.б.) бірге қолдану.
Дәрілермен өзара әрекеттесуі
Цефтриаксонның кальций тұздарының преципитаттарының пайда болу қаупіне байланысты ешқандай жағдайда цефтриаксонды құрамында кальций бар ерітінділермен (Рингер, Хартман ерітінділері және т.б.) бірге қолдануға болмайды!
Аминогликозидтер: синергизм салдарынан грамтеріс микроорганизмдерге қатысты белсенділігі жоғарылайды, бірақ ото- және нефроуыттылық қаупі жоғарылайды. Препараттар дозасын реттеу қажет және біріктіріп емдеу қажет болғанда, физикалық-химиялық үйлесімсіздігіне байланысты, оларды әртүрлі жерге бөлек енгізу және бір еккіште немесе инфузияға арналған бір ерітіндіде араластырмау керек.
Қабынуға қарсы стероидты емес дәрілер, антиагреганттар, К витаминінің антагонистері (мысалы, варфарин сияқты): қан кету қаупі жоғарылауы мүмкін.
Ілмектік диуретиктер және нефроуытты препараттар − нефроуыттылық қаупі жоғарылайды. Бактериостатикалық антибиотиктер (хлорамфеникол, тетрациклиндер): цефтриаксонның бактерицидтік әсерін төмендетеді.
Гормональді контрацептивтер: гормональді контрацептивтердің тиімділігі төмендейді, сондықтан емдеу кезінде және оны аяқтағаннан кейін 1 ай ішінде контрацепцияның қосымша (гормональді емес) әдістерін қолдану керек.
Басқа да бета-лактамдық антибиотиктер: айқаспалы аллергиялық реакциялар пайда болуы мүмкін.
Цефтриаксонды қабылдағаннан кейін бірден этанолды қолданғанда дисульфирам әсеріне ұқсас әсерлер байқалған жоқ.
Цефтриаксонның құрамында этанолдың жақпаушылығын немесе кейбір цефалоспориндерге тән қан кетуді туындата алатын N-метилтиотетразольді топ жоқ.
Пробенецид: цефтриаксонның өзекшелік секрециясына ықпалын тигізбейді (басқа цефалоспориндерден айырмашылығы).
Басқа антибиотиктер сияқты, цефтриаксон сүзекке қарсы вакцинаның емдік әсерін төмендетуі мүмкін, алайда мұндай әсер тек әлсіз Ty21 штаммдарында ғана болады.
Цефтриаксон-БХФЗ ерітіндісін, фармацевтикалық үйлесімсіздігіне байланысты, микробтарға қарсы басқа да препараттармен араластырмаған немесе бір мезгілде енгізбеген жөн.
Цефтриаксон амзакринмен, ванкомицинмен, флуконазолмен және аминогликозидтермен үйлеспейді және олармен араластыруға болмайды.
Айрықша нұсқаулар
Енгізер алдында, егер жасауға қарсы көрсетілімдері болмаған жағдайда, препараттың және лидокаиннің (бұлшықет ішіне енгізгенде) жағымдылығына тері ішіне сынама жүргізу қажет.
Ерітінділерді оларды тура қолданар алдында ғана дайындау қажет.
Лидокаині бар ерітіндіні көктамыр ішіне енгізуге болмайды!
Бөксе бұлшықетінің жоғарғы сыртқы шаршысына бұлшықетішілік инъекциялар терең болуы тиіс. Препарат ерітіндісін енгізер алдында иненің тамырдан тыс тұрғанына көз жеткізу қажет.
Цефтриаксонмен емдеудің әрбір жаңа курсын бастамас бұрын емделушіден бұған дейін цефалоспориндерге, пенициллиндерге, басқа да бета-лактамдық антибиотиктерге, дәрілік заттарға аса жоғары сезімталдық реакциялардың болған-болмағанын сұрап білген жөн. Сыртартқысында аллергияның кез келген түрі бар, әсіресе IgE негіз болған, пенициллинге немесе басқа да бета-лактамдық антибиотиктерге аса жоғары сезімталдық реакциялардың кез келген басқа түрлері бар емделушілерге абайлап тағайындау керек. Басқа да цефалоспориндерді қолданған кездегідей, тіпті нақты сыртартқысында тиісті көрсетілімдер жоқ болса да, анафилактикалық шоктың болуы мүмкін екендігін жоққа шығаруға болмайды. Анафилактикалық шок пайда болғанда көктамыр ішіне адреналин (эпинефрин) және глюкокортикоидтарды енгізу қажет.
Цефтриаксонды соңғы енгізуден кейін 48 сағат ішінде құрамында кальций бар ерітінділерді тағайындамаған жөн.
Бактерияларға қарсы препараттармен емдеу, әсіресе егде жастағы, сондай-ақ әлсіз емделушілерде антибиотикпен астасқан диареяның, колиттердің, соның ішінде жалған жарғақшалы колиттің пайда болуына әкеп соғуы мүмкін. Сондықтан цефтриаксонмен емдеу кезінде немесе емнен соң диарея пайда болғанда осы диагноздың, соның ішінде жалған жарғақшалы колиттің бар-жоқтығын анықтау қажет. Цефтриаксонды қолдануды іш өту ауыр және/немесе қан аралас болған жағдайда тоқтату және тиісті ем жүргізу қажет. Қажетті ем жоқ болған жағдайда уытты мегаколон, перитонит, шок пайда болуы мүмкін.
Цефалоспориндерді, цефтриаксонды қоса есептегенде, қабылдаған емделушілерде антибиотикпен индукцияланған иммундық гемолитикалық анемияның (соның ішінде өліммен аяқталған) пайда болғаны жөнінде хабарланған.
Цефтриаксонмен емдеу кезінде анемия пайда болғанда анемияның этиологиясы анықталғанша антибиотикті тоқтата тұру қажет.
Препаратпен ұзақ уақыт емдеу кезінде қан көріністерін, бауыр мен бүйректің функциональді жағдайларының көрсеткіштерін жүйелі бақылап отыру керек.
Бактерияларға қарсы препараттарды қолдану сезімтал емес микроорганизмдердің, атап айтқанда зеңдердің, шамадан тыс өсуіне және асқынжұқпаның пайда болуына әкеп соғуы мүмкін, бұл тиісті шараларды қолдануды қажет етеді.
Бүйрек жеткіліксіздігі бар емделушілер үшін әдетте дозаны түзетудің қажеті жоқ − цефтриаксонның екі жолмен шығарылуы (бүйрек және бауыр арқылы) есебінен. Креатинин клиренсі минутына 10 мл-ден аз болғанда антибиотиктің тәуліктік дозасы 2 г-ден аспауы тиіс.
Гемодиализдегі науқастарға диализден кейін препаратты қосымша енгізудің қажеті жоқ. Алайда дозаны түзету үшін қан сарысуында цефтриаксонның концентрациясын бақылаған жөн, өйткені мұндай науқастарда оның шығарылу жылдамдығы төмендеуі мүмкін.
Бауыр және бүйрек жеткіліксіздіктерінен осы ағзалар функциясының ауыр бұзылуы бір мезгілде болғанда препарат дозасын, қан плазмасында цефтриаксонның концентрациясына жүйелі бақылау жасалынбай, 2 г-ден асырылмауы керек.
Жекелеген жағдайларда цефтриаксонды белгіленген мөлшерден асатын дозаларда қолданғаннан кейін, өт қалтасының эхограммасында қараю байқалуы мүмкін (цефтриаксонның кальций тұздарының преципитаттары, олар емдеуді тоқтатқаннан/аяқтағаннан кейін жоғалады). Егер бұл құбылыстар клиникалық симптоматикамен қатарласа жүрсе, препаратты тоқтату жөнінде шешім қабылданады.
Цефтриаксонды өт жолдарында іркілу қаупінің факторлары бар науқастарға қолданғанда, өт жолдарының обструкциясының салдарынан, панкреатиттің жекелеген жағдайларының болғаны мәлімделген (мұндайда цефтриаксонның әсерінен түзілген преципитаттардың рөлін жоққа шығаруға болмайды).
Синтезделу бұзылған немесе К витамині жеткіліксіз емделушілерде (мысалы, бауырдың созылмалы ауруларында, егде жастағы адамдарда, жарытпай тамақтанғанда) протромбинді уақытты бақылаған жөн және цефтриаксонмен емдеуді бастағанға дейін немесе емдеу кезінде К витаминін (аптасына 10 мг) тағайындау керек.
Қан кетулерде және ас қорыту жолдарының аурулары сыртартқыда болғанда, әсіресе өзіне тән емес ойық жаралы спецификалық емес колитте немесе энтеритте сақтықпен тағайындаған жөн.
Цефтриаксон, басқа да кейбір цефалоспориндер сияқты, билирубинді сарысулық альбуминмен байланысынан ығыстырып шығаруы мүмкін, сондықтан препаратты гипербилирубинемиясы бар жаңа туған нәрестелерге абайлап қолдану керек. Цефтриаксонды билирубинді энцефалопатияның пайда болу қаупі бар жаңа туған нәрестелерге, әсіресе шала туған нәрестелерге қолдануға болмайды.
Артериялық гипертензияда және су-электролиттік теңгерім бұзылғанда қан плазмасындағы натрий деңгейін бақылаған жөн.
Цефтриаксонмен ем қабылдап жүрген емделушілерде Кумбс реакциясының жалғаноң нәтижелерінің жекелеген жағдайлары тіркелді. Несептегі глюкозаны ферментативтік емес әдістермен анықтағанда, басқа да антибиотиктердегі сияқты, цефтриаксон галактоземияға сынамада жалғаноң нәтижелер беруі мүмкін. Сондықтан цефтриаксонмен емдеу кезінде глюкозурияны тек ферменттік әдіспен ғана анықтаған жөн.
Препаратты «Қолдану тәсілі және дозалары» бөлімінде көрсетілген дозалауға сәйкес қолданады.
Жүктілік және лактация.
Цефтриаксон плацентарлық бөгет арқылы өтеді. Цефтриаксонды әйелдерге жүктілік кезінде қолданудың қауіпсіздігі зерттелген жоқ, сондықтан оны жүктілік кезеңінде қолдануға болмайды.
Цефтриаксон аздаған концентрацияларда емшек сүтіне бөлініп шығады. Сондықтан препаратты тағайындағанда емшек емізуді тоқтатқан жөн.
Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері
Емделушінің препаратқа жекелей реакциясы анықтап болмайынша, емделу кезінде жүйке жүйесі тарапынан көру функциясының нашарлауы, бас айналу, құрысу ұстамалары сияқты бұзылулар байқалуы мүмкін екендігін ескеріп, автокөлікті немесе басқа да механизмдерді басқаруды тоқтата тұрған жөн.
Артық дозалануы
Жағымсыз әсерлері күшеюі мүмкін.
Симптомдары: қызба, лейкопения, тромбоцитопения, жедел гемолитикалық анемия, тері, асқазан-ішектік реакциялар және бауыр реакциялары, ентігу, бүйрек функциясының жеткіліксіздігі, стоматит, анорексия, естудің уақытша жоғалуы, кеңістікте бағыттан адасу болуы мүмкін.
Емі: симптоматикалық және демеуші ем жүргізіледі. Гемодиализ және перитонеальді диализ тиімді емес. Өзіне тән у қайтарғысы жоқ.
Шығарылу түрі және қаптамасы
Резеңке тығынмен тұмшаланып тығындалған және алюминий қалпақшамен қаусырылған, сыйымдылығы 10 мл немесе 20 мл құтыда 1000 мг-ден.
1 құтыдан медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.
Құтыларды қаптауға арналған кассетаға 5 құтыдан салынған.
Бір кассета медициналық қолдану жөнінде мемлекеттік және орыс тілдеріндегі нұсқаулықпен бірге картон пеналға салынған.
Сақтау шарттары
Түпнұсқалық қаптамасында, 25°С-ден аспайтын температурада сақтау керек.
Балалардың қолы жетпейтін жерде сақтау керек.
Сақтау мерзімі
3 жыл
Жарамдылық мерзімі өткеннен кейін пайдалануға болмайды.
Дәріханадан босатылу шарттары
Рецепт арқылы
Өндіруші
"Борщагов ХФЗ" ҒӨО ЖАҚ.
Украина, 03134, Киев қ-сы, Мир к-сі, 17.
Тіркеу куәлігі иесінің атауы мен елі
"Борщагов ХФЗ" ҒӨО ЖАҚ, Украина
Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы
Қазақстан Республикасындағы «Борщагов ХФЗ» ҒӨО ЖАҚ өкілдігі
050063, Алматы қ., Әуезов ауданы, «Жетісу-3» ықш-ауд., 25 үй, 27 кеңсе
Факс: +7(272) 313-23-34; E-mail: vadimt58@list.ru