Вивитрол® (380 мг)

• русский
• қазақша

• Скачать инструкцию медикамента

Саудалық атауы

Вивитрол®

Халықаралық патенттелмеген атауы

Налтрексон

Дәрілік түрі

Бұлшықет ішіне енгізу үшін әсер етуі ұзартылған суспензияны дайындауға арналған 380 мг ұнтақ, еріткішпен жиынтықта (4 мл құтыда), еккішпен және инемен.

Құрамы

Бір құтының ішінде

белсенді зат - 430 мг налтрексон (сусыз негізі),

қосымша заттар: полимер: 75:25 DLJN1 [поли(d,l-лактид-когликолид)]

Еріткіштің құрамы: натрий карбоксиметилцеллюлозасы, полисорбат 20, натрий хлориді, инъекцияға арналған су.

Сипаттамасы

Ақ дерлік түстен ашық сары-қоңыр түске дейінгі ұнтақ.

Құты ішіндегісі еріткіште агломераттар түзбей-ақ, жеңіл суспензияланады.

Дайындалған суспензия кіші ине арқылы азғантай кедергімен немесе кедергісіз баяу өтеді.

Фармакотерапиялық тобы

Жүйке жүйесі ауруларын емдеуге арналған басқа да препараттар. Аддитивті бұзылыстарды емдеуге арналған дәрілер. Алкогольдік тәуелділікті емдеуге арналған дәрілер. Налтрексон.

АТХ коды N07ВВ04

Фармакологиялық қасиеттері

Фармакокинетикасы

Вивитрол® - әсер етуі ұзартылған, әрбір 4 апта сайын бұлшықет ішіне инъекция жасауға арналған препарат. Бұлшықет ішіне енгізгеннен кейін налтрексонның қан плазмасындағы концентрациясының өзгеруі енгізгеннен кейін ең көп дегенде шамамен 2 сағаттан соң бастапқы жоғарғы шегіне жетуімен және 2–3 күннен соң екінші жоғарғы шегіне жетуімен сипатталады. Препаратты енгізгеннен кейін шамамен 14 күннен бастап, оның қан плазмасындағы концентрациясы біртіндеп төмендейді, бірақ өлшенетін концентрациясы 1 айдан астамға сақталады.

Налтрексонның және оның негізгі метаболиті 6-β-налтрексолдың қан плазмасындағы Сmax және AUC мәні Вивитрол® препаратының енгізілген дозасына пропорционал. Вивитрол® препаратының 380 мг дозасын бір рет енгізгеннен кейін налтрексонның жалпы экспозициясы оны 28 күн бойы 50 мг мөлшерде ішке қабылдаумен салыстырғанда 3-4 есе жоғары. Алғашқы инъекциядан кейін тепе-тең концентрацияға доза арасындағы аралықтың соңында жетеді. Қайталап енгізгеннен кейін қанда налтрексонның және 6-β-налтрексолдың өте аз (<15%) жиналғаны байқалады.

Налтрексон қан плазмасы ақуыздарымен in vitro (21%) нашар байланысады. Налтрексон организмде белсенді метаболизмге ұшырайды. Негізгі метаболиті, 6-β-налтрексол, цитозольді фермент дигидродиолдегидрогеназа арқылы түзіледі. Р450 цитохромы жүйесінің ферменттері препараттың метаболизміне қатыспайды. Басқа метаболиттер 2-гидрокси-3-метокси-налтрексон және 2-гидрокси-3-метокси-6-β-налтрексол болып табылады. Налтрексон және оның метаболиттері глюкуронидпен конъюгаттар түзеді.

Ішу арқылы қабылдаумен салыстырғанда, Вивитрол® препаратын бұлшықет ішіне енгізген кезде 6-β-налтрексол едәуір аз түзіледі, ол бауырда жүйе алды метаболизмінің төмендеуінен болады. Налтрексон және оның метаболиттері негізінен несеппен бірге шығарылады, оған қоса препараттың өте аз мөлшері өзгермеген күйінде шығарылады. Налтрексонның T1/2 және 6-β-налтрексолдың T1/2 5-10 күнді құрайды және полимердің деградациясына байланысты болады.

Фармакодинамикасы

Налтрексон – апиындық μ-рецепторларға өте көп ұқсастығы бар апиындық антагонист. Препараттың өте аздаған дәрежеде ішкі белсенділігі бар немесе жоқ. Препаратты қолдану қарашықтарды тарылтуы мүмкін.

Вивитрол® толеранттылықты немесе психикалық және физикалық тәуелділікті дамытпайды. Апиынға физикалық тәуелділігі бар емделушілерде препаратты енгізу тоқтату синдромын тудырады.

Налтрексон мидың апиындық рецепторларымен бәсекелі байланыса отырып, апиындардың әсерін бөгейді. Препарат эндогенді апиындық жүйеге ықпалын тигізеді деп болжам жасалады. Блокада апиындар дозасының артуымен игерілуі мүмкін, ол гистамин секрециясының артуы сияқты симптомдармен білінеді.

Вивитрол® препараты аверсивті ем дәрісі емес және апиындарды немесе алкогольді қабылдаған кезде дисульфирамға ұқсас реакцияларды тудырмайды.

Қолданылуы

- препаратпен емдеуді бастамас бұрын амбулаторлық жағдайларда алкоголь қабылдауды тоқтата алуға қабілетті емделушілерде маскүнемдікті емдеуде

Емделушілер Вивитрол® препаратын енгізуді бастаған кезде алкогольді белсенді қабылдау кезеңінде болмауы тиіс.

- апиынға тәуелділікті емдеуде

Есірткіге тәуелді, соның ішінде алкогольге тәуелділіктен емделіп жүрген емделушілер, Вивитрол® препаратымен емдеуді бастаған кезде апиынсыз режимді сақтауы тиіс. Вивитрол® емдеудің жан-жақты жоспарының, соның ішінде психоәлеуметтік демеуді қамтитын элементі болуы тиіс.

Қолдану тәсілі және дозалары

Бұлшықет ішіне, бөксе бұлшықетіне, бөксенің оң және сол жағын кезектестіре отырып.

ВИВИТРОЛДЫ® КӨКТАМЫР ІШІНЕ НЕМЕСЕ ТЕРІ АСТЫНА ЕНГІЗУГЕ БОЛМАЙДЫ! Вивитрол® препаратын қаптамадағы компоненттерді пайдалана отырып, кәсіби медицина қызметкері енгізуі тиіс.

Вивитрол® препаратының ұсынылған дозасы 4 аптада 1 рет б/і 380 мг құрайды. Егер науқас кезекті дозаны ұмыт қалдырса, келесі инъекция мүмкіндігінше тезірек жасалуы тиіс. Вивитрол® препаратын қолданар алдында налтрексонды ішу арқылы қабылдау қажет етілмейді. Үзілістен кейін емдеуді қайта жаңғырту жөнінде деректер жоқ.

Науқасты ішу арқылы қабылданатын налтрексоннан Вивитрол® препаратына көшіру жөнінде жүйелі деректер жоқ.

Суспензияны дайындау жөніндегі нұсқаулар

Суспензия дайындау үшін жиынтықпен бірге салынған еріткішті ғана қолданған жөн. Препаратты жиынтықтағы инемен ғана енгізген жөн. Қаптаманың барлық компоненттері (ұнтағы бар құты, еріткіші бар құты, суспензия дайындауға арналған ине және қорғағыш қалпақшасы бар, инъекцияға арналған 2 ине) препаратты енгізу үшін қажет. Қаптама компоненттерін алмастыруға болмайды. Дозаның дәлдігін қамтамасыз ету үшін препаратты дайындау және енгізу жөніндегі нұсқауларды дәл орындау қажет. Асептика тәртібін сақтау қажет. Бауыр функциясының жеңіл немесе орташа айқындықтағы бұзылуы бар (Чайлд-Пью бойынша А және В класы) емделушілерде дозаны түзету қажет емес. Бүйрек функциясының жеңіл жеткіліксіздігінде (креатинин клиренсі минутына 50-80 мл) препарат дозасын түзету қажет етілмейді.

Балаларға қолданылуы жөнінде деректер жоқ.

Вивитрол® препаратын суспензияны дайындап болу бойына пайдаланған жөн. Препарат тек бір рет пайдалануға арналған.

Егер ерітінді және ыдысы бұған мүмкіндік берсе, парентеральді енгізуге арналған өнімдерді пайдаланар алдында механикалық қоспалардың бар-жоқтығын және түсінің өзгерген-өзгермегендігін көзбен қарап тексеру керек.

Жағымсыз әсерлері

Ұзақтығы 6 айға созылған клиникалық зерттеулерде Вивитрол® препаратымен емделген, алкогольге тәуелділігі бар емделушілердің 9%-да емдеу жағымсыз әсерлердің пайда болуына байланысты тоқтатылды. Плацебо енгізілген емделушілер тобында, жағымсыз құбылыстарға байланысты, емделушілердің 7%-да емдеу тоқтатылды. Вивитрол® препаратымен емдеуден бас тартудың өте жиі себептері енгізген жердегі реакциялар 3%, жүректің айнуы 2%, жүктілік 1%, бас ауыру 1% және өзіне-өзі қол жұмсау мінезін таныту 0,3% болды. Плацебо инъекциясын қабылдаған науқастар тобында, енгізілген жерде реакциялардың пайда болу себебіне байланысты, емдеу емделушілердің 1%-да ғана тоқтатылды.

Ұзақтығы 6 айға созылған клиникалық зерттеулерде Вивитрол® препаратымен емделген, апиынға тәуелділігі бар емделушілердің 2%-да емдеу жағымсыз әсерлердің пайда болуына байланысты тоқтатылды. Плацебо енгізілген емделушілер тобында, жағымсыз құбылыстарға байланысты, емделушілердің 2%-да емдеу тоқтатылды.

Төменде клиникалық зерттеулер барысында 5%-дан астам жағдайда (жиі) кездескен, апиынға тәуелділігі бар емделушілердегі жағымсыз құбылыстар берілген, осы жағымсыз құбылыстардың айқындылық дәрежесі жеңіл және орташа сипатта болды.

• Асқазан-ішек жолы тарапынан: жүректің айнуы, құсу, диарея, іштің ауыруы, асқазанда жайсыздық, ауыз ішінің құрғауы, анорексия, тәбеттің азаюы, тәбеттің нашарлауы

• Тыныс алу жүйесі тарапынан: фарингит

• Жалпы бұзылулар және енгізген жердегі реакциялар: ауыру, қатаю, ісіну, қышыну, қанталау, астения, үрейлену, летаргия

• Тірек-қимыл жүйесі тарапынан: артрит, буындардың ауыруы, буындардың қимылсыздығы, арқаның ауыруы, арқаның сіресуі, аяқ-қолдың ауыруы, бұлшықеттердің түйілуі, бұлшықеттердің тартылуы, бұлшықеттердің сіресуі

• Тері және теріастылық тіндер тарапынан: бөртпе, папулезді бөртпелер, тер бөртпе

• Жүйке жүйесі тарапынан: бас ауыруы, бас сақинасы, бас айналуы, естен тану, ұйқышылдық, мәңгіру, енжарлық

Апиынға тәуелділігі бар емделушілердегі жағымсыз құбылыстар, негізінен, алкогольге тәуелділігі бар емделушілердегідей болды.

Төменде клиникалық зерттеулер барысында 2%-дан астам жағдайда (жиі) кездескен, апиынға тәуелділігі бар емделушілердегі жағымсыз құбылыстар берілген, осы жағымсыз құбылыстардың айқындылық дәрежесі жеңіл және орташа сипатта болды.

• Зертханалық көрсеткіштер: аланинаминотрансфераза, аспартатаминотрансфераза және гамма-глютамилтрансфераза деңгейлерінің артуы

• Тыныс алу жүйесі тарапынан: назофарингит, тұмау

• Жүйке жүйесі тарапынан: ұйқысыздық, бас ауыруы

• Жүрек-қантамыр жүйесі тарапынан: артериялық қысымның жоғарылауы

• Жалпы бұзылулар және енгізген жердегі реакциялар: ауыру

• Асқазан-ішек жолы тарапынан: тістің ауыруы

Препаратты тіркеу алдындағы зерттеулер барысында білінген жағымсыз құбылыстар:

- Асқазан-ішек жолы тарапынан: іш қату, метеоризм, геморрой, колит, асқазан-ішек жолынан қан кету, ішектің салданып бітелуі, параректальді абсцесс, іште жайсыздық сезімі, жедел панкреатит.

- Жалпы бұзылулар және енгізген жердегі реакциялар: температураның жоғарылауы, летаргия, кеуденің ауыруы, кеуденің қысылуы, дене салмағының артуы немесе азаюы, дірілдеу, қалтырау, беттің ісінуі

- Психикалық бұзылыстар: ашушаңдық, ұйқының бұзылуы, алкогольді «тоқтату» синдромы, ажитация, эйфория, делирий, либидоның төмендеуі

- Жүйке жүйесі тарапынан: зейіннің нашарлауы, бас сақинасы, ақыл-ой қызметінің нашарлауы, құрысулар, ишемиялық инсульт, ми артерияларының аневризмі, парестезия

- Сезім мүшелері тарапынан: көрудің нашарлауы, конъюнктивит

- Тірек-қимыл жүйесі тарапынан: аяқ-қолдардың ауыруы, бұлшықеттердің түйілуі, буындардың қимылсыздығы, миалгия

- Тері және теріастылық тіндер тарапынан: қатты тершеңдік, соның ішінде түнде, қышыну

- Тыныс алу жүйесі тарапынан: тамақтың ауыруы, ентігу, синустардың бітелуі, өкпенің созылмалы обструктивті ауруы

- Зат алмасу тарапынан: тәбеттің жоғарылауы, ыстық өту соққысы, сусыздану, гиперхолестеринемия

- Жүрек-қантамыр жүйесі тарапынан: қан тебулер, тереңдегі көктамыр тромбоздары, өкпелік тромбоз, жүрек қағуының жиілеуі, жүрекшелердің фибрилляциясы, миокард инфарктісі, стенокардия, тұрақсыз стенокардия, жүрек функциясының созылмалы жеткіліксіздігі, коронарлық артериялардың атеросклерозы

- Қан және лимфа жүйесі тарапынан: лимфаденопатия, соның ішінде мойын адениті, қанда лейкоциттер санының артуы

- Иммунитет жүйесі тарапынан: маусымдық аллергия, аса жоғары сезімталдық реакциялары, соның ішінде ангионевротикалық ісіну және есекжем, АИВ жұқтырған емделушілерде АИВ жұқпасының өршуі

- Босанғаннан кейінгі және перинатальді кезеңдегі жүктіліктің асқынулары: өздігінен боатын аборт

- Жұқпалар және инвазиялар: бронхит, теріасты шелмайының қабынуы, гастроэнтерит, ларингит, пневмония, синусит, тіс абсцесі, жоғарғы тыныс жолдарының жұқпалары, несеп шығару жолдарының жұқпалары.

- Гепатобилиарлы жүйе тарапынан: холелитиаз, аланинаминотрансфераза және аспартатаминотрансфераза белсенділігінің артуы, жедел холецистит

Қолдануға болмайтын жағдайлар

- препараттың белсенді затына немесе еріткіштің оның толтырғыштарының кез келгеніне және компоненттеріне аса жоғары сезімталдық

- есірткілік анальгетиктерді қабылдап жүрген емделушілер

- апиындарды күрт тоқтату жағдайындағы емделушілер

- апиынға ағымдағы физикалық тәуелділігі бар емделушілер

- налоксонмен провакация сынамасы жасалмаған немесе несепте апиындардың бар-жоқтығына талдау нәтижесі оң болған емделушілер

Сақтықпен:- бауыр функциясының жеңіл немесе орташа айқын бұзылулары - Чайлд-Пью бойынша А және В класы (дозаны түзету қажет етілмейді)

- бауыр функциясының ауыр бұзылуларында (бұлшықетішілік инъекцияға, мысалы, тромбоцитопениямен және коагуляцияның бұзылуымен байланысты қауіп болғандықтан, абайлап тағайындаған жөн)

- жедел гепатит

- бүйрек функциясының жеңіл жеткіліксіздігі (креатинин клиренсі минутына 50-80 мл болғанда дозаны түзету қажет етілмейді)

- бүйрек функциясының орташа айқындықтағы және ауыр жеткіліксіздігі.

Дәрілермен өзара әрекеттесуі

Налтрексон құрамында апиыны бар дәрілердің антагонисті (мысалы, жөтелде, суық тигенде қолданылатын препараттар, диареяға қарсы препараттар және апиындық анальгетиктер) болып табылады. Налтрексон цитохром жүйесі ферменттерінің субстраттары болып табылмайтындықтан, осы ферменттер индукторларының немесе тежегіштерінің налтрексонның клиренсіне ықпал ету мүмкіндігі аз. Вивитрол® препаратын басқа препараттармен бірге тағайындаған кезде сақ болу керек және ықтималды қаупі мен әлеуетті пайдасына баға беру қажет.

Вивитрол® препаратын антидепрессанттармен бірге және онсыз қолданудың қауіпсіздік көрсеткіштері бірдей.

Айрықша нұсқаулар

Гепатоуыттылық.

Налтрексонның шамадан тыс дозаларын қабылдау гепатоцеллюлярлы бұзылуларға әкеп соғуы мүмкін. Налтрексонды жедел гепатитте және бауыр жеткіліксіздігінде қолдануға болмайды.

Ұсынылған дозаларда қолданған кезде Вивитрол® гепатоуытты емес.

Емделушілерге бауыр бұзылуының туындау қаупі туралы ескерткен жөн және гепатит симптомдары пайда болған жағдайда дәрігерге қаралуына кеңес берген жөн. Мұндай симптомдар пайда болған кезде Вивитрол® препаратымен емдеу тоқтатылуы тиіс.

Эозинофильдік пневмония

Эозинофильдік пневмонияның пайда болуының бір жағдайы және эозинофильдік пневмонияға күдіктенудің бір жағдайы анықталды. Екі жағдайда да госпитализациялау және антибиотиктер мен кортикостероидтар жәрдемімен емдеу қажет етілді. Пневмонияның, мысалы, үдемелі ентікпе және гипоксия сияқты симптомдары пайда болған кезде емделушілердің дереу дәрігерге қаралуына кеңес берген жөн. Дәрігерлер антибиотиктерге төзімді емделушілерде эозинофильдік пневмонияның пайда болуы мүмкін екендігін ескергені жөн.

Аса жоғары сезімталдық реакциялары

Вивитрол® препаратын қабылдаған кезде есекжем, ангионевротикалық ісіну, анафилаксия сияқты жағымсыз құбылыстар пайда болуы мүмкін. Емделушілерге асқын сезімталдық реакциялары пайда болған жағдайда дәрігерге дереу қаралуы және препаратпен әрі қарай емделуді тоқтатуы керек екендігін ескерткен жөн.

Апиындық рецепторларды бөгеуге әрекет кезінде апиындардың артық дозалануы

Апиынмен уыттанғаннан кейін емделушілерде әдетте апиынға төзімділік төмендейді. Вивитрол® 28 сағат ішінде экзогендік апиындардың әсерін бөгейді, алайда Вивитрол® препаратының жаңа дозасын енгізер алдында немесе Вивитрол® препаратының келесі инъекциясын ұмытып жіберіп алған жағдайда апиын қабылдаған емделушілерде апиындардың өлімге әкелетін артық дозалану жағдайларының болғаны белгілі.

Вивитрол® препаратымен емделген емделушілер апиындардың аз дозасына, емдегенге дейінгіге қарағанда, сезімтал болуы мүмкін. Бұл өмір үшін қауіпті апиындық уыттануды (тыныс алу қызметінің жеткіліксіздігі немесе тыныс алудың тоқтап қалуы, коллапс және т.б.) тудыруы мүмкін. Емделушілерге Вивитрол® препаратымен емдеуді тоқтатқаннан кейін олар апиындардың өте төмен дозаларына сезімтал болуы мүмкін екендігін ескерткен жөн. Дозалау аралығының соңында, яғни препарат инъекциясынан кейін шамамен бір айдан соң және келесі инъекцияны жіберіп алған жағдайда апиындарға төзімділіктің төмендейтінін есте ұстау маңызды. Емделушілерге және олардың отбасы мүшелеріне апиындарға сезімталдықтарының артатындығы және апиындардың артық дозалану қаупі жөнінде ескерткен жөн.

Налтрексон фармакологиялық әсері ұзаққа созылатын апиындық рецепторлардың күшті антагонистері болғанына қарамастан, олардан болған блокаданы жеңуге болады. Экзогендік апиындардың жоғары дозаларын енгізу арқылы осы блокаданы жеңуге әрекеттенетін емделушілер апиындардың шектен тыс дозасын қабылдауға және өз өміріне қауіп төндіруге тәуекел етеді. Апиындарды қабылдап болу бойына олардың плазмадағы концентрациялары апиын рецепторларын бәсекелі түрде жеңу үшін жеткілікті болуы және оның салдары ретінде емделушіде өмірге қатер төндіретін тыныстың тарылуы, қантамырлық коллапс түрінде білінетін апиындық уыттану жылдам пайда болуы мүмкін. Емделушілер апиын рецепторларының блокадасын жеңу әрекетінің салдары ауыр болатындығын ұғынуы тиіс.

Қанның зертханалық көрсеткіштеріне препараттың ықпалы

Вивитрол® препаратымен ем қабылдаған емделушілерде қандағы эозинофилдер деңгейінің жоғарылағаны білінеді, алайда бірнеше ай емделгеннен кейін эозинофилдер деңгейі қалыпқа келді. Препараттың жоғары дозаларын қабылдаған емделушілерде тромбоциттер деңгейінің орта есеппен 17,8×103 мкл-ге дейін төмендегені байқалды. Алайда бақыланатын рандомизирленген зерттеулерде Вивитролдың қан кетудің ұлғаюына ықпал етуі айғақталған жоқ.

Препаратпен 24 апта ем қабылдаған, апиынға тәуелді емделушілерде тромбоциттер санының орта есеппен 62,8 х 103 мкл-ге төмендегені байқалды. Плацебо тобындағы емделушілерде тромбоциттер саны орта есеппен 39,9 х 103 мкл-ге төмендеді. Алайда бақыланатын рандомизирленген зерттеулерде Вивитрол® препаратының қан кетудің ұлғаюына ықпал етуі айғақталған жоқ.

Вивитрол® препаратымен емдеу аясында қанда аспартатаминотрансфераза белсенділігінің жоғарылауы ішу арқылы қабылданатын налтрексонмен емдеген кездегідей болды және плацебо қабылдаған емделушілер тобындағы 0,9%-бен салыстырғанда 1,5% құрады.

Апиынға тәуелді емделушілердің қатысуымен ұзақтығы 6 айға дейін жүргізілген клиникалық зерттеулерде емделушілердің 89%-на С гепатиті диагнозы, емделушілердің 41%-на АИВ-жұқпасы диагнозы қойылды. Зерттеулерде бауыр ферменттері (аланинаминотрансфераза, аспартатаминотрансфераза және гамма-глютамилтрансфераза) белсенділігінің артқаны байқалды. Бұл жағымсыз құбылыстар плацебо қабылдаған емделушілер тобына қарағанда, 380 мг Вивитрол® препарытымен ем қабылдаған емделушілер тобында жиі байқалды. Аланинаминотрансфераза немесе аспартатаминотрансфераза деңгейлері норманың жоғарғы шегінен үш еседен астамға артқан емделушілер зерттеуге қатыстырылмады. Вивитрол® препаратымен ем қабылдаған емделушілерде трансаминаза деңгейінің норманың жоғары шегімен және шұғыл емдеуді қажет ететіндермен салыстырғанда 3 еседен астамға жоғарылауы плацебо қабылдаған емделушілерге қарағанда жиі байқалды. Фермент деңгейлерінің бұлай артуы, плацебо тобындағы емделушілердің 13%-мен салыстырғанда, Вивитрол® препаратымен ем қабылдаған емделушілердің 20%-да байқалды. Аспартатаминотрансфераза деңгейінің, норманың жоғарғы шегімен салыстырғанда үш еседен астамға жоғарылауы да, плацебо тобындағы (11%) емделушілермен салыстырғанда, Вивитрол® препаратымен ем қабылдаған (14%) емделушілер тобында жиі байқалды. Вивитрол® препаратымен ем қабылдаған, апиынға тәуелді емделушілерде аланинаминотрансфераза деңгейі орта есеппен 61 ХБ/л-ге, плацебо тобындағы емделушілерде- орта есеппен 48 ХБ/л-ге артты. Вивитрол® препаратымен ем қабылдаған, апиынға тәуелді емделушілерде аспартатаминотрансфераза деңгейі орта есеппен 40 ХБ/л-ге, плацебо тобындағы емделушілерде - орта есеппен 31 ХБ/л-ге жоғарылады. Клиникалық зерттеулер барысында Вивитрол® препаратын қабылдаған емделушілерде креатинфосфокиназа деңгейінің норманың жоғарғы шегінен, әдеттегідей, 1-2 есе жоғарылағаны байқалды. Креатинфосфокиназа деңгейінің осыған ұқсас жоғарылауы ішу арқылы қабылданатын налтрексонмен ем жүргізілген кезде де байқалады. Алайда ішу арқылы налтрексон және Вивитрол® препаратымен ем қабылдаған емделушілер тобында осы фермент белсенділігінің, тиісінше, 4 есе және тіпті 35 есе жоғарылаған жағдайлары белгілі болды. Креатинфосфокиназа деңгейінің қалыпты мәннен жоғарыға артуы Вивитрол® препаратымен ем қабылдаған, апиынға тәуелді емделушілердің 39%-да байқалды, плацебо қабылдаған емделушілер тобында креатинфосфокиназа деңгейінің жоғарылауы емделушілердің 32%-да байқалды. Кейбір жағдайларда плацебо қабылдаған емделушілерде креатинфосфокиназа деңгейі норманың жоғарғы шегімен салыстырғанда 41,8 есе жоғарылады; Вивитрол® препаратымен ем қабылдаған емделушілер тобында креатинфосфокиназаның норманың жоғарғы шегінен 22,1 есеге жоғарылау жағдайлары белгілі болды. Несепке жүргізілген кейбір иммуноферменттік талдауларда бірқатар препараттарға, әсіресе апиындарға, жалған оң нәтижелер пайда болуы мүмкін. Қосымша ақпарат нақты талдаулар жүргізу жөніндегі нұсқауларда берілген.

Сақтық шаралары

Апиынға тәуелді емделушілерде жедел «тоқтату» синдромының пайда болуына және бұрыннан барының өршуіне жол бермеу үшін емделушілер Вивитрол® препаратымен емделуден кем дегенде 7-10 күн бұрын апиындарды қабылдауды тоқтатуы тиіс.

Организмде апиындардың жоқтығын айғақтау үшін несепте апиындардың жоқ болуы жеткіліксіз, тоқтату реакцияларының қаупі болған кезде Вивитрол® препаратын қолданар алдында налоксонмен провакациялық сынама жасаған жөн.

Ауыруды басу үшін Вивитрол® препаратымен блокаданы қайтару

Вивитрол® препаратын қабылдап жүрген емделушілерге шұғыл жағдайларда ауыруды қайтару үшін аумақтық анальгезия, бензодиазепинмен тыныштандыру және есірткілік емес анальгетиктер қолданылады. Егер емделушілерге анестезия немесе анальгезия үшін есірткілік анальгетиктерді қолдану қажет болса, мұндай емделушілер ұзақ уақыт медициналық бақылауда болуы тиіс. Есірткілік анальгетиктермен емдеуді, асқынулар пайда болған жағдайда өкпеге жасанды желдету жүргізуге қабілетті тыныс алу проблемаларын болдырмау үшін, бұған арнайы үйретілген қызметкер жүргізуі тиіс. Налтрексонның әсерін жою үшін таңдап алынған дәрілерге қарамай-ақ, емделуші реанимацияның арнайы жабдықталған бөлімінде кәсіби медициналық қызметкердің ұдайы бақылауында болуы тиіс.

Депрессия және өзіне-өзі қол жұмсауға мінез таныту

Алкогольге және/немесе апиынға тәуелді емделушілерде, соның ішінде Вивитрол® препаратымен ем қабылдап жүрген емделушілерде, депрессия немесе өзіне-өзі қол жұмсау ойы белгілерінің пайда болуын мұқият бақылап отырған жөн. Отбасы мүшелеріне және емделушіні күтімге алған адамдарға депрессия немесе өзіне-өзі қол жұмсау ойы симптомдарының пайда болу жағдайын мұқият бақылауы керектігін және осындай симптомдар пайда болған кезде оны емдеуші дәрігерге хабарлау қажет екендігін ескерткен жөн.

Алкогольге тәуелділік

Вивитрол® препаратына бақыланатын клиникалық зерттеулер жүргізу кезінде өзіне-өзі қол жұмсау мінезін таныту (өзіне-өзі қол жұмсау ойлары, өзін-өзін өлтіруге әрекет ету, өзін-өзі өлтіру) жиі болған жоқ, алайда плацебо қабылдап жүрген емделушілер тобына қарағанда, Вивитрол® препаратымен ем қабылдап жүрген емделушілер тобында жиі кездесті (0-ге қарсы 1%). Зерттеуді аяқтағаннан кейін кейбір жағдайларда өзіне-өзі қол жұмсау ойы және мінез таныту тіркелді, бірақ бұл препаратпен емдеу кезінде пайда болған депрессияның салдарынан болды. Өзін-өзі өлтіру екі рет орын алды, екі жағдайда да емделушілер Вивитрол® препаратымен емделген болатын.

Депрессияның білінуіне байланысты препаратты қабылдауды тоқтату плацебо (0) тобындағыға қарағанда Вивитрол® қабылдап жүрген (1%) топта жиі болды.

24 күндік плацебо-бақыланатын зерттеулерде депрессияға байланысты жағымсыз құбылыстар 380 мг доза Вивитрол® препаратымен ем қабылдаған емделушілердің 10%-да, ал плацебо инъекциясын қабылдаған емделушілер тобының 5%-да байқалды.

Апиынға тәуелділік

Өзіне-өзі қол жұмсауға бағытталған жағымсыз құбылыстар (көңіл-күйдің тежелуі, өзіне-өзі қол жұмсау ойы, өзін-өзі өлтіруге әрекет) Вивитрол® қабылдаған, апиынға тәуелді емделушілердің 5%-да және ішу арқылы налтрексон қабылдаған емделушілердің 10%-да байқалды.

24 күндік плацебо-бақыланатын зерттеулерде көңіл-күйдің тежелуі, өзіне-өзі қол жұмсау ойлары сияқты жағымсыз құбылыстар 380 мг доза Вивитрол® препаратымен ем қабылдаған емделушілер тобында да, плацебо инъекциясын қабылдаған емделушілер тобында да байқалған жоқ.

Инъекция жасалған жердегі реакция

Вивитрол® препаратымен инъекция жасағанда ауырсыну, ауырушылық, тығыздалу, ісіну, эритема және қышу қатар жүруі мүмкін. Алайда кейбір жағдайларда инъекция жасалған жердегі реакциялар өте ауыр болуы мүмкін. Клиникалық зерттеулер барысында бір емделушіде қатаю пайда болды, ол инъекциядан кейін 4 сағат өткеннен кейін ұлғаюын жалғастырып, некроздың дамуына ұласты, оны алып тастау үшін хирургиялық араласу қажет етілді. Инъекция жасаған жерде теріастылық шелдің қабынуы, тығыздалуы, гематоманы, абсцесті, стерильді абсцесті және некрозды қамтыған басқа да реакция жағдайлары байқалды, олардың кейбіреулерін жою үшін хирургиялық араласым қажет етілді. Кейбір жағдайларда, негізінен әйелдерде, енгізілген жерде тыртықтар түзілді. Вивитрол® бөксе бұлшықетіне инъекция жасауға арналған, препаратты байқамай тері астына енгізіп алу енгізілген жерде ауыр жағымсыз реакциялардың пайда болу ықтималдығын арттыруы мүмкін. Қаптаманың ішінде болатын инъекцияға арналған ине Вивитрол® препаратын енгізу үшін арнайы жасалған, және еш уақытта қандай да болсын басқа инемен алмастырылмауы тиіс. Кейбір жағдайларда дене бітімінің ерекшеліктеріне байланысты иненің ұзындығы бұлшықетішілік инъекция жасау үшін жеткіліксіз болуы мүмкін. Сондықтан дәрігер инъекция жасар алдында иненің емделушіге сәйкес келетініне көз жеткізуі тиіс. Егер ине жарамаған жағдайда, басқа ем тағайындаған жөн. Емделушілерге препаратпен инъекция жасаған жерде пайда болған кез келген реакция туралы емдеуші дәрігерге хабарлап отыру керектігін ескерткен жөн. Теріасты абсцесінің, тері асты шелдерінің қабынуы белгілері, некроз немесе едәуір ісіну пайда болған жағдайда хирургиялық араласымның қажеттілігі жөнінде шешім қабылдаған жөн.

Алкогольді тоқтату

Вивитрол® препаратын қолдану алкогольді қабылдауды тоқтатуға байланысты симптомдардың біліністерін қайтармайды және төмендетпейді.

Торқабықтың окклюзиясы

Құрамында сүт және гликоль қышқылдарының сополимері бар басқа препаратпен инъекция жасағаннан кейін артериялардың окклюзиясы өте сирек кездесті және аномальді артерия-көктамырлық анастомоз болған кезде орын алды. Торқабық артерияларының бітелу жағдайының бірде-бірі байқалған жоқ. Вивитролды® тек бөксе бұлшықетіне енгізу қажет, қантамыр ағысына еніп кетуіне жол бермеген жөн.

Жүктілік және лактация кезеңі

Препарат уыттылығы бойынша С категориясына жатады. Вивитрол® препаратын жүктілік кезінде тек оны қолданудан болатын нақты пайдасы ұрық үшін нақты қауіптен басым болған жағдайда ғана тағайындау керек.

Налтрексонды ішу арқылы қабылдаған кезде налтрексонның және 6-β-налтрексолдың емшек сүтімен бөлініп шығатыны білінді. Ықтимал канцерогенділігіне және емшектегі балаларда ауыр жағымсыз құбылыстардың пайда болуы мүмкін екендігіне байланысты, емшек емізу кезінде Вивитрол® препаратымен емдеуді тоқтату немесе ана үшін емнің маңыздылығы дәрежесіне байланысты, препаратпен емделу кезінде лактацияны тоқтату жөнінде шешім қабылдаған жөн.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Вивитрол® препаратын қабылдау кезінде көлікті немесе қауіпті механизмдерді басқаруды тоқтата тұру керек.

Артық дозалануы

Симптомдары: инъекция жасаған жерде реакциялар, жүректің айнуы, іштің ауыруы, ұйқышылдық және бас айналу.

Емі: демеуші ем.

Шығарылу түрі және қаптамасы

Микросфералар сұр резеңке иілген тығынмен тығындалған және пластик қақпағы бар алюминий қалпақшамен қаусырылған сыйымдылығы 5 мл гидролитикалық І класты түссіз шыны құтыға салынған.

Силикондалған резеңке тығынмен тығындалған және пластик қақпағы бар алюминий қалпақшамен қаусырылған сыйымдылығы 5 мл гидролитикалық І типті түссіз шыны құтыларда 4 мл еріткіштен.

Микросферасы бар бір құты, еріткіші бар бір құты, сыйымдылығы 5 мл бір еккіш, суспензия дайындауға арналған 0.5 дюйм 20G бір ине және инъекцияға арналған 1.5 дюйм 20G 2 ине медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

2 °C-ден 8°C-ге дейінгі температурада сақтау керек.

Мұздатып қатыруға болмайды.

25оС-ден аспайтын температурада, 7 күннен асырмай сақтау керек.

25оС-ден асатын температураның әсеріне ұшыратпау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханадан босатылу шарттары

Рецепт арқылы

Өндіруші

Алкермес Инк., АҚШ

Қаптаушы

Силаг АГ, Швейцария

Тіркеу куәлігінің иесі

«Джонсон & Джонсон» ЖШҚ, Ресей.

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

Қазақстан Республикасындағы «Джонсон & Джонсон» ЖШҚ филиалы

050040, Алматы қ., Тимирязев к-сі, 42, № 23 «А» павильоны

Тел.: +7 (727) 356 88 11

е-mail: DrugSafetyKZ@its.jnj.com