Тропикамид (капли глазные, 1%) (Tropicamide)

• русский
• қазақша

• Скачать инструкцию медикамента

Саудалық атауы

Тропикамид

Халықаралық патенттелмеген атауы

Тропикамид

Дәрілік түрі

0,5% және 1% көз тамшы дәрісі

Құрамы

1 мл препараттың құрамында

белсенді зат - 5,0 мг және 10,0 мг тропикамид,

қосымша заттар: натрий хлориді, бензалконий хлориді, динатрий эдетатының дигидраты, 10% хлорлы сутек қышқылы, тазартылған су.

Сипаттамасы

Мөлдір түссіз ерітінді

Фармакотерапиялық тобы

Көз ауруларын емдеуге арналған препараттар. Мидриатиктер. Холиноблокаторлар.

АТХ коды S01FA06

Фармакологиялық қасиеттері

Фармакокинетикасы

Қарашықтың кеңеюі және салдануы препаратты конъюнктивальді қалтаға енгізген сәттен 5 минут өткенде басталады.

Қарашықтың ең үлкен кеңеюі препаратты енгізген сәттен бастап 15-20 минут ішінде басталады және Тропикамидтің 5 мг/мл ерітіндісін пайдаланған жағдайда 1 сағат ішінде және Тропикамидтің 10 мг/мл ерітіндісін қолданған жағдайда 2 сағат сақталады. Қарашықтың кеңею симптомдарының толық тоқтауы 3-5 сағаттан соң басталады.

10 мг/мл тропикамидті екі рет енгізгеннен кейін аккомодацияның ең жоғары салдануы оны конъюнктивальді қалтаға енгізген сәттен 25 минуттан соң басталады және 30 минутқа жуық созылады. Салданудың толық жоғалуы шамамен 3 сағат өткен соң басталады. Препаратты конъюнктивальді қалтаға енгізген кезде ол сіңе бастайды, және аздаған дәрежеде, әсіресе балалар мен егде жастағы адамдарда, жүйелік сіңуге ұшырайды.

Фармакодинамикасы

Тропикамид – м-холинбөгегіш дәрі, қысқа мерзімді мидриаз және аккомодация салдануын туындата отырып, нұрлы қабық пен цилиарлы дененің сфинктер рецепторларын бөгейді. Көзішілік қысымды аздап жоғарылатады.

Қолданылуы

0,5 % Тропикамид

- офтальмоскопия жүргізу және рефракцияны анықтау кезіндегі диагностикалық мақсаттар үшін (оның ішінде қарашықты кеңейтетін басқа да препараттарға жоғары сезімталдықта)

- көздің қабыну ауруларын кешенді емдеуде синехиялар дамуының алдын алу үшін

1 % Тропикамид

- рефракцияны зерттеу үшін аккомодация салдануы қажеттілігінде

Қолдану тәсілі және дозалары

Препаратты төменгі конъюнктивальді қалтаға тамызады. Тамызғаннан кейін Тропикамидтің жүйелі қан ағымына көз жасы өзектері арқылы сіңуін азайту үшін көздің ішкі бұрышын саусақпен жеңіл басу керек.

Дозалау сызбасы зерттеу түріне байланысты.

Диагностикалық қарашықтың кеңеюі үшін: 1-3 тамшыдан 10 минут ішінде. 3 реттік тамызу кезінде 10 минуттан кейін офтальмоскопия жүргізуге болады.

Рефракцияны анықтау үшін: 1 тамшыдан 6 рет 6-12 минут аралықпен.

Емдік мақсатта қолданған кезде: тәулігіне 6 ретке дейін тамызу керек.

Рефракцияны зерттеу үшін аккомодация салдануы мақсатында ерітіндіні 1-2 тамшыдан, тамызуды 5 минуттан кейін қайталайды. Егер емделуші 20-25 минут ішінде тексерілмесе, мидриатикалық әсерін ұзарту үшін қосымша тағы 1 тамшы тамызуға болады.

Жағымсыз әсерлері

Жергілікті, көру мүшесі тарапынан:

- көзішілік қысымның жоғарылауы

- өтпелі ашыту

- фотофобия

Препаратты ұзақ қолданғанда пайда болуы мүмкін: жергілікті тітіркену, гипертермия, ісіну және конъюнктивит.

Белсенді заттың жүйелі қан ағымына сіңуі салдарынан жүйелік сипаттағы жағымсыз әсерлердің дамуы мүмкін:

- ауыздың құрғауы

- гипертермия

- терінің құрғауы

- тахикардия

- кенеттен кіші дәретке қысылу

- іш қатуға әкелетін асқазан-ішек жолы перистальтикасы жылдамдығының азаюы

- құсу

- бас айналу

- орнықсыз жүру (атаксия)

Кейде, балалар мен жасөспірімдерде жиі болуы мүмкін:

• бөртпе

• орталық жүйке жүйесі тарапынан бұзылыстар: психотикалық симптомдар, мінез-құлықтың бұзылу симптомдары

• жүрек-қан тамырлар жүйесі тарапынан бұзылыстар: тыныстың кенеттен тарылуы мен қан айналудың жеткіліксіздігі симптомдары

• емшек еметін балалардағы іштің кебуі

Егер нұсқаулықта көрсетілген кез келген жағымсыз әсерлер ушығып бара жатса, немесе Сіз нұсқаулықта көрсетілмеген кез келген басқа да жағымсыз әсерлерді байқасаңыз, бұл туралы дәрігерге хабарлауыңыз керек.

Қолдануға болмайтын жағдайлар

- Тропикамидке немесе препараттың басқа компонентіне жоғары сезімталдық

- жабық бұрышқа әкелу үдерісі бар бастапқы глаукома, көздің алдыңғы камерасы тар бұрышты глаукомасы

- 8 жасқа дейінгі балалар

- жүктіліктің бірінші триместрі

- құрамында бензалконий хлориді болуына байланысты жұмсақ жанаспалы линзаларды пайдаланған кезде

- қуық асты безі гипертрофиясы, ішектің бітелуі немесе қақпа стенозы бар емделушілер.

Дәрілермен өзара әрекеттесуі

Антимускаринді препараттар, үшциклді антидепрессанттар, хинидин, фенотиазиндер, антигистаминді дәрілер және парасимпатикалық әсерлерін ішінара төмендетуді туғызатын басқа да дәрілік препараттармен бір мезгілде қолданғанда тропикамидтің тиімділігі күшейеді.

Антимускаринді препараттар қабылдау салдарынан асқазан қызметінің төмендеуі басқа дәрілік заттар сіңуінің нашарлауына алып келуі мүмкін.

Тропикамид ауыз қуысының құрғауынан тіл астына салатын нитраты бар таблеткалардың әсерін төмендетеді.

Айрықша нұсқаулар

Қолданылуы жөніндегі арнайы сақтану шаралары

Тек сыртқа қолдану үшін – жергілікті конъюнктивальді қалтаға.

Тамшылатқыштың ұштығына тигізбеген жөн, бұл ыдыс ішіндегісінің ластануын туындатуы мүмкін.

Тропикамидті диагностикалық мақсатта қолданар алдында, емделушіге немесе оған ілесіп келген адамға көрудің уақытша бұзылуы немесе жарықтан жасқанудың болатыны туралы ескерткен жөн.

Қарашықты кеңейту үшін Тропикамидті қолдану кезінде көз түбін зерттеу алдында емделушіге көз камерасы тар бұрышты глаукомаға қатысты диагностика жасау қажет (сыртартқы, алдыңғы камераның тереңдігін бағалау, гониоскопия), өйткені препаратты бір реттік қолданудан кейін глаукоманың жедел ұстамасы болуы мүмкін. Егер көз түбін зерттеу қажет болса, ал глаукоманы анықтау үшін тексеру жүргізу мүмкін болмаса, зерттеу жүргізгеннен соң бірден қарашықты тарылтатын препаратты енгізу қажет.

Жүйелік сіңу мен жағымсыз әсерлерді шектеу үшін қайталап қолданбаған дұрыс.

Тахикардиямен қатар жүретін аурулары бар (тиреотоксикоз, жүрек жеткіліксіздігі және т.б.) емделушілерге, сондай-ақ жүрек ишемиясы мен гипертониясы бар емделушілерге сақтықпен қолдану қажет.

Жағымсыз әсерлерінің даму қаупі жоғары болуына байланысты препаратты балаларға және егде жастағы адамдарға (65 жастан асқан) қолданғанда сақ болған жөн.

Жүктілік және лактация

Адамның фертильдігіне, тератогенді потенциалына теріс әсер етуі немесе эмбрион үшін басқа да жағымсыз әсерлері туралы клиникалық деректер жоқ. Тропикамидті жүктіліктің екінші және үшінші триместрлерінде ана үшін болжамды пайдасы ұрыққа ықтимал зиянынан артық болатын жағдайларда ғана қолдануға болады.

Тропикамид болмашы мөлшерде ана сүтіне өтеді, сондықтан дәрілік затты қолданған күні емшек емізу тоқтата тұрылуы тиіс.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Тропикамидті қолданудан кейін, аккомодация мен қарашық диаметрінің өзгеруі салдарынан көздің өткірлігі төмендеуі мүмкін, сондықтан препаратты пайдаланғаннан кейінгі 6 сағат ішінде көлік құралдарын басқаруға және механизмдермен жұмыс істеуге болмайды.

Артық дозалануы

Жергілікті қолданғанда артық дозалану мүмкіндігі аз.

Симптомдары: жоғары сезімталдық, жергілікті тітіркену, конънюктивит, елестеулер, бас ауыру, айқын ұйқышылдық, жүрек айну, тыныс алудың жиілеуі.

Емі: симптоматикалық және демеуші. Көзді жылы сумен мұқият шаю. Айқын жүйке қозуын бақылау үшін диазепам ұсынылады. Гипоксия және ацидоз түзетілуі тиіс.

Препарат кездейсоқ ішке түскен жағдайда құстыртып, асқазанды шаю және белсенділендірілген көмірді, физостигминді у қайтарғысы ретінде қолдану қажет.

Шығарылу түрі және қаптамасы

0,5 % және 1,0% көз тамшы дәрісі.

10 г ± 10 % (10 мл) немесе 5 г ± 10 % (5 мл) препараттан тығын-тамшылатқышы және тұмшалануын қамтамасыз ететін сақтандырғыш сақиналы қақпақшасы бар, сыйымдылығы 10 мл немесе 5 мл полиэтиленнен жасалған мөлдір емес ақ құтыда.

Құтыға заттаңба жапсырылады. Әр құты медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

Жарықтан қорғалған жерде, 150С-ден 250С-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Ашылған құтыны 4 апта ішінде пайдалану керек.

Препаратты қаптамасында көрсетілген жарамдылық мерзімі өткеннен кейін пайдалануға болмайды.

Дәріханадан босатылу шарттары

Рецепт арқылы

Өндіруші

Ромфарм Компани С.Р.Л., Румыния

Отопень, Ероилор к-сі 1А,

тел. +40 21 208 9743, +40 21 208 97 42, факс: +40 21 266 49 38

Тіркеу куәлігінің иесі

Ромфарм Компани С.Р.Л., Румыния

Отопень, Ероилор к-сі 1А,

тел. +40 21 208 9743, +40 21 208 97 42, факс: +40 21 266 49 38

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы

ҚР-дағы «Ромфарм Компани» өкілдігі, Алматы қ., Жандосов к-сі, 8А, 806 кеңсе, телефон/факс 8/7272/445126