Панкреатин 8000
Инструкция
-
русский
-
қазақша
ПАНКРЕАТИН
Саудалық атауы
Панкреатин
Халықаралық патенттелмеген атауы
Жоқ
Дәрілік түрі
Ішекте еритін қабықпен қапталған 0,24 г таблеткалар
Құрамы
Бір таблетканың құрамында
белсенді зат – 0,24 г панкреатин ұнтағы, белсенділігі кем дегенде: 8000 липолитикалық Ph. Eur.U., 5800 амилолитикалық Ph. Eur.U., 380 протеолитикалық Ph. Eur. U.,
қосымша заттар: микрокристалды целлюлоза М 102, натрий хлориді, поливинилпирролидон (коллидон СL), кремнийдің коллоидты қостотығы (аэросил), магний стеараты,
ішекте еритін қабықтың құрамы: коликоат (Collicoat МАЕ 30 DP Coating), тальк, макрогол (полиэтиленгликоль), титанның қостотығы (Е 171), кармоизин (Е 122) (қышқыл қызыл 2 С).
Сипаттамасы
Қызғылт түсті қабықпен қапталған, екі жақ беті дөңес, дөңгелек таблеткалар. Сындырған кезде екі қабат көрінеді.
Фармакотерапиялық тобы
Ас қорытуды жақсартатын препараттар. Ас қорытатын ферменттік препараттар.
АТЖ коды А09А А02.
Фармакологиялық қасиеттері
Фармакокинетикасы
Таблетканың қышқылға төзімді қабығы ферменттерді асқазан сөлімен әсерсізденуден қорғайды. Қабығы жіңішке ішектің бейтарап немесе сілтілік ортасының әсерімен ғана еріп, ферменттер босап шығады. Панкреатиннің құрамына кіретін ас қорыту ферменттері сіңбейді, тек ішек кеңістігінде ғана әсер етеді.
Ішу арқылы қабылдағаннан кейін 30-45 минуттан кейін препараттың ең жоғары ферментативтік әсері білінеді.
Фармакодинамикасы
Ферментті препарат. Ұйқы безі ферменттерінің (липазаның, амилазаның және протеазаның) тапшылығының орнын толтырады, олар тиісінше өсімдік және жануарлар майын (глицеринге және май қышқылдарынан дейін), полисахаридтерді (декстриндерге және моносахаридтерге дейін) және ақуыздарды (дипептидтерге және амин қышқылдарына дейін) гидролиздеп, олардың жіңішке ішекте толық сіңуіне мүмкіндік береді. Ұйқы безінің ауруларында препарат оның сыртқы сөлініс қызметін компенсациялайды және ас қорыту үдерісінің жақсаруына мүмкіндік береді.
Қолданылуы
- ұйқы безінің сыртқы сөлініс бөлу қызметінің жеткіліксіздігінде (созылмалы панкреатитте, муковисцидозда, Ремхельд синдромында (гастрокардиальді синдромда), панкреатэктомияда, диспепсияларда, сәулеленуден кейінгі жағдайда
- астың қорытылуы бұзылып, метеоризммен, диареямен қоса қабаттасқанда (асқазан немесе жіңішке ішек резекциясынан кейін)
- дұрыс тамақтанбағанда (қорытылуы ауыр майлы және дағдыдан тыс тағамдарды қолданғанда, тамақты көп ішкенде, ретсіз тамақтанғанда)
- шайнау қызметі бұзылғанда
- тамақтың ішек арқылы өту қызметі жылдамдаған кезде
- құрсақ қуысының ағзаларын рентгенологиялық және ультраздыбыстық зерттеуге дайындауға
Қолдану тәсілі және дозалары
Препаратты ас қабылдау кезінде, шайнамай, сұйықтықтың мол мөлшерімен ішіп қабылдайды.
Доза ұйқы безі қызметінің жеткіліксіздігі дәрежесіне және астың құрамына байланысты әр адамға жекелей таңдап алынады.
Тамақтану кезінде әдете 2-4 таблеткадан (ол липаза бойынша 16000-32000 Ph. Eur. U. сәйкес келеді) күніне 3-4 ретке тағайындайды. Қабылданған астың түріне және ас қорытудың бұзылуының ауырлығына байланысты тәуліктік доза арттырылуы мүмкін.
Ересектер үшін тәуліктік дозасы 6-18 таблеткаға дейін, ол липаза бойынша 48000-150000 Ph. Eur. U. сәйкес болады. Дене салмағының 1 кг-на шаққанда липазаның 15000-20000 Ph. Eur. U. дозасын арттырмау керек.
Емдеудің ұзақтығы жөніндегі мәселе әр адамға жекелей шешіледі.
Емдеу ұзақтығы бірнеше күннен (ас қорыту бұзылғанда, диета сақтамағанда) бірнеше айға дейін, тіпті жылға дейін (ұдайы орнын алмастыру емі қажет болғанда) созылуы мүмкін.
Жағымсыз әсерлері
- аллергиялық реакциялар
- жүректің айнуы, диарея, іш қату, іш тұсында жайсыздық сезімі (алайда осы жағымсыз әсерлердің препаратты қабылдауға байланысты себеп-салдарлық байланысы анықталған жоқ, өйткені аталған реакциялар ұйқы безінің сыртқы сөлініс қызметінің жеткіліксіздігі симптомдарына жатады)
- ішек бітелісінде және илеоцекальді бөлімінде, жоғары қарай кететін шеңберлі ішекте стриктураның дамуы (муковисцидозда ұсынылған дозаны арттырып жіберген жағдайда)
- гиперурикозурия, гиперурикемия (препаратты ұзақ уақыт жоғары дозаларда қолданғанда)
Қолдануға болмайтын жағдайлар
- препарат компоненттеріне сезімталдық жоғары болғанда
- жедел ағымды панкреатитте
- созылмалы панкреатит асқынғанда
- балаларға және 18 жасқа дейінгі жасөспірімдерге
Дәрілермен өзара әрекеттесуі
Темірдің сіңуін азайтады (әсіресе ұзақ уақыт қолданғанда).
Құрамында кальций карбонаты және/немесе магний гидрототығы бар антацидтік дәрілерді бір мезгілде қолдану панкреатиннің тиімділігін төмендетуі мүмкін.
Айрықша нұсқаулар
Муковисцидозда препараттың дозасы, қабылданатын астың сапасы мен мөлшеріне қарай, майдың гидролизденуі үшін қажетті ферменттердің мөлшеріне сай болуы тиіс.
Ас қорыту бұзылған жағдайларда ұзақ қолданғанда (ұйқы безінің қызметі қалыпты болғанда) темір препараттарын бір мезгілде тағайындаған жөн.
Жүктілік және лактация кезеңі
Панкреатинді жүктілік кезінде қолданудың қауіпсіздігі жеткілікті зерттелген жоқ. Препараттың ана үшін күтілетін пайдасы ұрыққа келетін қауіптен басым болған жағдайда қолдануға болады. Препаратты лактация кезеңінде тағайындау қажет болған жағдайда емшек емізуді тоқтата тұру жөніндегі мәселе шешілуі керек.
Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері
Препарат автокөлікті немесе басқа да қауіпті механизмдерді басқарған кезде реакция шапшаңдығына ықпалын тигізбейді.
Артық дозаланғанда
Симптомдары: гиперурикозурия, гиперурикемия, іш қату.
Емдеу: симптоматикалық ем.
Шығарылу түрі және қаптамасы
Поливинилхлоридті үлбірден және термолак жабыны және баспалық жабыны бар алюминий фольгадан жасалған пішінді ұяшықты қаптамаға 10 таблеткадан салынған.
Пішінді 1 немесе 5 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.
Сақтау шарттары
Құрғақ, жарықтан қорғалған жерде, 8оС-ден 15оС-ге дейінгі температурада сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Жарамдылық мерзімі өткеннен кейін қолдануға болмайды
Дәріханадан босатылу шарттары
Рецептісіз
Өндіруші
"Тернофарм" ЖШҚ.
46010, Украина, Тернополь қ-сы, Фабричная к-сі, 4;
тел./факс +38 (0352) 521-444, http://www.ternopharm.com.ua
Тіркеу куәлігінің иесі
"Тернофарм" ЖШҚ, Украина
Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы
Мекенжайы: "Тернофарм" ЖШҚ.
46010, Украина, Тернополь қ-сы, Фабричная к-сі, 4
Телефон: +38 (0352) 52 14 44
Факс: +38 (0352) 52 14 44
Электронды поштасы: ternopharm@ternopharm.com.ua