Индометацин Софарма (25 мг) (Indometacin)

• русский
• қазақша

• Скачать инструкцию медикамента

Саудалық атауы

Индометацин Софарма

Халықаралық патенттелмеген атауы

Индометацин

Дәрілік түрі

Ішекте еритін қабықпен қапталған таблетка, 25 мг

Құрамы

Бір таблетканың құрамында

белсенді зат: 25 мг индометацин,

қосымша заттар:

таблетка ядросының құрамы: лактоза моногидраты, бидай крахмалы, микрокристалды целлюлоза (101 типі), повидон К25, магний стеараты, коллоидты сусыз кремнийдің қостотығы, тальк.

қабықтың құрамы: метакрил қышқылы сополимерінің 30% дисперсиясы: этилакрилат (1:1); метилакрилаты сополимерінің 30% дисперсиясы: метакрилат метилі: метакрил қышқылы; натрий гидроксиді; полисорбат 80; пигментті суспензия – қоңыр (тальк, триэтилцитрат, титанның қостотығы (Е171), темірдің сары тотығы (Е172), темірдің қызыл тотығы (Е172), пропан-1,2 диол-альгинат, калий сорбаты); триэтил цитраты.

Сипаттамасы

Диаметрі 7 мм, қызыл сары-қоңыр түсті, дөңгелек, екі жақ беті дөңес, ішекте еритін қабықпен қапталған таблеткалар.

Фармакотерапиялық тобы

Қабынуға қарсы және ревматизмге қарсы препараттар. Қабынуға қарсы стероидты емес препараттар. Сірке қышқылының туындылары. Индометацин.

ATХ коды М01АВ01

Фармакологиялық қасиеттері

Фармакокинетикасы

Сіңуі

Ішке қабылдағаннан кейін қабылданған дозаның 80-90%-ға дейіні аш ішекте, және өте аз дәрежеде асқазанда сіңеді. Плазмада ең жоғары деңгейі 1-2 сағаттан соң білінеді.

Таралуы

Барлық тіндерге және ағзаларға таралады. Плацентарлық және гематоэнцефалдық бөгет арқылы өтеді. Синовиальді жарғақша арқылы буындарға өтеді, әрі оның синовиальді сұйықтықтағы концентрациясы плазмадағыдан жоғары болады. Плазмалық ақуыздармен 90-98%-ға байланысады және ақуыздармен байланыстағы басқа да дәрілік препараттарды ығыстырып шығаратын және бір мезгілде қолданғанда олардың емдік әсерін күшейтетін қабілеті бар.

Метаболизмі

Бауырда тотығу және конъюгациялану арқылы метаболизденеді.

Шығарылуы

Индометациннің жартылай шығарылу кезеңі 2,6 сағаттан 11,2 сағатқа дейін ауытқып отырады немесе ол орташа 5,8 сағатты құрайды. Бүйрек арқылы 60-75%-ы бөлініп шығады, олардың 10-20%-ы өзгермеген күйінде, ал қалған мөлшері өтпен және нәжіспен бірге бөлініп шығады. Емшек сүтімен бірге бөлініп шығады.

Фармакодинамикасы

Индометацин Софарма – индолсірке қышқылының туындысы және қабынуға қарсы стероидтық емес дәрілік препараттар тобына жатады. Қабынуға қарсы айқын әсері бар, ол фенилбутазонның және ацетилсалицил қышқылының әсерінен едәуір артық болады. Оның ауырсынуды басатын белсенділігі метамизол белсенділігімен шамалас. Антипиретикалық әсері бар. Индометацин циклооксигеназаны басу арқылы простагландиндер синтезін күшті бәсеңдететін әсер береді. Бұдан басқа, тромбоциттердің агрегациясын да және қабынған жерде липоксигеназаның, тиісінше, лейкотриеннің де белсенділігін азайтады; сондай-ақ эндогендік пирогендердің босап шығуын төмендетеді, лизосомалық ферменттердің белсенділігін жояды, бейтарап протеазаның белсенділігін басады. Тотықтырғыш фосфорлануды декупелдену және катехоламиндердің кері қармалуын басу, норадреналиннің алмасуын және белгілі ганглий бөгейтін әсерін күшейту сияқты басқа да маңызды әсерлері бар.

Қолданылуы

Қысқа мерзімдік симптоматикалық емдеуде:

- тірек-қимыл аппаратының қабыну және дегенеративтік ауруларындағы жедел және созылмалы ауыруларда: ревматоидты артритте; жедел және өршу сатысындағы созылмалы шорбуынданатын спондилоартритте (Бехтерев ауруы); подагра ұстамасында және подагралық артритте; псориаздық артритте; Рейтер ауруында;

- буын айналасы тіндерінің ауруларында: тендиниттерде, бурситтерде, тендобурситтерде, тендовагиниттерде, спортшылардағы жарақаттарда;

Қолдану тәсілі және дозалары

Tаблетканы тамақтанудан кейін ішке қолданады. Таблетканы судың мол мөлшерімен ішіп, тұтастай жұтады.

Симптомдарды бақылау үшін тиімді өте төмен дозаны ең қысқа мерзімге қолдана отырып, жағымсыз әсерлердің жиілігін азайтуға болады.

Ересектер және 18 жастан асқан жасөспірімдер

Бастапқы доза тәулігіне 2-4 рет 25-50 мг (1-2 таблетка) құрайды.

Емдік әсері жеткіліксіз болған кезде дозаны тәулігіне үш қабылдауға бөлінетін 150 мг-ге дейін арттырады. Ең жоғары тәуліктік дозасы 200 мг құрайды. Ұзақ уақыт емдегенде тәуліктік дозасы 75 мг-ден аспауы тиіс.

Подагра

Жедел подагралық ұстаманы басу үшін 100 мг құрайтын бастапқы дозаны тағайындайды, содан кейін емдеуді ауыру азайғанша тәулігіне 3 рет 50 мг дозада жалғастырады.

Егде жастағы (65 жастан асқан) емделушілер

Жағымсыз әсерлерінің жоғары қаупі бар. Ұсынылатын тиімді өте төмен доза ең қысқа мерзімге қолданылуы мүмкін. Асқазан-ішек жолынан қан кету мүмкін болғандықтан, емделушіні бақылауға алу қажет.

18 жасқа толмаған балалар

Индометацинді 18 жасқа дейінгі балаларға қолдануға болмайды, өйткені оларда препараттың қауіпсіздігі және тиімділігі жөнінде жеткілікті деректер жоқ.

Жағымсыз әсерлері

Жағымсыз әсерлері төменде жиілігі бойынша жіктелген. Жиілігі келесі үлгіде белгіленген: өте жиі (≥1/10), жиі (≥1/100 <1/10 дейін), жиі емес (≥1/1 000 <1/100 дейін), сирек (≥1/10 000 < 1/1 000 дейін), өте сирек (<1/10 000), жиілігі белгісіз (қолда бар мәліметтердің негізінде баға беру мүмкін емес).

Өте жиі:(10 емделушінің 1-уінен астамында пайда болуы мүмкін):

- асқазан-ішек бұзылулары. Көбіне егде жастағы емделушілерде пептидтік ойық жара, асқазан-ішек жолының тесілуі немесе қан кету (кейде өліммен аяқталатын) пайда болуы мүмкін.

Жиі:( 100 емделушінің 1-ден 10 дейінінде пайда болуы мүмкін):

- бас айналу, бас ауыру, ұйқышылдық, депрессия, шаршау

- жүректің айнуы, құсу, диарея, диспепсия, іш қату, іштің ауыруы

Жиі емес:(1 000 емделушінің 1-ден 10 дейінінде пайда болуы мүмкін):

- лейкопения, тромбоцитопения, агранулоцитоз, гемолитикалық анемия, апластикалық анемия, диссеминацияланған қантамырішілік ұю (ДҚҰ–синдромы)

- сұйықтықтың іркілуі, гипергликемия, глюкозурия, гиперкалиемия

- дімкәстік, үрейленгіштік, әлсіздік, зейінді жұмылдырудың нашарлауы, парестезияны қоса, бағыттан адасу, ұйқысыздық, ашушаңдық, шеткергі невропатия, жадының нашарлауы, психоздық реакциялар, естен тану, құрысулар, бұлшықет әлсіздігі, сенсетивтік бұзылулар, дизартрия, күйгелектік

- еріксіз қимылдау, сананың шатасуы

- деперсонализация, елестеулер, ұйқышылдық, құрысулар, эпилепсия

- паркинсонизм

- диплопия, көрудің көмескіленуі

- тахикардия, стенокардия, пальпитация, аритмия, ісінулер

- артериялық гипертензия, гипотензия

- метеоризм, мелена, гематемез, ойық жаралы стоматит, бұрыннан бар ойық жараның өршуі, ойық жаралы қолиттің өршуі, Крон ауруы

- бөртпемен немесе бөртпесіз қышыну, есекжем, петехиялар, экхимоздар

- протеинурия, гематурия, интерстициальді нефрит

- бүйрек функциясының жедел жеткіліксіздігі, нефроздық синдром

- папиллярлы некроз

Сирек:(10 000 емделушінің 1-ден 10 дейінінде пайда болуы мүмкін):

- сарғаюмен немесе сарғаюсыз уытты гепатит

Өте сирек: (10 000 емделушінің 1-уінде пайда болуы мүмкін):

- бронхтың түйілуі, демікпе ұстамалары, анафилактикалық немесе анафилактоидтық реакциялар

- естудің нашарлауы, құлақтың шыңылдауы

- ҚҚСД қолданумен байланысты жүрек функциясы жеткіліксіздігінің нашарлауы

Клиникалық зерттеулер және эпидемиологиялық деректер кейбір ҚҚСД қолдану (әсіресе жоғары дозаларда және ұзақ қолданғанда) артериялық тромбоздық оқиғалар қаупінің баяу жоғарылауымен (мысалы, миокард инфарктісі немесе инсульт) байланыстыруға болатынын көрсетеді.

- фульминантты гепатит

- эксфолиативті дерматит, пурпура, түйінді эритема, көп формалы эритема, буллезді бөртпелер, Стивенс-Джонсон синдромын және уытты эпидермальді некролизді қоса есептегенде.

Зертханалық және аспаптық зерттеу нәтижелеріне ықпалы:

Сарысулық аминотрансфераза (AЛT, AСT) деңгейлерінің жоғарылауы, билирубиннің өткінші жоғарылауы.

Қолдануға болмайтын жағдайлар

- Препараттың белсенді немесе қосымша заттарына аса жоғары сезімталдық

- Ацетилсалицил қышқылына немесе қабынуға қарсы стероидтық емес басқа да дәрілерге демікпелік ұстама, есекжем немесе ринит, мұрынның шырышты қабығының полипі сияқты клиникалық көріністер түрінде білінетін аса жоғары сезімталдық

- Бұрын ҚҚСД қолданудан асқазан-ішектік қан құйылулардың немесе тесілулердің болғаны жөнінде сыртартқылық деректер

- Белсенді немесе қайталанатын пептидтік ойық жара/асқазаннан және он екі елі ішектен қан кету (айғақталған ойық жараның немесе қан құйылудың екі немесе одан көп жағдайлары), ойық жаралы колит және/немесе энтероколит, Крон ауруы

- Жүрек функциясының ауыр жеткіліксіздігі, іштен туа біткен жүрек ақаулары

- Бауыр және бүйрек функциясының ауыр жеткіліксіздігі

- Индометацинді коронарлы шунттау жүргізген кезде (CABG) периоперациялық ауыруды емдеу үшін қолдануға болмайды

- Жүктілік және лактация кезеңі

- 18 жасқа толмаған балалар

- Гемофилия, гипокоагуляция және басқа да қан аурулары.

Дәрілермен өзара әрекеттесуі

Индометацинді мыналармен бір мезгілде қолданғанда:

• Басқа ҚҚСД, алкоголь: Индометацинді басқа ҚҚСД және алкогольмен бір мезгілде қолдану асқазан-ішек жолы тарапынан жағымсыз әсерлердің пайда болу қаупін арттырады.

• Дифлунизал: Индометациннің плазмалық деңгейін арттырады және бүйректік клиренсін төмендетеді. Өліммен аяқталатын асқазан-ішектік қан құйылулар пайда болуы мүмкін. Бұл біріктірілім ұсынылмайды.

• Дигоксин: Индометацин плазмада дигоксиннің концентрациясын арттыруы мүмкін (оның бүйрек арқылы бөлініп шығуын азайтады), бұл дозаны түзетуді және дигоксин деңгейін бақылауды қажет етеді.

• Литий тұздары: Индометацин литий тұздарының әсерін ұзартады және потенциялайды және литийдің уыттылығын арттырады, бұл литий деңгейін бақылап отыруды қажет етеді.

• Иммуносупрессорлар: Индометацинді және метотрексат мен циклоспорин сияқты иммуносупрессорларды бір мезгілде қолдану олардың уыттылығының күшеюіне әкеледі.

• Диуретиктер (несеп айдайтын): ҚҚСД диуретиктердің емдік тиімділігін төмендетеді (олардың тубулярлы секрециясының азаюына байланысты). Калий жинақтайтын диуретиктермен бірге қолданғанда гиперкалиемияның пайда болу қаупі жоғарылауы және тиазидтік диуретиктермен (триамтерен) біріктіріп қолданғанда бүйрек функциясының жедел жеткіліксіздігі қаупінің жоғарылауымен бүйрек функциясы төмендеуі мүмкін. Диуретиктер индометациннің нефроуыттылығын күшейтуі мүмкін.

• Гипертензияға қарсы дәрілер: Индометацин бір мезгілде қолданғанда АӨФ тежегіштерін және бета-блокаторлардың гипертензияға қарсы әсерін бәсеңдетуі мүмкін.

• Кортикостероидтар: Асқазан-ішектік ульцерациялар және қан құйылулар қаупі жоғарылайды.

• Антикоагулянттар: Тромбоциттік функцияның төмендеуі және асқазан-ішек жолының шырышты қабығына агрессивті әсер етуі салдарынан ульцерация және қан құйылулар қаупі артады.

Қан кету және протромбин уақытын бақылау қажет. Индометацин плазма ақуыздарымен байланысқан жерде кумаринді антикоагулянттармен бәсекелес түрде өзара әрекеттеседі, соның нәтижесінде олардың плазмалық концентрациялары жоғарылайды. Оларды бір мезгілде қолданған жағдайда индометацинді өте төмен дозада тағайындайды және протективтік агенттерді тағайындау мүмкіндігі талданады.

• Антиагреганттар және серотонинді кері қармайтын селективтік тежегіштер (SSRIs): Асқазан-ішектік қан кету қаупі жоғары.

• Хинолондар: Хинолондар мен индометацинді бірге қолдану эпилепсия немесе құрысулар жөнінде сыртартқылық деректері бар немесе онсыз емделушілерде құрысудың пайда болу қаупі артуы мүмкін.

• Пробенецид: Индометациннің экскрециясын баяулатады және уыттылығын арттырады.

• Диабетке қарсы дәрілер: Индометацин бір мезгілде қолданғанда гипо- немесе гипергликемиялық әсері байқалса да, диабетке қарсы пероральді дәрілердің және инсулиннің емдік тиімділігін өзгертпейді.

Айрықша нұсқаулар

Жалпы

- Жағымсыз әсерлерін өте қысқа мерзім ішінде симптомдарды бақылау үшін препараттың тиімді өте төмен дозасын пайдалана отырып, азайтуға болады (және төменде көрсетілген асқазан-ішектік және жүрек-қантамырлық қауіп факторларын).

- Индометацинді ЦОГ-2 селективтік тежегіштерін қоса, ҚҚСД тобына жататын басқа дәрілік препараттармен бір мезгілде қолдануға жол бермеген жөн.

- ҚҚСД тобына жататын дәрілік препараттарды қолданғанда, әсіресе 65 жастан асқан емделушілерде, бүйрек функциясының жеткіліксіздігі бар емделушілерде, бета-блокаторлармен, АӨФ тежегіштерімен және калий жинақтайтын диуретиктермен емделіп жүрген емделушілерде гиперкалиемияның даму қаупі бар. Мұндай емделушілерде қан сарысуындағы калий деңгейін бақылау қажет.

- Тағамдық өнімдерге және дәрілік заттарға аса жоғары сезімталдық біліністері бар емделушілерге, аллергиялық аурулары – мұрын поллинозы, бронх демікпесі, назальді полипозы бар науқастарға аса сақтықпен қолданылады.

Егде жастағы емделушілер (65 жастан асқан)

65 жастан асқан емделушілерге ҚҚСД қолдану жағымсыз әсерлерді, көбіне асқазан-ішектік қан құйылуларды немесе кейде өліммен аяқталатын тесілуді жиі туындатады.

Асқазан-ішектік қан құйылулар, ульцерациялар және тесілулер

- Асқазан-ішектік қан құйылулар, ульцерациялар және тесілулер (кейде өліммен аяқталатын) емдеу барысының кез келген уақытында барлық ҚҚСД қолданғанда, асқазан-ішек жолы тарапынан ескертетін симптомдар бар болғанда немесе онсыз немесе бұған дейінгі ауыр жағдайлар жөніндегі деректерде байқалады.

- Асқазан-ішек жолы тарапынан жағымсыз әсерлердің пайда болу қаупі ҚҚСД өте жоғары дозаларын қолданғанда, әсіресе қан құйылулармен асқынған немесе тесілуді қоса, ойық жара жөнінде сыртартқылық деректері бар емделушілерде және егде жастағы емделушілерде болады. Мұндай емделушілерде ҚҚСД емдеуді, протективтік дәрілік заттарды (мысалы, мизопростолды немесе протондық сорғы тежегіштерін) тағайындауға көңіл бөле отырып, мүмкіндігінше өте төмен дозадан бастаған жөн.

Бұл әрекет ацетилсалицил қышқылының немесе асқазан-ішектік асқынулар қаупін арттыратын басқа да дәрілік препараттардың төмен дозаларын (кортикостероидтар, антикоагулянттар, антиагреганттар, серотонинді кері қармайтын селективтік тежегіштер) бір мезгілде қолданған жағдайларда ұсынылады.

- ҚҚСД қолданған кезде өршуі мүмкін асқазан-ішек жолының басқа да аурулары (ойық жаралы колит, Крон ауруы) бар емделушілерді емдегенде аса сақтық қажет.

- Асқазан-ішек жолы тарапынан асқынулар қаупінің артуы алкогольді шамадан тыс пайдаланатын немесе шылымқор емделушілерде болады, сондықтан оларды емдеуді аса сақтықпен жүргізу қажет.

- Асқазан-ішек проблемалары жөнінде сыртартқылық деректері бар емдеушілердің (әсіресе егде жастағы науқастар) әсіресе емнің бас кезінде әдеттен тыс абдоминальді симптомдарды (әсіресе асқазан-ішектік қан құйылулар жөнінде) мәлімдеп отыруына кеңес берген жөн.

- Емделушілерді ульцерация немесе қан кету қаупін арттыруы мүмкін дәрілік заттармен (пероральді кортикостероидтар, варфарин сияқты антикоагулянттар, серотонинді кері қармайтын селективтік тежегіштер немесе ацетилсалицил қышқылы сияқты антиагреганттар) емдегенде аса сақ болу қажет етіледі.

- Асқазан-ішектік қан құйылулар және ульцерациялар пайда болған кезде дәрілік препаратты қолдануды тоқтатқан жөн.

Жүрек-қантамыр жүйесі және ми қан айналымы тарапынан бұзылулар

- Гипертензия және/немесе жүрек функциясының жеңілден орташаға дейінгі іркілген жеткіліксіздігі жөнінде сыртартқылық деректері бар емделушілерге тиісті бақылауды және кеңес берілуін қамтамасыз ету қажет, өйткені ҚҚСД емдеумен байланысты ісінулер және сұйықтықтың іркілуі жөнінде мәлімдемелер бар.

- Клиникалық зерттеулер және эпидемиологиялық деректер кейбір ҚҚСД (әсіресе жоғары дозаларда және ұзақ қолданғанда) қолданумен артериялық тромбоздық оқиғалар (мысалы, миокард инфарктісі немесе инсульт) қаупінің баяу жоғарылауын байланыстыруға болатындығын көрсетеді. Индометацинге қатысты мұндай қауіптің бар-жоқтығын анықтау үшін жеткілікті деректер жоқ.

- Бақыланбайтын гипертензиясы, жүрек функциясының іркілген жеткіліксіздігі, жүректің анықталған ишемиялық ауруы, шеткергі артериялар ауруы және/немесе қантамыр-ми аурулары бар емделушілерді индометацинмен оның тек пайда/қаупі арақатынасына мұқият баға берілгеннен кейін ғана емдеген жөн.

- Бұндай талқылаулар жүрек-қантамыр оқиғаларына қатысты қауіпті факторлары (мысалы, гипертензия, гиперлипидемия, қант диабеті, темекі тарту) бар емделушілерді ұзақ уақыт емдеуді бастамас бұрын қажет.

Тері реакциялары

Ауыр, соның ішінде өліммен аяқталатын тері реакциялары ҚҚСД қолданғанда өте сирек байқалады және эксфолиативтік дерматит, Стивенс-Джонсон синдромы, уытты эпидермальді некролиз жағдайларына қатысты. Аталған реакциялардың өте жоғары қаупі емнің бастапқы кезінде (алғашқы айда) білінеді. Дәрілік препаратты қолдануды аса жоғары сезімталдықтың алғашқы терілік немесе басқа да симптомдары пайда болғанда тоқтатқан жөн.

Бүйректік реакциялар

Бүйректі зақымдауы мүмкін болғандықтан, индометацин бүйрек аурулары бар (креатинин клиренсі минутына < 30 мл) науқастарға сақтықпен қолданылады.

Гематологиялық реакциялар

Сыртартқысында коагуляцияның бұзылғаны көрсетілген емделушілерге сақтықпен тағайындау қажет, өйткені дәрілік препарат простагландиндердің биосинтезін басады және тромбоциттердің функциясына ықпалын тигізеді.

Бауырлық реакциялар

Индометацинмен емдеу, ҚҚСД тобына жататын басқа да дәрілік препараттар сияқты, ұзақ қолданғанда бауыр функциясын өзгертуі мүмкін, бұл бауыр ферменттерін мезгіл-мезгіл бақылап отыруды қажет етеді.

Жұқпа жағдайлары

Дәрілік препараттың қабынуға қарсы әсер етуінің нәтижесінде, ол жедел қабыну симптомдарын бүркемелеуі мүмкін, бұл оны тағайындағанда бактериялық жұқпаның бар-жоқтығын анықтауды қажет етеді.

Психикалық реакциялар

Психикалық бұзылулары, депрессиясы, эпилепсиясы, паркинсонизмі бар науқастарға сақтықпен қолданылады, өйткені негізгі аурудың нашарлауына әкеп соғуы мүмкін.

Қосымша заттар

- Таблетканың құрамына қосымша зат ретінде лактоза кіреді. Сирек тұқым қуалайтын галактоза жақпаушылығы, Lapp лактаза тапшылығы немесе глюкоза-галактоза мальабсорбциясы бар емделушілер бұл дәріні қабылдамауы тиіс.

- Таблетканың құрамына қосымша зат ретінде бидай крахмалы кіреді. Бидай крахмалында глютеннің қалдық іздері ғана бар және бұл целиакиясы бар адамдар үшін қауіпсіз деп есептеледі.

Фертильділік, жүктілік және емшекпен қоректендіру

Жүктілік: ҚҚСД қолдану, простагландиндер синтезінің барлық басқа да тежегіштерін қолдану сияқты, жүктіліктің алғашқы айларында кездейсоқ түсік және мальформация (бүйректің зақымдануы, жүрек мальформациясы) қаупінің жоғарылауымен байланысты. Ұзақ уақыт жоғары дозаларды қолданғанда қаупі ұлғаяды.

Жүктіліктің соңғы 3 айында ҚҚСД қолдану анада және нәрестеде қан кету уақытының ұзаруына (антиагреганттық әсер, ол төмен дозаларды қолданғанның өзінде пайда болуы мүмкін) әкеледі және жатырдың жиырылуын басуы мүмкін, бұл босанудың баяулауына немесе ұзаққа созылуына әкеледі. Жүктіліктің соңғы триместрінде жоғары дозаларда қолданылған индометацин ұрықтың артериялық түтікшенің мезгілінен бұрын жабылуын, әрі қарай тұрақты өкпе гипертензиясын туындатуы мүмкін. Индометацин бүйректі зақымдауы мүмкін, ол бүйрек функциясының жеткіліксіздігіне және олигогидрамнионға дейін өршуі мүмкін.

Емшекпен қоректендіру: емшек сүтімен бірге шығарылатын болғандықтан, оны емшекпен қоректендіру кезеңінде қолдануға болмайды және емдеу кезінде бала емізуді тоқтату қажет.

Фертильділігіне ықпалы: дәрілік препаратты қолданған кезде бала көтере алатын жастағы әйелдерде фертильділіктің қайтымды түрде басылу қаупі бар.

Көлік құралын немесе қауіпті механизмдерді басқару қабілетіне дәрілік заттың ықпал ету ерекшеліктері

Индометацин Софарма жағымсыз әсерлерді (құлақтың шыңылдауын, бас айналуды, ұйқышылдықты, естудің және көрудің бұзылуларын) туындатуы мүмкін, олар зейіннің белсенділігін және рефлекстерді бұзуы және көлікті басқару мен машиналармен жұмыс жасау қабілетіне ықпалын тигізуі мүмкін.

Артық дозалануы

Симптомдары: жүректің айнуы, құсу, іштің ауыруы, бастың қатты ауыруы, бас айналу, жадының нашарлауы және бағыттан адасу. Өте ауыр жағдайларда парестезиялар және құрысулар байқалады.

Емі: симптоматикалық және демеуші. Гемодиализ тиімді емес.

Шығарылу түрі және қаптамасы

Қатты, түссіз, мөлдір ПВХ үлбірден/алюминий фольгадан жасалған пішінді ұяшықты қаптамада ішекте еритін қабықпен қапталған 30 таблеткадан.

Пішінді ұяшықты 1 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге бір жақ беті пигментпен жабылған картон қорапшаға салынған.

Сақтау шарттары

Түпнұсқалық қаптамасында, 25оС-ден аспайтын температурада.

Балалардың қолы жетпейтін жерде сақтау керек.

Сақтау мерзімі

5 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Софарма» АҚ, Болгария

Илинское шоссе к-сі 16, 1220 София, Болгария

Тіркеу куәлігі иесінің атауы және елі

«Софарма» АҚ, Болгария

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы:

«Софарма» АҚ саудалық өкілдігі Алматы қ., Қазақстан, 050036, «Мамыр 4» ы/а, үй 190

Телефон нөмірі: 7 (727) 380 01 03, 380 01 37, 380 01 42 (ішкі 108)

Факс нөмірі: 7 (727) 381 63 86

Электронды поштасы: info@sopharma.kz