Даласбин

Даласбин

Даклатасвир

Үлбірлі қабықпен қапталған таблеткалар

Бір таблетканың құрамында

Белсенді зат - 60.00 мг даклатасвир (66.00 мг даклатасвир гидрохлориді түрінде)

қосымша заттар: сусыз лактоза, микрокристалды целлюлоза (Авицел PH 102), натрий кроскармеллозасы, сусыз коллоидты кремнийдің қостотығы (Аэросил 200), магний стеараты

қабығы: Опадри® II жасыл 31F21443, құрамы: лактоза моногидраты, гипромеллоза, титанның қостотығы (Е 171), макрогол, D&C сары №10 алюминий лагы, «күн батар түстес» сары FCF (Е 110) (алюминий лагы), жылтыр көк FCF (Е 133) (алюминий лагы)

Дөңгелек пішінді, екі беті дөңес, жасыл түсті таблеткалар.

Вирусқа қарсы тікелей әсер ететін дәрілер. Вирусқа қарсы басқа да дәрілер. Даклатасвир.

АТХ коды J05AX14

Фармакокинетикасы

Даклатасвирдің фармакокинетикалық сипаттары дені сау ересек еріктіер мен созылмалы СВГ инфекциясы бар пациенттерде бағаланды. Тәулігіне 1 рет 60 мг даклатасвирдің пэгинтерферон альфа және рибавиринмен үйлестірілген бірнеше реттік пероральді дозаларынан кейін 1 генотипімен созылмалы СВГ инфекциясы бар, бұрын емделмеген пациенттерде, геометриялық орташа мәндері (КВ, %) даклатасвир үшін: Cmax - 1534 (58) нг/мл, AUC0-24h - 14122 (70) нг·сағ/мл, Cmin - 232 (83) нг/мл құрады.

Сіңірілуі

Даклатасвир, таблетка түрін бірнеше реттік пероральді дозаларда қабылдағаннан кейін жылдам сіңіріледі; плазмадағы ең жоғарғы концентрацияларына 1-2 сағаттан соң жетеді.

Cmax, AUC және Cmin мәндері даклатасвир үшін дозасына іс жүзінде пропорционалды жоғарылаған. Тепе теңдік жағдайына 4 күн тәулігіне 1 рет қолданғаннан кейін жеткен. 60 мг дозасында даклатасвирдің әсері дені сау субъектілер мен СВГ бар пациенттерде ұқсас болған.

Invitro және invivo зерттеулер, даклатасвир Р-гликопротеиннің (P-gp) субстраты болып табылатындығын көрсетті. Таблеткалар түріндегі препараттың абсолюттік биожетімділігі 67% құрайды.

Ішу арқылы қабылдағаннан кейінгі сіңірілуіне ас ішудің әсері

Дені сау субъектілерде даклатасвирдің 60 мг таблеткасын майлылығы жоғары ас ішкеннен кейін қолдану, даклатасвирді аш қарында қолданумен салыстырғанда, Cmax және AUC мәндерін сәйкесінше 28% және 23%-ға төмендеткен. Даклатасвирдің 60 мг таблеткасын жеңіл ас ішкеннен кейін қолдану даклатасвирдің әсер ету деңгейінің төмендеуіне алып келген жоқ.

Таралуы

Тепе теңдік күйінде даклатасвирдің ақуыздармен байланысу дәрежесі СВГ бар пациенттерде 99%-ға жуықты құраған және зерттеліп отырған (1 мг-ден 100 мг дейінгі) ауқымында дозасына тәуелді болмаған. Даклатасвирдің 60 мг таблеткасын ішу арқылы қабылдап, кейіннен [13C,15N]-даклатасвирдің 100 мкг дозасын вена ішіне қабылдаған пациенттерде, тепе теңдік жағдайындағы есептеп шығарылған таралу көлемі 47 л құрады. In vitro зерттеулер, даклатасвирдің гепатоциттерге активті және пассивті тасымалданатындығын көрсетеді. Белсенді тасымалдануы аниондардың органикалық тасымалдағышы (AOT) 2, Na+-таурохолаткотасымалдағыш полипептид (NTCP) немесе органикалық аниондардың тасымалдағыш полипептидтері (OATP) арқылы емес, органикалық катиондардың (OCT) 1 тасымалдағышы және идентификацияланбаған басқа қармау тасымалдағыштары жүзеге асырады.

Даклатасвир P-gp, OATP 1B1 және сүт безі обырының төзімділік ақуызының (BCRP) тежегіші болып табылады.

In vitro даклатасвир бүйректік қармау тасымалдағыштарының, OAT1 және 3, сондай-ақ, OCT2 тежегіші болып табылады, бірақ оның аталған тасымалдағыштар субстраттарының фармакокинетикасына клиникалық әсер беруі күтілмейді.

Биотрансформациясы

In vitro және in vivo зерттеулер, даклатасвирдің CYP3A субстраты болып табылатындығын, сонымен қатар CYP3A4 метаболизмге жауап беретін CYP негізгі изоформасы болып табылатындығын көрсетеді. Айналымдағы метаболиттерінің деңгейлері бастапқы заттың концентрациясының 5%-ынан артық құрамайды. Даклатасвир in vitro CYP1A2, 2B6, 2C8, 2C9, 2C19 немесе 2D6 ферменттерін тежемеген (IC50> 40 мкМ).

Шығарылуы

14C-даклатасвирдің дені сау субъектілерде ішу арқылы қабылданған бір реттік дозасынан кейін барлық радиоактивтілігінің 88%-ы нәжісте (53%-ы өзгермеген зат түрінде) және 6,6%-ы - несепте (көбінесе өзгеріссіз күйінде) анықталған. Бұл деректер, бауырдың адамда даклатасвир шығарылатын негізгі ағза болып табылатындығын көрсетеді. Даклатасвирді СВГ бар пациенттерде бірнеше рет қолданғаннан кейін аталған заттың жартылай шығарылуының терминальді кезеңі 12-ден 15 сағатқа дейін құраған. Даклатасвирдің 60 мг таблеткасын ішу арқылы қабылдап, кейіннен [13C,15N]-даклатасвирдің 100 мкг дозасын вена ішіне қабылдаған пациенттерде жалпы клиренсі 4,24 л/сағатты құраған.

Фармакодинамикасы

Даклатасвир құрылымдық емес 5A (NS5A) ақуызының, С вирусты гепатитінің (СВГ) репликациялық кешенінің маңызды компоненті болып табылатын көп функциялы ақуыздың тежегіші болып табылады. Даклатасвир вирустың РНҚ репликациясын және вириондар шоғырын тежейді.

Жасушалар өсірінділеріндегі вирусқа қарсы белсенділігі

Даклатасвир СВГ 1а және 1b генотиптері репликациясының тежегіші болып табылады, бұл жасушалардағы репликондардың сандық талдауларынан, талдау әдісіне байланысты тиімді концентрациясының (50% төмендеуі, EC50) 0,003-0,050 нМ және 0,001-0,009 нМ мәндерімен анықталған. Репликондар жүйелеріндегі даклатасвирдің EC50 мәндері 3а, 4а, 5а және 6а генотиптері үшін 0,003-1,25 нМ және 2а үшін генотипі 0,034-19 нМ, сондай-ақ, осы вирустың инфекциялық 2а генотипі (JFH-1) үшін 0,020 нМ құрады.

Даклатасвир СВГ жасушалық репликондары жүйесін қолданумен үйлестірілулерін зерттеулерде интерферон альфамен, СВГ құрылымдық емес 3 (NS3) ақуызы протеазаларының тежегішімен, СВГ құрылымдық емес 5B (NS5B) ақуызының нуклеозидтік емес тежегіштерімен және СВГ NS5B нуклеозидтік аналогтарымен өзара синергиялық әрекеттесулерінде аддитивтік әсері барын көрсетті. Вирусқа қарсы белсендіігіне қатысты антагонизм байқалған жоқ.

АИТВ қоса, құрамында РНҚ- және ДНҚ бар вирустардың бірқатарына қатысты вирусқа қарсы клиникалық тұрғыдан елеулі белсенділігі байқалған жоқ. Бұл даклатасвирдің СВГ қатысты селективтілігі жоғары екендігін растайды.

Жасуша өсірінділерінің резистенттілігі

1-4 генотиптерінде даклатасвирге резистенттілікті туғызатын аминқышқылдардың алмасулары жасушалық репликон жүйесіндегі 100 аминқышқылды NS5A қалдығының N-терминальді аймағында байқалды. L31V және Y93H алмасулары көбіне 1b генотипінде, ал M28T, L31V/M, Q30E/H/R және Y93C/H/N алмасулары көбінесе 1a генотипінде байқалған. Аталған алмасулар 1b генотипінде резистенттіліктің төмен деңгейлерін (EC50< 1 нМ) және 1a генотипінде резистенттіліктің жоғарырақ деңгейлерін (EC50 350 нМ дейін) туғызған. 2a генотипіндегі және 3a генотипіндегі аминқышылдарының бірен-саран алмасуы бар анағұрлым резистентті нұсқалары сәйкесінше F28S (EC50> 300 нМ) және Y93H (EC50> 1000 нМ) болды. 4 генотипінде 30 және 93 аминқышқылдарының алмасулары жиі байқалған (EC50< 16 нМ).

Айқаспалы резистенттілік

Даклатасвирге резистенттілік туғызатын СВГ репликондары интерферон альфаға және NS3-протеаза және NS5B-полимераза тежегіштері (нуклеозидтік және нуклеозидтік емес) сияқты СГВ емдеуге арналған, әсер ету механизмдері әр түрлі препараттарға толықтай сезімтал болып қалды.

- ересек пациенттердегі созылмалы С вирусты гепатитін (ССВГ) вирусқа қарсы басқа препараттармен біріктіріп емдеу үшін

Даласбин тұтастай жұту арқылы ішке қабылданады. Белсенді затының дәмі жағымсыз болғандықтан, таблеткаларды шайнауға немесе ұнтақтауға болмайды. Препаратты ас ішуге байланыссыз қолдануға болады.

Емдеуді созылмалы С гепатитін емдеуде тәжірибесі бар дәрігер бастауы және бақылап отыруы тиіс.

Дозалануы

Препараттың ұсынылатын дозасы тәулігіне 1 рет 60 мг құрайды.

Даласбинді басқа дәрілік заттармен бірге қабылдауға болады. Препаратты қолдануды бастар алдында Даласбинмен бірге қабылданатын басқа дәрілік заттарды қолдану жөніндегі нұсқаулықты оқып шығу керек.

Интерферондарды қолданбай, Даласбинді пайдаланып біріктіріп емдеудің ұсынылатын тәсілдері

ГТ: генотип; ЧП: Чайлд-Пью

* Адам иммун тапшылығы вирусы (АИТВ) қатарласа жүретін пациенттерді қоса. АИТВ емдеуге арналған вирусқа қарсы препараттарды дозалау жөніндегі ұсынымдарды «Басқа дәрілік заттармен өзара әрекеттесуі» бөлімінен қараңыз.

Даласбин + пэгинтерферон альфа + рибавирин

Бұл режим 4 генотипті инфекциясымен және циррозы немесе компенсацияланған циррозы бар пациенттер үшін ұсынылған режимге баламалы болып табылады. Даласбин пэгинтерферон альфа мен рибавиринді 24 - 48 апта бойы қолданумен біріктіріп 24 апта бойы қолданылады:

- егер СВГ РНҚ емдеудің 4 және 12 апталарында анықталмаса, онда емдеудің барлық 3 компоненті де жалпы ұзақтығы 24 апта бойы қолданылады;

- егер СВГ РНҚ 4 және 12 апталарда анықталмаса, Даласбинді 24-ші аптада тоқтату, ал пэгинтерферон альфа мен рибавиринді жалпы ұзақтығы 48 апта бойы қолдану керек.

Рибавиринді дозалау жөніндегі ұсынымдар

Даласбинмен бірге қолданылатын рибавириннің дозасы пациенттің дене салмағына негізделген (дене салмағы < 75 кг немесе ≥ 75 кг пациенттер үшін сәйкесінше 1000 мг немесе 1200 мг) (рибавирин үшін қолдану жөніндегі нұсқаулықты қараңыз).

Бауырдың Чайлд-Пью бойынша А, В немесе С класты циррозы немесе бауыр трансплантациясынан кейінгі СВГ қайталануы бар пациенттер үшін рибавириннің бастапқы дозасы ас ішу кезінде 600 мг құрайды. Егер бастапқы дозасының көтерімділігі жақсы болса, дозасын тәулігіне 1000-1200 мг ең жоғарғысына дейін арттыруға болады (шектік мәні - 75 кг). Егер бастапқы дозасы жеткілікті дәрежеде көтерімділігі жақсы болмаса, гемоглобин деңгейі мен креатинин клиренсін өлшеу нәтижелерінің негізінде клиникалық көрсетілімдеріне сәйкес дозасы төмендетілуі тиіс.

Бауыр циррозы бар пациенттерде немесе бауыр трансплантациясын бастан өткерген пациенттерде рибавиринді Даласбин препаратымен бір мезгілде қолдану үшін дозалау жөніндегі нұсқаулық

Дозасын түзету, емдеуді үзе тұру және тоқтату

Қолайсыз реакцияларды жою үшін Даласбиннің дозасын түзету ұсынылмайды. Жағымсыз реакциялардың туындауына байланысты емдеу кестесінің компоненттерін қабылдауды тоқтату қажет болса, Даласбинді монотерапия ретінде қолданбау керек.

Даласбин мен софосбувирдің біріктіріліміне қатысты вирусқа қарсы емді тоқтату жөнінде ережелер жоқ.

Даласбин, пэгинтерферон альфа және рибавиринмен емделу кезінде вирусологиялық жауабы жеткіліксіз болған пациенттерде емдеуді тоқтату

Емдеу кезінде вирусологиялық жауабы жеткіліксіз болған пациенттердің тұрақты вирусологиялық жауапқа (ТВЖ) қол жеткізу ықтималдығы аз, сондықтан онлай пациенттерде емдеуді тоқтату ұсынылады. Емдеуді тоқтатуды қажет ететін СГВ РНҚ шектік мәндері келесі кестеде берілген:

Даласбинді пэгинтерферон альфамен және рибавиринмен бірге қолданып жүрген және емдеу кезіндегі вирусологиялық жауабы жеткіліксіз болған пациенттер үшін емдеуді тоқтату ережелері

Бір мезгілде қолданылатын препараттарды дозалау жөніндегі ұсынымдар

Р450 цитохромы 3A4 ферментінің (CYP3A4) күшті тежегіштері

CYP3A4 күшті тежегіштерін бір мезгілде қолданғанда, даклатасвирдің дозасын тәулігіне 1 рет 30 мг дейін төмендету керек.

CYP3A4 орташа индукторлары

CYP3A4 орташа тежегіштерін бір мезгілде қолданғанда, даклатасвирдің дозасын тәулігіне 1 рет 90 мг дейін төмендету керек.

Дозаларын өткізіп алу

Пациенттерге Даласбин препаратының кезекті дозасын өткізіп алған жағдайда, егер препаратты қабылдаудың жоспарлы уақытынан 20 сағаттан аспайтын уақыт өтсе, оны барынша тезірек қабылдау және бастапқы емдеу кестесін ұстануы керектігі туралы нұсқау беру қажет. Егер дозасын өткізіп алған кезде жоспарлы қабылдау уақытынан 20 сағаттан астам уақыт өтсе, пациент бұл дозасын қабылдауды өткізіп жіберуі және келесі дозасын бастапқы емдеу кестесіне сәйкес қабылдауы керек.

Айрықша топтар

Егде жастағы пациенттер

≥ 65 жас шамасындағы пациенттер үшін Даласбиннің дозасын түзету қажет емес.

Бүйрек функциясының бұзылуы

Бүйрек функциясы бұзылуының кез келген дәрежесі пациенттер үшін Даласбиннің дозасын түзету қажет емес.

Бауыр функциясының бұзылуы

Бауыр функциясының әлсіз (Чайлд-Пью бойынша А класы, көрсеткіші 5-6), орташа (Чайлд-Пью бойынша В класы, көрсеткіші 7-9) немесе ауыр (Чайлд-Пью бойынша С класы, көрсеткіші ≥ 10) бұзылуы бар пациенттер үшін Даласбиннің дозасын түзету қажет емес.

Балалар

Даклатасвирді балалар мен 18 жасқа толмаған жасөспірімдерде қолданудың қауіпсіздігі мен тиімділігі анықталмаған. Мәліметтер жоқ.

Софосбувирмен біріктірілген даклатасвир

Анағұрлым жиі кездесетін жағымсыз реакциялар қажу, бас ауыруы және жүрек айнуы болып табылады.

Пэгинтерферон альфамен және рибавиринмен біріктірілген даклатасвир

Анағұрлым жиі кездесетін жағымсыз реакциялар қажу, бас ауыруы, қышыну, анемия, тұмаутәрізді симптомдар, жүрк айнуы, ұйқысыздық, нейтропения, астения, бөртпе, тәбеттің төмендеуі, терінің құрғауы, алопеция, қызу, миалгия, ашушаңдық, жөтел, диарея, ентігу және артралгия болып табылады.

Циррозы бар пациенттер қамтылған, пэгинтерферон альфамен және рибавиринмен біріктірілген даклатасвирдің қауіпсіздік бейіні, тек пэгинтерферон альфамен және рибавиринмен емдеу бейінімен ұқсас.

Жағымсыз реакцияларының жиілік параметрлері келесі тәртіппен анықталған: өте жиі (≥ 1/10); жиі (≥ 1/100, бірақ <1/10); жиі емес (≥ 1/1000, бірақ < 1/100); сирек (≥ 1/10000, бірақ < 1/1000); өте сирек (< 1/10000); жиілігі белгісіз (қолда бар мәліметтер бойынша бағалау мүмкін емес).

Даклатасвир + софосбувир + рибавирин:

Қан және лимфа жүйесі тарапынан: өте жиі – анемия.

Метаболизм және тамақтану бұзылулары: жиі – тәбеттің төмендеуі.

Психика бұзылулары: жиі – ұйқысыздық, ашушаңдық.

Жүйке жүйесі тарапынан: өте жиі – бас ауыруы; жиі – бас айналуы, бас сақинасы.

Қантамырлар тарапынан: жиі – бетке қан тебу.

Тыныс алу ағзалары, кеуде қуысы және көкірекорта тарапынан: жиі – ентігу, дене жүктемесі кезінде ентігу, жөтел, мұрынның бітелуі.

Асқазан-ішек жолы тарапынан: өте жиі – жүрек айнуы; жиі – диарея, құсу, іш ауыруы, гастроэзофагеальді рефлюкстік ауру, іш қатуы, ауыздың құрғауы, метеоризм.

Тері және теріасты тіндері тарапынан: жиі – бөртпе, алопеция, қышыну, терінің құрғауы.

Қаңқа-бұлшықет жүйесі мен дәнекер тіндер тарапынан: жиі – артралгия, миалгия.

Жалпы бұзылыстар және енгізген жердегі бұзылулар: өте жиі – қажу.

Даклатасвир + софосбувир

Психика бұзылуы: жиі – ұйқысыздық.

Жүйке жүйесі тарапынан: өте жиі – бас ауыруы; жиі – бас айналуы, бас сақинасы.

Асқазан-ішек жолы тарапынан: жиі – жүрек айнуы, диарея, іш ауыруы.

Қаңқа-бұлшықет жүйесі мен дәнекер тіндер тарапынан: жиі – артралгия, миалгия.

Жалпы бұзылыстар және енгізген жердегі бұзылулар: өте жиі – қажу.

Дәрілік затты тіркеуден кейінгі күмәнді жағымсыз реакциялар туралы хабарламалар маңызды болып табылады. Пациентте ауыр дәрілік затқа жағымсыз реакция анықталған немесе осы бөлімде сипатталмаған жаңа жағымсыз реакция пайда болған жағдайда, Ұлттық фармакоқадағалау жүйесіне сәйкес хабарлауыңызды өтінеміз.

- белсенді затына немесе қосымша заттарының қандай-да біреуіне аса жоғары сезімталдық;

- P450 цитохромының ферментіне 3A4 (CYP3A4) және P-gp тасымалдағышына күшті индукциялық әсер беретін және Даласбиннің әсерін төмендетуге және оның тиімділігінің жоғалуына әкеп соқтыруға қабілетті препараттармен бір мезгілде қолдану. Ондай белсенді заттарға фенитоин, карбамазепин, окскарбазепин, фенобарбитал, рифампицин, рифабутин, рифапентин, жүйелі қолданылатын дексаметазон, өсімдік тектес шайқурай (Hypericumperforatum) препараттары және т.б. жатады.

- Жүктілік: Даклатасвирдің жүкті әйелдерде қолданыуы туралы мәліметтер жоқ.

Даклатасвирдің жануарларда қолданылуын зерттеулерден эмбриоуытты және тератогендік әсерлері анықталды. Адам үшін ықтимал қаупі белгісіз.

• контрацепцияның сақталмауы: Даласбинді жүктілік кезінде немесе бала тууға қабілетті жастағы, контрацепция құралдарын пайдаланып жүрмеген әйелдерде қолданбау керек. Даласбинмен емдеу аяқталғаннан кейін 5 апта бойы тиімділігі жоғары контрацепция құралдарын пайдалану қажет. Даласбин басқа препараттармен бірге қолданылатындықтан, қолданылатын дәрілік заттар үшін қарсы көрсетілімдері мен ескертулер ескеріледі.

Жүктілік пен контрацепцияға қатысты егжей-тегжейлі ұсынымдарды рибавирин мен пэгинтерферон альфа үшін қолдану жөніндегі нұсқаулықтан қараңыз.

- Лактация: Даклатасвирдің емшек сүтіне бөлінетін-бөлінбейтіндігі белгісіз Жануарлар үшін қолда бар фармакокинетикалық және токсикологиялық мәліметтер, даклатасвир мен оның метаболиттерінің сүтке өтетіндігін көрсеткен. Жаңа туған нәресте/сәби үшін қаупін жоққа шығару мүмкін емес. Аналарға Даласбинді қолдану кезінде бала емізуден бас тарту жөнінде нұсқау беру қажет.

- Фертильділік: Даклатасвирдің фертильділікке әсері туралы мәліметтер жоқ.

Жұптасу немесе фертильділікке қатысты әсері байқалған жоқ.

- балалар мен 18 жасқа дейінгі жасөспірімдерге

Дәрілермен өзара әрекеттесулері

Басқа дәрілік заттармен өзара әрекеттесу ықтималдығы

Даклатасвир CYP3A4, P-gp және ОСТ1 субстраты болып табылады. CYP3A4 пен P-gp күшті немесе орташа индукторлары даклатасвирдің плазмалық деңгейлері мен емдік әсерін төмендетуі мүмкін. CYP3A4 пен P-gp күшті индукторларымен бір мезгілде қолдану қарсы көрсетілімді, ал CYP3A4 және P-gp орташа индукторларымен қолданғанда, Даласбиннің дозасын түзету ұсынылады. CYP3A4 күшті тежегіштері даклатасвирдің плазмалық деңгейлерін арттыруы мүмкін. CYP3A4 күшті тежегіштерімен бір мезгілде қолданғанда, Даласбиннің дозасын түзету ұсынылады. P-gp немесе ОСТ1 белсенділігін тежейтін препараттарды бір мезгілде қолдану даклатасвирдің әсер ету дәрежесіне шектеулі әсер етуі ықтимал.

Даклатасвир P-gp, OATP 1B1, OCT1 және BCRP тежегіші болып табылады. Даласбинді қолдану P-gp, OATP 1B1, OCT1 немесе BCRP субстраттары болып табылатын дәрілік заттардың жүйелі әсерін күшейтуі мүмкін, бұл олардың емдік әсерінің және жағымсыз реакциялардың артуына немесе ұзаруына алып келуі мүмкін. Егер препараттың емдік ауқымы шектеулі болса, сақтық таныту қажет.

Даклатасвир CYP3A4 өте әлсіз индукторы болып табылады және мидазоламның әсерінің 13% төмендеуін туғызады. Алайда, бұл әсері шектеулі болып табылатындықтан, бір мезгілде қолданылатын CYP3A4 субстраттарының дозаларын түзету қажет емес.

Емдеу кестелерінде пайдаланылатын препараттармен өзара дәрілік әрекеттесулер туралы ақпаратты, дәрілік препараттарды қолдану жөніндегі сәйкесінше нұсқаулықтардан қараңыз.

K дәруменінің антагонистерімен емделіп жүрген пациенттер

Даласбинмен емдеу кезінде бауыр функциясы өзгеруі мүмкін болғандықтан, халықаралық қалыптастырылған қатынасқа (ХҚҚ) мұқият мониторинг жүргізу ұсынылады.

Басқа дәрілік заттармен өзара әрекеттесулері және дозалау жөніндегі ұсынымдар

Вирусқа қарсы дәрілер, СВГ

- полимераза тежегішінің нуклеотидтік аналогы:

Софосбувир 400 мг тәулігіне 1 рет (тәулігіне 1 рет 60 мг даклатасвир): Даласбиннің немесе софосбувирдің дозасын түзету қажет емес.

- протеаза тежегіштері:

Боцепревир: боцепревирмен немесе CYP3A4 басқа күшті тежегіштерімен бір мезгілде қолданғанда, Даласбиннің дозасын тәулігіне 1 рет 30 мг дейін төмендету керек.

Симепревир 150 мг тәулігіне 1 рет (даклатасвир 60 мг тәулігіне 1 рет): Даласбиннің немесе симепревирдің дозасын түзету қажет емес.

Әр 12 сағат сайын 500 мг телапревир (тәулігіне 1 рет 20 мг даклатасвир), әр 8 сағат сайын 750 мг телапревир (тәулігіне 1 рет 20 мг даклатасвир): телапревирмен немесе CYP3A4 басқа күшті тежегіштерімен бір мезгілде қолданғанда, Даласбиннің дозасын тәулігіне 1 рет 30 мг дейін төмендету керек.

- СВГ қарсы вирусқа қарсы басқа дәрілер:

Аптасына 1 рет пэгинтерферон альфа 180 мкг және тәулігіне екі рет қабылданатын рибавирин 1000 мг немесе 1200 мг (тәулігіне 1 рет 60 мг даклатасвир): Даласбиннің, пэгинтерферон альфа немесе рибавириннің дозасын түзету қажет емес.

Вирусқа қарсы дәрілер, АИТВ немесе ВГВ

- протеаза тежегіштері:

Тәулігіне 1 рет атазанавир 300 мг/ритонавир 100 мг (тәулігіне 1 рет 20 мг даклатасвир); атазанавир/кобицистат (өзара әрекеттесуі зерттелмеген): Атазанавирмен/ритонавирмен, атазанавирмен/кобицистатпен немесе CYP3A4 басқа күшті тежегіштерімен бір мезгілде қолданғанда, Даласбиннің дозасын тәулігіне 1 рет 30 мг дейін төмендету керек.

Тәулігіне 1 рет Дарунавир 800 мг/ритонавир 100 мг (тәулігіне 1 рет 30 мг даклатасвир); дарунавир/кобицистат (өзара әрекеттесуі зерттелмеген): тәулігіне 1 рет 60 мг Даласбиннің, дарунавирдің/ритонавирдің (тәулігіне 1 рет 800/100 мг немесе тәулігіне 2 рет 600/100 мг) немесе дарунавирдің/кобицистаттың дозасын түзету қажет емес.

Тәулігіне 2 рет лопинавир 400 мг/ритонавир 100 мг (тәулігіне 1 рет 30 мг даклатасвир): тәулігіне 1 рет 60 мг Даласбиннің немесе лопинавирдің/ритонавирдің дозасын түзету қажет емес.

- кері транскриптазаның нуклеозидтік/нуклеотидтік тежегіштері (КТНТ):

Тенофовирадизопроксилфумарат тәулігіне 1 рет 300 мг (тәулігіне 1 рет 60 мг даклатасвир): Даласбиннің немесе тенофовирдің дозасын түзету қажет емес.

Ламивудин, зидовудин, эмтрицитабин, абакавир, диданозин, ставудин: Даласбиннің немесе КТНТ дозасын түзету қажет емес.

- кері транскриптазаның нуклеозидтік емес тежегіштері (КТНЕТ):

Тәулігіне 1 рет 600 мг эфавиренз (тәулігіне 1 рет 60 мг даклатасвир / тәулігіне 1 рет 120 мг): эфавирензді бір мезгілде қолданғанда Даласбиннің дозасын тәулігіне 1 рет 90 мг дейін арттыру керек.

Этравирин, невирапин (өзара әрекеттесуі зерттелмеген): мәліметтердің жеткіліксіздігіне байланысты, Даласбин мен этравиринді немесе невирапинді бір мезгілде қолдану ұсынылмайды.

Рилпивирин (өзара әрекеттесуі зерттелмеген): Даласбиннің немесе рилпивириннің дозасын түзету қажет емес.

- интеграза тежегіштері:

Тәулігіне 1 рет Долутегравир 50 мг (тәулігіне 1 рет 60 мг даклатасвир): Даласбиннің немесе долутегравирдің дозасын түзету қажет емес.

Ралтегравир (өзара әрекеттесуі зерттелмеген): Даласбиннің немесе ралтегравирдің дозасын түзету қажет емес.

Элвитегравир, кобицистат, эмтрицитабин, тенофовирадизопроксилфумарат (бұл бекітілген біріктірілім үшін өзара әрекеттесуі зерттелмеген): кобицистатпен немесе CYP3A4 басқа күшті тежегіштерімен бір мезгілде қолданғанда, Даласбиннің дозасын тәулігіне рет 30 мг дейін төмендету керек.

- бірігу тежегіші:

Энфувиртид (өзара әрекеттесуі зерттелмеген): Даласбиннің немесе энфувиртидтің дозасын түзету қажет емес.

- CCR5 рецепторының антагонисі:

Маравирок (өзара әрекеттесуі зерттелмеген): Даласбиннің немесе маравироктың дозасын түзету қажет емес.

Қышқылдылықты төмендететін заттар

- H2 рецепторларының антагонистері:

Фамотидин 40 мг, бір реттік дозасы (даклатасвир 60 мг, бір реттік дозасы): Даласбиннің дозасын түзету қажет емес.

- протондық сорғы тежегіштері:

Омепразол 40 мг, бір реттік дозасы (даклатасвир 60 мг, бір реттік дозасы): Даласбиннің дозасын түзету қажет емес.

Бактерияға қарсы заттар

Кларитромицин, телитромицин (өзара әрекеттесуі зерттелмеген): кларитромицинмен, телитромицинмен немесе CYP3A4 басқа күшті тежегіштерімен бір мезгілде қолданғанда Даласбиннің дозасын тәулігіне 1 рет 30 мг дейін төмендетуге болады.

Эритромицин (өзара әрекеттесуі зерттелмеген): Даласбинді эритромицинмен қолдану даклатасвир концентрацияларының жоғарылауына алып келуі мүмкін. Сақтық таныту қажет.

Азитромицин, ципрофлоксацин (өзара әрекеттесуі зерттелмеген): Даласбиннің, азитромициннің немесе ципрофлоксациннің дозасын түзету қажет емес.

Антикоагулянттар

Дабигатранаэтексилат (өзара әрекеттесуі зерттелмеген): дабигатранаэтексилатты немесе ішектегі P-gp емдеу ауқымы шектелген басқа субстраттарын қабылдап жүрген пациенттерде Даласбинмен емдеудің басында қауіпсіздігіне мониторинг жүргізуді жүзеге асыру ұсынылады.

Варфарин немесе K дәруменінің басқа антагонистері (өзара әрекеттесуі зерттелмеген): Даласбиннің немесе варфариннің дозасын түзету қажет емес. K дәруменінің барлық антагонистерін қолданғанда ХҚҚ мәндеріне мұқият мониторинг жүргізу ұсынылады, өйткені Даласбинмен емдеу кезінде бауыр функциясы өзгеруі мүмкін.

Құрысуға қарсы дәрілер

Карбамазепин, окскарбазепин, фенобарбитал, фенитоин (өзара әрекеттесуі зерттелмеген): Даласбинді карбамазепинмен, окскарбазепинмен, фенобарбиталмен, фенитоинмен немесе CYP3A4 басқа индукторларымен бір мезгілде қолдануға болмайды.

Антидепрессанттар

- серотонинді кері қармаудың селективті тежегіштері:

Тәулігіне 1 рет 10 мг Эсциталопрам (тәулігіне 1 рет 60 мг даклатасвир): Даласбиннің дозасын түзету қажет емес.

Зеңге қарсы дәрілер

Кетоконазол 400 мг тәулігіне 1 рет (даклатасвир 10 мг, бір реттік дозасы); итраконазол, позаконазол, вориконазол (өзара әрекеттесуі зерттелмеген): Кетоконазолмен немесе CYP3A4 басқа күшті тежегіштерімен бір мезгілде қолданғанда, Даласбиннің дозасын тәулігіне 1 рет 30 мг дейін төмендету керек.

Флуконазол (өзара әрекеттесуі зерттелмеген): даклатасвир концентрациясының орташа жоғарылауы күтіледі, алайда, Даласбиннің дозасын түзету қажет емес.

Туберкулезге қарсы дәрілер

Рифампицин 600 мг тәулігіне 1 рет (даклатасвир 60 мг, бір реттік дозасы); рифабутин, рифапентин (өзара әрекеттесуі зерттелмеген): Даласбинді рифампицинмен, рифабутинмен, рифапентинмен немесе CYP3A4 басқа күшті индукторларымен бір мезгілде қолдануға болмайды.

Жүрек-қантамыр жүйесін емдеуге арналған препараттар

- аритмияға қарсы дәрілер:

Дигоксин 0,125 мг тәулігіне 1 рет (даклатасвир 60 мг тәулігіне 1 рет): дигоксинді Даласбинмен бір мезгілде қолданғанда сақтық таныту қажет. Дигоксиннің ең төменгі бастапқы дозасын тағайындау керек. Қалаған клиникалық әсеріне қол жеткізу үшін, қан сарысуындағы дигоксин концентрациясын бақылау және оларды дигоксиннің дозасын титрлеу кезінде ескеру қажет.

Амиодарон (өзара әрекеттесуі зерттелмеген): емдеудің баламалы тәсілі болмаған жағдайда ғана қолдану керек. Аталған дәрілік затты софосбувирмен үйлестірілген Даласбинмен бір мезгілде қолданғанда, мұқият бақылауды жүзеге асыру ұсынылады.

- кальций өзекшелерінің блокаторлары:

Дилтиазем, нифедипин, амлодипин (өзара әрекеттесуі зерттелмеген): Даласбинді кальций өзекшелері блокаторларының қандай-да біреуімен қолдану даклатасвир концентрацияларының жоғарылауына алып келуі мүмкін. Сақтық таныту қажет.

Верапамил (өзара әрекеттесуі зерттелмеген): Даласбинді верапамилмен қолдану даклатасвир концентрацияларының жоғарылауына алып келуі мүмкін. Сақтық таныту қажет.

Кортикостероидтар

Жүйелі қолдануға арналған дексаметазон (өзара әрекеттесуі зерттелмеген): Даласбинді жүйелі қолдануға арналған дексаметазонмен немесе СYP3A4 басқа күшті индукторларымен бір мезгілде қолдануға болмайды.

Өсімдіктен жасалған қоспалар

Шайқурай (Hypericumperforatum) (өзара әрекеттесуі зерттелмеген): Даласбинді шайқураймен немесе CYP3A4 басқа күшті индукторларымен бір мезгілде қолдану қарсы көрсетілімді.

Гормональді контрацептивтер

21 күн бойы тәулігіне 1 рет 35 мкг этинилэстрадиол + 7/7/7 күн бойы тәулігіне 1 рет 0,180/0,215/0,250 мг норгестимат (даклатасвир 60 мг тәулігіне 1 рет): Даласбинмен емдеу кезінде құрамында 35 мкг этинилэстрадиол мен 0,180/0,215/0,250 мг норгестимат бар пероральді контрацептивті қолдану ұсынылады. Басқа пероральді контрацептивтер зерттелген жоқ.

Иммуносупрессанттар

Циклоспорин 400 мг, бір реттік дозасы (тәулігіне 1 рет 60 мг даклатасвир); такролимус 5 мг, бір реттік дозасы (тәулігіне 1 рет 60 мг даклатасвир); сиролимус, микофенолатамофетил (өзара әрекеттесуі зерттелмеген): Даласбинді циклоспоринмен, такролимуспен, сиролимуспен немесе микофенолат мофетилмен бір мезгілде қолданған кезде, дәрілік заттардың қандай-да біреуінің дозасын түзету қажет емес.

Гиполипидемиялық дәрілер

- ГМГ-КоА-редуктаза тежегіштері:

Розувастатин 10 мг, бір реттік дозасы (даклатасвир 60 мг тәулігіне 1 рет); аторвастатин, флувастатин, симвастатин, питавастатин, правастатин (өзара әрекеттесуі зерттелмеген): Даласбинді розувастатинмен немесе OATP 1B1 немесе BCRP басқа субстраттарымен бір мезгілде қолданғанда сақтық таныту қажет.

Есірткілік анальгетиктер

Бупренорфин/налоксон, 8/2 мг-ден 24/6 мг дейін тәулігіне 1 рет, жекелей таңдап алынған дозасы* (тәулігіне 1 рет 60 мг даклатасвир): Даласбиннің немесе бупренорфиннің дозасын түзету қажет емес, алайда, пациенттерде апиындардың уыттылық белгілерінің бар-жоқтығын бақылау ұсынылады.

Метадон, тәулігіне 1 рет 40-120 мг, жекелей таңдап алынған дозасы* (тәулігіне 1 рет 60 мг даклатасвир): Даласбиннің немесе метадонның дозасын түзету қажет емес.

Тыныштандыратын дәрілер

- бензодиазепиндер:

Мидазолам 5 мг, бір реттік дозасы (даклатасвир 60 мг тәулігіне 1 рет); триазолам, алпразолам (өзара әрекеттесуі зерттелмеген): Даласбин препаратын бір мезгілде қолданғанда, мидазоламның, басқа бензодиазепиндердің немесе CYP3A4 басқа да субстраттарының дозасын түзету қажет емес.

* Апиынға тәуелді ересектерде тұрақты демеуші ем кезінде бағаланған.

Даклатасвирді келесі препараттардың қандай-да біреуімен бір мезгілде қолданғанда, дәрілік заттардың қандай-да біреуі үшін клиникалық тұрғыдан елеулі фармакокинетикалық әсерлерінің туындауы күтілмейді: PDE-5 тежегіштері, АӨФ тежегіштері класының дәрілік заттары (мысалы, эналаприл), ангиотензин II рецепторларының антагонистері класының дәрілік заттары (мысалы, лозартан, ирбесартан, олмесартан, кандесартан, валсартан), дизопирамид, пропафенон, флекаинид, мексилитин, хинидин немесе антацидтер.

Балалар

Өзара әрекеттесулерін зерттеулер тек ересектер арасында жүргізілді.

Даласбинді монотерапия ретінде қолданбау керек. Препаратты созылмалы СВГ инфекциясын емдеуге арналған басқа дәрілік заттармен бірге қолдану қажет.

Ауыр брадикардия және жүрек блокадасы

Софосбувирмен үйлестірілген даклатасвирді монотерапия ретінде немесе жүректің жиырылу жиілігін төмендететін басқа препараттармен бірге қолданылатын амиодаронмен емдеумен бір мезгілде қолданғанда ауыр брадикардия мен жүрек блокадасы жағдайлары байқалған. Механизмі анықталмаған.

Амиодаронның бір мезгілде қолданылуы софосбувир мен вирусқа қарсы тікелей әсер ететін препараттардың қолданылуын клиникалық зерттеулер кезінде емдеумен шектелген. Жағдайлар өмірге қауіп төндіруі ықтимал болған, сондықтан амиодаронды Даласбинмен және софосбувирмен емдеу кезінде тек, аритмияға қарсы баламалы дәрілер көтерімсіз болған немесе оларға қарсы көрсетілімдер болған жағдайда ғана қолдану керек.

Амиодаронды бір мезгілде қолдану қажет болған жағдайда, Даласбинді софосбувирмен бірге қолданудың басында пациенттердің жағдайын мұқият бақылау ұсынылады. Брадиаритмияның туындау қаупі жоғары пациенттердің жай-күйіне, талапқа сай клиникалық жағдайларда 48 сағат бойы үздіксіз бақылау жүргізілуі тиіс.

Амиодаронның жартылай шығарылу кезеңінің ұзақтығы себепті, соңғы бірнеше ай ішінде амиодаронмен емдеуді тоқтатқан және софосбувирмен біріктірілген Даласбинмен емдеуді бастауды қажет ететін пациенттердің жай-күйін тиісінше бақылауды да жүзеге асыру қажет.

Даласбин мен софосбувирді амиодаронмен бірге монотерапия ретінде немесе жүректің жиырылу жиілігін төмендететін басқа препараттармен бірге қабылдап жүрген барлық пациенттерге де брадикардия және жүрек блокадасының симптомдары және ондай симптомдар туындаған жағдайда, тез арада медициналық көмекке жүгіну қажеттілігі туралы ескертілуі тиіс.

Генотиптерге тән белсенділік

СВГ түрлі генотиптері жағдайында ұсынылатын емдеу режимдері туралы ақпаратты «Қолдану тәсілі және дозалары» бөлімінен қараңыз.

Бауырдың Чайлд-Пью бойынша С класты ауруы бар пациенттер

Клиникалық зерттеуде (12 апта бойы даклатасвир + софосбувир + рибавирин) даклатасвирдің Чайлд-Пью бойынша С класты ауруы бар пациенттерде СВГ емдеудегі қауіпсіздігі мен тиімділігі анықталған. Алайда ТВЖ көрсеткіші Чайлд-Пью бойынша А және В класты ауруы бар пациенттердегіге қарағанда төмен болған. Осылайша, бауырдың Чайлд-Пью бойынша С класты ауруы бар пациенттер үшін Даласбинмен + софосбувирмен +/- рибавиринмен 24 апта бойғы дағдылы ем ұсынылады. Рибавиринді емдеу режиміне нақты бір пациент үшін клиникалық бағалаудың негізінде қосуға болады.

Біріккен СВГ/ВГВ (В гепатиті вирусы) инфекциясы

Вирусқа қарсы тікелей әсер ететін препараттармен емдеу кезінде немесе емдеуден кейін В гепатиті вирусының, кейде өліммен аяқталатын реактивациясы жағдайлары байқалған. Емдеуді бастар алдында барлық пациенттерде ВГВ бар-жоқтығына скрининг жүргізу қажет. Біріккен СВГ /ВГВ инфекциясы бар пациенттер ВГВ реактивациясы қаупіне ұшырайды, сондықтан олар қолданыстағы клиникалық хаттамаларға сәйкес қадағалануы және емделуі тиіс.

Даклатасвирмен қайтадан емдеу

Бұрын NS5A тежегішінің әсеріне ұшыраған пациенттерде қайтадан емдеу кестесінің бір бөлігі ретінде қолданылатын даклатасвирдің тиімділігі анықталған жоқ.

Қант диабеті бар пациенттерде қолданылуы.

Вирустық С гепатитін вирусқа қарсы тікелей әсер ететін дәрілік заттармен емдеуді бастағаннан кейін, қант диабеті бар пациенттер глюкоза деңгейі бақылануының жеңілдегенін сезінуі мүмкін, бұл симптоматикалық гипогликемияға алып келуі мүмкін. Қант диабеті бар, вирусқа қарсы тікелей әсер ететін препараттарды қабылдауды бастаған пациенттерде, әсіресе, алғашқы үш ай ішінде, сондай-ақ, диабеттің емін түзету қажет болған жағдайда, қандағы глюкоза мөлшерін мұқиятырақ бақылау қажет.

Жүктілік және контрацепцияға қойылатын талаптар

Даласбинді жүктілік кезінде немесе бала тууға қабілетті жастағы, контрацепция құралдарын пайдаланып жүрмеген әйелдерде қолданбау керек. Тиімділігі жоғары контрацепция құралдарын қолдану Даласбинмен емдеу аяқталғаннан кейін 5 апта бойы жалғасуы тиіс.

Даклатасвирді рибавиринмен бірге пайдалану кезінде қарсы көрсетілімдері мен ескертулер бар. Рибавириннің әсеріне ұшырағандарда елеулі тератогендік және/немесе эмбриоцидтік әсерлері анықталған; осы себепті пациент әйелдерде және ер жынысты пациенттердің серіктестерінде жүктілікті болдырмау үшін, аса сақ болу қажет.

Дәрілік препараттармен өзара әрекеттесулері

Даласбинді бір мезгілде қолдану басқа дәрілік заттардың концентрациясын өзгертуі мүмкін, ал басқа препараттар даклатасвирдің концентрациясын өзгертуі мүмкін. Емдік әсерін жоғалтуы ықтималдығы себепті, Даласбинмен емдеу кезінде қолдануға болмайтын дәрілік заттардың тізімі «Қолдануға болмайтын жағдайлар» бөлімінде келтірілген.

Даласбин құрамында лактоза бар. Галактозаны көтере алмаушылықтың сирек тұқым қуалайтын қиындықтары, Лапп лактаза жеткіліксіздігі немесе глюкоза-галактоза мальабсорбциясы бар пациенттер бұл препаратты қабылдамағаны жөн.

Балалар

Даклатасвирді балалар мен 18 жасқа толмаған жасөспірімдерде қолдану ұсынылмайды, өйткені, пациенттердің аталған тобындағы қауіпсіздігі мен тиімділігі анықталмаған.

Дәрілік заттың көлік құралы мен қауіптілігі зор механизмдерді басқару қабілетіне әсер ету ерекшеліктері

Софосбувирмен біріктіріп даклатасвирмен емдеу кезінде бас айналуы, сондай-ақ, пэгинтерферон альфамен және рибавиринмен біріктіріп даклатасвирмен емдеу кезінде бас айналуы, зейін қоюдың бұзылулары, бұлыңғыр көру және көру өткірлігінің төмендегені туралы хабарланған.

Симптомдары: Клиникалық зерттеулерде даклатасвирдің байқаусызда артық дозалану тәжірибесі бар. Клиникалық зерттеулерде 14 күнге дейін тәулігіне 1 рет 100 мг дейінгі даклатасвирді немесе 200 мг дейінгі бір реттік дозаларын қабылдаған дені сау субъектілер, күтілмеген жағымсыз реакцияларды бастан өткермеген.

Емі: Даклатасвирдің артық дозалануы кезінде, оған антидот белгісіз. Даклатасвирмен артық дозалануды емдеу өмірлік маңызы бар функциялардың мониторингін және пациенттің клиникалық жағдайын қадағалауды қоса, жалпы демеуші шараларға негізделуі тиіс. Даклатасвир плазма ақуыздарымен елеулі дәрежеде байланысатындықтан (99%), молекулалық салмағы > 500, диализ кезінде плазмадағы заттың концентрацияларының елеулі төмендеу ықтималдығы аз.

28 таблетка және ішінде силикагелі бар пакет алюминий фольгамен баспаланған, бұралатын пластик қақпағы бар пластик құтыға салынған.

1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапқа салынады.

30°С-ден аспайтын температурада сақтау керек.

Балалардың қолы жетпейтін жерде сақтау керек!

2 жыл

Жарамдылық мерзімі өткеннен кейін қолдануға болмайды.

Рецепт арқылы

Өндіруші

Глобал Напи Фармасьютикалз, Мысыр

2-ші Өнеркәсіптік Аймақ, №40, №18 көше, Сиксов Октобер Сити, Гиза

Тіркеу куәлігінің ұстаушысы

Ротафарм Лимитед, Ұлыбритания

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электронды пошта):

«РИН Фарм» ЖШС, Алматы, Түрксіб ауданы, Сүйінбай даңғылы, 222б

тел/факс: 8 (727) 252 90 90

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):

«TROKA-S PHARMA» ЖШС, Алматы, Сүйінбай даңғылы 222-б

ұялы тел. +7 701 786 33 98, (24 сағаттық байланыс).

е-mail: pvpharma@worldmedicine.kz