Кетальгин

• русский
• қазақша

• Скачать инструкцию медикамента

Саудалық атауы

Кетальгин

Халықаралық патенттелмеген атауы

Кеторолак

Дәрілік түрі

10 мг таблеткалар

Құрамы

Бір таблетканың құрамында

белсенді зат – 10 мг кеторолак трометамині,

қосымша заттар: лактоза моногидраты, картоп крахмалы, магний стеараты, коллоидты кремнийдің қостотығы (аэросил), микрокристалды целлюлоза.

Сипаттамасы

Дөңгелек, ойығы бар жалпақ цилиндр пішінді, ақ немесе сарғыш реңді ақ дерлік түсті таблеткалар.

Фармакотерапиялық тобы

Қабынуға қарсы стероидты емес және ревматизмге қарсы препараттар. Сірке қышқылының туындылары және оның аналогтары. Кеторолак.

АТХ коды М01АВ15

Фармакологиялық қасиеттері

Фармакокинетикасы

Ішке қабылдағаннан кейін кеторолак асқазан-ішек жолынан жылдам және толық сіңеді; тамақтану сіңу дәрежесіне әсер етпейді, бірақ оның жылдамдығын біршама баяулатады. Қандағы ең жоғары концентрациясына 30-60 минуттан кейін жетеді (0,01 г дозаны қолданудан кейін) және 0,7-1,1 мкг/мл құрайды. Елеулі жүйеалды метаболизмге берілмейді. Препараттың фармакокинетикасы бір реттік және қайталау дозаларын енгізгеннен кейін дозаға байланысты сипатта болады, яғни плазмадағы деңгейлері шамамен енгізілген дозаға пропорционалды. Препаратты ішу арқылы әрбір 6 сағат сайын қабылдағанда тепе-теңдік концентрациясына 24 сағат ішінде жетеді.

Плазма ақуыздарымен байланысуы – 99 % астам. Көздің сулы ылғалында жоғары концентрацияларға жетеді.

Кеторолактың 50 %-дан астамы фармакологиялық белсенді емес метаболиттер түзе отырып, негізінен глюкурон қышқылымен конъюгациялану жолымен бауырда метаболизденеді. Басты метаболиттері бүйрекпен бөлінетін глюкуронидтар және р-гидроксикеторолак болып табылады. Кеторолакты шығару бүйрекпен (90 % дейін), оның ішінде өзгермеген түрде (60 %), сондай-ақ нәжіспен (10 %) жүзеге асырылады. Бүйрек қызметі қалыпты емделушілерде жартылай шығарылу кезеңі 4-6 сағатты құрайды.

0,01-0,09 г дозада қабылдаған кезде организмде жиналмайды.

Ерекше клиникалық жағдайлардағы фармакокинетикасы: 65 жастан үлкен емделушілерде шығарылу жылдамдығы төмендейді: жартылай шығарылу кезеңі 0,01 г дозаны ішу арқылы қолданғаннан кейін орташа алғанда 6,2 сағатқа дейін созылады. Бүйрек жеткіліксіздігі кезінде шығарылуы баяу, мұны жалпы плазмалық клиренстің төмендеуі және жартылай шығарылу кезеңінің 9,6-9,9 сағатқа дейін созылуы дәлелдейді, бұл өз кезегінде дозаны түзетудің қажет екендігін көрсетеді. Бауыр қызметінің бұзылуы бар емделушілерде препарат фармакокинетикасының клиникалық мәнді өзгерістері байқалмаған.

Плаценталық бөгет арқылы өтеді. Емшек сүтіне енеді: ана 0,01 г кеторолакты қабылдаған кезде емшек сүтіндегі ең жоғары концентрациясына алғашқы дозаны қабылдағаннан кейін 2 сағаттан соң жетеді және 7,3 нг/мл, екінші дозаны қолданғанннан кейін 2 сағаттан соң (препаратты тәулігіне 4 рет пайдаланғанда) – 7,9 нг/мл құрайды.

Фармакодинамикасы

Кеторолак трометамині – қабынуға қарсы стероидты емес дәрілік зат, пирролизин-карбоксил қышқылының туындысы. Айқын ауырғанды басатын және қабынуға қарсы әсерге ие. Жүйелі ауыруды басатын әсері қабынуға қарсы әсерінен асып түседі. Ыстықты түсіретін әсері айтарлықтай әлсіз білінеді.

Кеторолак препараты белсенді компонентінің әсер ету механизмі ауыру дамуының басты факторы болып табылатын арахидон қышқылы простагландиндерінің түзілуін катализдеуші циклооксигеназа-1 және циклооксигеназа-2 селективті емес бәсеңдетуге негізделген. Кеторолак сондай-ақ басқа да ауыру мен қабыну медиаторларының түзілуін азайтады. Препарат төменгі және орташа қарқындылықтағы ауыруды толығымен басады, жоғары қарқындылықтағы ауыруды төмендетеді. Қабынуға қарсы стероидты емес басқа препараттар сияқты, кеторолак арахидон қышқылы мен коллаген туындатқан тромбоциттер агрегациясын бәсеңдетеді, АТФ-индукциялайтын агрегациясына ықпал етпейді. Кеторолак орташа қан кету уақытын ұзартады, бірақ тромбоциттер мөлшеріне, протромбинді уақытқа немесе ішінара белсенділендірілген тромбопластинді уақытқа әсер етпейді.

Апиынды анальгетиктерден айырмашылығы, кеторолак тыныс алу орталығына бәсеңдетуші әсер етпейді, СО2 соңғы парциальді қысымының жоғарылауын туындатпайды. Седативті және анксиолитикалық әсер етпейді. Препарат дәріге тәуелділікті және тоқтату симптомдарын туындатпайды.

Препарат ішке қабылдағаннан кейін 1 сағаттан соң әсер ете бастайды, ең жоғарысына 2-3 сағаттан соң жетеді және 8-12 сағат бойы жалғасады.

Қолдануға болмайтын жағдайлар

• шығу тегі әр түрлі орташа және күшті қарқындылықтағы ауыру

синдромында (оның ішінде операциядан кейінгі кезеңде, онкологиялық аурулар кезінде және т.б.)

Қолдану тәсілі және дозалары

Таблеткаларды мүмкіндігінше тамақтану кезінде немесе одан кейін қабылдау керек. Препарат тек қана қысқа мерзімдік қолдануға ұсынылады (5 тәулікке дейін). Жағымсыз әсерлерін барынша азайту мақсатында препаратты анағұрлым аз тиімді дозада симптомдарын бақылауға қажетті қысқа мерзімдік уақыт бойы қолданған жөн. Емдеуді бастар алдында нормоволемияға қол жеткізу қажет. Кетальгинді ересектерге қажет болғанда әрбір 4-6 сағат сайын 0,01 г-нан тағайындау керек. Препаратты тәулігіне 0,04 г асатын дозада қабылдау ұсынылмайды. Кеторолакты парентеральді алатын және кеторолакты таблетка түрінде ішу арқылы қабылдайтын емделушілер үшін жалпы біріктірілген тәуліктік доза 0,09 г аспауы тиіс (0,06 г жасы ұлғайған адамдар, бүйрек қызметінің бұзылуы бар және дене салмағы 50 кг аздау емделушілер үшін), ал егер препараттың шығарылу түрін қолдану өзгертілген болса, препараттың ішілетін түрін дозалау тәулігіне 0,04 г аспауы тиіс. Емделушілерді препаратты ішу арқылы қолдануға барынша ертерек ауыстыру қажет.

Жасы ұлғайған емделушілер

Жасы ұлғайған емделушілерде ауыр асқынулардың даму қаупі, оның ішінде ас қорыту жолы тарапынан зор. ҚҚСП қолдану арқылы емдеу кезінде емделушінің жай-күйін ұдайы қадағалап отырған жөн, әдетте препаратты қолдану арасында үлкен аралық, мысалы 6-8 сағат ұсынылады.

Жағымсыз әсерлері

Жиі

• бас ауыру, бас айналу, ұйқышылдық

• ісіну (бет, балтыр, тобық, саусақ, табан)

• дене салмағының артуы

Кейде

• құсу, жүрек айну, асқазанның толып кетуін сезіну, гастралгия, асқазан-ішек жолдарының эрозивті-ойық жаралы зақымдануы, метеоризм, іш қату

• артериялық қысымның жоғарылауы

• тері бөртпесі (макулопапуллезді бөртпені қоса), пурпура

• қатты тершеңдік

Сирек:

- холестатикалық сарғаю, гепатит, гепатомегалия, жедел панкреатит

- асептикалық менингит (қызба, қатты бас ауыруы, құрысу, мойын бұлшық етінің және/немесе арқаның сіреспелігі), жоғары белсенділік (көңіл-күйдің өзгеруі, мазасыздық), елестеулер, депрессия, психоз

- жедел бүйрек жеткіліксіздігі, несеп бөлінуі, несеп көлемінің жоғарылауы немесе төмендеуі. Нефрит, шығу тегі бүйректік ісіну

- гематуриямен және/немесе азотемиямен немесе онсыз белдің ауыруы, гемолитикалық уремия синдромы

- естудің төмендеуі, құлақтағы шуыл

- көрудің бұзылуы (оның ішінде көрудің бұлдырауы)

- бронх түйілуі немесе диспноэ, ринит, көмейдің ісінуі (ентігу, тыныс алудың қиындауы)

- өкпенің ісінуі, талып қалу

- тілдің ісінуі, қызба

- анемия, эозинофилия, лейкопения

- операциядан кейінгі жарадан қан кету, мұрыннан қан кету, ректальді қан кету

- эксфолиативті дерматит, есекжем, Стивенс-Джонсон синдромы, Лайелл синдромы

- стоматит

- анафилаксия немесе анафилактоидты реакциялар (бет терісі түсінің өзгеруі, тері қышынуы, тахипноэ немесе диспноэ, көзұясы маңайының ісінуі, ентігу, тыныс алудың қиындауы, кеуде қуысының тарылуы, тыныс алудың қырылдауы)

Қолдануға болмайтын жағдайлар

- кеторолакқа немесе басқа да қабынуға қарсы стероидты емес препараттарға жоғары сезімталдық

- «аспириндік» демікпе

- бронх түйілуі

- ангионевротикалық ісіну

- гиповолемия (оны туындатқан себептерге байланыссыз)

- сусыздану

- өршу сатысындағы асқазан-ішек жолдарының эрозивті-ойық жаралы зақымдануы, пептикалық ойық жаралар, гипокоагуляция (оның ішінде гемофилия)

- бауыр және/немесе бүйрек жеткіліксіздігі (плазма креатинині 50 мг/л жоғары болғанда)

- геморрагиялық инсульт (анықталған немесе күмәнді), геморрагиялық диатез, басқа да ҚҚСП бір мезгілде қабылдау, қан кетуі дамуының немесе қайталану қаупінің жоғары болуы (оның ішінде операциядан кейін), қан түзілудің бұзылуы

- жүктілік, босану, лактация кезеңі

- 16 жасқа дейінгі балалар

- қан кету қаупі жоғары болғандықтан хирургиялық операция алдында және кейін ауыруды басу үшін, сондай-ақ созылмалы ауыруды емдеу үшін

Дәрілермен өзара әрекеттесуі

Кеторолак қан плазмасы ақуыздарымен жеңіл байланысады (орташа мәні 99,2 %), ал байланысу дәрежесі концентрацияға байланысты болады.

Кеторолакпен бір мезгілде қолдануға болмайды

Жағымсыз әсерлерінің пайда болуы мүмкін екендігіне байланысты кеторолакты циклооксигеназа-2 селективті тежегіштерін қоса, басқа да ҚҚСП-мен, немесе ацетилсалицил қышқылын, варфарин, литий, пробенецид, циклоспорин қабылдап жүрген емделушілерге тағайындауға болмайды. ҚҚСП мифепристонның әсерін әлсіздендіруі мүмкін болуына байланысты ҚҚСП-ны мифепристонды қолданудан кейінгі 8-12 тәулік ішінде тағайындамаған жөн.

Дәрілік заттарды кеторолакпен біріктірілімде сақтықпен тағайындау керек

Нормоволемиясы бар дені сау адамдарда кеторолак фуросемидтің диуретикалық әсерін шамамен 20 %-ға төмендетеді, демек жүрек декомпенсациясы бар емделушілерге препаратты айрықша сақтықпен тағайындайды. Жүрек гликозидтерімен бір мезгілде енгізген жағдайда ҚҚСП жүрек жеткіліксіздігін күшейтуі, гломерулярлық сүзілу жылдамдығын төмендетуі және қан плазмасында жүрек гликозидтері деңгейін жоғарылатуы мүмкін. Кеторолак және басқа қабынуға қарсы стероидты емес препараттар гипотензивтік дәрілердің әсерін әлсіретуі ықтимал. Кеторолакты АӨФ тежегіштерімен бір мезгілде қолданған жағдайда, әсіресе организмде қан көлемі азайған емделушілерде, бүйрек қызметі бұзылуының жоғары қаупі бар. ҚҚСП-ны такролимуспен бірге тағайындаса, нефроуыттылық байқалуының ықтимал қаупі бар. Бір мезгілде диуретиктермен бірге тағайындау диуретикалық әсердің әлсіреуіне және ҚҚСП нефроуыттылық қаупінің жоғарылауына әкелуі мүмкін. Барлық ҚҚСП сияқты, кортикостероидты препараттарды бір мезгілде асқазан-ішек ойық жаралары немесе қан кетулердің туындау қаупі жоғары болуына байланысты сақтықпен тағайындайды. Егер ҚҚСП-ны антиагрегатты дәрілермен және серотониттің кері қармаушы селективті тежегіштерімен біріктірілімде тағайындайтын болса, асқазан-ішектен қан кетудің қаупі жоғары. Простогландиндер синтезінің кейбір тежегіштері метотрексат клиренсін азайтатыны мәлімделгендіктен және сондықтан оның уыттылығын жоғарылататын болар, метотрексатты бір мезгілде сақтықпен тағайындау ұсынылады.

ҚҚСП мен хинолондарды қабылдайтын емделушілерде құрысу дамуының жоғары қаупі болуы мүмкін.

ҚҚСП-ны зидовудинмен бір мезгілде қабылдау гематологиялық уыттылық қаупін жоғарылатады. Гемофилиямен зардап шегетін және зидовудинмен және ибупрофенмен бір мезгілде емделетін АИВ-жұқтырғандарда гемартроз және гематоманың жоғары қаупі болады.

Мына дәрілік заттардың кеторолакпен өзара әрекеттесу мүмкіндігі аз

Кеторолак дигоксиннің қан плазмасы ақуызымен байланысуына әсер етпеген. In vitro зерттеулері салицилаттың емдік концентрациясы кезінде (300 мкг/мл) және одан жоғары болғанда, кеторолактың байланысуы шамамен 99,2 %-дан 97,5 %-ға дейін төмендегенін көрсетеді. Дигоксин, варфарин, парацетамол, фенитоин және толбутамидтің емдік концентрациялары кеторолактың қан плазмасы ақуыздарымен байланысуына әсер етпеген. Кеторолак белсенділігі жоғары препарат болып табылатындықтан, оның қан плазмасындағы концентрациясы төмен, ол қан плазмасы ақуыздарымен байланысатын басқа препараттарды айтарлықтай алмастырады деп күтілмейді. Жануарлар мен адамдарға жүргізілген зерттеулерде кеторолак трометаминінің, оны немесе басқа препараттарды метаболиздеуге қабілетті бауыр ферменттерін индукциялайтыны немесе тежейтіні жөнінде деректер болмаған. Сондықтан кеторолак басқа препараттардың фармакокинетикасын ферменттерді индукциялау немесе тежеу механизмі арқылы өзгертеді деп күтуге болмайды.

Айрықша нұсқаулар

Кетальгин созылмалы ауыру синдромы кезінде қолдануға арналмаған.

Асқазан-ішектен қан кету, ойық жаралардың пайда болуы және перфорация

Кетальгин асқазан-ішек жолының зақымдануын туындатуы мүмкін.

ҚҚСП алатын, оның ішінде Кетальгин қабылдап жүрген науқастарда ауыр асқазан-ішек уыттылығының ауыр құбылыстары (асқазан мен ішектің тітіркенуі, қан кетулер, ойық жаралардың түзілуі, перфорациялар және т.б.) кез келген сәтте, соның ішінде алдын ала симптомдарынсыз пайда болуы мүмкін. ҚҚСП бойынша жүргізілген зерттеулер ойық жараның түзілуі мен қан кету қаупі жоқ қандай да бір науқастар тобын анықтай алмаған. Мұндай реакцияларға анағұрлым шалдыққыш және оларды нашар көтеретіндер жасы ұлғайған және әлсіреген науқастар; өліммен аяқталатын асқазан-ішек реакцияларының барынша көп саны осы популяциядағы науқастарда байқалады.

Асқазан-ішек қан кетулерінің клиникалық ауыр қаупі дозаға байланысты болады және тәулігіне 60 мг астам Кетальгин қабылдайтын жасы ұлғайған науқастарда артады. Сыртартқыда ойық жара ауруының болуы Кетальгинмен емдегенде асқазан-ішек жолы тарапынан ауыр асқынулардың болу мүмкіндігін ұлғайта түседі.

Тыныс алу қызметінің бұзылуы

Препаратты бронх демікпесі (немесе сыртартқысында демікпесі бар) бар емделушілерге қолданған жағдайда сақ болу қажет, өйткені ҚҚСП-ның ондай емделушілерде бронх түйілуі туындауын тездететіні хабарланған.

Бүйрекке әсері

Простагландиндер биосинтезінің тежегіштері (ҚҚСП қоса) нефроуытты әсер етеді. ҚҚСП бүйрек қызметінің нашарлауына әкелуі мүмкін болғандықтан, препаратты бүйрек, жүрек, бауыр қызметінің бұзылулары бар емделушілерге сақтықпен тағайындайды. Бүйрек қызметінің елеусіз ғана бұзылулары бар емделушілерге кеторолактың аз дозасын (бұлшықет ішіне немесе көктамыр ішіне тәулігіне 0,06 г аспайтындарын) тағайындайды, сондай-ақ мұндай емделушілер бүйрегінің жағдайын мұқият бақылаған жөн. Простагландиндер синтезін тежейтін басқа да препараттардағы сияқты, кеторолак трометаминін қабылдау кезінде қан сарысуындағы мочевина, креатинин және калий мөлшерінің арту жағдайлары туралы хабарланған, бұл бір дозаны қабылдаудан кейін де орын алуы мүмкін.

Жүрек-тамыр жүйесі тарапынан, бүйрек және бауырдың бұзылулары

Препаратты простагландиндер бүйрек перфузиясын қамтамасыз етуде демеуші рөл атқарып, қан көлемінің және/немесе бүйрек қан ағымының азаюына әкелетін жағдайларда емделушілерге сақтықпен тағайындайды. Бұл емделушілерде бүйректің қызметін бақылау қажет. Көлемінің азаюын түзеткен және қан сарысуындағы мочевина және креатинин мөлшерін, сондай-ақ емделушіде нормоволемия басталмай тұрып, шығарылатын несеп көлемін мұқият бақылаған жөн. Бүйрек диализінде болатын емделушілерде креатинин клиренсі қалыпты жылдамдықпен салыстарғанда шамамен екі есе азайып, ал соңғы жартылай шығарылу уақытында шамамен үш есе ұлғайған. Цирроз салдарынан бауыр қызметінде бұзылулары бар емделушілерде кеторолак клиренсінде немесе жартылай шығарылудың қалған кезеңінде қандай да бір клиникалық маңызды өзгерістер болмаған. Бауыр функционалдық тестілерінің бір немесе одан да көп мөлшерлерінің мәндерінен соң шекаралық мәндерінің жоғарылауы байқалуы мүмкін. Мұндай нормадан ауытқулардың уақытша болуы, өзгеріссіз қалуы немесе емді жалғастырған кезде үдеуі мүмкін. Егер клиникалық белгілері мен симптомдары бауыр ауруларының дамуын көрсететіндей болса немесе жүйелі білінулері байқалса, Кетальгинді тоқтату керек.

Сұйықтықтың іркілуі және ісінулер

Кеторолакты қолдану кезінде сұйықтықтың іркілуі және ісіну туралы хабарланған, сондықтан оны жүрек декомпенсациясы бар, артериялық гипертензиясы бар немесе соған ұқсас жағдаймен емделушілерге сақтықпен тағайындаған жөн.

Жүрек-қантамырлық және цереброваскулярлық әсерлері

Қазіргі кезде кеторолак трометамин үшін мұндай қауіпті бағалайтын жеткілікті ақпараттар жоқ. Бақыланбаған артериялық гипертензиясы, іркілісті жүрек жеткіліксіздігі, жүректің диагностикаланған ишемиялық ауруы, шеткергі артериялар аурулары және/немесе цереброваскулярлық аурулары бар емделушілер дәрігердің қарауында болуы тиіс.

Жүйелік қызыл жегі және дәнекер тіндердің аралас аурулары

Жүйелік қызыл жегі және дәнекер тіндердің әр түрлі аралас аурулары бар емделушілерде асептикалық менингиттің даму қаупі жоғарылайды.

Дерматологиялық

Кетальгинді терідегі бөртулердің алғашқы белгілері, шырышты қабықтың зақымдануы немесе кез келген басқа да жоғары сезімталдық белгілері болған жағдайда тоқтатқан жөн.

Гематологиялық әсерлері

Қан ұюының бұзылуы бар емделушілерге Кетальгин тағайындамаған жөн. Антикоагулянтты ем алатын емделушілер, егер кеторолакты бір мезгілде қабылдаса, қан кетудің жоғары қаупі болуы мүмкін. Қан кетуді тоқтату жылдамдығына әсер етуі мүмкін басқа да препараты алатын емделушілердің жағдайын оларға кетролакты тағайындаған кезде мұқият бақылаған жөн. Бақыланған клиникалық зерттеулерде операциядан кейін елеулі қан кету жағдайларының жиілігі 1 % аздауды құраған. Кеторолак тромбоциттер агрегациясын тежейді және қан кету уақытын ұзартады. Қан кету уақыты қалыпты емделушілерде қан кетудің ұзақтығы артқан, бірақ 2-11 минутта қалыпты мәндер диапазонынан шықпаған.

Ацетилсалицил қышқылын қолдану салдарынан ұзақ әсер етуден айырмашылығы, тромбоциттердің қызметі кеторолакты тоқтатқаннан кейінгі 24‑48 сағат ішінде қалпына түседі. Кеторолакты қан кету қаупі жоғары операцияны өткерген немесе ол толық тоқтатылмаған емделушілерге тағайындамаған жөн. Қан кетуді міндетті түрде тоқтату өте қиын болып саналатын болса, сақ болу керек. Кетальгин анестезияға арналған дәрі емес және седативті немесе анксиолитикалық қасиеттері жоқ, сондықтан ол операция алдында анестезияны демейтін премедикация дәрісі ретінде ұсынылмайды.

Препарат құрамында лактоза бар, сондықтан тұқым қуалайтын лактозаны/галактозаны көтере алмаушылығы бар науқастарға оны тағайындаған кезде ескерген дұрыс.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Жағымсыз әсер етуін (ұйқышылдық, бас айналу, вертиго, ұйқысыздық, қатты шаршағыштық, көрудің бұзылуы немесе депрессия) ескере отырып, сақтық танытқан жөн.

Артық дозалануы

Симптомдары: бас ауыруы, жүрек айнуы, құсу, эпигастрийдің ауыруы, асқазан-ішектен қан ету; сирек – диарея, бағдарсыздық, қозу, кома, ұйқышылдық, бас айналу, құлақтың шуылдауы, естен тану, басқа құрысулар. Ауыр улану жағдайларында бүйрек жеткіліксіздігі және бауырдың зақымдануы болуы мүмкін.

Емі: асқазанды шаю, белсенділендірілген көмірді қолдану. Диурез жеткілікті болуын қамтамасыз ету қажет. Бүйрек пен бауырдың қызметін мұқият бақылаған жөн. Емделушілердің жай-күйін ықтималдығы зор уытты мөлшерін қабылдағаннан кейін кем дегенде 4 сағат бойы бақылап отырған жөн. Жиі немесе ұзақ құрысуларды диазепамды көктамыр ішіне енгізу жолымен емдеген жөн. Басқа шараларды емделушінің клиникалық ахуалына байланысты тағайындауға болады. Симптоматикалық ем.

Шығарылу түрі және қаптамасы

Поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамада 10 таблеткадан.

Бір немесе екі пішінді қаптамадан медицинада қолданылуы жөніндегі нұсқаулықпен бірге картон пәшкеге салынады.

Сақтау шарттары

Жарықтан қорғалған жерде, 25 °C-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

“Лекхим-Харьков” АҚ,

61115, Харьков қ., 17-ші Партсъезд к-сі, 36, Украина

Тіркеу куәлігінің иесі

«Лекхим-Харьков» АҚ, Украина

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«Medicus Centre» ЖШС

050000, Алматы қ., Мусоргский к-сі, 2А

тел: +007(7272) 71-48-12, 71 48 13

e-mail: postavki@medicus.kz