Метотрексат (2,5 мг, Белмедпрепараты РУП)
Инструкция
-
русский
-
қазақша
Саудалық атауы
Метотрексат
Халықаралық патенттелмеген атауы
Метотрексат
Дәрілік түрі
Үлбірлі қабықпен қапталған таблеткалар, 2.5 мг, 5 мг.
Құрамы
Бір таблетканың құрамында
белсенді зат: метотрексат - 2,5 мг немесе 5 мг;
қосымша заттар: лактоза моногидраты, повидон, кальций стеараты, картоп крахмалы, опадрай сары (2,5 мг доза таблетка үшін), опадрай қызғылт сары (5 мг доза таблетка үшін);
2,5 мг доза таблетка үшін опадрай құрамы: поливинил спирті, ішінара гидролизденген, макрогол/полиэтиленгликоль, хинолинді сары алюминий лагы (Е 104), тальк, титанның қостотығы (Е 171), темірдің (III) сары тотығы (Е 172), күн батар түстес сары алюминий лагы (Е 110);
5 мг доза таблетка үшін опадрай құрамы: поливинил спирті, ішінара гидролизденген, макрогол/полиэтиленгликоль, тальк, титанның қостотығы (Е 171), темірдің (III) сары тотығы (Е 172), күн батар түстес сары алюминий лагы (Е 110), индигокармин алюминий лагы (Е 132).
Сипаттамасы
Екі беті дөңес, сары түсті үлбірлі қабықпен қапталған таблеткалар (2.5 мг доза үшін). Екі беті дөңес, қызыл сары түсті үлбірлі қабықпен қапталған таблеткалар (5.0 мг доза үшін).
Фармакотерапиялық тобы
Ісікке қарсы препараттар. Антиметаболиттер. Фолий қышқылының аналогтары. Метотрексат.
АТХ коды L01BA01
Фармакологиялық қасиеттері
Фармакокинетикасы
Ішу арқылы қабылдаған кезде сіңуі дозаға байланысты. Ішке 30 мг/м2 және төмен дозада қабылдағаннан кейін асқазан-ішек жолынан жылдам және толық сіңеді. Биожетімділігі 60% жуықты құрайды. Лейкемиясы бар балаларда сіңуі 23-тен 95%-ға дейін өзгеріп тұрады. Сіңуі 80 мг/м2-ден асатын дозада қабылдаған кезде төмендейді (қанығуы әсерінен болуы мүмкін). Ішу арқылы қабылдаған кезде Сmax 1-2 сағаттан соң жетеді. Тамақпен бірге қабылдау Сmax жету үшін қажетті уақытты шамамен 30 минутқа баяулатады, бірақ сіңірілуі мен биожетімділігінің деңгейі өзгермейді. Емдік дозаларда қабылдаған кезде енгізу жолына қарамастан гематоэнцефалдық бөгет арқылы өтпейді. Емшек сүтіне бөлініп шығады, плацента арқылы өтеді (ұрыққа тератогенді әсер етеді). Гидролазалар әсерімен метотрексатқа конвертациялануы мүмкін полиглутаматтар (ДГФ және тимидилатсинтетаза тежегіштері) түзе отырып, бауыр жасушаларында және басқа жасушаларда метаболизденеді. Ішек микрофлорасымен (ішке қабылдағаннан кейін) ішінара метаболизденеді. Полиглутаминді туындылардың аздаған мөлшері тіндерде ұзақ уақыт тоқталып қалады.
Бұл белсенді метаболиттер әсерінің тоқталуы мен ұзақтығы жасушаның, тіннің типіне және ісіктің түріне байланысты. Аздап (әдеттегі дозаларды қабылдағанда) 7-гидроксиметотрексатқа дейін (метотрексатқа қарағанда суда ерігіштігі 3-5 есе төмен) метаболизденеді. Бұл метаболиттің аккумуляциясы остеосаркоманы емдеуге тағайындалатын метотрексаттың жоғары дозаларын қабылдағанда жүреді. Соңғы Т1/2 дозаға тәуелді сипатта болады және төменгі дозаны енгізгенде (30 мг/м2 аз) 3-10 сағатты және 8-15 сағатты - метотрексаттың жоғары дозаларында (80 мг/м2 және одан көп) құрайды. Көбіне бүйрек арқылы шумақтық сүзілу және өзекшелік секреция жолымен 24 сағат ішінде шығарылады, өтпен 10 % аздауы шығарылады. Метотрексат клиренсі кең түрленеді, жоғары дозада төмендейді. Айқын асциті немесе плевральді сұйықтыққа жалқығы бар науқастарда препараттың шығарылуы баяу жүреді. Қайталап енгізгенде тіндерде метаболиттер түрінде жинақталады.
Фармакодинамикасы
Фолий қышқылы құрылымдық аналогтары тобының антиметаболиті болып табылады. Ісікке қарсы (цитостатикалық), иммунодепрессивті әсер етеді. Дигидрофолий қышқылын тетрагидрофолий қышқылына өзгертетін дигидрофолатредуктазаны (ДГФ) тежейді, ол пуринді нуклеотидтар синтезінде біркөміртекті топтары мен ДНҚ синтезіне қажетті тимидилаттың доноры болып табылады. Сонымен қатар, метотрексат жасушада ДГФ ғана емес, тимидилатсинтетаза, 5-аминоимидазол-4-карбоксамидорибонуклеотид (АИКАР) трансамилазаны қоса алғанда, басқа да фолатқа тәуелді ферменттерге де тежегіш әсер ететін метаболиттер түзе отырып, полиглутаминделеді. ДНҚ синтезін, репарациясын, жасушалық митозды бәсеңдетеді, аз дәрежеде РНҚ мен ақуыз синтезіне әсер етеді. S-фазалы спецификалыққа ие, жасушасының пролиферациялық белсенділігі жоғары болатын тіндерге қатысты белсенді, қатерлі жаңа түзілулердің өсуін тежейді. Белсенді бөлінетін ісіктердің, сондай-ақ сүйек кемігінің, эмбрионның, ауыз қуысы шырышты қабығының, ішектің, қуықтың жасушаларына барынша сезімтал.
Қолданылуы
- ересек емделушілердегі ревматоидты артритте базистік препараттармен ем жүргізу қажет болған кезде, ауыр белсенді ювенильді идиопатиялық артриттің полиартриттік түрінде қабынуға қарсы стероидты емес препараттарға талапқа сай жауап болмағанда
- өрескел псориаздың ауыр және денеге жайылған түрлерінде, әсіресе түйіндақты түрінде, ересектерде әдеттегі емдеу әдістері (жарықпен емдеу, PUVА және ретиноидтар) тиімсіз болған жағдайда
- жедел лимфобластты лейкозда демеуші ем ретінде.
Қолдану тәсілі және дозалары
Препарат ішке қолданылады.
Ревматоидты артритті емдеуге арналған доза:
Ересектер:
Әдеттегі емдеу әсер етпейтін немесе төзімсіз ауыр, белсенді, классикалық немесе орналасуы белгілі бір жерде болатын ревматоидты артриті бар емделушілерге метотрексатты 7,5 мг дозада, пероральді, аптасына бір рет тағайындаған жөн. Рецепт жазбасында препарат қабылданатын нақты апта күні белгіленуі тиіс.
Ересектер:
Метотрексатты егде емделушілерде сақтықпен қолданған жөн, дәрілік заттың дозасын азайту қарастырылуы тиіс.
Балалар:
Обыр химиотерапиясын қоспағанда, балаларда қолданудың қауіпсіздігі мен тиімділігі анықталмаған.
Псориазды емдеуге арналған доза:
Псориаздың ауыр түрін емдеу үшін препаратты 10 – 25 мг дозада, пероральді, аптасына бір рет қабылдау ұсынылады. Дозасы емделушінің реакциясы мен гематологиялық уыттылығына байланысты түзетілуі тиіс. Рецепт жазбасында препарат қабылданатын нақты апта күні белгіленуі тиіс.
Жедел лейкоз кезіндегі демеуші ем:
Емдеу басталғанға дейін бір апта бұрын 5 - 10 мг тестілеу дозасы ұсынылады, парентеральді, жекелей жағымсыз әсерлерін айқындау үшін.
5 күннен артық болмайтын кезеңге 30 мг/м2 аспайтын бір реттік доза ұсынылады. Препаратты қабылдау емшаралары арасында ұзақтығы екі аптадан кем болмайтын демалыс кезеңі ұсынылады, бұл сүйек кемігінің қалыпты жұмыс істеу деңгейіне дейін қалыптасуына қажет.
100 мг асатын дозалар, әдетте парентеральді енгізіледі және инъекциялық препарат пайдаланылуы тиіс. 70 мг/м2 жоғары дозалар кальций фолинатпен қорғаусыз немесе препаратты қабылдағаннан кейін 24 – 48 сағаттан соң метотрексаттың сарысулық деңгейін сандық түрде анықтамай, енгізілмеуі тиіс.
Егер метотрексатты біріктірілген химиотерапия құрамында қолданса, басқа дәрілік заттардың кез келген айқаспалы уыттылығын ескере отырып, доза азайтылуы тиіс.
Бүйрек жеткіліксіздігі бар емделушілер үшін ұсынылатын дозасы:
Бүйрек функциясы бәсеңдеген емделушілер метотрексатты төмендегі сызбаны пайдалана отырып, сақтықпен қабылдағандары жөн:
Креатинин клиренсі (мл/мин)
> 50 мл/мин – 100% доза
20- 50 мл/мин – 50 % доза
< 20 мл/мин – метотрексатты қабылдамау ұсынылады
Жағымсыз әсерлері
Жүйке жүйесі және сезім мүшелері тарапынан: энцефалопатия, лейкоэнцефалопатия (әсіресе, науқастарда миды сәулелендіруден кейін), бас айналу, бас ауыру, көрудің бұзылуы, ұйқышылдық, афазия, арқа тұсының ауыруы, мойын артқы бөлігі бұлшықеттерінің сіресуі, құрысулар, салдану, гемипарез, парез, дизартрия; жоғары дозада қолданғанда: когнитивтік функцияның транзиторлы бұзылуы, көңіл-күйдің құбылмалылығы; ерекше краниальді сезімталдық; жекелеген жағдайларда – қажу, әлсіздік, сананың шатасуы, атаксия, тремор, ашушаңдық, кома; конъюнктивит, көз жасының шамадан тыс ағуы, катаракта, жарықтан қорқу, қыртысты соқырлық (жоғары дозаларда).
Жүрек-қантамыр жүйесі тарапынан (қан түзу, гемостаз): анемия, лейкопения, тромбоцитопения, панцитопения, нейтропения, лимфопения (әсіресе Т-лимфоциттер), эозинофилия, агранулоцитоз, СОЭ жылдамдауы, лимфаденопатия, лимфопролиферативтік аурулар, гипогамма-глобулинемия, геморрагия, лейкопения салдарынан болған септицемия; сирек – перикардит, экссудативті перикардит, гипотензия, тромбоэмболиялық өзгерістер (артериялық тромбоз, церебральді тромбоз, терең көктамырлар тромбозы, бүйрек көктамырлары тромбозы, тор қабық көктамырлары тромбозы, тромбофлебит, өкпе эмболиясы).
Респираторлық жүйе тарапынан: сирек – интерстициальді пневмонит, өкпе фиброзы, өкпе жұқпасының өршуі, тыныс алудың жеткіліксіздігі альвеолит, интерстициальді пневмонит (оның ішінде өлімге әкелетін), СОӨА.
АІЖ тарапынан: гингивит, фарингит, ойық жаралы стоматит, анорексия, жүрек айну, құсу, диарея, жұтудың қиындауы, мелена, гематемезис, АІЖ шырышты қабығының ойық жаралануы, асқазан-ішектен қан кету, энтерит, бауырдың зақымдануы, бауыр фиброзы және циррозы, жедел гепатит, бауыр жеткіліксіздігі, гипоальбуминемия, "бауыр" трансаминазалары белсенділігінің артуы (үздіксіз немесе ұзақ ем алатын науқастарда ықтималдығы жоғары), панкреатит.
Несеп-жыныс жүйесі тарапынан: цистит, нефропатия, бүйрек жеткіліксіздігі, азотемия, гематурия, протеинурия, гиперурикемия немесе айқын нефропатия, дисменорея, тұрақсыз олигоспермия, оогенез және сперматогенез процесінің бұзылуы, фетальді ақаулар, либидоның төмендеуі, импотенция, дисменорея, қынаптық бөліністер, гинекомастия, бедеулік, өздігінен болған түсік, ұрықтың өлуі.
Тері жабындары тарапынан: тері эритемасы, қышыну, шаштың түсуі (сирек), фотосенсибилизация, экхимоз, безеу түріндегі бөртулер, фурункулез, қабыршықтану, терінің де- немесе гиперпигментациясы, күлдіреуіктердің түзілуі, фолликулит, телеангиэктазия, уытты эпидермальді некролиз, Стивенс – Джонсон синдромы, терінің ойық жарасы және некрозы, эксфолиативтік дерматит.
Аллергиялық реакциялар: қызба, қалтырау, бөртпе, есекжем, анафилаксия.
Басқалар: иммуносупрессия, жұқпалар: өмірге қауіп төндіретін оппортунистік жұқпалар (оның ішінде пневмоцистік пневмония), ЦМВ (оның ішінде ЦМВ-пневмония), сепсис (оның ішінде өлімге әкелетін), нокардиоз, гистоплазмоз, криптококкоз, Herpes zoster және Herpes simplex (оның ішінде диссеминацияланған) туындатқан жұқпалар, остеопороз, артралгия, белдің ауыруы, миалгия, остеонекроз, сынықтар, васкулит, қант диабеті, лимфома (оның ішінде қайтымды), ісік лизисі синдромы, жұмсақ тіндер некрозы, кенеттен болған өлім. Ревматоидты артриті емдеуде: 10% астам - "бауыр" трансаминазалары белсенділігі артады, жүрек айну, құсу; 3-10% - стоматит, тромбоцитопения (100 мың/мкл аз); 1-3% - тері бөртпесі, қышыну, дерматит, диарея, алопеция, лейкопения (3000/мкл аз), панцитопения, бас айналу, интерстициальді пневмонит; басқалар - гематокриттің төмендеуі, бас ауыры, жұқпалар (оның ішінде жоғары тыныс жолдарының), анорексия, артралгия, кеуденің ауыруы, жөтел, дизурия, көздегі жайсыздық, мұрыннан қан кету, қызба, қатты тершеңдік, құлақтың шуылдауы, қынаптық бөліністер. Псориазды емдеуде алопеция, фотосезімталдық, теріні ашытуды сезіну, терідегі ойық жаралы ауыратын түйіндақтар. Ювенильді ревматоидты артритті емдеуде: "бауыр" трансаминазалары белсенділігінің жоғарылауы (14%), АІЖ функциясының бұзылуы (11%), оның ішінде жүрек айну, құсу, диарея, стоматит (2%), лейкопения (2%), бас ауыру (1.2%), алопеция (0.5%), бас айналу (0.2%), тері бөртпесі (0.2%).
Қолдануға болмайтын жағдайлар
- метотрексатқа және/немесе препараттың кез келген басқа компонентіне жоғары сезімталдық
- маскүнемдік
- сүйек кемігінің гипоплазиясы, айқын анемия, лейкопения, нейтропения, тромбоцитопения
- бүйрек немесе бауырдың айқын жеткіліксіздігі
- желшешек (соның ішінде жақында болған), белдемелі теміреткі, туберкулез, АИВ және басқа да жұқпалы аурулар
- тұқым қуалаған лактоза жақпаушылығы, Lapp-лактоза ферментінің тапшылығы, глюкоза/галактоза мальабсорбциясы
- ауыз қуысы және асқазан-ішек жолының ойық жарасы
- қатарласа жасалатын тірі вакциналармен вакцинациялау
- жүктілік және емшек емізу
- 18 жасқа дейінгі балалар (хинолинді сары (Е 104), күн батар түстес сары (Е 110), индигокармин (Е 132) бояғыштарының болуына байланысты)
Сақтықпен:
- асцит
- плевральді қуыстағы жалқық
- сусыздану
- сыртартқыда подагра немесе нефролитиаз болуы
- бұған дейін жүргізілген сәулемен емдеу және химиотерапия
Дәрілермен өзара әрекеттесуі
Метотрексаттың уыттануға әкелетін күшті және ұзақ әсер етуіне ҚҚСД, барбитураттарды, сульфаниламидтерді, кортикостероидтарды, тетрациклиндерді, триметопримді, хлорамфениколды, пара-аминобензой және пара-аминогиппура қышқылдарын, пробенецидті бір мезгілде қолдану ықпал етеді. Қанда несеп қышқылы концентрациясын жоғарылатады, сондықтан гиперурикемия және подагра қатар жүретін науқастарды емдеген кезде подаграға қарсы ДЗ (аллопуринол, колхицин, сульфинпиразон) дозасын түзету қажет етілуі мүмкін; урикозуриялық подаграға қарсы ДЗ метотрексатпен емдеу (аллопуринолды пайдаланған дұрыс) аясында несеп қышқылының жоғарылауымен байланысты нефропатия дамуы қаупін арттыруы мүмкін. ҚҚСП метотрексаттың жоғары дозасы аясында соңғысының концентрациясын арттырады және сыртқа шығарылуын баяулатады, бұл ауыр гематологиялық және асқазан-ішек уыттануынан өлімге әкеліп соқтыруы мүмкін. Орташа және жоғары дозаларда метотрексат инфузиясын жүргізгенге дейін фенилбутазонды 7-12 күн, пироксикамды 10 күн, дифлунисал мен индометацинді 24-48 сағат, кетопрофен мен T1/2 қысқа ҚҚСП қабылдауды 12-24 сағат бұрын және оны аяқтағаннан кейін кем дегенде 12 сағат ішінде (қандағы метотрексат концентрациясына байланысты) тоқтату ұсынылады. Метотрексаттың төменгі дозаларымен ҚҚСП үйлестіруде (метотрексаттың бүйрек өзекшелерімен шығарылуы төмендеуі мүмкін) сақ болған жөн. Өзекшелік секрецияны бөгейтін ДЗ (мысалы, пробенецид), метотрексаттың уыттылығын оның бүйрекпен шығарылуын азайту есебінен арттырады. Гепатоуыттылықтың даму қаупін ретиноидтар, азатиоприн, сульфасалазин, этанол және басқа гепатоуытты ДЗ арттырады. Құрамында фолат бар ДЗ (оның ішінде поливитаминдер) метотрексаттың сүйек кемігіне уытты әсерін азайтады. Аспарагиназа метотрексаттың ісікке қарсы әсерінің айқындығын жасушалар репликациясын тежеу есебінен төмендетеді. Динитроген тотығын пайдалану арқылы анестезия жүргізу күтпеген ауыр миелосупрессия мен стоматиттің дамуына әкелуі мүмкін. Парентеральді қолдануға арналған ацикловир метотрексатты интратекальді енгізу аясында неврологиялық бұзылулардың даму қаупін арттырады. Фолий қышқылы мен оның туындылары тиімділігін төмендетеді. Тікелей емес антикоагулянттардың (кумарин немесе индандион туындылары) әсерін күшейтеді және қан кету қаупін жоғарылатады. Пенициллин тобының препараттары метотрексаттың бүйректік клиренсін төмендетеді. Метотрексат және аспарагиназаны бір мезгілде қолданғанда метотрексаттың әсерін бөгеуі мүмкін. Неомицин (ішке қабылдауға арналған) метотрексаттың (ішке қабылдауға арналған) сіңуін төмендетуі мүмкін. Патологиялық қан өзгерістерін туындататын препараттар, егер осы препараттар сүйек кемігі функциясына қатысты метотрексат сияқты әсер ететін болса, лейкопения және/немесе тромбоцитопенияны күшейтеді. Сүйек кемігі функциясының бәсеңдеуін туындататын басқа препараттар, немесе сәулемен емдеу сүйек кемігі функциясының әсерін үдетеді және аддитивті бәсеңдетеді. Цитарабинмен бір мезгілде пайдаланғанда синергиялық цитоуыттылық әсері болуы мүмкін. Метотрексатты PUVA-терапиямен біріктіріп (метоксален және УКС) ем алған псориазы немесе зең тәріздес микозы бар бірнеше емделушіде тері обыры анықталған. Сәулелендіру емімен үйлестіру сүйек кемігін бәсеңдету қаупін арттыруы мүмкін. Тірі вирус вакциналарымен біріктіру вакциналық вирус репликациясы қарқындауын туындатуы, вакцинаның жағымсыз әсерлерін күшейтуі және тірі, әрі белсенділігі жойылған вакциналар енгізуге жауап ретінде антидене өндірілуін төмендетуі мүмкін.
Айрықша нұсқаулар
Қорғалмаған ашық теріні ұзақ уақыт күн сәулесінің астында ұстамаған немесе УКС жарығын шамадан тыс қолданбаған жөн (фотосенсибилизация реакциясы болуы мүмкін). Препаратты қабылдағаннан кейін 3 айдан 12 айға дейінгі аралықта иммунизациядан бас тарту қажет (егер мұны дәрігер қаламаса); науқаспен бірге тұратын отбасының басқа мүшелері полиомиелитке қарсы ішу арқылы қабылданатын вакцинамен иммунизациядан бас тартқаны жөн (полиомиелитке қарсы вакцина алған адамдармен қарым-қатынаста болмау керек, немесе мұрын мен ауызды жабатын қорғаныш бетперде киген жөн).
Метотрексатпен емдеу кезінде және одан кейін ұрықтануды болдырмаған жөн (еркектерге – емдеуден кейін 3 ай, әйелдерге – кем дегенде бір овуляциялық цикл). Метотрексатпен емдеу курсын жүргізгеннен кейін препараттың жоғары дозасының уыттылық әсерлерін азайту үшін кальций фолинатты қолдану ұсынылады. Уыттану симптомдарын дер кезінде анықтау үшін шеткергі қан жағдайын (лейкоциттер мен тромбоциттер санын: алдымен күнара, содан соң бірінші айдың ішінде әрбір 3-5 күн сайын, сосын 7-10 күнде 1 рет, ремиссия кезеңінде – 1-2 аптада 1 рет), «бауыр» трансаминазалары белсенділігін, бүйрек функциясын бақылау, кеуде қуысы ағзаларына мезгіл-мезгіл рентгеноскопия жүргізу қажет. Сүйек кемігінің қан түзу жағдайына бақылауды емге дейін, емдеу кезінде 1 рет және курстың соңында жүргізу керек. Диарея және ойық жаралы стоматит пайда болған кезде метотрексатпен емдеуді тоқтату қажет, өйткені геморрагиялық энтериттің және ішектің тесілуінің даму қаупі жоғары.
Метотрексат жедел немесе созылмалы гепатоуыттылықтың дамуына (соның ішінде, бауырдың фиброзы мен циррозына) алып келуі ықтимал. Созылмалы гепатоуыттылық әдетте метотрексатты ұзақ (әдетте 2 жыл немесе одан ұзақ) немесе 1,5 г-дан кем емес жалпы жинақталу дозасына жеткенге дейін қолданғаннан кейін дамиды және қолайсыз аяқталуына әкелуі мүмкін. Гепатоуытты әсері ауыр сыртартқысының қатарласуымен (маскүнемдік, семіздік, қант диабеті) және кәрілік жасқа байланысты болуы мүмкін. Бауыр қызметін айқындау үшін, биохимиялық параметрлермен қатар, емдеуді бастар алдында немесе емдеуді бастағаннан кейін 2-4 айдан кейін; 1,5 г жалпы жинақталу дозасында және әрбір 1-1,5 г қосымша дозадан кейін бауыр биопсиясын жүргізу ұсынылады. Орташа бауыр фиброзында немесе цирроздың кез-келген дәрежесінде метотрексатпен емдеуді тоқтатады; жеңіл түрдегі фиброзда әдетте 6 айдан кейін қайтадан биопсия жасау ұсынылады. Бастапқы емдеу кезеңінде бауырдың болымсыз гистологиялық өзгерістері болуы мүмкін (болымсыз портальді қабыну және майлы өзгерістер), бұл емдеуден бас тартуға немесе тоқтатуға негіз болып табылмайды, бірақ препаратты қолданғанда сақ болу қажеттігін көрсетеді.
Дәрілік заттың көлік құралдарын және қауіптілігі зор механизмдерді басқару қабілетіне ықпал ету ерекшеліктері
Препаратпен емдеген кезде көлік құралдары мен қауіптілігі зор механизмдерді басқарудан тартына тұрған жөн.
Артық дозалануы
Симптомдары: спецификалық симптомдары жоқ. Плазмадағы метотрексаттың мөлшеріне қарай диагностика жасалады.
Емі: метотрексаттың миелоуытты әсерін бейтараптандыру үшін кальций фолинатын дереу енгізу (ішке, б/і немесе к/і). Кальций фолинатының дозасы аз дегенде метотрексат дозасына тең болуы тиіс, оны алғашқы сағат ішінде енгізу қажет; одан кейінгі дозаларды қажеттілігіне қарай енгізеді. Организмнің гидратациясын арттырады, препараттың және оның метаболиттерінің несеп жолында шөгінді түзілуін болдырмас үшін несепті сілтілендіреді.
Шығарылу түрі және қаптамасы
10 таблеткадан пішінді ұяшықты қаптамаға салынған. 2 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.
Сақтау шарттары
Ылғалдан және жарықтан қорғалған жерде, 25º-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Қаптамасында көрсетілген жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы.
Өндіруші
«Белмедпрепараты» РУК, Беларусь Республикасы
Заңды мекенжайы және шағымдарды қабылдайтын мекенжайы:
220007, Минск қ., Фабрициус к-сі, 30,
т./ф.: (+375 17) 220 37 16,
e-mail: medic@belmedpreparaty.com.
Тіркеу куәлігі иесінің атауы және елі
«Белмедпрепараты» РУК, Беларусь Республикасы
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы
«КазБелМедФарм» ЖШС, 050028, Қазақстан Республикасы,
Алматы қ., Қызыл гвардияшылар жолы 258 В
232-90-50, 285-04-00, admin@caph.kz