Преднизолон (5 мг, Биосинтез ОАО)

• русский
• қазақша

• Скачать инструкцию медикамента

Саудалық атауы

Преднизолон

Халықаралық патенттелмеген атауы

Преднизолон

Дәрілік түрі

5 мг таблеткалар

Құрамы

Бір таблетканың құрамында

Сипаттамасы

Ақ түсті, ойығы және сызығы бар жалпақ цилиндр пішінді таблеткалар.

Фармакотерапиялық тобы

Жүйелік пайдалануға арналған кортикостероидтар. Глюкокортикостероидтар. Преднизолон.

АТХ коды Н02АВ06

Фармакологиялық қасиеттері

Фармакокинетикасы

Ішке қабылдаған кезде преднизолон асқазан-ішек жолынан жақсы сіңеді. Қанда ең жоғары концентрацияға пероральді қабылдаудан кейін 1–1,5 сағаттан соң жетеді. Препараттың 90% жуығы қан плазмасының ақуыздарымен: транскортинмен (кортизолды байланыстыратын глобулинмен) және альбуминдермен байланысады. Преднизолон негізінен глюкурон және күкірт қышқылдарымен конъюгациялану арқылы бауырда, ішінара бүйректе және басқа да тіндерде метаболизденеді. Метаболиттері белсенді емес. Өт және шумақтық сүзілу арқылы несеппен бөлінеді де, оның 80-90% бүйрек өзекшелері арқылы қайта сіңеді. Дозасының 20% бүйрек арқылы өзгермеген күйде шығарылады. Пероральді қабылдаудан кейін қан плазмасынан жартылай шығарылу кезеңі 2-4 сағатты құрайды.

Фармакодинамикасы

Преднизолон - синтетикалық глюкокортикостероидты препарат, гидрокортизонның сусыздандырылған аналогы. Қабынуға қарсы, аллергияға қарсы және иммунодепрессиялық әсері бар, бета-адренорецепторлардың эндогенді катехоламиндерге деген сезімталдығын арттырады.

Спецификалық цитоплазмалық рецепторлармен (глюкокортикостероидтарға (ГКС) арналған рецепторлар барлық тіндерде, әсіресе бауырда көп кездеседі) өзара әрекеттесіп, ақуыздардың (соның ішінде өмірлік маңызы бар жасушаішілік үдерістерді реттейтін ферменттердің) түзілуін индукциялайтын кешен түзеді.

Қабынуға қарсы әсері эозинофилдердің және жуан жасушалардың қабыну медиаторларының босап шығуын бәсеңдетуімен; гиалурон қышқылын өндіретін липокортиндердің түзілуін индукциялау және жуан жасушалардың санын азайтумен; қылтамырлардың өткізгіштігін азайтумен; жасуша жарғақшаларын (әсіресе лизосомальды) және органелл жасушаларын тұрақтандырумен байланысты; Қабыну үдерісінің барлық кезеңіне әсер етеді: арахидон қышқылы деңгейінде простагландиндердің (Pg) синтезін тежейді (липокортин фосфолипаза А2-ні бәсеңдетеді, арахидон қышқылының либерациясын басады, қабыну үдерісіне, аллергияға т.б. ықпал ететін эндоасқынтотықтардың, лейкотриендердің биосинтезін тежейді), "қабыну цитокиндерінің" (интерлейкин 1, альфа ісіктері некрозы факторы т.б.) синтезін тежейді; жасуша жарғақшаларының әртүрлі зақымдаушы факторлардың әсеріне төзімділігін жақсартады.

Ақуыз алмасуы: плазмадағы глобулиндердің санын азайтып, бауыр мен бүйректе альбуминдер синтезін (альбумин/глобулин коэффициентін жоғарылатумен) жоғарылатады, бұлшықет тіндерінде ақуыздардың синтезін төмендетіп, ондағы катаболизмді күшейтеді.

Липидтік алмасу: жоғары май қышқылдарының және триглицеридтердің синтезін жоғарылатады, майдың таралуын реттейді (майдың жиналуы негізінен иық белдеуі тұсында, бет, іш аумағында болады), гиперхолестеринемияның пайда болуына алып келеді.

Көмірсу алмасуы: асқазан-ішек жолдарынан көмірсудың сіңуін күшейтеді; глюкозо-6-фосфатазаның белсенділігін арттырады (глюкозаның бауырдан қанға түсуін жоғарылатады); фосфоэнолпируваткарбоксилазаның белсенділігін және аминотрансферазаның синтезін (глюконеогенездің белсенділенуін) жоғарылатады; гипергликемияның дамуына мүмкіндік береді.

Су-электролиттік алмасу: натрий ионы (Na+) мен суды организмде ұстайды, калий иондарының (К+) шығуын стимуляциялайды (минералокортикостероидты белсенділік), асқазан-ішек жолынан кальций иондарының (Са2+) сіңуін азайтып, кальцийдің сүйектерден «шайылып» және бүйректер арқылы шығарылуын арттырады да, сүйек тіндерінің минералдануын азайтады.

Иммунодепрессиялық әсері туындаған лимфоидты тіндердің инволюциясымен, лимфоциттердің (әсіресе Т-лимфоциттердің) пролиферациясының бәсеңдеуімен, В-жасушаларының көшіп жүруінің және Т- және В-лимфоциттердің өзара әрекеттесуінің тежелуімен, лимфоциттер мен макрофагтардан цитокиндердің (интерлейкин-1, 2; гамма-интерферон) босап шығуының тежелуімен және антиденелердің пайда болуының төмендеуімен жүзеге асады.

Аллергияға қарсы әсері аллергиялық медиаторлардың синтезі мен секрециясының төмендеуі, сенсибилизацияланған жуан жасушалар мен базофилдерден гистаминнің және басқа да биологиялық белсенді заттардың босап шығуының тежелуі, айналымдағы базофилдер санының азаюы, лимфоидты және дәнекер тіндердің өсуінің бәсеңдеуі, Т- және В-лимфоциттер санының, жуан жасушалардың азаюы, эффекторлық жасушалардың аллергиялық медиаторларға сезімталдығының төмендеуі, антиденелердің түзілуінің басылуы және организмнің иммундық жауабының өзгеруі нәтижесінде дамиды.

Тыныс алу жолдарының обструкциялық ауруларында дәрінің әсері негізінен қабыну үдерісін тежеуге, шырышты қабықтардың ісінуін болдырмауға немесе айқындылығын азайтуға, бронх эпителиінің шырышты қабатының астындағы қабатта эозинофильдік инфильтрацияны төмендетуге, және бронхтың шырышты қабатына айналымда жүретін иммундық кешеннің жинақталуына, сондай-ақ шырышты қабықтың ойық жаралануы мен десквамациясын тежеуге байланысты. Кіші және орташа калибрлі бронхтардағы бета-адренорецепторлардың эндогенді катехоламиндерге және экзогенді симпатомиметиктерге деген сезімталдығын арттырады, шырыш өнімін азайту есебінен оның тұтқырлығын төмендетеді.

АКТГ синтезі мен секрециясын және соның салдарынан эндогендік ГКС синтезін бәсеңдетеді.

Қолданылуы

• дәнекер тінінің жүйелік ауруларында (жүйелік қызыл жегі, склеродермия, түйінді периартериит, дерматомиозит, ревматоидты артрит)

• буындардың жедел және созылмалы қабыну ауруларында – подагралық және псориаздық артрит, остеоартрит (соның ішінде жарақаттан кейінгі), полиартрит, иық-жауырын периартриті, шорбуынданған спондилоартрит (Бехтерев ауруы), ювенильді артрит, ересектерде Стилл синдромы, бурсит, спецификалық емес тендосиновит, синовит және эпикондилит

• ревматикалық қызбада, жедел ревмокардитте

• бронх демікпесінде, демікпелік статуста

• жедел және созылмалы аллергиялық ауруларда – соның ішінде дәрілік заттарға және тағамдық өнімдерге аллергиялық реакциялар, сарысу құю ауруы, есекжем, аллергиялық ринит, Квинке ісінуі, дәрілік экзантема, поллиноз және т.б.

• тері ауруларында – сулы бөртпе, псориаз, экзема, атопиялық дерматит (таралған нейродермит), жанаспалы дерматит (терінің үлкен беті зақымданған), токсидермия, себореялы дерматит, эксфолиативті дерматит, уытты эпидермальді некролиз (Лайелл синдромы), буллезді ұшық түріндегі дерматит, Стивенс-Джонсон синдромы

• алдын ала парентеральді қолданудан кейінгі мидың ісінуінде (соның ішінде мидың ісінуі аясында немесе хирургиялық араласыммен, сәулемен емдеумен немесе бастың жарақаттануымен байланысты)

• көздің аллергиялық ауруларында – конъюнктивиттің аллергиялық түрлері

• көздің қабыну ауруларында – симпатикалық офтальмия, ауыр солғын ағымды алдыңғы және артқы увеиттер, көру жүйкесінің невриті

• бүйрекүсті безі функциясының алғашқы немесе салдарлық жеткіліксіздігінде (соның ішінде бүйрекүсті бездерін алып тастағаннан кейін)

• бүйрекүсті бездерінің туа біткен гиперплазиясында

• генезі аутоиммундық бүйрек ауруларында (соның ішінде жедел гломерулонефрит); нефротикалық синдромда (соның ішінде липоидты нефроз аясында)

• жедел тиреоидитте

• қан және қан түзу жүйесінің ауруларында – агранулоцитоз, панмиелопатия, аутоиммундық гемолитикалық анемия, лимфо- және миелоидты лейкоздар, лимфогранулематоз, тромбоцитопениялық пурпура, ересектерде салдарлық тромбоцитопения, эритробластопения (эритроцитарлы анемия), туа біткен (эритроидты) гипопластикалық анемия

• өкпенің интерстициальді ауруларында – жедел альвеолит, өкпе фиброзы, ІІ-ІІІ сатыдағы саркоидоз

• туберкулез менингитінде, өкпе туберкулезінде, аспирациялық пневмонияда (спецификалық химиялық емдеумен біріккен)

• бериллиозда, Леффлер синдромында (басқа емге көнбейтін); өкпе обырында (цитостатиктермен біріктіріп)

• шашыранды склерозда

• асқазан-ішек ауруларында – ойық жаралы колит, Крон ауруы, жергілікті энтерит

• гепатитте

• ағзаларды ауыстырып салғанда трансплантаттың ажырау реакциясының алдын алуда

• онкологиялық аурулар аясындағы гиперкальциемияда

• миелома ауруында

Қолдану тәсілі және дозалары

Препарат дозасын және емде ұзақтығын дәрігер аурудың көрсетілімдері мен ауырлығына байланысты әр адамға жекелей белгілейді.

Препараттың барлық тәуліктік дозасын бір реттік қабылдау немесе екі еселенген тәуліктік дозаны күнара таңертеңгі сағат 6-дан 8-ге дейінгі аралықта глюкокортикостероидтардың эндогендік секрециясының циркадтық ырғағын ескере отырып, қабылдау ұсынылады. Жоғары тәуліктік дозаны 2-4 қабылдауға бөлуге болады, мұндайда таңертеңгісін үлкен дозада қабылдау керек. Таблеткаларды тамақтану кезінде немесе тамақтанудан кейін ішке бірден сұйықтықтың аздаған мөлшерімен ішіп қабылдаған жөн.

Жедел жағдайларда және орнын басу емі ретінде ересектерге тәулігіне бастапқы 20-30 мг дозада тағайындайды, демеуші доза тәулігіне 5-10 мг құрайды. Қажет болғанда бастапқы доза тәулігіне 15-100 мг, демеуші доза тәулігіне 5-15 мг құрауы мүмкін.

3 жастан бастап және одан үлкен балалар үшін бастапқы доза тәулігіне дене салмағының әр кг шаққанда 4-6 қабылданатын 1-2 мг, демеуші доза дене салмағының әр кг шаққанда тәулігіне 0,3-0,6 мг құрайды.

Емдік әсері болған жағдайда, алдымен кештеу қабылданатындарды тоқтата отырып, дозаны біртіндеп 5 мг-ден, содан кейін 3-5 күн аралықпен 2,5 мг-ден төмендетеді. Препаратты ұзақ уақыт қабылдағанда тәуліктік дозаны біртіндеп төмендеткен жөн. Ұзақ уақыт емдеуді күрт тоқтатуға болмайды! Демеуші дозаны тоқтату глюкокортикостероидтық ем неғұрлым ұзақ қолданылса, соғұрлым баяуырақ жүргізіледі.

Күйзеліс әсерлерінде (жұқпа, аллергиялық реакция, жарақат, операция, жүйке күйзелісі) негізгі аурудың өршуіне жол бермеу үшін Преднизолонның дозасы уақытша арттырылуы тиіс (1,5-3 есе, ал ауыр жағдайларда – 5-10 есе).

Жағымсыз әсерлері

Өте жиі (>1/10), жиі (>1/100, <1/10), жиі емес (>1/1000, <1/100), сирек (>1/10000, <1/1000), өте сирек (<1/10000), белгісіз (қолда бар деректер негізінде бағалана алмайды).

Жалпы, гипоталамо-гипофизарлық-бүйрекүсті безі жүйесінің басылуын қосқанда болжанатын жағымсыз әсерлердің даму жиілігі дозаға, қабылдау уақытына және емдеу ұзақтығына байланысты. Егер аз уақыт ішінде, мүмкіндігінше, ең төменгі тиімді дозаны пайдалану керек болса, жағымсыз әсерлері барынша азаюы мүмкін.

Өте жиі

• жұқпаға жоғары сезімталдық, бұрыннан бар жұқпаның өршуі, жасырын жұқпаның белсенділенуі және жұқпа симптомдарының бүркемеленуі (преднизолонның иммуносупрессивтік және қабынуға қарсы әсерінің салдарынан)

• эозинофилдер мен лимфоциттер санының төмендеуі

• бұрыннан бар аурудың бүркемеленуі немесе өршуі

• преднизолонды тұрақты пероральді түрде қолданғанда бүйрекүсті безі функциясының жеткіліксіздігі (гипоталамустың тежелуінен басталып, бүйрекүсті безі қыртысының нағыз атрофиясымен аяқталатын), бүйрекүсті безі функциясының жеткіліксіздігі салдарынан тоқтату синдромы (бас ауыру, жүректің айнуы, бас айналу, анорексия, әлсіздік, эмоциялық тұрақсыздық, апатия және стрестік жағдайларға талапқа сай емес реакция), инсулинге төмен сезімталдықпен «стероидты қант диабеті», қант диабетінен зардап шегіп жүрген емделушілерде қандағы қант деңгейінің жоғарылауы (100%). Өсу гормоны секрециясының бұзылуы және оған сезімталдықтың төмендеуі нәтижесінде балаларда өсудің кідіруі

• көзішілік қысымның жоғарылауы (пероральді препаратпен ем қабылдаған 40%-ға дейінгі емделушілерде), катаракта (препаратпен ұзақ уақыт бойы пероральді емдегенде 30% емделушілерде)

• өкпе абсцессі (12%)

• ауыз қуысының кандидозы, әсіресе обырмен ауыратындарда (33%)

• шырышты қабықтың зеңдік жұқпалары (30%)

• арқаның ауыруы, шектеулі қозғалғыштық, жедел ауыру, омыртқаның компрессиялық сынулары және өсудің төмендеуі, ұзын сүйектердің сынулары (пероральді препаратпен ұзақ уақыт емдегенде 25%), жоғары дозалармен емдегендегі миопатия (10%) сияқты симптомдары бар остеопороз

Жиі

• лейкоциттер мен тромбоциттер мөлшерінің жоғарылауы

• физиологиялық тұрғыдан жоғары пероральді дозаларды (әдетте тәулігіне 50 мг-ден жоғары) тұрақты қабылдағанда майдың жиналу сипатының (ай тәріздес бет, дененің семіруі, «өгіз өркеш») өзгеруін қоса, Кушинг синдромы, калийдің орнына натрийді ұстап қалу салдарынан болатын гипокалиемия, бала көтеретін жастағы әйелдердегі аменорея, ішке қабылданатын жоғары дозалармен емдеген кездегі холестерин, триглицеридтер мен липопротеиндер деңгейінің жоғарылуы, тәбеттің және салмақтың артуы

• кортикостероидтармен индукцияланған эйфория, депрессия, психоз

• гипертензия (натрийді ұстап қалу салдарынан, бұл сұйықтықты ұстап қалуға әкеледі), жүрек функциясының іркілген жеткіліксіздігінің өршуі (натрийді ұстап қалу нәтижесінде)

• туберкулездің дамуының жоғары қаупі

• асқазан-ішек тесілулерінің, колит, илеит, дивертикулиттің даму қаупінің артуы және симптомдарының күшеюі

• созылулар, безеу тәрізді бөртпе, көгерулердің пайда болуы, дерматит, экхимоз, бет эритемасы, атрофия, гирсутизм, жараның баяу жазылуы, терлеудің күшеюі, телеангиэктазия мен терінің жұқаруы, бұрыннан бар аурулардың бүркемеленуі немесе нашарлауы

• түнгі несеп шығару жиілігінің артуы

Жиі емес

• аллергиялық реакциялар

• пероральді аз дозалармен емдегендегі қант диабеті (<1%), пероральді төмен дозалармен емдегендегі холестерин, триглицеридтер мен липопротеиндер деңгейінің жоғарылауы

• ұйқысыздық, көңіл-күйдің құбылуы, жеке бастың өзгеруі, мания және елестеулер

• тыныс алу бұлшықетінің миопатиясы

• ацетилсалицил қышқылын немесе қабынуға қарсы стероидты емес дәрілерді (ҚҚСД) бір уақытта қабылдағанда асқазан немесе он екі елі ішектің ойық жарасы, асқазан-ішектен қан кетулер (0,5%), асқазан-ішек тесілулері

• сүйек тінінің асептикалық некрозы

• кальций мен фосфаттың жоғары экскрециясы салдарынан болатын несеп тастары

Сирек

• қан ұюдың жоғарылауы салдарынан тромбоз қаупі

• қалқанша без функциясының өзгеруі

• церебральді малярия кезінде команың ұзақтығы артуы мүмкін, когнитивтік бұзылулар (мысалы, жадының нашар болуы), деменция, эпидуральді липоматоз

• бір мезгілдегі көздің герпестік жұқпасы кезінде көздің мөлдір қабығы бұзылуының жоғары қаупі (бұл жұқпаны бүркемелеу салдарынан), глаукома (препаратпен ұзақ уақыт бойы пероральді емдегенде)

Өте сирек

• кетоацидоз және гиперосмолярлық кома, жасырын гиперпаратиреоздың пайда болуы, порфирияларға бейімділік, ісік лизисінің синдромы, жыныс гормоны секрециясының бұзылуы (етеккір бұзылыстары, гирсутизм, импотенция)

• жасырын эпилепсияның білінуі, мидың жалған ісігі (бас ауыру, анық көрмеу және көрудің бұзылуы сияқты симптомдары бар қатерсіз бассүйекішілік гипертензия)

• экзофтальм (ұзақ емдегеннен кейін)

• жүрек функциясының төмендеу қаупі бар кардиомиопатия, гипокалиемия салдарынан болатын аритмия, тамыр коллапсы

• панкреатит (жоғары дозалармен ұзақ емдегеннен кейін)

• эпидермальді некролиз, Стивенс-Джонсон синдромы

• ахил сіңірі мен тізеүсті сіңірінің тендинопатиясы

Белгісіз

• атеросклероз бен тромбоздың жоғары даму қаупі, васкулит (сондай-ақ ұзақ емдегеннен кейін тоқтату синдромы сияқты болуы мүмкін)

• өңеш ойық жарасы мен кандидозы

• бұлшықет атрофиясы, сіңір аурулары, тендинит, сіңірлердің үзілуі

• жараның баяу жазылуы, тәбеттің бұзылуы

Ескерту:Ұзақ уақыт емдегеннен кейін дозаны шамадан тыс тез азайтқанда бұлшықет және буын ауыруы, қызба, ринит, конъюнктивит және салмақ жоғалту сияқты мәселелер туындауы мүмкін.

Қолдануға болмайтын жағдайлар

• Преднизолонға немесе препарат компоненттеріне жоғары сезімталдық

• лактаза тапшылығы, лактоза жақпаушылығы, сахароза/изомальтаза тапшылығы, фруктоза жақпаушылығы, глюкоза-галактоза мальабсорбциясы

• 3 жасқа дейінгі балаларға

• жүктіліктің III триместрі немесе лактация кезеңі

Мынандай аурулар мен жағдайларда сақтықпен тағайындалуы керек:

• асқазан мен он екі елі ішектің ойық жара аурында, эзофагитте, гастритте, жедел немесе латентті пептидтік ойық жарада, жақында ғана жасалған ішек анастомозында, тесілу немесе абсцесске айналу қаупі бар спецификалық емес ойық жаралы колитте, дивертикулитте

• паразитарлық және табиғаты вирустық, зеңдік немесе бактериялық (қазіргі кезде немесе жақын арада орын алған, бұған жақын арада аурулармен қарым-қатынаста болуын қоса) жұқпалы ауруларда - қарапайым ұшық, белдемелі герпес (виремиялық фаза), желшешек, қызылша; амебиаз, стронгилоидоз; жүйелік микоз; белсенді және латентті туберкулез. Ауыр жағдайдағы жұқпалы аурулар кезінде қолдануға тек спецификалық ем аясында ғана жол беріледі.

• вакцинациялау алдындағы немесе одан кейінгі кезең (вакцинациядан 8 апта бұрын және одан 2 апта кейін) БЦЖ екпесінен кейінгі лимфаденит. Иммунитет тапшылығы жағдайы (соның ішінде ЖИТС немесе АИВ жұқтырғандар)

• жүрек-қантамыр жүйесінің аурулары, соның ішінде жүрек функциясының декомпенсацияланған жеткіліксіздігі, артериялық гипертензия, гиперлипидемия

• қант диабеті (соның ішінде көмірсуларға деген төзімділіктің бұзылуы), тиреотоксикоз, гипотиреоз, Иценко-Кушинг ауруы, семіру (ІІІ-ІV сатысы)

• бүйрек және/немесе бауыр функциясының созылмалы ауыр жеткіліксіздігі, нефроуролитиаз

• гипоальбуминемия және оның дамуына бейім жағдай (бауыр циррозы, нефротикалық синдром)

• жүйелік остеопороз, миастения gravis, жедел психоз, полиомиелит (бульбарлы энцефалит түрінен басқасы), ашық және жабық бұрышты глаукома

• жүктілік

• балаларда өсу кезінде глюкокортикостероидтар тек абсолютті көрсетілімдері бойынша және емдеуші дәрігердің тиянақты бақылауымен қолданылуы тиіс.

Дәрілермен өзара әрекеттесуі

Преднизолонды мыналармен бір мезгілде тағайындағанда:

"бауырдың" микросомалъды ферменттерінің индукторларымен (фенобарбитал, рифампицин, фенитоин, теофиллин, эфедрин) оның концентрациясының төмендеуіне әкеледі;

диуретиктермен (әсіресе, "тиазидтік" және карбоангидраза тежегіштерімен) және В амфотерицинмен бірге тағайындағанда организмнен К+ иондарының шығарылуын арттыруы мүмкін;

құрамында натрий бар препараттармен – ісінулер және артериялық қысымның жоғарылауына әкеледі;

В амфотерицинмен – жүрек функциясы жеткіліксіздігінің орын алу қаупі арта түседі;

жүрек гликозидтерімен – оның жағымдылығы нашарлайды, және қарыншалық экстрасистолияның (гипокалиемияның салдарынан) даму қаупі арта түседі;

әсері тікелей емес антикоагулянттармен - олардың әсерін (сирек-күшейтеді) төмендетеді (дозасын түзетуді қажет етеді);

антикоагулянттармен және тромболитиктермен – асқазан-ішек жолдары ойық жарасынан қан кету қаупі жоғарылайды;

этанолмен және қабынуға қарсы стероидты емес препараттармен (ҚҚСП) - бірге қолданғанда асқазан-ішек жолдарында эрозивті-ойық жараның пайда болу қаупі күшейіп, қан кетулер пайда болуы мүмкін (артриттерді ҚҚСП-пен біріктіріп емдегенде емдік әсерлердің қосылуына байланысты глюкокортикостероидтардың дозасы төмендеуі мүмкін);

парацетамолмен – гепатоуыттылықтың (бауыр ферментерінің индукциясы және парацетамолдың уытты метаболитінің пайда болуы) даму қаупі арта түседі;

ацетилсалицил қышқылымен – оның шығарылуын жылдамдатып, қандағы концентрациясын төмендетеді (преднизолонды қабылдауды тоқтатқанда қандағы салицилаттардың деңгейі жоғарылайды және жағымсыз құбылыстардың пайда болу қаупі артады);

инсулинмен және пероральді гипогликемиялық препараттармен, гипотензивті дәрілермен - олардың тиімділігі азаяды;

D витаминімен – ішекте кальций иондарының (Са2+) сіңуіне ықпалы төмендейді;

соматотропты гормонмен – соңғысының тиімділігі төмендейді, ал празиквантелмен бірге – оның концентрациясын төмендетеді;

М-холиноблокаторлармен – (антигистаминдік препараттарды және үшциклді антидепрессантарды қосқанда) және нитраттармен бірге – көзішілік қысымның жоғарылауына мүмкіндік береді;

изониазид пен мекселитин олардың метаболизмін арттырады (әсіресе "баяу" ацетилаторлардың), бұл олардың плазмадағы концентрациясының төмендеуіне әкеп соғады.

Карбоангидразаның тежегіштері және "ілмектік" диуретиктер остеопороздың даму қаупін арттыруы мүмкін.

Индометацин, преднизолонды альбуминдермен байланысынан ығыстыра отырып, оның жағымсыз әсерлерінің даму қаупін арттырады.

Адренокортикотропты гормон (АКТГ) преднизолонның әсерін күшейтеді.

Эргокальциферол және паратгормон преднизолонның әсерінен туындайтын остеопатияның дамуына кедергі жасайды.

Циклоспорин мен кетоконазол преднизолонның метаболизмін баяулата отырып, бірқатар жағдайларда оның уыттылығын арттыруы мүмкін.

Андрогендер мен стероидты анаболиялық препараттарды преднизолонмен бір мезгілде тағайындау шеткергі ісінулердің және гирсутизмнің дамуына, безеулердің пайда болуына жағдай жасайды.

Эстрогендер мен құрамында эстрогендер бар пероральді контрацептивтер преднизолонның клиренсін төмендетеді, бұл оның әсерінің күшеюімен қатар жүруі мүмкін.

Митотан және бүйрекүсті безі қыртысы функциясының басқа да тежегіштері преднизолон дозасын жоғарылатуды қажет етуі мүмкін.

Вирустарға қарсы тірі вакциналармен бір мезгілде және басқа түрдегі иммунизациялау аясында қолданғанда – вирустардың белсенділігі артып, жұқпаның даму мүмкіндігі арта түседі.

Антипсихотикалық дәрілер (нейролептиктер) және азатиоприн преднизолонды қолданған кезде катарактаның даму қаупін арттырады.

Иммунодепрессанттар жұқпалардың және лимфоманың немесе Эпштейн-Барр вирусынан туындаған басқа да лимфопролиферативтік бұзылулардың даму қаупін арттырады.

Антацидтермен бір мезгілде қолдану преднизолонның сіңуін төмендетеді.

Антитиреоидты препараттармен бір мезгілде қолданғанда преднизолонның клиренсі төмендейді, ал тиреоидты гормондармен қолданғанда – жоғарылайды.

Айрықша нұсқаулар

Емдеуді бастар алдында (емдеу барысында – ургенттік жағдайға байланысты мүмкін болмауына байланысты) қолдануға болмайтын ықтимал жағдайды анықтау үшін науқас тексерілуі тиіс. Клиникалық тексеруге жүрек-қантамырлар жүйесін тексеру, өкпені рентгенологиялық тексеру, асқазан және он екі елі ішекті, несеп шығару жүйесін және көру ағзаларын тексеру; қан формуласын, қан плазмасындағы глюкоза мен су-электролиттер мөлшерін бақылау қамтылуы тиіс.

Преднизолонмен емдеу барысында (әсіресе ұзақ уақыт бойы) окулистің бақылауында болып, артериялық қысымды, су-электролит теңгерімі жағдайын, сондай-ақ шеткергі қан көрінісін және қандағы глюкоза деңгейін бақылап отыру керек.

Жағымсыз әсерлерді азайту мақсатында организмге калий иондарының (К+) түсуін (емдәм, калий препараттары) арттыру керек. Тағам ақуыздарға, витаминдерге бай болып, құрамында май, көмірсу және ас тұзы мөлшері шектеулі болуы тиіс.

Препараттың әсері гипотиреозы және бауыр циррозы бар ауруларда күшейеді. Препарат эмоциональды тұрақсыздықты немесе психоздық бұзылуларды күшейтуі мүмкін. Сыртартқысында психоз көрсетілсе, Преднизолонды үлкен дозада дәрігердің қатаң бақылауымен қолданады.

Демеуші ем жүргізу кезіндегі стрестік жағдайларда (мысалы, хирургиялық операциялар, жарақат немесе жұқпалы аурулар) глюкокортикостероидтарға деген қажеттіліктің артуына байланысты, препараттың дозасына түзетулер енгізу керек. Стресс жағдайларында бүйрекүсті бездері қыртысы функциясының салыстырмалы жеткіліксіздігі дамуы мүмкін болғандықтан, Преднизолонмен ұзақ емдеу аяқталғаннан кейін бір жыл бойы науқасты тиянақты бақылауға алған жөн.

Пайдалануды күрт тоқтатқанда, әсіресе, препарат бұның алдында жоғарғы дозада тағайындалған жағдайда «тоқтату» синдромы дамуы мүмкін (анорексия, жүректің айнуы, мәңгіру, жайылған түрдегі қаңқа-бұлшықет ауыруы, жалпы әлсіздік), сондай-ақ Преднизолонды тағайындауға себеп болған аурудың өршуі мүмкін.

Преднизолонмен емдеу кезінде, тиімділігінің (иммундық жауаптың) төмендейтініне байланысты, вакцинация жүргізуге болмайды.

Интеркуррентті жұқпалар кезінде, сепсистік жағдайларда және туберкулезде Преднизолонды қолдана отырып, бір мезгілде бактерицидті әсері бар антибиотиктермен ем жүргізу қажет.

Балаларда Преднизолонмен ұзақ уақыт бойы ем жүргізгенде бала бойының өсуі мен даму динамикасына мұқият бақылау жүргізу керек. Емдеу кезеңінде балалар қызылшамен немесе желшешекпен ауырғандармен қарым-қатынаста болған болса, оларға профилактикалық тұрғыдан спецификалық иммуноглобулиндерді қолданады.

Бүйрекүсті безі функциясының жеткіліксіздігі кезінде минералокортикоидты әсері әлсіз болғандықтан, Преднизолонды минералокортикоидтармен біріктіріп қолданады.

Қант диабеті бар науқастарда қандағы глюкоза деңгейіне бақылау жасап, қажет болған жағдайда емді реттеп отыру керек.

Сүйек-буын жүйесіне рентгенологиялық (омыртқа мен саусақтар суреті) бақылау жүргізу керек.

Бүйректің және несеп шығару жолдарының латентті жұқпалы аурулары бар науқастарда, Преднизолон диагностикалық маңызы бар лейкоцитурияны тудыруы мүмкін.

Преднизолон метаболиттері 11- және 17-оксикетокортикостероидтардың мөлшерін жоғарылатады.

Жүктілік және лактация

Жүктілік кезінде ( әсіресе І және ІІ триместрде) өмірлік көрсетілімдер бойынша ғана қолданылады.

Жүктілік кезеңінде емдеу ұзаққа созылғанда ұрықтың өсуі бұзылады. Жүктіліктің III триместрінде ұрықтың бүйрекүсті безі қыртысы атрофиясының пайда болу қаупі бар, бұл жаңа туған нәрестеге орнын басу емін жүргізуді қажет етуі мүмкін.

Глюкокортикостероидтар емшек сүтіне енетін болғандықтан, емшек емізу кезеңінде препаратты қолдану керек болған жағдайда емшек емізуді тоқтатуға кеңес беріледі.

Көлік құралын немесе қауіпті механизмдерді басқару қабілетіне дәрілік заттың ықпал ету ерекшеліктері

Қолдану кезеңінде автокөлікті басқаруды және зейінді жұмылдыру мен психомоторлы жауаптың шапшаңдығын қажет ететін қауіпті қызмет түрлерімен айналысуды тоқтата тұру қажет.

Артық дозалануы

Дозаға байланысты жағымсыз құбылыстар күшеюі мүмкін. Преднизолонның дозасын азайту қажет. Симптоматикалық емдеу.

Шығарылу түрі және қаптамасы

5 мг таблеткалар.

БП полимерлі типті банкілерге 60 таблеткадан салынған.

Әрбір банкі медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Жарықтан қорғалған жерде, 25оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Биосинтез» ААҚ, Ресей Федерациясы

440033, Пенза қ., Дружба к-сі, 4, тел/факс (8412) 57-72-49,

e-mail: certificate@biosintez.com

Тіркеу куәлігі иесінің атауы және елі

«Биосинтез» ААҚ, Ресей Федерациясы

Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның мекенжайы

«Биосинтез» ААҚ, Ресей Федерациясы

440033, Пенза қ., Дружба к-сі, 4, тел/факс (8412) 57-72-49,

e-mail: certificate@biosintez.com

 

13