Левомицетин-Дарница (250 мг)

• русский
• қазақша

• Скачать инструкцию медикамента

Саудалық атауы

Левомицетин-Дарница

Халықаралық патенттелмеген атауы

Хлорамфеникол

Дәрілік түрі

250 мг, 500 мг таблеткалар

Құрамы

Бір таблетканың құрамында

белсенді зат - 250 мг немесе 500 мг хлорамфеникол (левомицетин),

қосымша заттар: картоп крахмалы, гидроксипропилцеллюлоза,

стеарин қышқылы.

Сипаттамасы

Жалпақ цилиндр пішінді, сызығы мен ойығы бар, ақ немесе сәл сарғыш реңді ақ түсті таблеткалар.

Фармакотерапиялық тобы

Бактерияға қарсы жүйелі пайдалануға арналған препараттар.

Амфениколдар. Хлорамфеникол

АТХ коды J01BA01

Фармакологиялық қасиеттері

Фармакокинетикасы

Хлорамфеникол ішке қабылдаған кезде жеңіл сіңіріледі. Қандағы 10 мкг/мл немесе одан көп концентрациясына 1 г дозада бір рет ішке қабылдағаннан кейін шамамен 1 немесе 2 сағаттан соң жетуге болады, ал қандағы шамамен 18,5 мкг/мл концентрациясы 1 г препараттың бірнеше дозаларын қабылдағаннан кейін анықталған. Хлорамфеникол пальмитаты ішке қабылданғанда хлорамфеникол мен натрий сукцинатына дейін асқазан-ішек жолында сіңгенше гидролизденеді; ондай гидролиз жаңа туған нәрестелер мен сәбилерде толық болмай, препараттың осы жас тобындағы тұрақсыз фармакокинетикасына ықпал етуі мүмкін. Хлорамфеникол дененің тіндері мен сұйықтықтарына оңай өтеді, жұлын сұйықтығына енеді, қанда болатын концентрациясының 50 % жуығын түзіп (тіпті ми қабықтарының қабынуы болмаса да), ол плацента арқылы диффузияланады, емшек сүтіне, көздің сулы және шыны тәрізді сұйықтығына түседі. Препараттың қабылданған дозасының шамамен 60 % дейіні қан плазмасы ақуыздарымен байланысады. Хлорамфениколдың жартылай шығарылу кезеңі 1,5-нан 4 сағатқа дейінгі шекте болады; жартылай шығарылу кезеңі бауыр жеткіліксіздігі ауыр науқастарда ұзақтау болады, сонымен қатар жаңа туған нәрестелерде одан да көпке созылады. Бүйрек жеткіліксіздігі препараттың әсер етуші затының жартылай шығарылу кезеңіне, оның қарқынды метаболизміне орай, салыстырмалы түрде аздап ықпал етеді, бірақ белсенді емес метаболиттердің жиналуына әкелуі мүмкін.

Хлорамфеникол негізінен несеппен, бірақ 5-10 % ішуге арналған дозасы ғана өзгеріссіз күйде шығарылады; негізінен глюкурон қышқылымен конъюгациялану жолымен бауырда қалғанының белсенділігі жойылады. Өтке 3 % жуығы бөлінеді. Алайда басым бөлігі жұтылып, 1 % жуығы ғана негізінен белсенді емес түрінде нәжіспен бөлініп шығады. Хлорамфеникол сіңірілуі, метаболизмі және шығарылуы, әсіресе, жаңа туған нәрестелер мен балаларда елеулі тұлға аралық ауытқуларға ұшырайды, бұл осы емделушідегі фармакокинетиканы анықтау үшін қан плазмасындағы концентрациясына мониторинг қажет етеді.

Фармакодинамикасы

Хлорамфеникол – грамоң және грамтеріс бактерияларға, сондай-ақ кейбір басқа микроорганизмдерге қатысты әсер ету ауқымы кең антибиотик. Пенициллинге, тетрациклиндерге, сульфаниламидтерге төзімді бактериялар штаммдарына қатысты тиімді. Препарат әсері т-РНҚ амин қышқылдарының рибосомаларға тасымалдану сатысындағы микроб жасушасында ақуыз синтезі үдерісін бұзумен байланысты. Хлорамфеникол аса жоғары концентрацияларда, ол Haemophilus influenzae, Neisseria meningitidis және Streptococcus pneumoniae қамтылатын кейбір микроорганизмдерге қатысты бактерицидті болуы мүмкін болса да, ең алдымен, патогенді микроорганизмдерге бактериостатикалық әсер көрсетеді.

Белсенділік ауқымы. Хлорамфеникол бактериялардың көптеген түрлеріне қарсы белсенді. Bacillus anthracis, Corynebacterium diphtheriae қамтылатын грамоң микроорганизмдер және Peptococcus пен Peptostreptococcus spp. сияқты анаэробтар, әдетте, хлорамфениколға сезімтал болып келеді. Алайда, грамоң кокктар, соның ішінде Staphylococcus epidermidis стафилококктары мен кейбір Staphylococcus aureus штаммдары мен стрептококктар, мысалы, Str. pneumoniae, Str. pyogenes және viridans, метициллинге төзімді стафилококктар және Enterococcus faecalis, әдетте, хлорамфениколға төзімді болып шықты.

Neisseria meningitidis және N.gonorrhoeae сияқты грамтеріс кокктар, әдетте, Haemophilus influenzae және Bordetella pertussis, Brucella abortus, Campylobacter spp., Legionella pneumophila, Pasteurella мен Vibrio spp. қамтылатын бірқатар басқа да грамтеріс бактериялар тәрізді препаратқа өте сезімтал.

Enterobacteriaceae өзінің сезімталдығына қарай ерекшеленеді, көптеген штаммдар жүре иеленген төзімділік танытты, дегенмен Escherichia coli мен Klebsiella spp., Proteus mirabilis, Salmonella, Shigella мен Yersinia spp.

штаммдары хлорамфениколға сезімтал.

Enterobacter, индол-оң Proteus және Serratia spp. көптеген штаммдары хлорамфениколға төзімді немесе ең болмағанда орташа сезімтал. Pseudomonas aeruginosa әрдайым төзімді, ал Burkholderia (бұрынғы Pseudomonas) spp. сезімтал болуы мүмкін. Кейбір грамтеріс анаэробтар (Bacteroides fragilis, Veillonella және Fusobacterium spp.) препаратқа сезімтал немесе орташа сезімтал.

Хлорамфениколға сезімтал басқа да микроорганизмдер: Actinomyces spp., Leptospira spp., спирохеттер.

Treponema pallidum, Chlamydiaceae, Mycoplasma spp. және Rickettsia spp., Nocardia spp. сияқты микроорганизмдер препарат әсеріне төзімді.

Хлорамфеникол зеңдер, қарапайымдар және вирустарға қатысты тиімсіз.

Микроорганизмдердің төзімділігі баяу дамиды.

Қолданылуы

- көбіне қоздырғыштары Bacteroides fragilis болып табылатын ауыр

анаэробты жұқпаларды (ми абсцессі) және құрсақ қуысының жұқпаларын (іріңді перитонит, өт шығару жолдарының жұқпалары, несеп шығару

жолдарының жұқпалары) емдеу

- эмпирикалық сипаттағы да, қоздырғыштары Haemophilus influenzae

сияқты сезімтал микроорганизмдер екені белгілі болған кезде де

менингококкты жұқпаны, бактериялық менингитті емдеу

- хламидиозды, бруцеллезді, бөртпе сүзек, ерлихиоз, трахома және

Жартастағы таулар дақтанған қызбасы сияқты риккетсиозды жұқпаларды емдеу

- емдеген кезде хлорамфениколды басқа дәрілік препараттарға балама

ретінде қолдануға болатын бактериялық жұқпалар: күрделі асқазан-ішек жұқпалары (соның ішінде Salmonella enteritis, Yersinia enteritis, Shigella spp. туғызған), іш сүзегі, паратифтер, іріңді жарақатты жұқпа, шап

лимфогранулемасы, Haemophilus influenzae туғызған ауыр жұқпалар,

туляремия (әсіресе, менингитке күдік туындағанда)

- іріңді отитті емдеу

Қолдану тәсілі және дозалары

Левомицетин-Дарница ас ішуден 30 минут бұрын ішке қолданылады.

Ересектер препаратты күніне 3-4 рет 250-500 мг қабылдайды. Тәуліктік дозасы – 2000 мг. Ерекше ауыр жағдайларда Левомицетин-Дарницаны қанның жағдайын және бауыр мен бүйрек функциясын қатаң бақылаумен, тәулігіне 4000 мг дейінгі дозада (ересектер үшін ең жоғары тәуліктік доза) қолдануға болады. Тәуліктік дозаны 3-4 рет қабылдауға бөледі.

Препараттың 6-дан 8 жасқа дейінгі балаларға арналған бір реттік дозасы дене салмағына 10 мг/кг, 8 жастан асқан балалар үшін 250 мг құрайды. Қабылдау жиілігі – тәулігіне 3-4 рет.

Левомицетин-Дарницамен емдеу курсы 7-10 күн құрайды. Көрсетілімдері бойынша жақсы көтерімді болған және қан түзілу жүйесінде өзгерістер болмаған жағдайда емдеу курсын 2 аптаға дейін ұзартуға болады.

Жағымсыз әсерлері

- ең ауырлары: апластикалық анемия, сүйек кемігі қызметінің бәсеңдеуі және «сұр синдром»

- психомоторлық бұзылыстар, депрессия, делирий, сананың шатасуы,

шеткергі неврит, көру жүйкесінің невриті, көру және есту арқылы

елестеулер, көру және есту өткірлігінің төмендеуі, дәм сезудің нашарлауы, бас ауыру, энцефалопатия

- диспепсия, іштің кебуі, жүрек айну, құсу (ас ішуден кейін 1 сағаттан соң қабылдағанда даму ықтималдығы азаяды, диарея, ауыз қуысы мен аңқа шырышты қабығының тітіркенуі, дерматит (соның ішінде перианальді дерматит), ішек микрофлорасының бәсеңдеуі, дисбактериоз, энтероколит, стоматит, глоссит

- бауыр функциясының бұзылуы

- сүйек кемігінің бәсеңдеуі, ретикулоцитопения, қанда гемоглобин

деңгейінің азаюы, анемия, лейкопения, гранулоцитопения,

тромбоцитопения, эритроцитопения, панцитопения

Сирек

- апластикалық анемия, гипопластикалық анемия, агранулоцитоз, бұрынғы эритроцитарлық түрлердің цитоплазмалық вакуолизациясы

- аллергиялық реакциялар: тері бөртпесі, қызба, ангионевротикалық ісіну, есекжем, анафилаксия.

Басқалары:

- гипертермия, салдарлы зең жұқпасы, бактериолизға реакция

(Яриш-Гексгеймер реакциясы), коллапс (балаларда)

Қолдануға болмайтын жағдайлар

- хлорамфениколға, өзге амфениколдарға және/немесе препараттың басқа компоненттеріне жоғары сезімталдық

- қан аурулары, қанның бәсең түзілуі

- тері аурулары (псориаз, экзема, зеңді зақымданулар)

- жүктілік және лактация кезеңі

- жедел респираторлық аурулар, баспа

- бауыр және/немесе бүйрек функциясының айқын бұзылулары

- глюкоза-6-фосфат дегидрогеназа ферментінің тапшылығы

- порфирия

- 6 жасқа дейінгі балаларға

Левомицетин-Дарницаны бақылаусыз қолдануға және оны жұқпалы үдерістердің жеңіл түрлерінде алдын алу мақсатында, әсіресе, балаларға қолдануға жол берілмейді.

Дәрілермен өзара әрекеттесуі

Хлорамфеникол Р450 цитохромының ферменттік жүйесін бәсеңдетеді, сондықтан оны эпилепсияға қарсы препараттармен (фенобарбитал, фенитоин), тікелей емес антикоагулянттармен (дикумарин, варфарин) бір мезгілде қолданғанда осы препараттар метаболизмінің әлсіреуі, шығарылуының баяулауы, қан плазмасындағы концентрацияларының ұлғаюы және олардың уыттылығының артуы болады.

Ішуге арналған гипогликемиялық препараттар (хлорпропамид, толбутамид). Хлорамфениколмен қолданғанда ішуге арналған гипогликемиялық препараттар әсерінің күшеюі білінеді (бауырдағы метаболизмінің бәсеңдеуі және қан плазмасындағы концентрацияларының жоғарылауы есебінен).

Фенобарбитал, рифампицин, рифабутин – оның бауырдағы метаболизмін жеделдету жолымен қан плазмасындағы хлорамфеникол концентрациясын төмендетеді.

Парацетамолмен бір мезгілде қолданғанда хлорамфениколдың жартылай шығарылу кезеңінің ұзаруын байқауға болады.

Фенитоин. Бір мезгілде қолданғанда қан плазмасындағы хлорамфеникол концентрациясының төмендеуін де, жоғарылауын да байқауға болады.

Циклоспорин – хлорамфениколмен бір мезгілде қолданғанда плазмадағы циклоспорин деңгейінің артуын байқауға болады. Осы препараттарды бір мезгілде қолданғанда циклоспорин концентрациясына мониторинг

жасау қажет.

Циклофосфамид – бір мезгілде қолдану циклофосфамидтің жартылай шығарылу кезеңін 7,5-тен 11,5 сағатқа дейін ұзартады.

Такролимус – хлорамфениколмен бір мезгілде қолданғанда плазмадағы такролимус деңгейінің артуын байқауға болады. Бір мезгілде қолданғанда такролимус дозасын түзету қажет.

Левомицетин пенициллиндер мен цефалоспориндердің бактерияға қарсы әсерін азайтады.

Макролидтер (эритромицин, олеандомицин, клиндамицин), линкозамидтер (линкомицин), полиенді антибиотиктер (нистатин, леворин) – хлорамфеникол осы препараттармен бір мезгілде қолданылғанда хлорамфениколдың осы препараттарды байланысқан күйден ығыстыруы немесе бактериялық рибосомалардың 50S суббірлігімен олардың байланысуын бөгеуі есебінен әсерлерінің өзара әлсіреуі білінеді.

Циклосерин – бір мезгілде қолдану хлорамфеникол нейроуыттылығын күшейтеді.

Қан түзілуін бәсеңдететін дәрілік заттар (сульфаниламидтер, цитостатиктер, циметидин, ристомицин) – бір мезгілде қолдану сүйек кемігі қызметінің бәсеңдеу қатерін және оның көріністерінің ауырлығын арттыруы ықтимал.

Құрамында эстроген бар ішуге арналған контрацептивтер, темір препараттары, фолий қышқылы, цианокобаламин – хлорамфеникол осы препараттар тиімділігін төмендетуі мүмкін.

Этанол – этанолды бір мезгілде қабылдағанда дисульфирамға ұқсас реакция (тері жабындарының гиперемиясы, тахикардия, жүрек айну, құсу, рефлекторлы жөтел, құрысулар) дамуы мүмкін.

Айрықша нұсқаулар

Препаратты дәрігердің бақылауымен ғана қолдану керек.

Хлорамфеникол сүйек кемігі функциясының күрделі бәсеңдеуіне әкелуі мүмкін, ол агранулоцитоз, тромбоцитопениялық пурпура немесе апластикалық анемияны дамытуы ықтимал. Қан түзілу жүйесі тарапынан болатын бұл зардаптар, әдетте, жоғары дозамен, ұзақ уақыт қолданумен немесе қайталанатын курстармен байланысты, бірақ олар салыстырмалы төмен дозаларын қолданғанда да туындауы мүмкін. Хлорамфениколды бұрыннан келе жатқан сүйек кемігі функциясының бәсеңдеуі немесе қан дискразиясы бар емделушілерге тағайындауға болмайды. Хлорамфениколды сүйек кемігі функциясын бәсеңдететін басқа дәрілік заттармен қолданбау керек. Препаратпен емдеу қауіпсіздігін арттыру үшін, егер мүмкін болса, оның қан сарысуындағы концентрациясына мониторинг жасаған жөн. Емдік диапазоны 5-15 мкг/мл құрайды. Мониторинг бауыр ауруларына шалдыққан емделушілерге, сондай-ақ егде жастағы емделушілерге, бүйрегі ауыратын науқастарға және хлорамфеникол өзара әрекеттесуі мүмкін басқа препараттар алатын тұлғаларға ерекше қажет.

Қолдану кезінде қан көрінісін бақылап отыру қажет. Қан элементтеріне кез келген зиянды әсер етуге қатысты деректер препаратпен емдеуді дереу тоқтатуға нұсқау бола алады.

Бұдан бұрын цитостатиктермен емделу немесе сәулелі ем организмде хлорамфениколдың жиналуына және сүйек кемігінің бәсеңдеуі түріндегі уытты реакциялардың дамуына, бауыр функциясының бұзылуына әкелуі мүмкін.

Бауыр жеткіліксіздігі бар емделушілерге азайтылған дозаларын тағайындау керек. Қан плазмасындағы хлорамфениколдың шектен тыс концентрациясы бүйрек жеткіліксіздігі ауыр емделушілерде әдеттегі дозасын қолданудан кейін де пайда болуы мүмкін: препарат дозасын азайту немесе қабылдаулар арасындағы аралықты ұзарту қажет.

Хлорамфениколды жеңіл жұқпаларды емдегенде немесе алдын алу мақсатында, сондай-ақ уыттылығы аз антибиотиктер жетімді болатын кез келген жұқпаларда қолдануға болмайды. Сонымен қатар қайталанатын курстардан және емді ұзаққа созып алудан аулақ болу керек.

Жүрек-қантамыр ауруларында және аллергиялық реакцияларға бейімділікте сақтықпен қолдану керек. Хлорамфеникол қолдану ауыз қуысының микробты жұқпалары жиілігінің артуына, жазылу үдерістерінің баяулауына және қызыл иектердің қанағыштығына әкеледі, бұл миелоуыттылық көрінісі болуы мүмкін. Стоматологиялық араласуларды мүмкіндігінше препаратпен емдеу басталғанша аяқтаған дұрыс.

Хлорамфеникол тағайындау жедел порфирия ұстамасына түрткі болуы мүмкін. Препарат порфириясы бар емделушілерге қолдануға қауіпті.

Хлорамфеникол иммундық жауаптың дамуына ықпал ете алады, оны белсенді иммунизация жүргізу кезінде тағайындауға болмайды.

Дәрілік препараттың автокөлікті немесе қауіптілігі зор механизмдерді басқару қабілетіне әсер ету ерекшеліктері

Препаратты атқаратын қызметі жоғары зейін қоюды және психомоторлық реакциялар шапшаңдығын талап ететін тұлғаларға сақтықпен қолдану керек.

Артық дозалануы

Симптомдары: «сұр синдром» (ерте жастағы балалардағы кардиоваскулярлық синдром), салыстырмалы артық дозаланғанда (даму себебі бауыр ферменттері жетілмеуінен және оның миокардқа тікелей уытты әсер етуінен болатын левомицетиннің жиналуынан болады) – терінің көгілдір-сұр түсі, дене температурасының түсіп кетуі, ырғақсыз тыныс алу, жүйке реакцияларының төмендеуі, жүрек-қантамыр жеткіліксіздігі, айналымдық коллапс, ацидоз, миокард өткізгіштігінің бәсеңдеуі, кома және өліммен аяқталу. «Сұр синдромды» бауыр және бүйрек функциясы бұзылған емделушілерде де байқауға болады және препараттың жинақталу салдарынан болады. «Сұр синдром» қан плазмасында хлорамфениколдың 50 мкг/мл-ден жоғары концентрациясында көрініс береді.

Емі. Асқазанды шаю, тұзды іш жүргізгіш, белсендірілген көмір қабылдау, жоғары тазартатын клизма. Ауыр жағдайларда – симптоматикалық ем,

гемосорбция.

Шығарылу түрі және қаптамасы

10 таблеткадан жарықтан қорғайтын поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамада.

Пішінді ұяшықты қаптамаларды медицинада қолданылуы жөніндегі мемлекеттік және орыс тілдеріндегі нұсқаулықтардың тиісті санымен бірге қорапшаға салмай-ақ топтық қаптамаға қаптауға болады.

Сақтау шарттары

Түпнұсқалық қаптамада, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Фармацевтикалық фирма «Дарница» ЖАҚ

Украина, 02093, Киев қ., Борисполь к-сі, 13.

Тіркеу куәлігі иесінің атауы және елі

«Фармацевтикалық фирма «Дарница» ЖАҚ, Украина

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы -

телефон/факс: (+ 380 44) 207 73 27

e-mail: vigilance@darnitsa.kiev.ua

http://www.darnitsa.ua