Эспиро (50 мг)

• русский
• қазақша

• Скачать инструкцию медикамента

Саудалық атауы

Эспиро

Халықаралық патенттелмеген атауы

Эплеренон

Дәрілік түр

Үлбірлі қабықпен қапталған 25 мг, 50 мг таблеткалар

Құрамы

Бір таблетканың құрамында

белсенді зат – тиісінше 25.0 мг немесе 50.0 мг эплеренон,

қосымша заттар: лактоза моногидраты, микрокристалды целлюлоза, гипромеллоза, натрий лаурилсульфаты, натрий кроскармеллозасы, магний стеараты,

қабықтың құрамы Опадрай сары 33G32578, соның ішінде: гипромеллоза, титанның қостотығы (E 171), лактоза моногидраты, макрогол, триацетин, темірдің (III) сары тотығы (E 172).

Сипаттамасы

Сары түсті үлбірлі қабықпен қапталған, дөңгелек пішінді, екі жақ беті дөңес таблеткалар (25 мг доза үшін).

Сары түсті үлбірлі қабықпен қапталған, дөңгелек пішінді, екі жақ беті дөңес, бір жақ бетінде бөлетін сызығы бар таблеткалар (50 мг доза үшін).

Фармакотерапиялық тобы

Калий жинақтаушы диуретиктер. Альдостерон антагонистері. Эплеренон.

ATХ коды C03DA04

Фармакологиялық қасиеттері

Фармакокинетикасы

Сіңуі және таралуы

Эплеренонның абсолютті биожетімділігі белгісіз. Қолданудан шамамен 2 сағат өткен соң қан плазмасында ең жоғары концентрацияға жетеді. Қан плазмасындағы ең жоғары концентрация (Cmax) және концентрациясы қисығы астындағы аудан (AUC) 10 - 100 мг аралықтағы дозаға пропорционалды, және 100 мг-нан астам дозаларда қолданғанда аз пропорционалды. Тепе-тең концентрацияларға 2 күн ішінде жетеді. Ас қабылдау сіңуіне ықпалын тигізбейді.

Эплеренонның қан плазмасы ақуыздарымен байланысуы, көбіне альфа 1-қышқыл гликопротеиндермен байланысу есебінен, 50%-ға жуықты құрайды. Болжаммен алынған таралу көлемі тепе-тең жағдайларда 50 (±7) л құрайды. Эплеренон эритроциттермен таңдап байланыспайды.

Meтаболизмі және шығарылуы

Эплеренонның метаболизмі CYP3А4 изоферментінің әсерімен жүзеге асады. Адамның қан плазмасындағы эплеренонның белсенді метаболиттері идентификацияланбаған.

Эплеренон дозасының 5%-дан азы өзгермеген күйінде несеппен және нәжіспен бірге шығарылады.

Радиоактивті изотоппен таңбаланған дәрілік препараттың дозасын ішке бір рет қабылдағаннан кейін, дозаның 32%-ға жуығы нәжіспен бірге және 67%-ға жуығы несеппен бірге шығарылды. Эплеренонның элиминациясы сатысындағы жартылай шығарылу кезеңі 3-5 сағатқа жуықты құрайды. Қан плазмасындағы клиренсі сағатына 10 л-ге жуықты құрайды.

Емделушілердің ерекше топтары

Жасы, жынысы және нәсілі:

Эплеренонның еркектер мен әйелдердегі фармакокинетикасында елеулі айырмашылық жоқ. Егде жастағы адамдарда Cmax (22%) және AUC (45%) тепе-тең көрсеткіштері жас емделушілермен (18 - 45 жас) салыстырғанда жоғары болды. Негроид нәсілді адамдарда Cmax және AUC тепе-тең көрсеткіштері тиісінше 19%-ға және 26%-ға төмен болды.

Бүйрек қызметінің жеткіліксіздігі:

Эплеренонның фармакокинетикасы бүйрек қызметінің әртүрлі дәрежелі жеткіліксіздігі бар науқастарда және гемодиализдегі емделушілерде зерттелді. Дені сау емделушілермен салыстырғанда AUC және Cmax тепе-тең көрсеткіштері, бүйрек қызметінің ауыр жеткіліксіздігі бар емделушілерде тиісінше 38%-ға және 24%-ға жоғарылады, және гемодиализдегі емделушілерде тиісінше 26%-ға және 3%-ға төмендеді. Қан плазмасынан эплеренонның клиренсі мен креатинин клиренсі арасында өзара байланыс байқалған жоқ. Эплеренон гемодиализбен жоғалмайды.

Бауыр қызметінің жеткіліксіздігі:

Бауыр қызметінің ауыр жеткіліксіздігі бар емделушілерде эплеренон зерттелген жоқ, сондықтан оны науқастардың осы тобына қолдануға болмайды.

Жүрек қызметінің жеткіліксіздігі:

Жүрек қызметінің жеткіліксіздігі бар емделушілерде эплеренонның клиренсі дені сау адамдардағы осындайға ұқсас.

Фармакодинамикасы

Эплеренонның, глюкокортикоидтық, прогестерондық және андрогендік рецепторлармен салыстырғанда, адамдағы минералокортикоидтық рецепторларға қатысты салыстырмалы селективтілігі бар, олардың артериялық қысымды реттеуге және жүрек-қантамыр аурулары патогенезіне қатысатын ренин-ангиотензин-альдостерон жүйесінің (РААЖ) негізгі гормоны – альдостеронмен байланысын бөгейді.

Эплеренон қан плазмасында ренин және қан сарысуында альдостерон деңгейлерін тұрақты түрде жоғарылатады. Нәтижесінде рениннің секрециясы қайтымды байланысу механизмі бойынша альдостеронмен басылады. Мұндайда ренин белсенділігінің немесе айналымдағы альдостерон деңгейінің жоғарылауы эплеренонның әсеріне ықпалын тигізбейді.

Қолданылуы

- жүректің сол жақ қарыншасы қызметі бұзылған (LVEF [сол жақ қарыншадан қанды айдау фракциясы] ≤40%), клиникалық жағдайы тұрақты емделушілерде өлім және жүрек-қантамыр ауруларының қаупін төмендету мақсатында бета-адреноблокаторларды қолдана отырып жүргізілетін стандартты емге қосымша дәрі ретінде

- жақын арада миокард инфарктісін бастан кешкеннен кейін жүрек қызметі жеткіліксіздігінің клиникалық біліністері байқалған емделушілерде өлім және жүрек-қантамырлардың аурушаңдық қаупін төмендету мақсатында

Қолдану тәсілі және дозалары

Эспироны ас қабылдау кезінде немесе оған қарамай-ақ қабылдай беруге болады. Эспироның ұсынылатын демеуші дозасы тәулігіне бір рет 50 мг құрайды. Ең жоғары тәуліктік дозасы – 50 мг.

Жақын арада миокард инфарктісін бастан кешкеннен кейін жүрек қызметі жеткіліксіздігінің клиникалық біліністері байқалған емделушілерде өлім және жүрек-қантамырлардың аурушаңдық қаупін төмендету мақсатында

Емдеуді тәулігіне бір рет 25 мг дозадан бастаған және оны, қан сарысуындағы калий деңгейін бақылай отырып (1 кестені қараңыз), бәрінен дұрысы 4 апта бойы тәулігіне бір рет қажетті 50 мг дозаға жеткенше біртіндеп арттырған жөн. Әдетте Эспиромен емдеуді миокард инфарктісі анықталғаннан кейін 3-14 күн ішінде бастаған дұрыс.

Жүректің сол жақ қарыншасы қызметі бұзылған (LVEF [сол жақ қарыншадан қанды айдау фракциясы] ≤40%), клиникалық жағдайы тұрақты емделушілерде өлім және жүрек-қантамыр ауруларының қаупін төмендету мақсатында

Жүрек қызметінің созылмалы жеткіліксіздігінде (NYHA ІІ класы) емдеуді тәулігіне бір рет 25 мг дозадан бастайды және оны, қан сарысуындағы калий деңгейін бақылай отырып (1 кестені қараңыз), бәрінен дұрысы 4 апта бойы тәулігіне бір рет қажетті 50 мг дозаға жеткенше біртіндеп арттырады.

Қан сарысуындағы калий концентрациясы >5,0 ммоль/л құрайтын емделушілерде емді Эспиромен бастамау керек.

Қан сарысуындағы калий деңгейін препаратпен емдеуді бастағанға дейін, алғашқы аптаның ішінде және қолдануды бастағаннан немесе дозаны түзеткеннен бір айдан кейін анықтаған жөн. Әрі қарай қан сарысуындағы калий деңгейін қажетіне қарай әлсін-әлсін бақылап отырған жөн.

Емдеуді бастағаннан кейін дозаны, қан сарысуындағы калий деңгейін есепке ала отырып, кестеде көрсетілгендей етіп түзеткен жөн.

Эспироны қан сарысуында калий концентрациясының ≥ 6,0 ммоль/л жоғарылау себебінен тоқтатқанда, егер қан сарысуындағы калий концентрациясы 5,0 ммоль/л-ден кем болса, препарат 25 мг дозада бір күннен кейін қайталап қолданылуы мүмкін.

Балаларға және жасөспірімдерге қолданылуы

Эплеренонды балаларға қолдану жөнінде деректер жоқ, сондықтан дәрілік өнімді емделушілердің осы тобында қолдану ұсынылмайды.

Егде жастағы адамдарға қолданылуы

Егде жастағы адамдарда бастапқы дозаны түзетудің қажеті жоқ. Жастың ұлғаюына байланысты бүйрек қызметінің нашарлауы салдарынан, егде жастағы адамдарда гиперкалиемияның пайда болу қаупі жоғары. Ол организмде дәрілік заттың концентрациясын арттыратын қатарласқан ауруларының, әсіресе бауыр қызметінің жеңіл немесе орташа бұзылуларының болуына байланысты қосымша артуы мүмкін. Қан сарысуында калий деңгейін әлсін-әлсін бақылап отыру керек.

Бүйрек қызметінің жеткіліксіздігі бар емделушілерге қолданылуы

Бүйрек қызметінің жеңіл бұзылулары бар емделушілерде бастапқы дозаны түзету қажет емес. Қан сарысуында калий деңгейін әлсін-әлсін бақылап отыру керек.

Эплеренон диализдің жәрдемімен жоғалмайды.

Бауыр қызметінің жеткіліксіздігі бар емделушілерге қолданылуы

Бауыр қызметінің жеңіл немесе орташа бұзылулары бар емделушілерде бастапқы дозаны түзету қажет емес. Мұндай емделушілердің организмінде эплеренон концентрациясының артуын ескеріп, әсіресе егде жастағы емделушілерде қан сарысуындағы калий концентрациясын жиі және жүйелі түрде бақылап отыру керек.

Басқа дәрілік препараттар қабылдап жүрген емделушілерге қолданылуы

Әлсіз немесе орташа CYP3A4 тежегіштерін, мысалы, амиодаронды, дилтиаземді және верапамилді бір мезгілде қолданғанда емдеуді тәулігіне бір рет 25 мг дозадан бастаған жөн. Доза тәулігіне бір рет 25 мг-нан аспауы тиіс.

Жағымсыз әсерлері

Жиі (≥1/100 – <1/10)

- жұқпалар

- гиперкалиемия

- бас айналу, синкопе

- артериялық гипотензия

- жөтел

- диарея, жүректің айнуы, іш қату

- бөртпе, қышыну

- бүйрек қызметінің бұзылуы

Жиі емес (>1/1 000 – < 1/100)

- пиелонефрит

- эозинофилия

- гипотиреоз

- гипонатриемия, дегидратация, гиперхолестеринемия, гипертриглицеридемия

- ұйқысыздық

- бас ауыру, гипестезия

- миокард инфарктісі, жүрек қызметінің сол жақ қарыншалық жеткіліксіздігі, жүрекшелердің фибрилляциясы, тахикардия

- аяқ артерияларының тромбозы, ортостатикалық гипотензия

- фарингит

- құсу, метеоризм

- қатты терлеу

- арқаның ауыруы, балтыр бұлшықеттерінде ауыртатын құрысулар

- холецистит

- гинекомастия

- астения, дімкәстік

- мочевина азоты, креатинин, қандағы глюкоза деңгейлерінің жоғарылауы, эпидермальді өсу факторы рецепторы деңгейінің төмендеуі.

Жиілігі белгісіз

- ангионевротикалық ісіну

Қолдануға болмайтын жағдайлар

- эплеренонға немесе препараттың қандай да болсын қосымша затына жоғары сезімталдық

- емді бастағанға дейін сарысудағы калий деңгейі > 5,0 ммоль/л

- бүйрек қызметінің айқындылығы орташа және ауыр жеткіліксіздігі (креатинин клиренсі < 30 мл/мин)

- бауыр қызметінің ауыр жеткіліксіздігі (Чайлд-Пью шкаласы бойынша С класы)

- калий жинақтаушы диуретиктерді, калий препараттарын немесе CYP3A4 күшті тежегіштерін (мыс., итраконазол, кетоконазол, ритонавир, нелфинавир, кларитромицин, телитромицин және нефазодон) бір мезгілде қолдану

- ангиотензинге өзгертуші фермент (АӨФ) тежегіштерімен және ангиотензин II рецепторлары антагонистерімен (AIIРА) біріктіру

- 18 жасқа дейінгі балалар

- жүктілік, лактация кезеңі

Дәрілермен өзара әрекеттесуі

Калий жинақтаушы диуретиктер және калий препараттары:

Гиперкалиемияның пайда болу қаупінің жоғарылығын ескеріп, Эспироны калий жинақтаушы диуретиктер және калий препараттарын қабылдап жүрген емделушілерге тағайындамаған жөн. Калий жинақтаушы диуретиктер гипертензияға қарсы дәрілік препараттардың және басқа да диуретиктердің әсерлерін күшейтуі мүмкін.

Литий:

Эспироның литиймен өзара әрекеттесуі зерттелген жоқ, алайда диуретиктерді және ангиотензин-өзгертуші фермент тежегіштерін бір мезгілде қабылдап жүрген емделушілерде литийден улану жағдайлары тіркелді. Эспиро мен литийді бір мезгілде қолдануға болмайды. Егер мұндай ем қажет деп табылса, қан плазмасындағы литий деңгейін бақылаған жөн.

Циклоспорин, такролимус:

Циклоспорин мен такролимус бүйрек қызметінің бұзылуына әкелуі және гиперкалиемия қаупін арттыруы мүмкін. Эспиро мен циклоспоринді немесе такролимусты бір мезгілде қолданбаған жөн. Мұндай емді тағайындау қажет болған жағдайда қан сарысуындағы калий деңгейін және бүйрек қызметін мұқият бақылау керек.

Қабынуға қарсы стероидты емес дәрілік препараттар (ҚҚСП):

ҚҚСП емдеу, әсіресе қауіпті топтағы емделушілерде (егде жастағы емделушілер және (немесе) сусызданған емделушілер) осы дәрілік заттардың шумақтық сүзілуге тікелей әсер етуі бүйрек қызметінің жедел жеткіліксіздігіне әкеп соғуы мүмкін. Эспиро және ҚҚСП қабылдап жүрген емделушілерді талапқа сай гидратациялау керек, оларда емді бастамас бұрын бүйрек қызметіне бақылау жүргізу қажет.

Триметоприм:

Триметопримді және Эспироны бір мезгілде қолдану гиперкалиемия қаупін арттырады. Әсіресе бүйрек қызметінің жеткіліксіздігі бар емделушілерде және егде жастағы адамдарда қан сарысуындағы калий деңгейін және бүйрек қызметін бақылау қажет.

Ангиотензин-өзгертуші фермент (АӨФ) тежегіштері, ангиотензин II рецепторларының антагонистері (AIIРА):

Эспиро мен АӨФ тежегіштерін немесе ангиотензин II рецепторларының антагонистерін бір мезгілде тағайындағанда сақ болған жөн. Эспироны осы дәрілік препараттармен біріктіру бүйрек қызметінің бұзылу қаупі бар емделушілерде, мысалы, егде жастағы адамдарда гиперкалиемияның пайда болу қаупін арттыруы мүмкін. Сарысудағы калий деңгейіне және бүйрек қызметіне жан-жақты мониторинг керек.

Альфа-1-адреноблокаторлар (мыс., празозин, альфузозин):

Альфа-1-адреноблокаторлар мен Эспироны бір мезгілде қолданғанда гипотензивтік әсердің және (немесе) ортостатикалық гипотензияның жоғарылау мүмкіндігі бар. Эспиро мен альфа-1- адреноблокаторларды бір мезгілде қолдану кезінде ортостатикалық гипотензияға клиникалық мониторинг жасау ұсынылады.

Үшциклдік антидепрессанттар, нейролептиктер, амифостин, баклофен:

Осы дәрілік препараттарды Эспиромен бір мезгілде қолдану гипотензивтік әсерді және ортостатикалық гипотензия қаупін арттыруы мүмкін.

Глюкокортикостероидтар, тетракозактид:

Осы дәрілік заттарды Эспиромен бір мезгілде қолдану гипертензияға қарсы әсердің бәсеңдеуіне (натрийдің және сұйықтықтың іркілуіне) әкелуі мүмкін.

Дигоксин:

Дигоксиннің организмдегі концентрациясы (AUC) Эспиромен бір мезгілде қолданғанда 16%-ға артады (90% сенімді аралық: 4% - 30%). Дигоксинді емдік диапазонның жоғарғы шегіне жақын дозаларда қолданған кезде сақ болу қажет.

Варфарин:

Варфаринмен клиникалық тұрғыдан маңызды фармакокинетикалық өзара әрекеттесулер байқалған жоқ. Варфаринді емдік диапазонның жоғарғы шегіне жақын дозаларда қолдану кезінде сақ болу қажет.

CYP3A4 субстраттары:

Тесттік CYP3A4 субстарттарымен, яғни мидазоламмен және цизапридпен жүргізілген фармакокинетикалық зерттеу нәтижелерінде Эспиромен бір мезгілде қолданғанда маңызды фармакокинетикалық өзара әрекеттесу белгілері табылған жоқ.

CYP3A4 тежегіштері:

• CYP3A4 күшті тежегіштері: Эспироны CYP3A4 ферментінің тежегіштерімен бір мезгілде қолданғанда елеулі фармакокинетикалық өзара әрекеттесулер білінуі мүмкін. CYP3A4 күшті тежегіші (тәулігіне екі рет 200 мг кетоконазол) Эспироның AUC мәнін 441%-ға арттырды. Эспироны кетоконазол, итраконазол, ритонавир, нелфинавир, кларитромицин, телитромицин және нефазодон сияқты CYP3A4 күшті тежегіштерімен бір мезгілде қолдануға болмайды.

• CYP3A4 әлсіз немесе орташа тежегіштері: Эспироны эритромицинмен, саквинавирмен, амиодаронмен, дилтиаземмен, верапамилмен және флуконазолмен бір мезгілде қолдану Эспироның AUC мәнінің 98-187%-ға артуымен білінетін маңызды фармакокинетикалық өзара әрекеттесуді тудырды. Эспироның тәуліктік дозасы CYP3A4 әлсіз немесе орташа тежегіштерін бір мезгілде қолданғанда 25 мг-нан аспауы тиіс.

CYP3A4 индукторлары:

Шайқурай тұндырмасын (CYP3А4 күшті индукторы) Эспиромен бір мезгілде қабылдау соңғысының AUC мәнін 30%-ға төмендетті. Рифампицин сияқты өте күшті CYP3А4 индукторларын қолданғанда Эспироның AUC мәні өте айқын төмендеуі мүмкін. Эспиро тиімділігінің ықтимал төмендеуін ескеріп, күшті CYP3А4 индукторларын (рифампицинді, карбамазепинді, фенитоинді, фенобарбиталды, шайқурай тұндырмасын) және Эспироны бір мезгілде қолдануға болмайды.

Антацидтер: Жүргізілген фармакокинетикалық клиникалық зерттеу нәтижелерін негізге алсақ, антацидтердің Эспиромен маңызды өзара әрекеттесуі оларды бір мезгілде қолданғанда болжанбайды.

Айрықша нұсқаулар

Гиперкалиемия

Эспироны қолданған кезде оның әсер ету механизмінен гиперкалиемия пайда болуы мүмкін. Емнің бас кезінде және препарат дозасын өзгерткенде барлық емделушілерде қан сарысуындағы калий концентрациясын бақылаған жөн. Әрі қарай емдеу барысында әсіресе гиперкалиемияның пайда болу қаупі жоғары емделушілерде, мысалы бүйрек қызметінің жеткіліксіздігі бар егде науқастарда және қант диабеті бар емделушілерде калий концентрациясына әлсін-әлсін бақылау жүргізу керек. Гиперкалиемияның пайда болу қаупінің жоғарылығын ескеріп, Эспиромен емдеуді бастағаннан кейін калий препараттардың қолдануға болмайды. Эспиро дозасын төмендету қан сарысуындағы калий концентрациясының төмендеуіне әкелетіндігі дәлелденген. Бір зерттеуде Эспиромен емделу аясында гидрохлортиазидті енгізу қан сарысуында калий концентрациясының артуына кедергі жасайтыны айғақталды.

Бүйрек қызметінің бұзылуы:

Бүйрек қызметі бұзылған, соның ішінде диабеттік микроальбуминуриясы бар емделушілерде қан сарысуындағы калий концентрациясын жүйелі түрде бақылап отыру керек. Гиперкалиемияның пайда болу қаупі бүйрек қызметін төмендеткен кезде артады. Эспиро гемодиализдің жәрдемімен жоғалмайды.

Бауыр қызметіің бұзылуы:

Бауыр қызметінің жеңіл немесе орташа бұзылулары (Чайлд-Пью шкаласы бойынша А және В класы) бар емделушілерде қан сарысуында калий концентрациясын 5,5 ммоль/л-ден астамға артуы байқалған жоқ. Мұндай емделушілерде электролиттер деңгейін бақылаған жөн. Бауыр қызметінің бұзылуы ауыр емделушілерде Эспироны қолдану зерттелген жоқ, сондықтан оны тағайындауға болмайды.

Лактоза:

Таблетка құрамында лактоза бар, сондықтан оларды тұқым қуалауы сирек галактоза жақпаушылығы, Лапп лактаза жеткіліксіздігі немесе глюкоза-галактоза мальабсорбциясы синдромы бар емделушілерге тағайындамаған жөн.

Жүктілік және лактация кезеңі

Эспироны жүктілік және лактация кезеңінде пайдалануға зерттеулер жүргізілген жоқ. Препаратты қолдану қажет болған жағдайда, ана үшін күтілетін пайдасы ұрық/нәресте үшін ықтимал қаупінен едәуір басым болған жағдайда, оны тағайындау шешімін дәрігер қабылдайды. Эплеренонды жүкті әйелдерге абайлап тағайындаған жөн.

Бала емізу: Ішке қабылданғаннан кейін эплеренонның емшек сүтімен бірге бөлініп шығатын-шықпайтыны белгісіз. Емшек еміп жүрген жаңа туған нәрестелерде жағымсыз әсерлердің болу мүмкіндігінің белгісіз екендігін ескеріп, емшек емізуді тоқтатуды немесе емделуші үшін оны қолданудың маңыздылығына байланысты, дәрілік препараттарды тоқтату жағын қарастырған жөн.

Дәрілік заттың көлік құралын немесе қауіпті механизмдерді басқару қабілетіне ықпал ету ерекшеліктері

Эспироның көлік құралын басқару және қозғалыстағы механизммен қызмет көрсетуге ықпалын тигізуі жөнінде деректер жоқ. Эплеренон ұйқышылдықты немесе когнитивтік қызметтердің бұзылуларын тудырмайды, бірақ емделу кезінде көлікті басқарғанда немесе механизмдермен қызмет жасағанда бас айналудың пайда болуы мүмкін екендігін ескеру қажет.

Артық дозалануы

Эспироның артық дозалану жағдайлары мәлімделмеген.

Симптомдары: гиперкалиемия, гипотензия.

Емі: белсенділендірілген көмір тағайындау және симптоматикалық ем тағайындау. Гемодиализ тиімді емес.

Шығарылу түрі және қаптамасы

Поливинилхлоридті немесе PVDC үлбірден және алюминий фольгадан жасалған пішінді ұяшықты қаптамада 10 немесе 14 таблеткадан.

10 таблеткалық пішінді ұяшықты 1, 2, 3, 5 немесе 9 қаптама немесе 14 таблеткалық пішінді ұяшықты 2 қаптама медицинада қолданылуы жөнінде мемлекеттік және орыс тілдерінде бекітілген нұсқаулықпен бірге картон пәшкеге салынған.

Сақтау шарттары

25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

«Польфарма» Фармацевтикалық зауыты АҚ, Польша

Пельплиньска к-сі19, 83-200 Старогард Гданьски

Тіркеу куәлігінің иесі

«Химфарм» АҚ, Қазақстан

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Химфарм» АҚ, Шымкент қ-сы, ҚАЗАҚСТАН РЕСПУБЛИКАСЫ,

Рашидов к-сі, н/ж, т/ф: 560882

Телефон нөмірі 7252 (561342)

Факс нөмірі 7252 (561342)

Электрондық поштасы standart@santo.kz