Наглазим (5 мл)

• русский
• қазақша

• Скачать инструкцию медикамента

Саудалық атауы

Наглазим

Халықаралық патенттелмеген атауы

Галсульфаза

Дәрілік түрі

Инфузия үшін ерітінді дайындауға арналған концентрат, 1 мг/мл, 5 мл

Құрамы

Бір құтының ішінде:

белсенді зат – 5 мг галсульфаза,

қосымша заттар: натрий хлориді, натрий фосфаты бірнегізді моногидраты, натрий фосфаты екінегізді гептагидраты, полисорбат 80, инъекцияға арналған су.

Сипаттамасы

Түссізден бозғыл-сары түске дейінгі мөлдір немесе сәл бозаңданатын сұйықтық

Фармакотерапиялық тобы

АІЖ ауруларын және зат алмасу бұзылуларын емдеуге арналған басқа да препараттар. Ферментті препараттар. Галсульфаза.

ATX коды А16АВ08

Фармакологиялық қасиеттері

Фармакокинетикасы

Галсульфазаның фармакокинетикасы 6 типті (МПС VI) Мукополисахаридозы бар, галсульфазаны дене салмағына 1 мг/кг дозасында 4-сағаттық инфузия түрінде алған 13 емделушінің үлгісінде зерттелді. Емдеудің 24 аптасынан кейін ( стандартты ауытқуы [СО]) плазмада препараттың ең жоғары концентрациясының (Cmax) орташа мәні 2,357 (± 1,560) нг/мл құраған, «плазмадағы концентрация - уақыт» арақатынасы (AUC0-t) қисығы астындағы ауданының (СО) орташа мәні 5,707 ( 4,022) сағ х нг/мл тең болған. Орташа таралу көлемі (Vz) (СО) 316 ( 752) мл/кг тең болған, ал галсульфазаның плазмалық клиренсінің (CL) орташа мәні ( СО) 7.9 ( 14.7) мл/мин/кг құрады. Препараттың орташа (СО) жартылай шығарылу кезеңі (Т1/2) зерттеудің 24-ші аптасында 22.8 ( 10.7) минутқа тең болған.

1 Фаза емделушілерінің фармакокинетикалық параметрлері ұзақ уақыт бойы (кем дегенде 194 апта ішінде) тұрақты болып қалған.

Бүйрек арқылы галсульфаза клиренсі өте елеусіз болады.

Фармакодинамикасы

Галсульфаза адам N-ацетилгалактозамин-4-сульфатазасының тазартылған рекомбинантты түрін білдіреді. Галсульфаза рекомбинантты ДНҚ технологиясы жолымен қытай атжалманының овариальді жасушаларымен өндіріледі. Экзогенді фермент ретінде галсульфаза лизосомаға енеді және гликозамингликандар (ГАГ) катаболизмін күшейтеді. Галсульфазаны жасушалардың сіңіруі және оның лизосомаларға түсуі, шамасы, галсульфаза олигосахаридтік тізбектерінде болатын маннозо-6-фосфаттың спецификалық маннозо-6-фосфатты рецепторлармен байланысуы жолымен жүзеге асырылатын тәрізді.

Наглазим (галсульфаза) орфанды дәрілік зат болып табылады сирек тұқым қуалайтын МПС VI ауруларын емдеуде қолданылады.

МПС VI – бұл N-ацетилгалактозамин-4-сульфатаза ферменті белсенділігінің болмауымен немесе айқын төмендеуімен сипатталатын гетерогенді жүйелік бұзылу, ол ГАГ субстраты, дерматансульфатының жинақталуына және жасушалар, тіндер мен ағзалардың кең таралған дисфункциясына әкеледі. Осының нәтижесінде аурудың негізгі клиникалық көріністері туындайды: өсудің кідіруі, қаңқа құрылымының пропорционалды болмауы және буын қозғалғыштығының бұзылулары.

Наглазимнің қауіпсіздігі мен тиімділігінің клиникалық зерттеулерінде дене төзімділігін, буын қозғалғыштығын, буындардың ауыруы мен сіресуін, жоғарғы тыныс жолдары өткізгіштігінің бұзылуын, қолдың ептілігі мен көру өткірлігін қоса, МПС VI жүйелік байқалуы тексерілді.

Клиникалық зерттеулерге МПС VI бар 56 емделуші (5-тен 29 жасқа дейінгі) қатысты. Көптеген емделушілерде ауру көріністері ауыр болған, мұны дене төзімділігіне тест жүргізу кезіндегі жұмысқа қабілетінің төмендігі дәлелдейді. Олардың ішінде салыстармалы жасырын, шағын орталықты, рандомизациялық, плацебо-бақыланатын клиникалық зерттеуге енгізілген 38 емделуші рандомизирленді (1:1), 1 мг/кг Наглазимді немесе плацебоны аптасына бір рет 24 апта бойы алған. Осы зерттеудің соңына қарай Наглазим алған 19 емделуші плацебо алған топпен салыстырғанда «Жүріс ұзақтығының 12-минуттық тестісінде» (12MWT) және «Басқышпен көтерілудің 3-минуттық тестісінде» (3 MSC) орташа мәнінің көбірек ұлғайғанын көрсеткен (1 кесте).

1 кесте: Плацебо-бақыланатын клиникалық зерттеуден алынған нәтижелер

24 апталық плацебо-бақыланатын зерттеулерден кейінгі кезеңде 38 емделуші Наглазим препаратын 72 апта бойы ашық клиникалық зерттеулерде алған. Бастапқыда Наглазим алған барлық 19 емделуші және бұрын плацебо алған 19 емделуші жалғастырылған 72 апталық клиникалық зерттеу кезінде 12MWT және 3 MSC жақсаруын көрсеткен.

Клиникалық зерттеулерде Наглазим алуды жалғастырған емделушілер төзімділіктің ұзақ мерзімдік жақсаруы мен ГАГ деңгейінің тұрақты төмендеуін шамамен 97-240 аптаға сақтаған.

53-тен 153-ке дейінгі апта ішінде Наглазимді аптасына 1 немесе 2 мг/кг алған, МПС VI бар 4 нәресте (1 жастан кіші) қатысқан, дозалаудың екі режимін (Фаза 4) қосымша рандомизацияланған маркетингтен кейінгі клиникалық зерттеулер кезінде бет дисморфизмі нашарлауының жақсаруы немесе болмауы, өсу жылдамдығының қалыпты мәнінің сақталуы анықталған, естудің кем дегенде бір құлақта жақсаруы байқалған. Емдеуге дейінгі деректермен салыстырғанда несепте ГАГ деңгейлері 70%-дан аса төмендеген, бұл ересек емделушілердегі көрсеткіштермен өзара байланысты. Алайда қаңқа дисплазиясының үдеуі, жарықтар түзілуі мен мөлдір қабық бұлыңғырлануының дамуы байқалған.

Қолданылуы

- расталған 6 типті Мукополисахаридоз (МПС VI; N-ацетилгалактозамин-4-сульфатаза тапшылығы; Марото-Лами синдромы) диагнозы бар емделушілерді ұзаққа созылатын орын басатын ферменттік емдеуде

Қолдану тәсілі және дозалары

Басқа да тұқым қуалайтын жинақталу лизосомалық аурулары жағдайындағы сияқты, аурудың қайтымсыз клиникалық көріністері (әсіресе аурудың ауыр түрлерінде) туындағанға дейін емдеуді ерте бастау маңызды болып табылады.

Наглазим препаратының балалар мен ересектер үшін ұсынылатын дозасы ұзақтығы 4 сағат көктамырішілік инфузия түрінде кг дене салмағына 1 мг аптасына бір рет.

Наглазим препаратының сұйылтуға қажетті құтылар саны емделушінің салмағын ескере отырып белгіленеді:

Емделушінің салмағы (кг) х 1 мл/кг Наглазим = Наглазимнің қажетті көлемі мл-мен.

Наглазимнің қажетті көлемі мл-мен / 5 мл = құтылардың қажетті саны.

Егер құтылар саны тұтас шықпаса, оны үстіңгі санға дейін дөңгелектеп жіберу қажет. Тоңазытқыштан алынған инфузиялық ерітіндіні дайындау үшін құтылардың тұтас санын бөлме температурасында ұстау керек. Сұйылтар алдында құтылар бөлме температурасында 24 сағаттан артық сақталмауы тиіс.

Сұйылтар алдында әрбір құтыны жүзінді бөлшектер болуына және түстің өзгеруіне көзбен шолып тексеру қажет. Ерітінді мөлдірден сәл бұлыңғарға дейін және түссізден бозғылт-сары түске дейін, көрінбейтін бөлшектерсіз болуы тиіс. Инфузия үшін ерітінді дайындауға арналған концентратты 0,9% натрий хлориді ерітіндісіне асептиканың сәйкес талаптарын сақтай отырып қосу қажет.

Гиперволемияға бейім және салмағы 20 кг төмен емделушілер үшін 0,9% натрий хлориді ерітіндісі бар, көлемі 100 мл инфузиялық қалталарды пайдалануға болады, мұндай жағдайда инфузия жылдамдығы (мл/сағ) жалпы құю ұзақтығы 4 сағаттан кем болмайтындай түрде төмендетілуі тиіс. 100 мл қалталарды пайдаланған кезде Наглазим құтыларының қажетті мөлшерін баяу және тікелей инфузиялық қалтаға қосу керек.

0,9% натрий хлориді ерітіндісі бар, көлемі 250 мл инфузиялық қалталарды салмағы 20 кг және одан асатын емделушілер үшін пайдалануға болады. Көлемі 250 мл инфузиялық қалтадан инфузиялық қалтаға қосылатын Наглазим ерітіндісінің көлеміне тең есептелген ерітінді көлемін алып, шығарып тастау қажет.

Наглазимнің қажетті мөлшерін құтылардың сәйкес мөлшерінен еккішпен баяу шығарып алып, оны 0,9% натрий хлориді ерітіндісі бар инфузиялық қалтаға баяу қосу керек.

Шамадан тыс шайқамаған және ерітіндіні дайындау кезінде сүзгісі бар инені пайдаланбаған дұрыс.

К/і енгізудің бастапқы жылдамдығы былайша реттеледі, қалған көлемі (шамамен 97.5%) келесі 3 сағат ішінде енгізілуі үшін жалпы ерітіндінің шамамен 2.5% алғашқы сағат ішінде енгізу керек.

Инфузия жылдамдығын таңдау үлгілері:

250 мл инфузиялық қалта: 1-ші сағат – 6 мл/сағ, келесі 3 сағат – 81 мл/сағ.

100 мл инфузиялық қалта: 1-ші сағат – 3 мл/сағ, келесі 3 сағат – 32 мл/сағ.

Инфузия алдында ерітіндіні инфузиялық қалтаны абайлап, баяу айналдыра отырып араластырады. Алынған ерітіндіні сілкуге болмайды.

Дайындалған препаратты енгізу біріккен фильтрмен жабдықталған (0.2 мкм) инфузиялық аппараттың көмегімен жүзеге асырылады.

Наглазим препаратының әрбір құтысы бір реттік пайдалануға арналған.

Алынған Наглазим ерітіндісі стерильдікті сақтау үшін дереу пайдаланылуы тиіс. Егер ерітінді дереу пайдаланылмаса, ерітіндінің сақтау уақыты мен сақтау шарттары үшін медицина қызметкері жауап береді. Әдетте, ерітіндінің сақтау уақыты мен шарттары 2°С-ден 8°С-ге дейінгі температурада 24 сағаттан аспауы тиіс, кейіннен қолдану кезінде бөлме температурасында (23°С - 27°С) 24 сағат сақталады.

Пайдаланылмаған препарат және басқа да қалдықтар ұлттық заңнамаға сәйкес жойылады.

Жағымсыз әсерлері

Өте жиі (1/10)

- фарингит, гастроэнтерит

- арефлексия, бас ауруы

- конъюнктивит, мөлдір қабықтың бұлыңғырлануы

- құлақтың ауыруы, естудің бұзылуы

- гипертония

- мұрынның бітелуі, ентігу

- іштің ауыруы, жүрек айну, құсу

- кіндік жарығы

- ангионевротикалық ісіну, бөртпе, терінің қышынуы, есекжем

- ауыру, буынның ауыруы

- қалтырау / температураның көтерілуі, дімкәстік, қызба

- кеуденің ауыруы

Жиі (1/100 бастап <1/10 дейін)

- тремор

- гипотензия

- тыныс алудың тоқтап қалуы, жөтел, тыныс алудың бұзылысы, демікпе, бронх түйілуі

- эритема

Жиілігі белгісіз

- анафилаксия, шок, көмейдің ісінуі

- парестезия

- брадикардия, тахикардия

- бозару, цианоз

- гипоксия, тыныс алудың жиілеуі

Қолдануға болмайтын жағдайлар

• антигистаминдік және/немесе ыстық түсіретін дәрілермен, және/немесе кортикостероидтармен және/немесе инфузия жылдамдығын реттеу арқылы емдеу кезінде медициналық/дәрілік бақылауға келмейтін ауыр немесе өмірге қауіп төндіретін аса жоғары сезімталдық реакциясы (препаратты қайта қолданудың қарсы көрсетілімі болып табылады)

Дәрілермен өзара әрекеттесуі

Бұл препарат үшін дәрілік өзара әрекеттесу зерттеулері жүргізілмеген.

Айрықша нұсқаулар

Наглазиммен емдеуді МПС VI немесе зат алмасудың тұқым қуалайтын басқа да аурулары бар емделушілерді емдеу тәжірибесі бар дәрігер жүргізуі тиіс. Наглазим инфузиясын енгізу төтенше оқиғалар жағдайларына арналған арнайы реанимациялық аппаратурасы бар клиника жағдайында жүргізіледі.

Инфузиялық реакциялар. Наглазим қабылдайтын емделушілерде инфузиялық реакциялар, яғни к/і құю кезінде немесе инфузия жүргізілген күн ішінде туындайтын жағымсыз реакциялар дамиды.

Наглазиммен емдеу кезеңінде инфузиялық реакция даму қаупін төмендету мақсатында емделушілерге антигистаминдік препараттарды ыстық түсіретін дәрілермен бірге немесе оларсыз, инфузияны бастағанға дейін шамамен 30-60 минут бұрын қабылдау ұсынылады. Инфузиялық реакциялардың инфузияны тоқтату немесе жылдамдығын төмендету жолымен және емделушіге антигистаминдік және/немесе ыстық түсіретін дәрілерді (мысалы, парацетамол) қосымша тағайындаумен, осылайша науқасқа препарат енгізуді жалғастыруға мүмкіндік бере отырып, бақылануы мүмкін.

Инфузияны ұзақ тоқтатқаннан кейін емдеу курсын жалғастыруға қатысты шектеулі деректерді ескере отырып, мұндай жағдайларға аса сақтықпен келу қажет, өйткені жоғары сезімталдық реакциясы дамуының барынша жоғары қаупі болуы мүмкін.

Ауырлық дәрежесі ауыр немесе орташа инфузиялық реакция пайда болған жағдайда, антигистаминдік және/немесе ыстық түсіретін препараттармен емдеу және/немесе құю жылдамдығын реакция басталған кездегіге қарағанда екі есе аз деңгейіне дейін төмендету мүмкіндігін қарастырған жөн.

Бірлі-жарым ауыр инфузиялық реакция даму кезінде көктамырішілік құюды дереу тоқтатқан жөн, антигистаминдік және ыстық түсіретін дәрілермен емдеу мүмкіндігін қарастыру қажет. Инфузия реакция туындаған деңгейден 50%-25% төмендетілген жылдамдықпен жаңартылуы мүмкін.

Орташа дәрежелі қайталану реакциясы немесе бірлі-жарым ауыр инфузиялық реакциядан кейін қайталап енгізу жағдайында, Наглазиммен емдеу курсын жаңарту алдында антигистаминдік және ыстық түсіретін дәрілермен және/немесе кортикостероидтармен алдын ала емдеу мүмкіндігін, сондай-ақ құю жылдамдығын реакция туындағын деңгейден 50%-25%-ға дейін төмендетуді қарастырған жөн.

Басқа да көктамырішілік ақуыз препараттарын пайдалану кезіндегідей, жоғары сезімталдықтың аллергия типті ауыр реакциялары туындауы мүмкін. Осындай реакциялар пайда болғанда Наглазим қолдануды дереу тоқтату және тиісті ем жүргізуді бастау ұсынылады. Бұл ретте қарқынды емдеудің қолданыстағы стандарттарын сақтау керек. Препаратты бұған дейін инфузия жүргізгенде аллергиялық реакциясы болған емделушілерге қайтадан тағайындағанда сақ болған жөн.

Антигистаминдік және/немесе ыстық түсіретін дәрілермен, және/немесе кортикостероидтармен және/немесе инфузия жылдамдығын реттеу арқылы емдеу кезінде медициналық/дәрілік бақылауға келмейтін ауыр немесе өмірге қауіп төндіретін аса жоғары сезімталдық реакциясы препаратты қайта қолданудың қарсы көрсетілімі болып табылады

Әр құтыдағы бұл дәрілік препараттың құрамында 0.8 ммоль (18.4 мг) натрий бар және инфузия үшін 0,9% натрий хлориді пайдаланылады. Бұл деректі тұз құрамы төмен емдәмде жүрген емделушілер ескергендері жөн.

Тыныс алу жолдары аурулары бар емделушілер. Тыныс алу жолдары аурулары бар емделушілерді емдеуге сақтықпен қараған жөн. Антигистаминдік және седативтік препараттар қабылдауды шектеу немесе мұқият бақылау қажет. Белгілі бір жағдайларда тыныс алу жолдарында тұрақты оңды қысым немесе трахеостомия болғанда өкпені жасанды желдету жүргізу мүмкіндігін қарастырған дұрыс.

Жедел қызба аурулары немесе тыныс алу жүйесі аурулары бар емделушілерге Наглазим инфузиясын енгізуді кейбір жағдайларда тоқтата тұру керек.

Жұлын немесе омыртқа мойын бөлігінің компрессиясы. Миелопатияға әкелетін жұлын немесе омыртқа мойын бөлігінің компрессиясы МПС VI белгілі және күрделі асқынуы болып табылады. Мұндай асқыну аурудың табиғи дамуы кезінде, оның ішінде Наглазим қабылдайтын емделушілерде басталуы мүмкін. Препаратты тіркеуден кейін пайдалану кезінде хирургиялық араласуды қажет ететін жұлын немесе омыртқа мойын бөлігінің компрессиясы дамуы немесе ушығуының бірқатар жағдайлары хабарланған. МПС VI зардап шегетін емделушілер жұлын немесе омыртқа мойын бөлігінің компрессиясы симптомдары мен белгілерін (арқаның ауыруын, қысылу деңгейінен төмен қол-аяқ ұшының салдануын, несеп пен нәжісті ұстай алмауды қоса) ерте анықтау мақсатында бақылануы және қажетті медициналық көмек алуы тиіс.

Иммуногендік

Анти-галсульфазды IgG антиденелер емдеудің 4-тен 8 аптаға дейінгі кезеңінде Наглазим препаратымен ем қабылдаған 98% (54-тің 53-і) емделушілерде айқындалған. Антиденелермен бейтараптандырылатын антидененің жалпы титрі немесе IgE антидене деңгейі және инфузиялық-астасқан реакциялар арасындағы, сондай-ақ несептегі ГАГ деңгейі немесе төзімділік тестісімен өзара байланыс анықталмаған.

Бүйрек және бауыр жеткіліксіздігі

Бүйрек және бауыр жеткіліксіздігі бар емделушілер үшін Наглазимнің тиімділігі мен қауіпсіздігі зерттелмеген.

Егде адамдар

65 жастан асқан емделушілер үшін Наглазимнің тиімділігі мен қауіпсіздігі зерттелмеген.

Балалар

МПС VI ауруы бар 5 жастан кіші балаларда Наглазимді қолданудың тиімділігі мен қауіпсіздігі жөніндегі деректер қолданудың клиникалық тәжірибесімен расталған және ғылыми әдебиетте жарияланған. Балалар үшін Наглазимді дозалаудың арнайы режимі талап етілмейді.

Жүктілік және лактация кезеңі

Наглазим жүктілік кезінде қолданылмауы тиіс, аса қажет жағдайда ғана қолданылуы мүмкін.

Галсульфазаның емшек сүтіне өтетін-өтпейтіндігі белгісіз. Сондықтан Наглазиммен емдеу кезінде бала емізуді тоқта тұру қажет.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Зерттеулер жүргізілген жоқ.

Артық дозалануы

Бірнеше емделушіге ұсынылатын деңгейден шамамен екі есе асып түсетін инфузия жылдамдығымен Наглазимнің жалпы дозасы енгізілді, анық жағымсыз құбылыстар байқалмаған.

Шығарылу түрі және қаптамасы

5 мл препараттан резеңке тығынмен тығындалған және алюминий қақпақпен қаусырылған 1 типті шыны құтыларда.

Препарат бар 1 құтыны картон қаптамаға салады және медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапқа салынады.

Сақтау шарттары

2°С-ден 8°С-ге дейінгі температурада сақтау керек. Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Веттер Фарма Фертигунг ГмбХ және Ко.КГ,

Эйзенбахштрассе 2-4 88085 Лангенарген, Германия

Қаптаушы

Каталент ЮК Пакагинг Лтд., Ұлыбритания

Тіркеу куәлігінің иесі

БиоМарин Еуропа Лимитед, Ұлыбритания

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«ВИВА ФАРМ» ЖШС

2-ші Остроумов к-сі, 33, Алматы қ., ҚР

тел.: +7 (727) 383 74 63, факс: +7 (727) 383 74 56;

e-mail: pv@vivapharm.kz, viva@vivapharm.kz