Тетурам (150 мг, Борщаговский ХФЗ НПЦ ПАО) (Disulfiram)

• русский
• қазақша

• Скачать инструкцию медикамента

Саудалық атауы

Тетурам

Халықаралық патенттелмеген атауы

Дисульфирам

Дәрілік түрі

150 мг таблеткалар

Құрамы

Бір таблетканың құрамында

белсенді зат - 150 мг дисульфирам,

қосымша заттар: повидон, макрогол 6000, лактоза моногидраты, натрий кроскармелозасы, магний стеараты

Сипаттамасы

Дөңгелек пішінді, қиғашталған жиегі (ойығы) және сызығы бар беткейі тегіс, ақ немесе сәл сарғыштау-жасыл реңді ақ түсті таблеткалар

Фармакотерапиялық тобы

Жүйке жүйесі ауруларын емдеуге арналған басқа да препараттар. Аддиктивті бұзылыстарды емдеуге арналған дәрілер. Алкогольге тәуелділікті емдеуге арналған дәрілер. Дисульфирам

АТХ коды N07ВВ01

Фармакологиялық қасиеттері

Фармакокинетикасы

Ішке қабылдағаннан кейін ас қорыту жолында препараттың сіңірілуі жылдам жүреді, бірақ толық емес (70–90%). Препарат глюкурон конъюгаты түрінде бөлініп шығатын диэтилдитиокарбаматқа қалпына келу жолымен тез метаболизденеді немесе бір бөлігі (4–53%) өкпе арқылы шығарылатын диэтиламин мен күкірт көміртегіне трансформацияланады. Ең жоғары емдік әсеріне ішу арқылы қабылдаудан кейін 12 сағаттан соң жетеді және емдеуді тоқтатқаннан кейін 10-14 күн бойы жалғасуы мүмкін.

Фармакодинамикасы

Созылмалы алкоголизмді емдеуге арналған дәрі. Этил спиртінің метаболизміне қатысатын ацетальдегиддегидрогеназа ферментін тежейді, ол ацетальдегид – этанолдың аралық метаболиті концентрациясының жоғарылауына әкеледі. Бұл метаболит бірқатар жағымсыз сезінулерді: қанның бетке тебуін, жүрек айнуын, құсуды, дімкәстікті сезінуді, тахикардияны, артериялық қысымның төмендеуін туындатуға қабілетті, бұл препаратты қабылдаудан кейін алкоголь қабылдауды мүлдем жағымсыз етеді және спиртті ішімдіктің түріне және иісіне деген тұрақты теріс рефлекс қалыптасуына мүмкіндік береді.

Қолданылуы

- емдеудің басқа тәсілдері тиімсіз болған жағдайдағы созылмалы алкоголизмде

Қолдану тәсілі және дозалары

Препаратты таңертең тамақтанудың алдында ашқарынға 0,45 - 0,75 г-нан ішуге тағайындайды.

Препаратпен емдеуді әдетте классикалық сызба бойынша жүргізеді.

Алғашқы дисульфирам-алкогольдік сынаманы ем басталғаннан соң 7-10 күннен кейін жүргізеді. Препаратты таңертеңгі қабылдаудан кейін науқас 20-30 мл алкогольді ішімдікті, көбінесе 40% арақты қабылдайды. Қайталама сынамаларын стационар жағдайында 1-2 күннен кейін, амбулаторлық жағдайда – 3-5 күн өткеннен кейін жүргізеді. Әлсіз реакция кезінде алкогольді ішімдіктің дозасын кезекті сынамада 10-20 мл-ге арттырады. Арақтың ең жоғары дозасы 100 - 120 мл. Емдеу басталғаннан кейінгі 1 – 3 жыл ішінде препараттың дозасын тәулігіне 0,15-тен – 0,3 г дейін біртіндеп төмендетеді.

Жекелеген жағдайларда дәрігер емдеуді дербес сызба бойынша жүргізеді.

Жағымсыз әсерлері

- ауыздың "темір" татуы, жүрек айну, құсу, галитоз, асқазанның ауыруы, іш өту

- аяқ полиневриті, көру жүйкесінің невриті

- нейропсихикалық бұзылулар

- жадыны жоғалту, сананың шатасуы, астения, бас ауыруы, қатты шаршағыштық, ұйқышылдық, көңіл-күйдің нашарлауы

- тері-аллергиялық реакциялары

- коллапс

- жүрек ырғағының бұзылуы, артериялық гипотензия

- стенокардия

- мио­кард инфарктісі, кенеттен болған өлім, тыныстың тарылуы

- мидың ісінуі

- бассүйекішілік қан кетулер

- құрысулар, энцефалопатия

- колостомиясы бар науқастардағы (көміртегі сульфидінің түзілуіне байланысты) жағымсыз иіс

- қанда трансаминазалар деңгейінің жоғарылауы

- гепатит жағдайлары, гепатиттің фульминантты және фатальді түрлері болуы мүмкін

Қолдануға болмайтын жағдайлар

- дисульфирамға аса жоғары сезімталдық

- тиреоуыттылық

- қант диабеті

- кенеттен айқын көрініс берген кардиосклероз, ми тамырларының атеросклерозы, инфаркт алдындағы және одан кейінгі жай-күй, қолқа аневризмасы, коронарлық жеткіліксіздік, II және III сатыдағы артериялық гипертензия, ауыр ми тамырлары аурулары, декомпенсация сатысындағы жүрек және қантамырлары аурулары және басқалар

- қан түкіретін өкпе туберкулезі, жаңа пайда болған туберкулездік инфильтрат

- бронх демікпесі, өкпенің айқын эмфиземасы

- асқазан-ішек жолы шырышының эрозиялық зақымданулары, асқазан мен он екі елі ішектің ойық жара ауруы, асқазан-ішек жолынан қан кету

- ауыр бауыр және бүйрек аурулары, бауыр жеткіліксіздігі

- қан түзу органдарының аурулары

- психикалық аурулар

- мидың жұқпалы аурулары

- эпилепсия, эпилепсия түріндегі синдром

- полиневриттер, есту мен көз жүйкелерінің невриттері

- глаукома

- қатерлі ісіктер

- жүктілік пен лактация кезеңі

- 18 жасқа дейінгі балалар

- 60 жастан асқандар

- эндартериит

- бұрын өткерген дисульфирамды (антабусты) психоздар

Дәрілермен өзара әрекеттесуі

Изониазид: мінез-құлық пен қозғалыс үйлесімінің бұзылуы ықтимал.

Нитроимидазолдар (метронидазол, ординазол, секнидазол, тинидазол): психика бұзылуының, сандырақтаудың, делириялық бұзылыстардың, сана шатасуының пайда болу қаупін арттырады.

Фенитоин: қан плазмасындағы фенитоин деңгейінің (оның метаболизмінің бәсеңдеу салдарынан) уыттылық көрініс бере отырып, елеулі және жылдам жоғарылауы. Егер мұндай біріктіруді қолданбау мүмкін болмаса, препаратпен емдеу кезінде және одан кейін клиникасын бақылап, қан плазмасындағы препараттың концентрациясына бақылау жүргізу керек.

Варфарин (ішу арқылы қабылданатын басқа да антикоагулянттарға экстраполяциялаумен): ішу арқылы қабылданатын антикоагулянттар әсерінің жоғарылауы мен қан кету қаупі (бауырда варфарин метаболизмінің төмендеуі). Емдеу үдерісінде және тетурамды тоқтатқаннан кейін 8 күн бойы протромбин деңгейін жиі бақылау және антикоагулянттар дозасын түзету ұсынылады.

Теофиллин: тетурам теофиллиннің метаболизмін бұзады, сондықтан клиникалық симптомдарын және қан плазмасындағы препарат концентрациясын ескере отырып, теофиллин дозасы төмендетілуі тиіс.

Бензодиазепиндер: тетурам олардың (әсіресе хлордиазепоксидтің және диазепамның) тотықтану метаболизмін тежеу жолымен бензодиазепиндердің тыныштандыратын әсерін үдетуі мүмкін. Бензодиазепиндердің дозасы клиникалық көріністеріне сәйкес түзетілуі тиіс.

Үшциклді антидепрессанттар: алкогольді көтере алмаушылық реакциясының күшеюі мүмкін.

Айрықша нұсқаулар

Емдеуді нарколог-дәрігердің бақылауымен бастау қажет.

Тетурамды емделушіні жан-жақты медициналық тексеруден кейін ғана тағайындайды. Науқас препараттың қасиеттері мен ерекшеліктері туралы хабардар етілуі тиіс. Алкогольді немесе құрамында этанол бар дәрілік заттарды бір мезгілде қабылдаудың ықтимал салдары туралы емделушіге ескерту қажет.

Бүйрек жеткіліксіздігі, гипотиреозы, бауырдың, тыныс алу жүйесінің аурулары бар емделушілерге (әсіресе алкогольмен бір мезгілде қолдану мүмкіндігі кезінде) сақтықпен қолданған жөн.

Препаратты алкогольді соңғы қабылдаудан кейін кем дегенде 12-24 сағат өткен соң ғана тағайындауға болады.

Препарат құрамына лактоза кіреді, сондықтан туа біткен галактоземия, глюкоза-галактоза мальабсорбция синдромы, лактаза жеткіліксіздігі сияқты көмірсуларға төзімділігі бұзылған емделушілерге оны қолдану ұсынылмайды.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

Препаратпен емделу кезеңінде көлік құралдарын және қауіптілігі зор механизмдерді басқарудан бас тарта тұрған дұрыс.

Артық дозалануы

Тетурамды және эти­л спиртін қолданған кезде артық дозалану байқалады.

Симптомдары: сананың шатасуы, коматоздық жай-күй, коллапс, неврологиялық асқынулар, ісінулер, құрысулар.

Емі: жүрек-қан тамырлары және тыныс алу жүйесі функционалдық жағдайын қалпына келтіруге және демеуге бағытталған симптоматикалық ем, уытсыздандыру емін жүргізеді, тыныс алу аналептиктерін, В тобы витаминдерін енгізеді.

Шығарылу түрі және қаптамасы

Поливинилхлоридті үлбірден және бір жағында термолакпен жабылған және екінші жағында мөрі бар алюминий фольгадан жасалған блистерде 10 таблеткадан. 1 немесе 5 блистерден медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Түпнұсқалық қаптамасында, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Жарамдылық мерзімі

4 жыл

Жарамдылық мерзімі өткеннен кейін пайдалануға болмайды.

Босатылу шарттары

Рецепт арқылы

Өндіруші

«Борщагов химиялық-фармацевтикалық зауыты» Ғылыми-өндірістік орталығы» Жариялы акционерлік қоғамы,

Украина, 03134, Киев қ., Мир к-сі, 17

Тіркеу куәлігінің иесі

«Борщагов химиялық-фармацевтикалық зауыты» Ғылыми-өндірістік орталығы» Жариялы акционерлік қоғамы, Украина

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

Қазақстан Республикасы аумағында «Борщагов ХФЗ» ҒӨО ЖАҚ өкілдігі

050043, Алматы қ., Орбита ауд., 2, 28 үй, 30 пәтер

факс: +7(272) 20-78-05, 55-18-53

E-mail: vadimt58@list.ru