ОД-Левокс

• русский
• қазақша

• Скачать инструкцию медикамента

Саудалық атауы

ОД-Левокс

Халықаралық патенттелмеген атауы

Левофлоксацин

Дәрілік түрі

Үлбірлі қабықпен қапталған таблеткалар, 500 мг

Құрамы

Бір таблетканың құрамында:

белсенді зат: 512,4 мг левофлоксацин гемигидраты (500,00 мг левофлоксацинге баламалы),

қосымша заттар: кросповидон, микрокристалды целлюлоза, гидроксипропилметилцеллюлоза (5 сps), коллоидты кремнийдің қостотығы, тальк, магний стеараты,

қабықтың құрамы: гидроксипропилметилцеллюлоза (5 сps), полиэтиленгликоль 6000, титанның қостотығы Е 171, тальк, метилпарагидроксибензоат, пропилпарагидроксибензоат.

Сипаттамасы

Капсула пішінді, бір жағында сызығы бар, ақ немесе ақ дерлік түсті үлбірлі қабықпен қапталған таблеткалар. Көлденең тілігінен екі қабаты көрінеді. Сындырған жерінде таблетка ядросы сары түсті.

Фармакотерапиялық тобы

Жүйелі пайдалануға арналған бактерияға қарсы препараттар. Микробқа қарсы препараттар – хинолон туындылары. Фторхинолондар. Левофлоксацин

АТХ коды J01MA12

Фармакологиялық қасиеттері

Фармакокинетикасы

Ішке қабылданған кезде левофлоксацин тез және толық дерлік сіңеді (ас ішу сіңірілу жылдамдығы мен толықтығына аз әсер етеді). Биожетімділігі - 99%. Плазмада ең жоғары концентрациясына жету уақыты (TCmax) – 1-2 сағат. 500 мг қабылдаған кезде плазмадағы ең жоғары концентрациясы (Сmax) 5,2 мкг/мл құрайды. Плазма ақуыздарымен байланысуы 30-40% жуық.

Левофлоксациннің орташа жинақталуы препаратты күніне 2 рет 500 мг дозада қабылдаған үшінші күні-ақ байқалады. Ағзалар мен тіндерге: өкпеге, бронх шырышты қабығына, қақырыққа, несеп-жыныс жүйесі ағзаларына, полиморфты-ядролық лейкоциттерге, альвеолярлы макрофагтарға жақсы өтеді. 500 мг препарат ішу арқылы қабылданғаннан кейін бронх шырышында және эпителий төсемінің сұйықтығында Сmax – тиісінше, 8,3 мкг/г және 10,8 мкг/мл; күлдіреуіктер сұйығындағы левофлоксацин Сmax – 4,0-6,7 мкг/мл, бұл жағдайдағы TCmax – 2-4 сағат. 500 мг препарат ішу арқылы қабылданғаннан кейін өкпе тіндерінде Сmax – 11,3 мкг/г, ал TCmax – 4-6 сағат. Левофлоксацин аз мөлшерлерде жұлын сұйықтығына өтеді. Тәулігіне 500 мг левофлоксацин ішу арқылы қабылданғанда емдеудің үшінші күнінде қуық асты безі тіндеріндегі Сmax препарат қабылдағаннан кейін 2,6 және 24 сағаттан соң – тиісінше, 8,7 мкг/г, 8,2 мкг/г және 2,0 мкг/г. Қуық асты безі/плазма концентрацияларының арақатынасы, орта есеппен – 1,84. Несептегі орташа Сmax мәні 500 мг препарат қабылдағаннан кейін 8-12 сағаттан соң – 200 мг/л. Препараттың аздаған бөлігі бауырда тотығады және/немесе ацетилсізденеді. Жартылай шығарылу кезеңі (Т1/2) – 6-8 сағат. Организмнен көбіне бүйрекпен (қабылданған дозаның 85% шамасы) шумақтық сүзілу және өзекшелік секреция арқылы шығарылады. Ішке қабылданған 4% левофлоксацин дозасы 72 сағат ішінде ішекпен шығарылады. Бүйрек функциясы бұзылуларында және бүйрек клиренсі азайғанда Т1/2 ұзарады.

Клиникалық сынақтар барысында ерлер мен әйелдердегі препарат фармакокинетикасында айырмашылықтар болған жоқ.

Фармакодинамикасы

Левофлоксацин – құрамында белсенді зат ретіндегі офлоксациннің солға айналдыратын изомері бар фторхинолондар тобындағы әсер ету ауқымы кең антибиотик. ДНҚ-гиразаны (ІІ топоизомераза) және IV топоизомеразаны бөгейді, суперспирализация мен ДНҚ жарықтарының тігісін бұзады, ДНҚ синтезін бәсеңдетеді, цитоплазмада, жасуша қабырғасында және жарғақшаларда терең морфологиялық өзгерістер туғызады.

Әрі in vitro, әрі in vivo жағдайларында микроорганизмдердің көпшілігіне қатысты тиімді.

Препарат әсеріне сезімтал:

- аэробты грамоң микроорганизмдер: Staphylococcus aureus (метициллинге сезімтал штаммдар), Staphylococcus sаprорhyticus, С және G топтарының Streptococcus spp., Streptococcus agalactiae, Streptococcus pneumoniae (пенициллинге сезімтал/орташа сезімтал/төзімді штаммдар), Streptococcus pyogenes

- аэробты грамтеріс микроорганизмдер: Bacteroides серасіа, Eikenella corrodens, Haemophilus influenzae (ампициллинге сезімтал/төзімді штаммдар), Haemophilus parainfluenzae, Klebsiella spp. (соның ішінде Klebsiella oxytoca, Klebsiella pneumoniae), Moraxella catarrhalis (бета-лактамаза өндіретін және өндірмейтін штаммдар), Pasteurella multocida, Proteus vulgaris, Providencia rettgeri

- анаэробты бактериялар: Peptostreptococcus spp.

- басқа микроорганизмдер: Chlamydia pneumoniae, Chlamydia psittaci, Chlamydia trachomatis, Legionella pneumophila, Mycoplasma pneumonia, Mycoplasma hominis, Ureaplasma urealyticum

Төзімділігі жүре пайда болуы мүмкін микроорганизмдер

- аэробты грамоң микроорганизмдер: Enterococcus faecаlis, Staphylococcus aureus (метициллинге төзімді), Staphylococcus соаgulasе spp.

- аэробты грамтеріс микроорганизмдер: Acinetobacter baumannii, Citrobacter freundii, Enterobacter aerogenes, Enterobacter agglomerans, Enterobacter cloacae, Escherichia coli, Morganella morganii, Proteus mirabilis, Providencia stuartii, Pseudomonas aeruginosa, Serratia marcescens

- анаэробты микроорганизмдер: Bacteroides fragilis, Bacteroides thetaiotaomicron, Bacteroides vulgatus, Bacteroides ovatus, Clostridium difficile

Pseudomonas aeruginosa туғызған аурухана жұқпаларында біріктірілген ем қажет болуы мүмкін.

Қолданылуы

ОД-Левокс препараты препаратқа сезімтал микроорганизмдерден туындаған жұқпалы-қабыну ауруларында қолданылады:

- төменгі тыныс жолдарының (созылмалы бронхиттің өршуі, ауруханадан тыс пневмония)

- ЛОР-ағзалардың (жедел бактериялық синусит)

- несеп шығару жолдарының және бүйректің (соның ішінде жедел пиелонефрит)

- созылмалы бактериялық простатит

- терінің және жұмсақ тіндердің жұқпалары (іріңдеген атеромалар, абсцесс, фурункулдар)

 

Қолдану тәсілі және дозалары

ОД-Левоксты шайнамай, мол сұйық мөлшерімен ішіп, күніне бір немесе екі рет ішке қабылдау керек. Таблетканы жартылай бөлуге (таблеткадағы сызық бойынша) болады.

ОД-Левокс препаратының дозалары жұқпаның сипатымен және ауырлығымен, сондай-ақ болжанатын қоздырғыш сезімталдығымен анықталады.

Препараттың ересектерге ұсынылатын дозасы:

Жедел бактериялық синуситте – 500 мг тәулігіне 1 рет 10-14 күн бойы;

Созылмалы бронхит өршуінде – 250-500 мг тәулігіне 1 рет 7-10 күн бойы;

Ауруханадан тыс пневмонияда – 500 мг тәулігіне 1 немесе 2 рет 7-14 күн бойы;

Несеп шығару жолдарының және бүйректің асқынбаған жұқпаларында – 250 мг (1/2 таблетка) тәулігіне 1 рет 3 күн бойы;

Несеп шығару жолдарының асқынбаған жұқпаларында – 250 мг (1/2 таблетка) тәулігіне 1 рет 7-10 күн бойы;

Созылмалы бактериялық простатитте – 500 мг тәулігіне 1 рет 28 күн бойы;

Терінің және жұмсақ тіндердің жұқпаларында – 250-500 мг тәулігіне 1-2 рет 7-14 күн бойы;

Емделушілердің ерекше топтары

Бүйрек функциясының бұзылуы кезінде (креатинин клиренсі ≤ 50 мл/мин) дозалау

1 гемодиализ немесе тұрақты амбулаторлық перитонеальді диализ (ТАПД) кезінде қосымша дозалар енгізу қажет емес.

Бауыр функциясының бұзылуында дозаны арнайы таңдау қажет емес, өйткені левофлоксацин мардымсыз мөлшерде ғана бауырда метаболизденіп, көбіне бүйрекпен шығарылады.

Егер препарат қабылдау өтіп кетсе, кезекті қабылдау уақытына дейін таблетканы мүмкіндігінше тезірек қабылдау керек. Әріқарай ұсынылған сызба бойынша левофлоксацин қабылдауды жалғастыру қажет.

Жағымсыз әсерлері

Жиі (> 1/100, < 1/10):

- бас айналу, бас ауыру, ұйқысыздық

- диарея, құсу, жүрек айну

- қандағы «бауыр» ферменттері белсенділігінің жоғарылауы (мысалы, аланинаминотрансфераза (АлАТ), аспартатаминотрансфераза (АсАТ), сілтілі фосфотаза, гамма глутамилтранспептидаза (ГГТ)

Жиі емес (> 1/1000, < 1/100):

- лейкопения (шеткергі қанда лейкоциттер санының азаюы), эозинофилия (шеткергі қанда эозинофильдер санының көбеюі)

- қатты ұйқышылдық, жалпы әлсіздік (астения), ашушаңдық, вертиго

- іштің ауыруы, диспепсия, метеоризм, іш қату

- қан сарысуында билирубин және креатинин деңгейінің жоғарылауы

- қышыну, бөртпе

- анорексия

- зеңді жұқпалар, патогенді микроорганизмдер төзімділігінің дамуы

- астения

Сирек (> 1/10000, < 1/1000):

- есекжем

- мазасыздық сезімі, сананың шатасуы

- ентігу, бронх түйілу

- ауыр тахикардия, артериялық қысымның төмендеуі

- нейтропения (шеткергі қанда нейтрофильдер санының азаюы), тромбоцитопения (шеткергі қанда тромбоциттер санының азаюы)

- құрысу ұстамалары, парестезия, тремор, психоз жағдайы, депрессия, сананың шатасуы, ажитация, үрейлену

- құлақтың шыңылдауы

- сіңірлердің үзілуі, соның ішінде тендинит, мысалы, ахилл сіңірлерінің үзілуі, буын және бұлшықет ауырулары

- экстрапирамидалық симптомдар және бұлшықет үйлесімінің басқа да бұзылулары

- өте сирек жағдайларда энтероколит, соның ішінде жалған жарғақшалы колит белгісі болып табылатын қан аралас диарея

Өте сирек (< 1/10000)(жекелеген хабарламаларды қоса):

- жедел бүйрек жеткіліксіздігі, мысалы, интерстициальді нефрит салдарынан

- гипогликемия (кома болуы мүмкін), әсіресе, қант диабеті бар емделушілерде (гипогликемия белгілері: «қасқыр» тәбет, күйгелектік, қара терге түсу, діріл) немесе гипергликемия (ауыз кеберсуі, шөлдеу, жиі несеп шығару, шаршау, көрудің тұмандануы, терінің құрғауы немесе қышынуы, аритмия)

- Квинке ісінуі, анафилактикалық шок, анафилактикалық және анафилактоидтық реакциялар алғашқы дозаны қабылдағаннан кейін дамуы мүмкін, фотосенсибилизация, аллергиялық пневмонит, қызба

- көрудің және естудің бұзылуы

- барлық дәм сезу түйсіктерінен толық айрылуға дейін апаратын дәм сезімталдығының бұзылуы, иіс сезудің оны толық жоғалтуға дейін апаратын бұзылуы

- сіңірлердің, мысалы, ахилл сіңірлерінің үзілуі – бұл жағымсыз реакция ем басталған соң 48 сағат ішінде байқалады және екі жақты сипатта болады, ауыр миастениямен науқастар үшін ерекше мәні бар бұлшықет әлсіздігі

- гепатит

- агранулоцитоз

- аутоагрессиялық мінез-құлықпен, соның ішінде суицидтік ойлар және әрекеттермен болатын психикалық реакциялар, елестеулер

- сенсорлы және сенсомоторлы шеткергі нейропатия

Жиілігі белгісіз (қолда бар деректер бойынша кездесу жиілігін анықтау мүмкін емес):

- уытты эпидермалық некролиз, Стивенс-Джонсон синдромы, көп пішінді эритема, гипергидроз

- QT аралығының ұзаруы, жүрекшелер дірілдеуі

- рабдомиолиз

- панцитопения, гемолитикалық анемия

- жоғары сезімталдық

- сарғаю, өмірге қатер төндіретін жедел бауыр жеткіліксіздігіне дейін апаратын бауыр некрозының жағдайлары, алғашқы кезекте ауыр негізгі ауруы бар науқастарда

- арқаның, кеуденің, аяқ-қолдың ауыруы

- гиперсенситивті васкулит

- порфириямен науқастардағы порфирия ұстамалары

- қатерсіз бассүйекішілік гипертензия

- уақытша көрмей қалу

Қолдануға болмайтын жағдайлар

- левофлоксацинге немесе басқа фторхинолондарға, сондай-ақ препараттың қосымша заттарына жоғары сезімталдық

- эпилепсия

- сыртартқыдағы хинолондармен емдеу кезінде сіңірлердің зақымдануы

- жүктілік және лактация кезеңі

- 18 жасқа дейінгі балалар мен жасөспірімдерге.

Дәрілермен өзара әрекеттесуі

Хинолондар препараттардың, соның ішінде теофиллиннің құрысуға әзірлік шегін төмендететін қабілетін күшейтуі мүмкін. Фенбуфенмен бір мезгілде қабылдағанда левофлоксациннің монотерапия кезіндегіден көп жоғары концентрациялары байқалады.

Левофлоксацин әсерін ішек моторикасын бәсеңдететін дәрілік заттар (ДЗ), сукральфат, құрамында магний- немесе алюминий бар антацидтік дәрілер, темір мен мырыш тұздары азайтады.

Глюкокортикостероидтар қабылдау сіңірлердің үзілу қаупін арттырады.

Левофлоксацин варфариннің антикоагулянттық белсенділігін күшейтеді.

Левофлоксациннің бүйректегі өзекшелік секрецияны бөгеуі мүмкін екеніне орай, циметидин мен пробенецидтің әсер етуімен левофлоксацин шығарылуы (бүйрек клиренсі) сәл баяулайды. Бұл өзара әрекеттесудің, бәрінен бұрын, бүйрек функциясы бұзылған науқастар үшін клиникалық мәнге ие болатынын атап өту керек.

Левофлоксацин циклоспориннің жартылай шығарылу кезеңін ұзартады.

Левофлоксацин мен гипогликемиялық дәрілерді бір мезгілде қолдану қан плазмасындағы глюкоза концентрациясының өзгеруіне (гипогликемия және гипергликемия) алып келеді.

К витамині антагонистерімен (мысалы, варфаринмен) біріктірілген ОД-Левокспен емдеу коагуляциялық тестілер көрсеткіштерінің (халықаралық қалыптасқан қатынас (ХҚҚ) есебімен протромбин уақытының (ПУ)) артуына және/немесе тіптен қатты болатын қан кетудің күшеюіне әкелуі мүмкін. К витамині антагонистерін алатын науқастар протромбин деңгейін ұдайы тексеріп, науқастың ПУ-ның бақылау ПУ-на қатынасы ретінде айқындалатын халықаралық қалыптасқан қатынас (ХҚҚ) есебімен протромбин уақытына (ПУ) мониторинг жасау керек.

QT аралығын ұзартатын дәрілік препараттармен. Левофлоксацин, басқа да фторхинолондар сияқты, QT аралығын ұзартатын препараттар (мысалы, аритмияға қарсы IA және III класс препараттары, үш циклды антидепрессанттар, макролидтер) алатын емделушілерде абайлап қолданылуы тиіс.

Айрықша нұсқаулар

Глюкоза-6-фосфатдегидрогеназа тапшылығы тұсында егде жастағы тұлғаларға сақтықпен қолдану керек (бүйрек функциясының қатарлас төмендеуі болуының жоғары ықтималдығымен байланысты).

ОД-Левокс темір тұздары, мырыш, антацидтер және сукральфат препараттарын қабылдауға дейін, ең болмаса, 2 сағат бұрын немесе одан кейін 2 сағаттан соң қолданылуы тиіс.

ОД-Левокс препаратымен емделу кезінде тері жабындарының зақымдануынан (фотосенсибилизация) сақтану үшін күн сәулесінен және жасанды УК-сәулеленуден аулақ болу қажет.

Cирек жағдайларда, жиірек Ахилл сіңірлерінің тендиниті пайда болып, бұл оның үзілуіне әкелуі мүмкін. Егде жаста және кортикостероидты препараттар қолданатын науқастарда тендинит пен сіңірлер үзілуінің даму қаупі жоғары. Ондай науқастарды оларға ОД-Левокс препараты тағайындалғанда қатаң бақылау қажет. Тендинит белгілері білінгенде барлық науқастар өз емдеуші дәрігеріне қаралғаны дұрыс. Тендинитке күдік туындағанда ОД-Левокспен емдеуді дереу тоқтатып, зақымданған сіңірді тиісінше емдеуді (мысалы, иммобилизация) бастау керек.

Аллергиялық реакциялар белгілері білінгенде ОД-Левокс дереу тоқтатылады.

Сыртартқысында ми зақымдануы (инсульт, ауыр жарақат) бар науқастарда құрысулардың дамуы, ал глюкоза-6-фосфатдегидрогеназа жеткіліксіздігінде гемолиздің даму қаупі болуы мүмкін.

ОД-Левокс cыртартқысында эпилепсиясы бар науқастарға қарсы көрсетілімді. Ол өз алдына, басқа хинолондармен болған жағдайдағыдай, фенбуфенмен және осыған ұқсас қабынуға қарсы стероидты емес дәрілермен немесе церебральді құрысу шегін төмендететін препараттармен бір мезгілде емдеу кезінде құрысуларға (орталық жүйке жүйесінің зақымдануы) бейім науқастарды ОД-Левокс препаратымен емдегенде барынша сақтық шарасын қадағалау керек («Дәрілермен өзара әрекеттесуі» бөлімін қараңыз). Құрысулар дамыған жағдайда ОД-Левокспен емдеуді тоқтау керек.

Левофлоксацинмен емдеу аясында немесе одан кейін пайда болатын персистирлеуші немесе қан аралас диарея Clostridium difficile-мен байланысты аурудың симптомы болуы мүмкін, оның ауыр түрі жалған жарғақшалы колит болып табылады. Жалған жарғақшалы колитке күдік туындағанда ОД-Левокспен емдеуді тоқтату керек, науқасқа демеуші және спецификалық ем жүргізу кідіріссіз басталады.

ОД-Левокс препараты мен варфарин бір мезгілде қолданылғанда протромбин уақытына және басқа да қанның ұю көрсеткіштеріне тиянақты мониторинг жасау қажет.

ОД-Левокс гипогликемиялық препараттармен бір мезгілде қолданылғанда қан плазмасындағы глюкоза концентрациясына мұқият мониторинг жасау ұсынылады (гипер- немесе гипогликемия дамуы мүмкін).

Асқын жұқпа. Басқа антибиотиктер қолдану кезіндегідей, әсіресе, ұзақ уақыт бойы левофлоксацин қолдану оған сезімтал емес микроорганизмдердің күшті көбеюіне әкелуі мүмкін, бұл адамда қалып шегінде болатын микрофлораның өзгерісін (бактериялар және зеңдер) туғызып, асқын жұқпа дамуына әкелуі мүмкін. Сондықтан, емдеу барысында емделушінің ахуалын қайта бағалау міндетті, ал ем кезінде асқын жұқпа дамыған жағдайда тиісті шаралар қабылдану керек.

QT аралығының ұзаруы. Левофлоксацинді қоса, фторхинолондар алған емделушілерде QT аралығы ұзаруының өте сирек жағдайлары хабарланды. Левофлоксацинді қоса, фторхинолондар қолданылғанда QT аралығын ұзартатын белгілі қауіп факторлары бар емделушілерде: егде жастағы емделушілерде; электролиттік бұзылулары түзетілмеген (гипокалиемиямен, гипомагниемиямен); туа біткен QT аралығының ұзару синдромымен; жүрек аурулары (жүрек жеткіліксіздігі, миокард инфарктісі, брадикардия) бар емделушілерде; аритмияға қарсы IА және III класс дәрілері, үш циклды антидепрессанттар, макролидтер сияқты QT аралығын ұзартуға қабілетті ДЗ бір мезгілде қабылданғанда сақ болу керек.

Шеткергі нейропатия. Левофлоксацинді қоса, фторхинолондар алатын емделушілерде тез басталуы мүмкін сенсорлы және сенсорлы-моторлы шеткергі нейропатия болды. Егер емделушіде нейропатия симптомдары білінсе, левофлоксацин қолдану тоқтатылуы тиіс. Бұл қайтымсыз өзгерістердің болжамды даму қаупін кемітеді.

Жалған салдану миастениясының (myasthenia gravis) өршуі. Левофлоксацин жалған салдану миастениясы (myasthenia gravis) бар емделушілерде сақтықпен қолдану керек.

Левофлоксацин препараттары өліммен аяқталуға дейін апаратын күрделі аса жоғары сезімталдық реакцияларын, мысалы, кейде алғашқы дозасынан кейін-ақ анафилактикалық шокқа дейін апаратын ангионевротикалық ісінуді туындатуы мүмкін («Жағымсыз әсерлері» бөлімін қараңыз). ОД-Левокс қабылдайтын науқастардың аса жоғары сезімталдық реакциялары дамыған жағдайда емдеуші дәрігерге немесе жедел жәрдем дәрігеріне шұғыл қаралғаны дұрыс.

ОД-Левокс препаратымен емделгенде психоздық реакциялар дамуы мүмкін. Олар дамыған жағдайда препарат қабылдауды тоқтату керек. Егер препарат психоздары бар немесе сыртартқысында психикалық аурулары болған науқастарға тағайындау керек болса, сақтық шарасын қадағалау ұсынылады.

ОД-Левокс қабылдайтын науқастарда несептегі апиынды анықтау жалған оң нәтиже беруі мүмкін. Алынған нәтижені басқа мейлінше спецификалық әдіспен растау қажет болуы мүмкін.

Өмірге қатер төндіретін бауыр жеткіліксіздігіне дейін апаратын бауыр некрозы жағдайлары, атап айтқанда, ауыр негізгі ауруы бар, мысалы, сепсиспен науқастарда құрамында левофлоксацин бар препараттар қабылдаумен байланысты тіркелген («Жағымсыз әсерлері» бөлімін қараңыз). Егер анорексия, сарғаю, несептің күңгірт түске боялуы, қышыну және іштің ауырсынуы сияқты бауыр ауруының белгілері мен симптомдары пайда болса, ОД-Левокс препаратымен емделуді тоқтатып, өз емдеуші дәрігеріне қаралу қажет.

Дәрілік заттың автокөлікті және басқа күрделі механикалық құралдарды басқару қабілетіне әсер ету ерекшеліктері

ОД-Левокс препаратымен емделу кезінде автокөлік басқарғанда және жоғары зейін шоғырландыру мен психомоторлық реакциялар шапшаңдығын талап ететін аса қауіпті басқа қызмет түрлерімен айналысқанда сақтық шарасын қадағалау қажет.

Артық дозалануы

Симптомдары: сананың шатасуы, бас айналу, сананың бұзылуы, құрысулар, жүрек айну, құсу және шырышты қабықтардың эрозиялық зақымдануы болуы мүмкін. Зерттеулер жүргізу кезінде орташа емдік дозаларынан асып кететін левофлоксацин қолданылғанда QT аралығының ұзаруы мүмкін екені көрсетілген.

Емі: қажет болса, симптоматикалық ем, кардиограмма мониторингі жүргізіледі. Левофлоксацин гемодиализ, перитонеальді диализ және тұрақты перитонеальді диализ кезінде шығарылмайды. Арнайы у қайтарғысы жоқ.

Шығарылу түрі және қаптамасы

5 таблеткадан алюминий фольгадан және поливинилхлоридті үлбірден жасалған пішінді ұяшықты қаптамада.

1 немесе 2 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

7 таблеткадан алюминий фольгадан және поливинилхлоридті үлбірден жасалған пішінді ұяшықты қаптамада.

1 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

Сақтау шарттары

Құрғақ, жарықтан қорғалған жерде, 30 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Босатылу шарттары

Рецепт арқылы

Өндіруші

«Эдж Фарма Прайвет Лимитед»

166 Атланта Билдинг,

209 Нариман Пойнт,

Мумбай – 400021, Үндістан

Тіркеу куәлігінің иесі

«Эдж Фарма Прайвет Лимитед», Үндістан

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

ЖШС «СonsultAsia»

E-mail: pv@consultingasia.kz

Тел/факс: +727-248-66-51; +77051708876; +77051708825