Вигексол (300 мг йода на мл)

• русский
• қазақша

• Скачать инструкцию медикамента

Саудалық атауы

Вигексол

Халықаралық патенттелмеген атауы

Йогексол

Дәрілік түрі

Инъекцияға арналған 300 мг йод/мл, 350 мг йод/мл ерітінді

Құрамы

1 мл препарат құрамында

белсенді зат – 647 мг немесе 755 мг йогексол сусыз затқа шаққанда,

қосымша заттар: натрий кальций эдетаты, трометамол, сұйылтылған хлорсутек қышқылы, инъекцияға арналған су.

Сипаттамасы

Мөлдір түссіз немесе ашық-сары түсті ерітінді.

Фармакотерапиялық тобы

Контрастылы заттар. Құрамында йод бар рентгеноконтрастылы заттар. Ренотропты рентгеноконтрастылы суда еритін төмен осмолярлы заттар. Йогексол.

АТХ коды V08АВ02

Фармакологиялық қасиеттері

Фармакокинетикасы

Көктамыр ішіне енгізілген 100 % дерлік йогексол өзгеріссіз күйде қалыпты қызмет атқаратын бүйрек арқылы 24 сағат ішінде бөлініп шығады. Ең жоғары йогексол концентрациясы инъекциядан кейін шамамен 1 сағаттан соң несепте анықталады. Препараттың жартылай шығарылу уақыты 2 сағатқа жуық құрайды. Препарат метаболиттері табылмаған. Йогексолдың қан плазмасы ақуыздарымен байланысуы онша зор емес (2%-дан аз), оның клиникалық мәні жоқ, сондықтан да назар аудармауға болады.

Фармакодинамикасы

Йогексол ерітіндісі – ионды емес, мономерлі, трийодталған, суда еритін рентгеноконтрастылы дәрі.

Әдеттегі миелография кезінде ең жоғары рентгеноконтрастылыққа жету уақыты – 30 минутқа дейін (1 сағаттан соң-ақ көзге көрінбейді). Компьютерлік томографияда кеуде бөліміндегі контраст көрінісін 1сағат, мойын бөлімінде – 2 сағатқа жуық, базальді цистерналарда – 3-4 сағат ішінде көруге болады. Буын қуыстарының, жатыр қуысының, фаллопий түтіктерінің, перитонеальді дөңбектердің, панкреатиндік және өт түтіктерінің, қуықтың контрастылануына тікелей енгізуден соң жетуге болады.

Қолданылуы

Йогексол ерітіндісі диагностикалық мақсаттарға ғана арналған.

Рентгеноконтрастылы препарат:

• кардиоангиография, урография, флебография және компьютерлік томография (КТ) кезінде контрастылықты күшейту

• бел, кеуде және мойын миелографиясын, субарахноидальді енгізуден кейін КТ-цистернографиясын

• артрография, эндоскопиялық ретроградты панкреатография (ЭРПГ), эндоскопиялық ретроградты холангиопанкреатография (ЭРХПГ), герниография, гистеросальпингография, сиалография және асқазан-ішек жолына зерттеулер жүргізу мақсатында қолдануға арналған.

Қолдану тәсілі және дозалары

Препарат артерия ішіне, көктамыр ішіне, интратекальді, қуыс ішіне енгізуге, ішу арқылы қабылдауға және ректальді енгізуге арналған.

Доза зерттеу типі мен әдісіне және науқастың жасына, салмағына, жүректегі лықсыту көлеміне және жалпы жағдайына байланысты. Әдетте, қазіргі уақытта қолданылатын басқа да құрамында йод бар рентгеноконтрастылы дәрілерге арналғандай, ерітіндінің шамамен алынған көлемі мен концентрациясы пайдаланылады. Басқа да контрастылы дәрілер жағдайындағы сияқты, инъекцияға дейін және одан кейін науқасты жеткілікті су жүктемесімен қамтамасыз ету қажет.

Парентеральді енгізуге арналған барлық препараттар сияқты, йогексол ерітіндісі пайдаланар алдында ерімейтін бөлшектерінің, түс өзгерісінің және қаптама бүтіндігі бүлінуінің бар-жоғы тұрғысынан қарап тексерілуі тиіс.

Препарат тура қолданар алдында еккішке толтырылуы тиіс. Препараттың пайдаланылмаған қалдықтарын әріқарай қолдануға рұқсат етілмейді.

Йогексол ерітіндісін басқа дәрілік заттармен араластыруға болмайды (еккіштер мен инені жеке-жеке пайдалану қажет).

Препаратты енгізгенде науқас жатқан қалыпта болуы тиіс. Емшара аяқталған соң 30 минут ішінде пациентке дәрігерлік бақылау орнатылады, өйткені жағымсыз реакциялардың көпшілігі тура осы кезеңде туындайды.

Интратекальді енгізу:

Миелография орындалған соң пациент бас жағын 20º көтеріп жатқан қалыпта 1 сағаттан кем емес тыныштық күйінде болуы тиіс. Құрысулар дамитын төменгі шекке күдік туындағанда тексерілушіні 6 сағат бойы қадағалау қажет. Амбулаторлық режимде жүрген пациенттер еңкеюден сақтану қажет.

Ұсынылатын дозалау режимі төмендегі кестеде берілген.

Көктамыр ішіне енгізуге арналған дозалау кестесі

Артерия ішіне енгізуге арналған дозалау кестесі

Интратекальді енгізуге арналған дозалау кестесі

Жағымсыз реакциялар қаупін жоққа тән азайту үшін йодтың жиынтық дозасы 3 г-ден аспауы тиіс.

Қуыс ішіне енгізуге арналған дозалау кестесі

Жағымсыз әсерлері

Жалпы жағымсыз реакциялар

Ионды емес рентгеноконтрастылы дәрілерге деген қолайсыз және жағымсыз реакциялар, әдетте, орташа айқындылық дәрежесінде, қайтымды сипатта болады және иондық препараттар қолдану кезіндегіден сирек кездеседі.

Бүкіл дененің ысынуын сезіну немесе ауыздағы өткінші темір тату сияқты жалпы сипаттағы орташа білінетін көріністер кездеседі. Бас ауыруын немесе қызбаны, анда-санда көрініс беретін гипертензияның туындауын байқауға болады. Анафилактоидтық реакциялар дозаға және енгізу тәсіліне байланыссыз туындауы мүмкін: ауыр жағымсыз реакция аса жоғары сезімталдықтың мардымсыз көріністерінен басталуы мүмкін. Бұл жағдайда контрастылы дәрі енгізуді бірден тоқтатып, қажет болса, емді дәрілерді тамырішілік енгізуді қолданудан бастау керек. Ентігу, бөртпе, эритема, есекжем, қышыну және ангионевроздық ісіну сияқты аса жоғары сезімталдық реакцияларын байқауға болады. Олар тікелей препаратты енгізуден кейін де, бірнеше күннен соң да дамуы мүмкін. Бета-блокаторлар қабылдайтын пациенттерде анафилаксия көріністері атипиялық сипатта болуы және вагустық реакциялар ретінде қате қабылдануы мүмкін.

Жағымсыз әскерлер жиілігі былайша белгіленеді:

өте жиі (≥1 / 10), жиі (≥1 / 100, <1 / 10 дейін), жиі емес (≥1 / 1, 000 <1 / 100 дейін), сирек (≥1 / 10, 000, <1 / 1000), өте сирек (<1 / 10, 000) және онша белгілі еместері (қолда бар деректер негізінде бағалауға болмайды).

Жиі

• ысыну сезімі

Жиі емес

• жүрек айну

Сирек

• аса жоғары сезімталдық (соның ішінде ентігу, бөртпе, эритема, есекжем, қышыну, тері реакциялары, Квинке ісінуі, көмей ісінуі, ларингоспазм, бронхоспазм немесе өкпенің кардиогенді емес ісінуі)

• бас ауыру

• брадикардия

• құсу

• гипертермия

Өте сирек

• дәм сезудің бұрмалануы (ауыз қуысындағы өтпелі «темір» тату)

• гипертония, гипотония

• диарея, іштің ауыруы/жайсыздануы

• тремор (қалтырау)

Белгісіз

• анафилактоидтық реакция, анафилаксиялық шок

• вазовагальді естен тану

• йодизм

Тамырішілік енгізу (артерияішілік және көктамырішілік)

Төменде ионды емес мономерлі контрастылы дәрілерді тамырішілік қолдану кезінде ғана туындайтын қолайсыз оқиғалар баяндалған.

Артерия ішіне қолдануға тән қолайсыз әсерлер сипаты инъекция салған жерге және енгізілген дозаға байланысты. Селективті ангиография және контрастылы дәрі жоғары концентрацияларда белгілі бір ағзаға жететін басқа да емшаралар осы нақты бір ағзадағы асқынулармен қатар жүруі мүмкін.

Жиі емес

• ысыну сезімі

• енгізген жердегі ауыру және жайсыздану

Сирек

• бас айналу

• аритмиялар (соның ішінде брадикардия, тахикардия)

• жөтел

• бүйрек функциясының бұзылуы, жедел бүйрек жеткіліксіздігін қоса

• астениялық жай-күйлер (соның ішінде жалпы дімкәстану, қажу)

Өте сирек

• құрысулар, сананың бұзылуы, сенсорлы бұзылулар (соның ішінде, гипестезия), парестезия, тремор

• беттің қызаруы

• ентігу, өкпенің кардиогенді емес ісінуі

Белгісіз

• тиреотоксикоз

• сананың шатасуы

• уақытша қозғалыс дисфункциясы (соның ішінде сөйлеудің нашарлауы, афазия, дизартрия), транзиторлы естен тану

• уақытша соқырлық

• уақытша естімей қалу

• ауыр жүрек-қантамырлық асқынулар (соның ішінде, жүректің тоқтап қалуы, жүректің және тыныс алудың тоқтауы), коронарлық артериялар түйілуі

• шок, артериялық түйілу, ишемия, тромбофлебит және тромбоз

• ауыр респираторлық белгілер мен симптомдар, бронхоспазм, ларингоспазм

• панкреатиттің өршуі

• артралгия

• енгізген жердегі реакция, соның ішінде экстравазация

Интратекальді пайдалану

Төменде ионды емес мономерлі контрастылы дәрілерді интратекальді қолдану кезінде ғана туындайтын қолайсыз оқиғалар баяндалған.

Контрастылы дәрілерді интратекальді енгізу кезінде кейіннен білінетін қолайсыз құбылыстар инъекциядан кейін бірнеше сағат немесе күн өткенде дамуы мүмкін. Осындай құбылыстардың жиілігі әдеттегі люмбарлы пункция кезіндегідей.

Өте жиі:

• бас ауыру (күшті болуы және ұзаққа созылуы мүмкін)

Жиі

• жүрек айну, құсу

Жиі емес

• асептикалық менингит (соның ішінде, химиялық менингит)

Сирек

• құрысулар, бас айналу

• диарея

• мойынның ауыруы, арқаның ауыруы

• аяқ-қолдың ауыруы

Белгісіз

• электроэнцефалограмманың өзгеруі, менингизм, қозғалыс бұзылулары (соның ішінде сөйлеудің нашарлауы, афазия, дизартрия), парастезия және сезімталдық бұзылыстары

• уақытша соқырлық, көздің қарығуы

• уақытша естімей қалу

• сананың шатасуы

• бұлшықеттің түйілуі

• инъекция орнындағы реакциялар

Организм қуысына енгізу

Төменде ионсыз моно өлшемді контрастылы дәрілерді организм қуысына енгізу кезінде ғана туындайтын қолайсыз оқиғалар баяндалған.

Эндоскопиялық ретроградты холангиопанкреатография (ЭРХП):

Жиі

• панкреатит, қандағы амилазаның жоғарылауы

Ішу арқылы қолдану

Өте жиі

• диарея

Жиі

• жүрек айну, құсу

Жиі емес

• іштің ауыруы

Гистеросальпингография (ГСГ)

Өте жиі

• іштің ауыруы

Артрография

Өте жиі

• енгізген жердегі ауыру

Белгісіз

• артрит

Герниография

• жалпы бұзылулар, емшарадан кейінгі ауыру

Қолдануға болмайтын жағдайлар

• белсенді затқа немесе қосымша заттардың кез келгеніне жоғары сезімталдық

• айқын тиреотоксикоз

• эпилепсия және церебральді инфекциялар (субарахноидальді енгізу үшін)

• жүктілік және лактация кезеңі

Дәрілермен өзара әрекеттесуі

Бета-блокаторлар қабылдайтын пациенттерде анафилаксия көріністері атипиялық сипатта болып, вагустық реакциялар ретінде қате қабылдануы мүмкін.

Фенотиазин туындылары және басқа да психозға қарсы дәрілік заттар (нейролептиктер), моноаминоксидаза тежегіштері, үш циклды антидепрессанттар, орталық жүйке жүйесінің стимуляторлары, аналептиктер эпилепсия шегін төмендетеді және эпилепсия ұстамаларының қаупін арттырады.

Құрамында йод бар контрастылы дәрілер енгізу бүйрек функциясының уақытша бұзылуымен қатар жүруі мүмкін, ал бұл метформин алатын қант диабетімен науқастарда сүт қышқылды ацидоздың дамуына түрткі болуы мүмкін.

Құрамында йод бар контрастылы дәрілер енгізуге дейін 2 аптадан аз уақыт бұрын интерлейкин-2 алған науқастарда кейіннен білінетін реакциялардың (тұмау тәрізді симптомдардың немесе тері реакцияларының) жоғары даму қаупі болады.

Құрамында йод бар контрастылы дәрілердің бәрі қалқанша без функциясын талдау нәтижелеріне ықпал ете алады, ал темірдің йодты байланыстыру қабілеті бірнеше апта ішінде төмендеуі мүмкін.

Қан сарысуындағы және несептегі контрастылы дәрілердің жоғары концентрациясы билирубиннің, ақуыздар мен органикалық емес заттардың (мысалы, темір, мыс, кальций, фосфаттар) зертханалық талдаулар нәтижелеріне ықпал етуі мүмкін. Сондықтан тексеру өткізген күні осы заттарға талдау жасауға болмайды.

Айрықша нұсқаулар

Рентгенконтрастылы дәріні қолданар алдында пациент туралы толық ақпарат алу қажет. Сыртартқыда құрамында йод бар контрастылы препараттарға аллергияның, демікпенің және қолайсыз реакциялардың болуы жоғары зейін бөлуді талап етеді. Бұл жағдайларда кортикостероидтармен және гистаминді рецепторлар антагонистерімен премедикация мүмкіндігін қарастыру қажет.

Йогексол ерітіндісін қолдану кезінде күрделі реакциялардың даму қаупі әлсіз болып саналады. Алайда, құрамында йод бар контрастылы дәрілер анафилактоидтық реакцияларды немесе аса жоғары сезімталдықтың басқа көріністерін туындатуы мүмкін. Сондықтан күрделі реакциялар жағдайында атқарылатын әрекеттер ретін алдын ала ойластырып, қажетті препараттар мен шұғыл емдеуге арналған құрылғыны дайындап қою керек. Бүкіл рентгенография шарасы барысында көктамыр ішіне тез кіруді қамтамасыз ету үшін үнемі канюля немесе катетер қою ұсынылады.

Емшарадан 2 сағат бұрын пациент ас ішуді тоқтатуы тиіс.

Ионды емес контрастылы дәрілер, иондық дәрілерге қарағанда, in vitro қан ұю жүйесіне әлсіз ықпал етеді. Тамырішілік катетер қойғанда ангиография әдістемесін мұқият қадағалап, емшарадан туындайтын тромбоз және эмболия қаупін жоққа тән азайту үшін катетерді жиі жуып-шаю (мысалы, гепарин қосылған физиологиялық ерітіндімен) керек.

Контрастылы дәрілерді енгізуге дейін және одан кейін жеткілікті су жүктемесін қамтамасыз ету керек. Бұл, әсіресе, көптеген миеломамен, қант диабетімен, бүйрек функциясының бұзылуымен науқастарға, сондай-ақ егде жастағы науқастарға қатысты.

Күрделі жүрек ауруларымен және өкпе гипертензиясымен науқастарға да қатысты сақтық таныту керек, өйткені оларда гемодинамиканың бұзылуы немесе білінуі мүмкін.

Сыртартқысында жедел церебральді патологиясы, ісіктері немесе эпилепсиясы бар науқастар құрысуларға бейім болып келеді және ерекше көңіл бөлуді талап етеді. Маскүнемдер мен нашақорларда да құрысулар мен неврологиялық реакциялардың даму қаупі жоғары. Бірнеше пациентте миелографиядан кейін уақытша естімей қалу және тіпті люмбарлы пункция кезінде жұлын-ми сұйықтығы қысымының түсіп кетуі нәтижесінде туындағаны жорамалданатын кереңдік байқалды.

Контрастылы дәрілер енгізуден кейінгі жедел бүйрек жеткіліксіздігін болдырмау үшін жоғары қауіп тобына жататын бүйрек функциясының бұзылуы бұрыннан бар және қант диабетімен науқастарға ерекше көңіл бөлу керек.

Қауіп парапротеинемиямен (миеломатоз және Вальденстрем макроглобулинемиясымен) науқастарда да жоғары.

Жағымсыз реакцияларға жол бермеу шаралары:

• қауіп тобына жататын пациенттерді анықтау;

• талапқа сай гидратациямен қамтамасыз ету, егер қажет болса, бұған контрастылы препарат енгізу сәтіне дейін-ақ басталып, оның бүйрекпен шығарылатын сәтіне дейін жалғасатын тұрақты көктамырішілік инфузия көмегімен жетуге болады;

• организмнен контрастылы заттың шығарылуына дейін – нефроуытты препараттар, ішу арқылы холецистографияға арналған дәрілер қолдану, бүйрек артерияларының қысылып қалуы, бүйрек артерияларының ангиопластикасы, хирургиялық операциялар кезінде бүйрекке түсетін қосымша жүктемеге жол бермеу;

• қайталанатын рентгеноконтрастылы зерттеулер препаратты соңғы енгізуден кейін, бүйрек функциясы толық қалыпқа түскен соң орындалуы тиіс.

Метформин алатын қант диабетімен науқастарға құрамында йод бар контрастылы дәрілерді тамыр ішіне енгізер алдында сүт қышқылды ацидоз дамуын болдырмас үшін қан сарысуындағы креатинин деңгейін өлшеу керек. Креатинин/бүйрек функциясының қалыпты деңгейі: метформин қолдану контрастылы дәрі енгізілген сәтте тоқтатылып, 48 сағаттан соң немесе креатинин/бүйрек функциясының деңгейі қалыпқа түскен соң жаңғыртылады. Креатинин/бүйрек функциясының аномальді деңгейі: метформин қолдану тоқтатылады, ал контрастылы дәрі қолданумен тексеру 48 сағатқа шегеріледі. Метформин қолдануды креатинин/бүйрек функциясы бастапқы деңгейіне оралған соң ғана жаңғыртуға болады. Бүйрек функциясы аномальді немесе белгісіз болатын шұғыл жағдайларда, дәрігер контрастылы дәрі қолданудың қауіп/пайда арақатынасын бағалап, алдын ала сақтандыру шараларын қолдануы тиіс: метформин қолдануды тоқтатып, су жүктемесін толықтырып, бүйрек функциясы мен сүт қышқылды ацидоз симптомдарын бақылау керек.

Бауыр функциясының өтпелі бұзылу қаупі бар. Бүйрек және бауыр жеткіліксіздігі біріккен науқастарға контрастылы дәрілер енгізілгенде ерекше сақтану талап етіледі, өйткені оларда осы препараттардың клиренсі едәуір төмендеуі мүмкін. Гемодиализде жүрген науқастардың тексерілуден кейін бірден диализ жасалатын жағдайда рентгенографиялық тексеруге арналған контрастылы дәрілерді алуына болады.

Құрамында йод бар контрастылы дәрілер енгізу гравис миастениясының симптомдарын күшейтуі мүмкін. Феохромоцитомамен науқастарға тамырішілік емшаралар жасалғанда гипертониялық кризді болдырмау үшін профилактикалық тұрғыда альфа-блокаторлар тағайындалу керек. Гипертиреоидизммен науқастарға қатысты ерекше сақтық шарасын қадағалау керек. Көп түйінді зобпен науқастарда құрамында йод бар контрастылы дәрілер енгізілген соң гипертиреоидизмның жоғары даму қаупі болуы мүмкін.

Тамырдан контрастылы дәрінің шығарылуы сирек жағдайларда зардаптарсыз өтетін жергілікті ауыруды және ісінуді туындатуы мүмкін. Алайда, қабыну жағдайлары және тіпті тін некрозы байқалды. Дағдылы ағымдағы шаралар ретінде енгізу орнын көтеру және суыту ұсынылады. Компартмент-синдром дамуында хирургиялық декомпрессия қажет болуы мүмкін.

Қадағалау мерзімі:

Контрастылы дәріні енгізуден соң пациент кемінде 30 минут қадағалауда болуы тиіс, өйткені күрделі жағымсыз әсерлердің көпшілігі тура осы уақыт кезеңінде дамиды. Алайда, кейіннен білінетін реакцияларды да байқауға болады.

Интратекальді қолдану:

Миелографиядан кейін науқас 1 сағат бойы басы мен кеудесін 20°С көтерген күйде жатқан қалпын өзгертпеуі тиіс. Бұдан кейін оның абайлап жүруіне болады, бірақ еңкеюден сақтану керек. Егер науқас кереуетте қалса, басы мен кеудесі 6 сағат бойы көтеріңкі күйде қалуы тиіс. Төмен құрысу шегіне күдік туындағанда науқас осы кезеңде қадағалауда болуы тиіс. Амбулаторлық науқастарды инъекциядан кейінгі алғашқы 24 сағатта жалғыз қалдыруға болмайды.

Құтылар бір рет пайдалануға ғана арналған, препараттың пайдаланылмаған қалдықтары жойылуы тиіс.

Жүктілік және лактация кезеңі

Жүкті әйелдерде қолдану үшін йогексол ерітіндісінің қауіпсіздігі анықталмаған. Жануарлар арасында жүргізілген тәжірибелік зерттеулер нәтижелері тұқым өрбіту функциясына, эмбрион немесе ұрықтың дамуына, жүктілік ағымына, сондай-ақ пери- және постнатальді дамуға тікелей немесе жанама теріс әсер етуін көріністемейді.

Дегенмен де, мүмкіндігінше, жүктілік кезінде радиациялық әсерге ұшырамау керек; қауіп мүмкіндігін төмендету үшін контрастылы затпен немесе онсыз рентгеноскопия қажеттілігін тиянақты есепке алу керек. Егер қажеттілік болжамды қауіптен асып кететін және оны дәрігер қажет деп санайтын жағдайлар болмаса, йогексол ерітіндісін жүктілік кезінде қолдануға болмайды. Контрастылы дәрілер мардымсыз дәрежеде емшек сүтіне экскрецияланады және ішекте тым аз сіңеді.

Сондықтан емшекпен қоректендіргенде сәбиге зиян келтіру ықтималдығы аз болып табылады. Дегенмен де, йогексол ерітіндісін енгізуден кейін 24 сағат ішінде бала емізуден бас тарту мақсатқа сай болады.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Контрастылы дәріні интратекальді енгізуден кейінгі алғашқы 24 сағат ішінде машина жүргізуге немесе қандай да бір басқа механизмдерді пайдалануға кеңес берілмейді.

Артық дозалануы

Артық дозалану симптомдарының даму қаупі тым аз. Препараттың жоғары дозаларында ұзаққа созылатын емшара бүйрек функциясынан көрініс беруі мүмкін (жартылай шығарылу кезеңі – 2 сағат). Препараттың кездейсоқ артық дозалануын, әсіресе, жоғары дозалары көп рет енгізілген жағдайларда күрделі ангиографиялық емшаралар кезінде кездестіруге болады.

Емі: су-электролит теңгерімінің бұзылуларын түзету. Келесі 3 күнде бүйрек функциясына мониторинг жасаған жөн. Қажет болған жағдайда, препарат қалдықтарын шығару үшін гемодиализ қолдану керек. Арнайы у қайтарғысы жоқ.

Шығарылу түрі және қаптамасы

20 мл немесе 50 мл немесе 100 мл препараттан құтыларға құйылады. 10 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге қорапшаға қапталады.

Сақтау шарттары

Жарықтан және екіншілік рентген сәулесінен қорғалған жерде,

15 ºС-ден 25 ºС-ге дейінгі температурада сақтау керек.

Балалардан қорғау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші/Қаптаушы

«НҰР-МАЙ ФАРМАЦИЯ» ЖШС, Қазақстан Республикасы, Алматы қ., Жетісу ауданы, Первомайский ш.а., Қапшағай к-сі, 17 үй, тел./факс:

+7 (727) 2603974.

Тіркеу куәлігінің иесі

«НҰР-МАЙ ФАРМАЦИЯ» ЖШС, Қазақстан Республикасы, Алматы қ., Жетісу ауданы, Первомайский ш.а., Қапшағай к-сі, 17 үй, тел./факс:

+7 (727) 2603974.

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«НҰР-МАЙ ФАРМАЦИЯ» ЖШС, Қазақстан Республикасы, Алматы қ., Жетісу ауданы, Первомайский ш.а., Қапшағай к-сі, 17 үй, тел./факс:

+7 (727) 2603974.