Зиаген® (20 мг/мл)

• русский
• қазақша

• Скачать инструкцию медикамента

Саудалық атауы

Зиаген®

Халықаралық патенттелмеген атауы

Абакавир

Дәрілік түрі

Ішуге арналған ерітінді, 20 мг/мл

Құрамы

1 мл ерітіндінің құрамында

белсенді зат – 23,4 мг1 абакавир сульфаты (20,0 мг абакавирге баламалы),

қосымша заттар: сорбитол 70% (кристалды емес)2, натрий cахарині, натрий цитраты, сусыз лимон қышқылы, пропиленгликоль, метилпарагидроксибензоат, пропилпарагидроксибензоат, құлпынайдың жасанды хош иістендіргіші, бананның жасанды хош иістендіргіші, сұйылтылған хлорсутек қышқылы және/немесе натрий гидроксиді, тазартылған су.

Сипаттамасы

Жеміске тән иісі бар, мөлдір немесе сәл бозаңданған бозғылт-сары түсті ерітінді

Фармакотерапиялық тобы

Вирустарға қарсы тікелей әсер ететін препараттар. Нуклеозидтер – кері транскриптазаның тежегіштері. Абакавир.

АТХ коды J05AF06

Фармакологиялық қасиеттері

Фармакокинетикасы

Сіңуі

Препаратты ішке қабылдағаннан кейін абакавир асқазан-ішек жолынан тез және толық сіңіріледі. Ересектерде абсолютті биожетімділігі 83%-ға жуықты құрайды. Ең жоғары концентрацияға жетудің орташа уақыты (tmах) 1 сағатты құрайды.

Тағам абакавирдің сіңуін баяулатады және ең жоғары концентрациясын Сmах төмендетеді, бірақ плазмада AUC жалпы концентрацияға ықпалын тигізбейді, сондықтан Зиаген® препаратын тамақ ішуге қарамай-ақ қабылдай беруге болады.

Таралуы

Көктамырішілік енгізуден кейін ықтимал таралу көлемі 0,8 л/кг-ге жуықты құрайды, бұл дене тіндеріне абакавирдің еркін өтетіндігін көрсетеді. Абакавир жұлын-ми сұйықтығына жақсы өтеді: жұлын-ми сұйықтығындағы және қан плазмасындағы AUC арақатынасы 30-44% құрайды. Жұлын-ми сұйықтығында абакавир орташа концентрацияға 1,5 сағаттан соң жетеді және 0,14 мкг/мл құрайды.

Ең жоғары концентрацияға кем дегенде 4 сағаттан соң жетеді, бірақ бақыланатын мәндері абакавирдің IC50 (50% тежегіш концентрациясынан) 9 есе артық болады, ол 0.08 мкг\мл немесе 0.26 мкМ (микромоль) құрайды. Плазма ақуыздарымен байланысуы мардымсыз (~49%).

Метаболизмі

Зиаген®, негізінен, бауырда метаболизденеді. Қабылданған дозаның 2%-дан азы несеппен бірге өзгермеген күйінде бөлініп шығады. Зиаген® препаратының адам организміндегі метаболизмі көбіне алкогольдегидрогеназаның әсер етуіне және 5’-карбон қышқылы мен 5’-глюкуронидтің глюкуронидті коньюганттарының түзілуімен байланысты. Осы метаболиттердің мөлшері қабылданған дозаның 66%-ға жуығын құрайды. Метаболиттер несеппен бірге шығарылады.

Шығарылуы

Зиаген® препаратының жартылай шығарылу кезеңі 1,5 сағатты құрайды. Препаратты ішке тәулігіне 2 рет қабылдағаннан кейін препараттың айтарлықтай жинақталу жағдайы байқалған жоқ. Зиаген® препаратының шығарылуы бауыр метаболизмі арқылы жүреді, ары қарай метаболиттердің несеппен экскрециялануына ұласады. Қабылданған дозаның 83%-ға жуығы несеппен бірге метаболиттер және өзгермеген препарат түрінде шығарылады, қалған бөлігі нәжіспен бірге шығарылады.

Бауыр функциясының бұзылулары

Зиаген® көбіне бауыр арқылы метаболизденеді. Бауыр функциясының аздаған бұзылулары бар (Child-Pugh шкаласы бойынша 5-6 балл) пациенттерде абакавирдің AUC мәні орта есеппен 1,89 есеге, ал жартылай шығарылу кезеңі 1,58 есеге артады. Бауыр функциясының аздаған бұзылуы абакавир метаболиттерінің AUC мәніне ықпалын тигізбейді, бірақ метаболиттердің түзілу және шығарылу жылдамдығын төмендетеді. Емдік нәтижеге қол жеткізу үшін бауыр функциясының аздаған дәрежедегі бұзылулары бар пациенттер Зиаген® препаратын тәулігіне 2 рет 10 мл қабылдағаны жөн.

Бүйрек функциясының бұзылулары

Бүйрек функциясының бұзылуы бар пациенттерде дозаны төмендету қажет емес.

Балалар

Балаларда Зиаген® препаратының фармакокинетикалық параметрлері ересектердегі осындайларға ұқсас болады, алайда балаларда плазмалық концентрациялардың көрсеткіштері өте құбылмалы. Препаратты бір реттік қабылдауды екі реттік режимде дозаланғанмен салыстырып талдау AUC шамасына олардың ықпалын көрсеткен жоқ.

3 айлыққа толмаған балаларда препаратты қолдану жөніндегі деректер жеткіліксіз. Шектеулі клиникалық деректер препаратты өмірге келгеніне 30 күн толмаған нәрестелерге дене салмағының әр кг шаққанда 2 мг дозада тағайындағанда, AUC көрсеткіші препаратты жасы үлкенірек балаларға 8 мг/кг дозада тағайындаған кезде де осындай күйінде қалатынын көрсетті.

Егде жастағы пациенттер

65 жастан асқан пациенттерде абакавирдің фармакокинетикасы зерттелген жоқ.

65 жастан асқан егде пациенттерді емдеген кезде оларда бауыр, бүйрек және жүрек функцияларының төмендеуі жиі орын алатынын, олардың қатар жүретін аурулардан зардап шегіп жүргенін және, антиретровирустық дәрілермен қатар, басқа да көптеген препараттарды қабылдап жүргенін ескерген жөн.

Фармакодинамикасы

Зиаген® кері транскриптазаның нуклеозидтік тежегіштері класына жатады. Ол зидовудинге, ламивудинге, зальцитабинге, диданозинге немесе невирапинге резистентті АИТВ-1 изоляттарын қоса, іріктелген күшті АИТВ-1 және АИТВ-2 тежегіштері болып табылады. Зиаген® белсенді компонент карбовир 5-трифосфатқа (ТР) дейін жасушаішілік метаболизмге ұшырайды. Зиаген® препаратының әсер ету механизмі АИТВ кері транскриптазасы энзимінің тежелуі болып табылады, ол РНҚ тізбегінің үзілуіне және вирус репликациясының тоқтауына әкеледі.

Абакавир невирапинмен және зидовудинмен in vitro синергиялық өзара әсер береді. Жасушалар өсіріндісінде Зиагеннің вирустарға қарсы белсенділігі кері транскриптазаның нуклеозидтік тежегіштерімен (диданозин, эмтрицитабин, ламивудин, ставудин, тенофовир, зальцитабин, зидовудин) және кері транскриптазаның нуклеозидтік емес тежегіштерімен (невирапин) немесе протеаза тежегіштерімен (ампренавир) бірге қолданған жағдайда бәсеңдемейді.

Резистенттіліктің дамуы кері транскриптазаның белгілі бір кодондық аймақтарындағы (M184V, K65R, L74V және Y115F кодондары) генотиптік өзгерістермен байланысты. Абакавирге резистенттілік біршама баяу дамиды және IC50 мәнінің 8 есе артуына қол жеткізу үшін, жабайы вирус штаммымен салыстырғанда, көптеген мутацияның болуын қажет етеді. Зиаген® мен протеаза тежегіштері немесе кері транскриптазаның нуклеозидтік емес тежегіштері арасында айқаспалы резистенттіліктің дамуы екіталай. Зиаген® препаратымен, ламивудинмен және зидовудинмен бастапқы емнің тиімсіздігіне тек M184V мутациясы ғана себеп болады.

Вирустың бақыланбайтын репликациясы бар, алдын ала емделген және басқа нуклеозидтік тежегіштерге тұрақты пациенттердің клиникалық штаммдарында абакавирге сезімталдықтың клиникалық тұрғыдан төмендегені көріністелді.

Зиаген® гематоэнцефалдық бөгет арқылы өтеді және жұлын-ми сұйықтығында АИТВ-1 РНҚ деңгейін төмендетеді. Басқа антиретровирустық препараттармен біріктірілімінде Зиаген® АИТВ-инфекциямен байланысты неврологиялық асқынуларға жол бермеуде белгілі бір мәнге ие болуы мүмкін, сондай-ақ резистенттіліктің дамуын баяулатуы мүмкін.

Қолданылуы

- біріктірілген антиретровирустық ем құрамында ересектер мен балалардағы адамның иммунтапшылық вирусын (АИТВ инфекциясын) емдеуде

Қолдану тәсілі және дозалары

Зиаген® препаратын АИТВ инфекциясын емдеу тәжірибесі бар мамандар тағайындауы тиіс. Зиаген® препаратын тамақ ішуге қарамай-ақ қабылдай беруге болады.

Емдеу курсын дәрігер белгілейді.

Ересектер және дене салмағы >30 кг балалар

Ұсынылатын доза тәулігіне 2 рет 300 мг (15 мл) немесе тәулігіне бір рет 600 мг (30 мл) құрайды.

3 айлық жастағы және салмағы < 30 кг балалар

Тәулігіне екі рет дене салмағының әр кг шаққанда 8 мг немесе тәулігіне бір рет дене салмағының әр кг шаққанда 16 мг. Ең жоғары тәуліктік доза – 2 қабылдауға бөлінген 300 мл.

3 айлыққа толмаған балалар

Лимиттеуші клиникалық деректерге байланысты ұсынылмайды.

Бүйрек функциясы бұзылған пациенттер

Дозаны арнайы таңдау қажет емес.

Бауыр функциясы бұзылған пациенттер

Бауыр функциясының аздаған бұзылулары бар (Child-Pugh шкаласы бойынша 5-6 балл) пациенттер үшін Зиаген® препаратының ұсынылатын дозасы тәулігіне 2 рет 10 мл (200 мг) құрайды.

Қабылданбай қалған доза

Препаратты қабылдауды жіберіп алған жағдайда, мұны есіне түсіру бойына Зиаген® препаратын бірден қабылдаған жөн. Келесі дозаны әдеттегідей уақытта қабылдау керек. Пациент қосарлы дозаны қабылдамағаны жөн.

Егер Зиаген® препаратын қабылдау жағымсыз құбылыстарға немесе жағдайдың нашарлауына байланысты тоқтатылса, пациент емдеуді қайта жаңғыртар алдында аса жоғары сезімталдықтың ықтимал симптомдарын бақылау үшін дәрігерге жүгінгені жөн.

Жағымсыз әсерлері

Сипатталған жағымсыз реакциялардың көбісі үшін, олардың туындауы Зиаген® препаратын қабылдаумен, АИТВ инфекцияларын емдеуде пайдаланылатын әртүрлі дәрілік заттарды қабылдаумен, немесе ауру механизмімен байланысты екендігі-еместігі айқын емес.

Төменде аталған симптомдардың көбісі (жүректің айнуы, құсу, диарея, қызба, енжарлық/әлсіздік, бөртпе) әдетте абакавирге аса жоғары сезімталдығы бар пациенттерде болады. Сөйтіп, осы белгілердің кез келгені бар болатын пациенттер, онда аса жоғары сезімталдық реакцияларының бар-жоқтығын анықтау үшін, мұқият тексерілуі тиіс. Егер абакавирді қабылдау осы симптомдардың қандай да болсын бірінің дамуы себебінен тоқтатылса, емдеуді қайта жаңғырту емдеуші дәрігердің тікелей бақылауымен жүргізілуі тиіс.

Төменде аталған жағымсыз реакциялардың көбісінде емдеуге шектеу қойылған жоқ. Кездесу жиілігі былайша белгіленеді: өте жиі (≥1/10), жиі (≥1/100 және <1/10), жиі емес (≥1/1 000 және <1/100), сирек (≥1/10 000 және <1/1 000), өте сирек (<1/10 000, жекелеген жағдайларды қоса), белгісіз (жиілігіне баға беру мүмкін емес).

Клиникалық зерттеу деректері

Жиі

- анорексия, жүректің айнуы, құсу, диарея

- бас ауыру

- қызба, қажығыштық, әлсіздік

Постмаркетингтік зерттеулер

Жиі

- гиперлактатемия

- бөртпе

Сирек

- лактоацидоз

- май қыртыстарының қайта таралуы/ұлғаюы (басқа антиретровирустық препараттарды бірге қабылдауды қоса, мультифакторлы этиологиясы бар)

- панкреатит (Зиаген® препаратын қабылдаумен байланысы анық емес)

Өте сирек

- мультиформалы эритема, Стивенс-Джонсон синдромы, эпидермальді уытты некролиз

Аса жоғары сезімталдық

Клиникалық зерттеулерде аса жоғары сезімталдық реакциясы абакавир қабылдап жүрген, HLA-B*5701 аллелі бойынша теріс статусы бар пациенттердің 3,4%-да дамыды. Клиникалық зерттеулер 600 мг абакавирді күніне бір рет қабылдағанда аса жоғары сезімталдық деңгейі 300 мг абакавирді күніне екі рет қабылдағанда болатын деңгейлер шегінде қалғанын көрсетті.

Кейбір аса жоғары сезімталдық реакциялары өмір үшін қауіпті болды және, қолданылған сақтық шараларына қарамастан, өліммен аяқталуға әкеп соқты. Бұл реакция полиағзалық зақымдануды және организм жүйесінің зақымдануларын айғақтайтын симптомдардың көріністерімен сипатталады. Көптеген жағдайда аса жоғары сезімталдық реакциясы көріністерінің бірі қызба немесе бөртпе (макуло-папулезді немесе есекжем) болып табылады, алайда, аса жоғары сезімталдық реакциялары осы симптомдар жоқ болған кезде де байқалуы мүмкін.

Аса жоғары сезімталдық реакциялары Зиаген препаратымен емдеудің кез келген кезеңінде дамуы мүмкін, бірақ әдетте препаратты қабылдауды бастағаннан кейін алғашқы 6 апта ішінде (шамамен 11 күні) көрініс береді.

Аса жоғары сезімталдық реакцияларының белгілері және симптомдары төменде берілген. Олар клиникалық зерттеулер және пост-маркетингтік бақылаулар негізінде анықталды. Аса жоғары сезімталдық реакциясы бар, ең кемінде 10% пациентте көрініс берген симптомдар қалың қаріппен берілген.

- бөртпе (әдетте макуло-папулезді немесе уртикарлы)

- ойық жаралы стоматит, іштің ауыруы, жүректің айнуы, құсу, диарея

- ентігу, жөтел, тамақтың ауыруы, тыныс алу функциясының жеткіліксіздігі, респираторлы дистресс синдромы

- қызба, енжарлық/шаршау, дімкәстік, ісінулер, лимфоаденопатия, гипотензия, конъюнктивит, анафилаксия

- бас ауыру, парестезиялар

- лимфопения

- функциональді бауыр сынамалары көрсеткіштерінің жоғарылауы, гепатит, бауыр функциясының жеткіліксіздігі

- креатинин деңгейінің жоғарылауы, бүйрек функциясының жеткіліксіздігі

- миалгиялар, миолиз, артралгиялар, креатинфосфокиназа деңгейінің жоғарылауы

Бөртпе (сәйкесінше, 67%-ға қарсы 81%) және асқазан-ішек жолы тарапынан көріністер (сәйкесінше, 54%-ға қарсы 70%) балаларда ересектерге қарағанда жиі пайда болды.

Кейбір жағдайларда аса жоғары сезімталдық реакциялары респираторлы жүйе аурулары (пневмония, бронхит, фарингит), тұмау тәрізді аурулар, гастроэнтерит немесе басқа дәрілік заттарға реакциялар ретінде берілуі мүмкін. Аса жоғары сезімталдық реакцияларын диагностикалауды кідірту абакавир қабылдауды жалғастыруға және, сәйкесінше, қабылдау аясында өте ауыр аса жоғары сезімталдық реакцияларының дамуына әкеп соғуы мүмкін. Сондықтан, басқа диагноз болуы мүмкіндігіне қарамастан, осы жағдайдың өзінде, аса жоғары сезімталдық реакцияларына күмәнданғанда, аталған барлық симптомдардың аса жоғары сезімталдық реакциясымен ықтимал өзара байланысы тұрғысынан мұқият талқылануы тиіс. Егер аса жоғары сезімталдық реакциясының бар-жоқтығын анықтау мүмкін болмаса, Зиаген® препаратын және құрамында абакавир бар басқа препараттарды (КИВЕКСА, ТРИЗИВИР, ТРИУМЕК) қабылдау тоқтатылуы және келешекте ешқашан тағайындалмауы тиіс.

Аса жоғары сезімталдық реакциясымен байланысты симптомдар емдеуді жалғастырған кезде нашарлайды, ал абакавирді және құрамында абакавир бар басқа препараттарды қабылдауды тоқтатқаннан кейін олар әдетте жоғалады.

Аса жоғары сезімталдықтың қандай да болсын бір симптомының (бөртпе, қызба, дімкәстік/шаршау, гастроинтестинальді немесе респираторлы симптомдар) дамуы аясында абакавир қабылдауды тоқтатқаннан кейін, оны қабылдауды қайта жаңғыртқанда аса жоғары сезімталдық реакциясы дамыған бірнеше жағдайлар байқалды. Қайталанған аса жоғары сезімталдық реакциялары, бастапқыға қарағанда, өмірге қауіп төндіретін гипотензияға немесе өліммен аяқталуға әкеп соғатындай өте ауыр болуы мүмкін.

HLA-B*5701 статусына қарамай-ақ, пациенттерде аса жоғары сезімталдық реакциялары дамыған кезде Зиаген препаратын және/немесе құрамында абакавир бар басқа да препараттарды (КИВЕКСА, ТРИЗИВИР, ТРИУМЕК) қабылдау дереу тоқтатылуы және келешекте ол тіпті тағайындалмауы тиіс.

Сирек жағдайларда аса жоғары сезімталдықтың бұған дейінгі белгілері және симптомдары жоқ болғанда, абакавирмен емдеуді қайта жаңғыртқанда аса жоғары сезімталдық реакциялары дамуы мүмкін.

Аса жоғары сезімталдықтың тез ұлғая бастаған реакциялары, соның ішінде өмір үшін қауіпті реакциялар, Зиаген® препаратын қабылдауды тоқтатқанға дейінгі аса жоғары сезімталдықтың негізгі симптомдарының (тері бөртпесі, қызба, асқазан-ішек жолымен, тыныс алу ағзаларымен байланысты симптомдар, немесе енжарлық және дімкәстік сияқты конституциялық симптомдар) тек біреуі ғана болған пациенттерде Зиаген® препаратын қабылдауды қайта жаңғыртқаннан кейін пайда болды. Аса жоғары сезімталдық реакцияларының өте көп таралған оқшау симптомдары терідегі бөртпе болып табылады. Бұдан басқа, өте сирек жағдайларда аса жоғары сезімталдық реакциялары емдеуді қайта жаңғыртқан, және бұрын аса жоғары сезімталдық реакциясының симптомдары болмаған пациенттерде байқалды. Екі жағдайда да Зиаген® препаратын қабылдауды қайта жаңғырту шешімі қабылданса, бұл медициналық жәрдемге қол жеткізу оңай болатын жағдайларда ғана жасалуы тиіс.

Абакавирге осындай аса жоғары сезімталдық реакцияларының болуы мүмкін екендігі әрбір пациентке алдын ала ескертілуі тиіс.

Қолдануға болмайтын жағдайлар

- абакавирге немесе препараттың кез келген басқа компонентіне белгілі аса жоғары сезімталдық

- 3 айлық жасқа дейін

- фруктозаның туа біткен жақпаушылығы

- бауыр функциясының орташа немесе ауыр бұзылулары

Дәрілермен өзара әрекеттесуі

Іn vitro зерттеулер нәтижелерін және абакавир метаболизмін негізге алсақ, Зиаген® препаратының қатысуымен дәрілік өзара әрекеттесудің ықтималдылығы төмен болғаны байқалады.

Зиаген® препараты P450 цитохромы (мысалы, CYP3A4, CYP2C9 немесе CYP2D6 сияқты) ферменттерімен аздап метаболизденеді және осы ферменттік жүйеге тежегіш немесе индукциялағыш әсерін тигізбейді. Зиаген® препаратының протеазаның антиретровирустық тежегіштерімен және Р450 цитохромы жүйесінің ферменттерімен метаболизденетін басқа препараттармен өзара әрекеттесуі екіталай.

Абакавир, зидовудин және ламивудин арасында клиникалық тұрғыдан маңызды өзара әрекеттесу байқалған жоқ.

Бірге қолданған кезде этил спирті Зиаген® препаратының метаболизмін өзгертеді, соның нәтижесінде Зиаген® препаратының AUC мәні шамамен 41%-ға артады. Зиаген препаратының қауіпсіздігі бейінін ескере отырып, бұл өзгерістерді клиникалық тұрғыдан маңызды емес деп есептеуге болады. Абакавир этил спиртіне ықпалын тигізбейді.

Зиаген® препаратын 600 мг дозада және метадонды бірге тағайындау абакавирдің ең жоғары концентрациясының (Смах) 35%-ға төмендеуіне және оған жету уақытының 1 сағатқа (t max) артуына әкеледі, мұндайда AUC шамасы өзгерген жоқ. Осы өзгерулер абакавирдің фармакокинетикасына ықпалын тигізбейді, бірақ метадонның жүйелік клиренсінің 22%-ға дейін артуына әкелуі мүмкін. Бұл өзгерулер клиникалық тұрғыдан маңызды болып табылмайды, алайда, кейде метадон дозасын ары қарай титрлеуді талап етуі мүмкін.

Ретиноидтар, мысалы, изотретиноин алкогольдегидрогиназаның әсерімен белсенділігін жояды. Зиаген® препаратымен өзара әрекеттесуі мүмкін, бірақ бұған зерттеу жүргізілген жоқ.

Абакавир мен рибавириннің фосфорлану жолдары бірдей болғандықтан, осы препараттар арасында жасушаішілік ықтимал өзара әрекеттесу теориялық тұрғыдан мүмкін болады, бұл рибавириннің жасушаішілік фосфорланған метаболиттерінің төмендеуіне әкелуі және, осының ықтимал салдары ретінде, пегилирленген интерферондарды рибавиринмен бірге қабылдап жүрген, біріккен С гепатитінің инфекциясы бар пациенттерде С гепатитіне тұрақты вирусологиялық жауаптың төмендеуіне әкеп соғуы мүмкін. Әдебиеттерде абакавир мен рибавиринді бірге қолдануға қатысты қарама-қайшы клиникалық деректер берілген. Кейбір деректер құрамында абакавир бар антиретровирустық ем қабылдап жүрген, біріккен АИТВ инфекциясы/С гепатиті бар пациенттердің пегилирленген интерферон/рибавирин еміне оң клиникалық жауаптың төмендеуі қаупіне ұшырауы мүмкін екендігін айғақтайды. Екі препаратты бірге қолданғанда сақтық танытқан жөн.

Айрықша нұсқаулар

Абакавирге аса жоғары сезімталдық

Клиникалық зерттеулерде HLA B* 5701 аллелінің болуы абакавирге аса жоғары сезімталдық реакциялары дамуының, сирек жағдайларда өліммен аяқталуға әкеп соғатын, едәуір қаупімен (зерттелгендердің 5%-ында) астасатыны байқалды.

Емдеуші дәрігер Зиаген® препаратымен емдеуді бастар алдында пациенттерде HLA B*5701 аллерінің бар-жоқтығына скрининг жүргізудің маңыздылығына көңіл бөлуі тиіс. Сондай-ақ скрининг жүргізу осы препаратты бұрын қабылдаған және абакавирге толеранттылықтың бар екендігін көрсеткен, HLA B*5701 статусы белгісіз пациенттерде Зиаген® препаратымен емдеуді қайта жаңғыртар алдында ұсынылады. HLA B*5701 аллелінің тасымалдаушысы болғанда абакавирді қолдану ұсынылмайды; құрамында абакавир бар препараттар тек қатаң медициналық бақылаумен ғана және потенциалды пайдасы ықтимал қаупінен артық болған жағдайда ғана тағайындалуы мүмкін.

Зиаген® препаратын қабылдап жүрген пациенттерде аса жоғары сезімталдық реакциясына күмәнданғанда клиникалық диагноз клиникалық деректерге негізделуі тиіс. Тіпті HLA B*5701 аллельдерінің тасымалдаушысы болмаған жағдайдың өзінде, қолда бар клиникалық деректер негізінде аса жоғары сезімталдық реакциясы дамуының бар-жоқтығын анықтау мүмкін болмағанда, Зиаген® препаратын қабылдауды тоқтату және, өліммен аяқталу қаупінің мүмкін болуына байланысты, келешекте құрамында абакавир бар басқа препараттарды тағайындамау қажет.

Аса жоғары сезімталдық реакциясы полиағзалық зақымдануды айғақтайтын симптомдармен білінеді. Көптеген жағдайларда аса жоғары сезімталдық синдромы көріністерінің бірі қызба немесе бөртпе болып табылады, алайда аса жоғары сезімталдық реакциялары басқа да симптомдармен (шаршау, дімкәстік, гастроинтестинальді симптомдар, мысалы, жүректің айнуы, құсу, диарея, іш тұсының ауыруы сияқты; диспноэ, тамақтың жыбырлауы, жөтел, кеуде қуысы аймағында инфильтраттар сияқты респираторлы симптомдар) қатар жүруі мүмкін.

Аса жоғары сезімталдық реакциялары Зиаген® препаратымен емдеудің кез келген кезеңінде дамуы мүмкін, бірақ әдетте препарат қабылдауды бастаған алғашқы 6 апта ішінде білінеді. Зиаген® препаратын қабылдауды тоқтатқан кезде аса жоғары сезімталдық симптомдары, әдеттегідей, қайтты. Емдеуді жалғастырған кезде симптомдар күшейеді, бұл пациенттің өміріне қатер төндіруі мүмкін.

HLA B*5701 статусына қарамай-ақ, пациент аса жоғары сезімталдықтың кез келген симптомы дамыған кезде мұны емдеуші дәрігерге дереу айтуы тиіс. Аса жоғары сезімталдық реакциясының диагнозы айғақталған жағдайда Зиаген® препаратын қабылдауды дереу тоқтатқан жөн. Аса жоғары сезімталдық реакциясы дамығанда Зиаген® препаратын және құрамында абакавир бар кез келген басқа өнімдерді (КИВЕКСА, ТРИЗИВИР, ТРИУМЕК) ешқашан қайталап тағайындауға болмайды, өйткені өмірге қауіп төндіретін артериялық гипотонияны қоса, өте ауыр симптомдар бірнеше сағаттың ішінде қайта жаңғыруы және өліммен аяқталуға әкеп соғуы мүмкін.

Диагностиканы кідіртуге жол бермеу және ықтимал қауіптерді төмендету үшін, басқа диагноз (мысалы, тыныс алу ағзаларының аурулары, тұмау тәрізді аурулар, гастроэнтерит немесе басқа да дәрілік препараттарға реакциялар) болуы мүмкін екендігі анықталмаған жағдайдың өзінде, аса жоғары сезімталдық реакциясына күдіктенген жағдайда, Зиаген® препаратын қабылдауды тоқтату қажет. Зиаген® препаратын және құрамында абакавир бар басқа да препараттарды (КИВЕКСА, ТРИЗИВИР, ТРИУМЕК), тіпті вирустарға қарсы басқа да баламалы препараттарды қабылдауға осыған ұқсас симптомдар дамыса да, қайталап тағайындауға болмайды.

Аса жоғары сезімталдық реакциялары жөнінде жыртылмалы ескерту кәртішкесі Зиаген® препаратының картон қорабының бір бөлігі болып табылады.

HLA B*5701 аллелінің бар екендігіне қарамастан, егер Зиаген® препаратымен емдеу тоқтатылса және оны жалғастыру жөнінде шешім қабылданса, аса жоғары сезімталдық реакциясының симптомдары біліністерінің бар-жоқтығын анықтау үшін, препаратты тоқтату себептерін мұқият талқылау қажет. Егер аса жоғары сезімталдық реакциясының болуы жоққа шығарылмаса да, Зиаген® препаратын және құрамында абакавир бар басқа да препараттарды қабылдау қайта жаңғыртылмауы тиіс.

Аса жоғары сезімталдықтың қандай да болсын бір симптомының (бөртпе, қызба, дімкәстік/шаршау, гастроинтестинальді немесе респираторлы симптомдар) дамуы аясында абакавир қабылдауды тоқтатқаннан кейін, оны қабылдауды қайта жаңғыртқанда аса жоғары сезімталдық реакциясы дамыған бірнеше жағдайлар байқалды. Егер емдеуді қайта жаңғырту шешімі қабылданса, препаратты қабылдау емдеуші дәрігердің тікелей бақылауымен жүргізілуі тиіс.

Кейбір жағдайларда аса жоғары сезімталдықтың бұған дейінгі белгілері және симптомдары жоқ болған кезде абакавирмен емдеуді қайта жаңғыртқанда аса жоғары сезімталдық реакциялары дамуы мүмкін.

Егер емдеуді қайта жаңғырту шешімі қабылданса, препаратты қабылдау пациентке дереу жәрдем көрсетілу мүмкіндігі бар болғанда ғана жүзеге асырылуы тиіс.

Зиаген® препаратын тағайындаған кезде дәрігер аса жоғары сезімталдық реакциясы жөнінде келесі деректерден пациенттің хабардар екендігіне сенімді болуы тиіс:

- пациент Зиаген® препаратына болуы мүмкін аса жоғары сезімталдықтың өмірге қауіп төндіретін симптомдармен көрініс беретін немесе өліммен аяқталуға әкеп соғатын реакциялары жөнінде, сондай-ақ HLA B*5701 аллелінің тасымалдаушысы болған жағдайда аса жоғары сезімталдық реакциясының даму қаупінің ұлғаятыны жөнінде білуі тиіс

- пациент HLA B*5701 аллельдері жоқ болғанның өзінде Зиаген® препаратын қабылдауға аса жоғары сезімталдық реакциясының дамуы мүмкін екендігін білуі тиіс. Егер пациентте аса жоғары сезімталдық реакциясымен байланысты болуы мүмкін симптомдар байқалса, ол емдеуші дәрігерге ДЕРЕУ ҚАРАЛУЫ ТИІС

- абакавирге аса жоғары сезімталдығы бар пациенттер HLA B*5701 статусына қарамастан, Зиаген препаратын немесе құрамында абакавир бар басқа препаратты ешқашан қабылдамауы керек екендігін білуі тиіс

- аса жоғары сезімталдық реакциясы дамығаннан кейін Зиаген® препаратымен емделуді өздігінен қайта жаңғыртуға жол бермеу үшін, пациент қалған таблеткаларды дәрігерге қайтарғаны жөн

- Зиаген® препаратын қабылдауды қандай да бір себептен тоқтатқан пациенттер препарат қабылдауды қайта жаңғыртар алдында дәрігерден кеңес алуы тиіс

- пациенттер Зиаген® препаратын қолдану жөніндегі нұсқаулықты мұқият оқып шығуы және, қаптамаға салынған, аса жоғары сезімталдық реакциялары жөнінде ақпараты бар, жыртылмалы ескерту кәртішкесін өзінде ұстауы тиіс

Сүт қышқылды ацидоз/ стеатозбен бірге айқын гепатомегалия

Нуклеозидтер аналогтары тобының антиретровирустық препараттарын монотерапия ретінде немесе кешенді ем құрамында қабылдаған, АИТВ жұқтырған пациенттерде (көбіне әйелдерде) сүт қышқылды ацидоз және бауырдың майлы дистрофиясы бар гепатомегалия жағдайлары (соның ішінде өліммен аяқталған жағдайлар) сипатталды.

Сүт ацидозының дамуын көрсететін клиникалық ерекшеліктерге жалпы әлсіздік, анорексия және салмақтың түсініксіз кездейсоқ жоғалуы, асқазан-ішектік және тыныс алу симптомдары (ентігу және тыныстың жиілеуі) жатады.

Зиаген® препаратымен емдеген кезде, әсіресе пациенттерде бауыр аурулары дамуының қауіп факторлары бар болғанда, сақтық танытқан жөн. Гепатит белгілері бар немесе онсыз сүт қышқылды ацидоздың клиникалық немесе зертханалық (тіпті трансаминазалардың деңгейі жоғарыламағанның өзінде, гепатомегалияны және стеатозды қамтуы мүмкін) белгілері пайда болған жағдайда Зиаген® препаратын қабылдауды тоқтатқан жөн.

Липодистрофия/май қыртыстарының қайта таралуы

Біріктірілген антиретровирустық ем жүргізілген кейбір пациенттерде жалпы семіздікті қоса, организмдегі майдың қайта таралуы/жиналуы, дорсоцервикальді семіздік (Буффало өркеші), шеткергі май қыртыстары мөлшерінің азаюы, беттің арықтауы, сүт безінің үлкеюі, сарысуда глюкоза деңгейі мен липидтер деңгейлерінің жоғарылауы байқалды.

Липодистрофияға жататын жағымсыз әсерлер протеаза тежегіштерінің немесе кері трнаскриптазаның нуклеозидтік тежегіштерінің класына жататын кез келген препаратты қабылдағанда кезде дамуы мүмкін. Алайда, қолда бар деректер аталған класқа жататын әртүрлі препараттарды қабылдаған кездегі даму қаупі бірдей болмайтындығын айғақтайды.

Бұдан басқа, липодистрофияның дамуына, мысалы, АИТВ инфекцияның бірігуі, егде жас сияқты көптеген факторлар мүмкіндік береді және антиретровирустық ем жүргізу ұзақтығы маңызды, мүмкін, синергиялық рөл атқаруы мүмкін.

Осы бұзылыстардың кейіннен болатын зардаптары қазіргі таңда белгісіз.

Клиникалық зерттеулер кезінде организмде майдың қайта таралу белгілеріне көңіл бөлген жөн. Сарысудағы липидтердің деңгейін және қандағы глюкоза деңгейін мұқият бақылау қажет. Қажет болған жағдайда липидтік алмасудың бұзылуына тиісінше ем жүргізіледі.

Иммунитет реактивациясының қабыну синдромы (ИРҚС)

Антиретровирустық емнің (АРЕ) басында күрделі иммунтапшылығы бар, АИТВ жұқтырған пациенттерде асимптомды қабыну реакциясы немесе қалдық шартты-патогендік инфекциялар онымен қатар жүретін аурулардың клиникалық симптомдарын нашарлатуы мүмкін. АРЕ бастағаннан кейін әдетте алғашқы бірнеше апта немесе айлар ішінде цитомегаловирусты ринит, жайылған және/немесе ошақтық микобактериялық инфекциялар және пневмоцистті пневмония байқалды. Кез келген қабыну симптомдары дер кезінде анықталуы тиіс және, қажет болғанда, қабынуға қарсы тиісті ем жүргізілуі тиіс. Зиаген® препаратын қабылдаған кезде сондай-ақ аутоиммундық бұзылулар да (полимиозит, Джуллиан-Барр синдромы, диффузиялы уытты зоб) кездесті, дегенмен, ауру ұстамаларының уақыты барынша ауытқымалы және Зиаген® препаратымен емдеуді бастағаннан кейін көп айдан кейін басталуы мүмкін.

Миокард инфарктісі

Экспериментальді зерттеулер миокард инфарктісі мен абакавирді қолдану арасындағы байланысты көрсетті. Негізінен антиретровирустық ем қабылдап жүрген пациенттер зерттелді. Клиникалық зерттеу деректері миокард инфарктісі жағдайларының шектеулі санын көрсетті және қауіптің аздап жоғарылайтынын теріске шығаруға болмайды. Экспериментальді топтардан және рандомизацияланған зерттеулерден алынған қолда бар жалпы деректер біршама дәйексіздікті көрсетеді, сондықтан абакавирмен емдеу мен миокард инфарктісінің даму қаупі арасында себеп-салдарлық байланысты айғақтай да, жоққа шығара да алмайды. Қауіптің ықтимал ұлғаюын түсіндіру үшін анықталған бірыңғай биологиялық механизм казіргі таңға дейін жоқ. Зиаген® препаратын тағайындаған кезде барлық қауіп факторларын (темекі тарту, гипертония және гиперлипидемия) барынша азайтуға тырысу үшін шаралар қабылдануы қажет.

Остеонекроз

Этиологиясы көп факторлы (кортикостероидтарды пайдалануды, алкогольді пайдалануды, иммунитеттің қатты төмендеуін, дене салмағының жоғары индексін қоса) деп саналса да, әсіресе АИТВ ауруларының кеш сатылары бар және/немесе біріктірілген антиретровирустық емді ұзақ қабылдап жүрген пациенттерде остеонекроз жағдайлары жөнінде мәлімделді. Егер пациенттер буындарының сырқырауын және ауыруын, буындардың қимылсыздығын және қозғалудың қиындауын басынан кешірсе, олардың дәрігерге қаралғаны жөн.

Оппортунистік инфекциялар

Зиаген® препаратын немесе басқа да антиретровирустық препараттарды қолданып жүрген пациенттерде оппортунистік инфекциялар және АИТВ инфекцияларының басқа да асқынулары дамуы мүмкін, сондықтан пациенттер АИТВ инфекцияларын емдеу тәжірибесі бар дәрігерлердің ұдайы бақылауында болуы тиіс.

Инфекцияның жұғуы

Пациенттер Зиаген® препаратын қоса, қазіргі антивирустық ем жыныстық қатынас кезінде немесе инфекциясы бар қанды құйған кезде АИТВ-нің басқа адамдарға жұғуына кедергі жасай алмайтындығынан хабардар болуы тиіс. Қауіпсіздіктің тиісті шараларын сақтау қажеттілігін есте ұстаған жөн.

Жүрек-қантамыр аурулары

Зиаген® препаратын қамтитын, антиретровирустық ем тағайындаған кезде, жүректің ишемиялық ауруының дамуына жол бермеу үшін, гипертония, гиперлипидемия, қант диабеті, темекі тарту сияқты барлық қауіп факторларын төмендетуге бағытталған сақтық шаралары қолданылуы тиіс.

Қосымша заттар

Ішуге арналған Зиаген® ерітіндісінде 340 мг/мл сорбитол бар. Ұсынымдарға сәйкес қабылдағанда әрбір 15 мл дозада шамамен 5 г сорбитол бар. Бұл препаратты, фруктозаның жақпаушылығына байланысты, тұқым қуалаған сирек аурулары бар пациенттердің қабылдамағаны жөн. Сорбитолдың жеңіл іш жүргізетін әсері бар. Сорбитолдың калориясы 2,6 ккал/г құрайды.

Ішуге арналған Зиаген® ерітіндісінде сондай-ақ метилпарагидроксибензоат және пропилпарагидроксибензоат бар, олар аллергиялық реакцияларды туындатуы мүмкін (мүмкін, кідіріспен).

Фертильділік

Жануарларға жүргізілген зерттеулер абакавирдің ұрпақ өрбіту функциясына ықпалын тигізбейтінін көрсетті.

Жүктілік

Жүкті әйелдердің антиретровирустық Регистрінде абакавирді жүктілік кезінде және босанғаннан кейін қабылдаған 2000 әйел зерттелді. Алынған деректер жатырішілік ақаулардың пайда болуының жоғары қаупі жоқ екендігін көрсетеді, дегенмен, жүкті әйелдерде абакавирді қолдану жөнінде бақыланатын клиникалық зерттеулер жоқ. Зиаген препараты ана үшін күтілетін пайдасы ұрық үшін потенциалды қаупінен басым болған жағдайда ғана қолданылуы мүмкін.

Анасы антиретровирустық ем қабылдаған жаңа туған нәрестелерде сүт қышқылы деңгейінің аздап өткінші жоғарылағаны байқалды, бұл митохондриальді дисфункциямен байланысты болуы мүмкін. Осы фактінің клиникалық маңызы белгісіз. Дамудың кідіруі, құрысу және басқа да неврологиялық ауытқушылықтар байқалды, алайда осы жағдайлар мен жатырішілік даму кезінде антиретровирустық препараттарды қабылдау арасында байланыс анықталған жоқ. Инфекцияның вертикальді түрде жұғуына жол бермеу үшін жүкті әйелдерде антиретровирустық препараттарды қолданудың ағымдағы нұсқауларына бұл фактілердің қатысы жоқ.

Лактация

АИТВ емшек сүтіне өтетін болғандықтан, әйелдер вирустың жұғуына жол бермеу үшін баланы емізбегені жөн. Егер жасанды тамақтандыру мүмкін болмаса, антиретровирустық ем аясында емшек емізу жөніндегі ресми жергілікті нұсқауларға жүгіну қажет. Абакавирді тәулігіне 300 мг дозада қабылдағанда емшек сүтіндегі абакавир концентрациясының плазмаға арақатынасы 0.9 құрады. Нәрестелердің көбісінде плазмадағы абакавир деңгейі анықталған жоқ (сезімталдық шегі – 16 нг/мл). Карбовир трифосфатының (абакавирдің белсенді метаболитінің) жасушаішілік мөлшері анықталмағандықтан, сарысудағы абакавир концентрациясының клиникалық маңызы анықталған жоқ.

Көлік құралын немесе қауіпті механизмдерді басқару қабілетіне дәрілік заттың ықпал ету ерекшеліктері

Жағымсыз әсерлердің даму мүмкіндігін ескеріп, автомобиль басқарғанда немесе қозғалыстағы механизмдермен жұмыс жасағанда сақтық танытқан жөн.

Артық дозалануы

Симптомдары: 1200 мг дозаны және күндік 1800 мг дозаны бір реттік қолдану кезінде күтілмеген жағымсыз реакциялардың туындағаны жөнінде мәлімдемелер болған жоқ. Зиаген препаратының өте жоғары дозаларының әсері белгісіз.

Емі: уытсыздану белгілерін анықтау мақсатында пациенттің жағдайын бақылау және қажет болғанда демеуші ем жүргізу. Абакавирдің гемодиализ немесе перитонеальді диализ арқылы шығарылатын-шығарылмайтыны белгісіз.

Шығарылу түрі және қаптамасы

Ішуге арналған ерітінді, 20 мг/мл.

Балалардың ашып тастауына жол бермейтін қорғанышы, бұрап жабылатын қалпақшасы бар, тығыздығы жоғары полиэтиленнен жасалған құтыға препарат 240 мл-ден құйылған.

Картон қорапқа адаптерімен, сыйымдылығы 10 мл дозаланған еккішімен және медициналық қолдану жөніндегі мемлекеттік және орыс тілдеріндегі нұсқаулықпен бірге 1 құтыдан салынған.

Сақтау шарттары

30ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Ашылған құтыны 2 айдан артық сақтамау керек

Жарамдылық мерзімі өткен препаратты қабылдауға болмайды

Дәріханалардан босатылу шарттары

Рецепт арқылы

Өндіруші

ГлаксоСмитКляйн Инк., Канада

(7333 Mississauga Road North, Mississauga, Ontario, Canada, L5N 6LА)

Қаптаушы

ГлаксоСмитКляйн Инк., Канада

(7333 Mississauga Road North, Mississauga, Ontario, Canada, L5N 6LА)

Тіркеу куәлігінің иесі

ViiV Healthcare ULC, Канада

(8455 Route Transcanadienne, Montreal, Quebec, Canada, H4S 1Z1)

Зиаген® ViiV Healthcare компаниясы тобының саудалық таңбасы болып табылады

Қазақстан Республикасы аумағында тұтынушылардан өнім (тауар) сапасы жөніндегі шағымдарды қабылдайтын ұйымның мекенжайы

Қазақстандағы ГлаксоСмитКляйн Экспорт Лтд өкілдігі

050059, Алматы қ., Фурманов-сі, 273

Телефон нөмірі: +7 727 258 28 92,

Факс нөмірі: + 7 727 258 28 90

Электронды поштасы: kaz.med@gsk.com

Медициналық қолдану жөніндегі нұсқаулықтың жаңа версиясын www.dari.kz сайтынан қараңыз

1 - абакавир сульфатының көрсетілген мөлшері абакавирге 1.17 коэффициенті жәрдемімен қайта есептелген

2 - 70% сорбитол (кристалды) ЕФ* 70% сорбитолға (кристалды емес) ЕФ* алмастырылуы мүмкін