Дюзела (60 мг)

• русский
• қазақша

• Скачать инструкцию медикамента

Саудалық атауы

Дюзела

Халықаралық патенттелмеген атауы

Дулоксетин

Дәрілік түрі

Босап шығуы кейінге қалдырылған капсулалар, 30 мг және 60 мг

Құрамы

Бір капсуланың құрамында

белсенді зат - 30 мг және 60 мг дулоксетинге баламалы

33.675 және 67.350 дулоксетин гидрохлориді,

қосымша заттар: #20, #25 түйіршіктелген қант сфералары, гипромеллоза, 2910, D-маннитол, тазартылған тальк, сахароза, метакрил қышқылы дисперсиялық кополимері, 30 %, триэтилцитрат, натрий гидроксиді,

капсуланың құрамы (30 мг доза үшін): бриллиантты көк Е133, Понсо 4R Е124, сансет сары Е110, титанның қостотығы Е171, желатин, натрий лаурилсульфаты,

капсуланың құрамы (60 мг доза үшін): бриллиантты көк Е133, Понсо 4R Е124, сансет сары Е110, темірдің сары тотығы Е172, титанның қостотығы Е171, желатин, натрий лаурилсульфаты.

Сипаттамасы

Өлшемі №2 қоңыр түсті қақпағы және ақ түсті корпусы (30 мг доза үшін) бар капсулалар.

Өлшемі №0 қоңыр түсті қақпағы және күңгірт-сары түсті корпусы (60 мг доза үшін) бар капсулалар.

Капсула ішіндегісі ақ немесе ақ дерлік түсті пеллеттер.

Фармакотерапиялық тобы

Психоаналептиктер. Антидепрессанттар. Басқа да антидепрессанттар. Дулоксетин

АТХ коды N06AX21

Фармакологиялық қасиеттері

Фармакокинетикасы

Дулоксетин бір ғана энантиомер ретінде тағайындалады. Дулоксетин фармакокинетикасы ішінара жынысына, жас шамасына, шылым шегуіне және CYP2D6 метаболизатор статусына қарай субъект аралық үлкен ауытқушылығымен (негізінен 50-60%) ерекшеленеді.

Сіңуі. Дулоксетин ішке қабылдағанда жақсы сіңеді. Сіңуі препаратты ішке қабылдағаннан кейін 2 сағаттан соң басталады. Препарат қандағы ең жоғары концентрациясына (Cmax) ішке қабылдағаннан кейін 6 сағаттан кейін жетеді. Дулоксетиннің абсолютті пероральді биожетімділігі 32-80% шегінде (орташа 50%) болады. Тамақ ішу препараттың ең жоғары концентрациясына әсер етпейді, бірақ ең жоғары концентрациясына жету уақытын 6 сағаттан 10 сағатқа дейін арттырады, бұл сіңу дәрежесін жанама (шамамен 10%-ға) азайтады.

Таралуы. Дулоксетин плазма ақуыздарымен жақсы байланысады (> 90%), негізінен альбуминмен және α1-қышқыл гликопротеинмен, бірақ бүйрек немесе бауыр тарапынан бұзылулар қан ақуыздарымен байланысу дәрежесіне әсер етпейді.

Метаболизмі. Дулоксетин оксидатты ферменттермен соңынан конъюгацияланумен белсенді метаболизденеді, және оның метаболиттері негізінен несеппен шығарылады. CYP2D6 да, CYP1A2 сияқты екі негізгі метаболит (4-гидроксидулоксетиннің глюкуронды конъюгаты, 5-гидрокси,6-метоксидулоксетин сульфат конъюгаты) түзілуін катализдейді. Айналымдағы метаболиттер фармакологиялық тұрғыда белсенді емес.

Шығарылуы. Дулоксетиннің жартылай шығарылу кезеңінің ұзақтығы орташа 12 сағатты (8 сағаттан 17 сағатқа дейін) құрайды. Ішу арқылы қабылдағанда дулоксетиннің орташа клиренсі 101 л/ сағатты құрайды.

Емделушілердің жекелеген топтары.

Жынысы: әйелдер мен ерлер арасындағы фармакокинетикасының анықталған айырмашылығы (әйелдердегі орташа клиренсі шамамен 50%-ға төмен) болса да, жынысына қарай доза түзету қажеттігі туындайтындай бұл айырмашылық соншалықты көп те емес.

Жасы: жас, орта жастағы және егде жастағы (65 жас және одан асқан) әйел жынысты емделушілердегі фармакокинетикасының анықталған айырмашылығы болса да, егде жастағыларда препараттың AUC (концентрация/уақыт қисығы астындағы аудан) жоғары және жартылай шығарылу кезеңі ұзағырақ (шамамен 25%-ға), бұл айырмашылықтар емделушілердің тек жасына ғана байланысты доза өзгерту үшін жеткіліксіз.

Бүйрек қызметі бұзылуы: гемодиализдегі бүйрек қызметінің ауыр бұзылуы бар емделушілерде (созылмалы бүйрек жеткіліксіздігінің (БСЖ) терминалды сатысы) дулоксетиннің Cmax және AUC мәндері ұлғайған. Осыған байланысты препаратты бүйрек қызметінің клиникалық айқын бұзылуы бар емделушілерде қолдану ұсынылмайды. Жеңіл және орташа дәрежелі бүйрек жеткіліксіздігі бар емделушілерде дулоксетин фармакокинетикасы бойынша деректер шектеулі.

Бауыр қызметі бұзылуы: дені сау субъектілермен салыстырғанда ауырлығы орташа (Child-Pugh бойынша В класты) бауыр ауруы бар емделушілерде дулоксетиннің плазмадағы клиренсінің 79%-ға төмендегені, жартылай ыдырауының терминалдық кезеңінің 2.3 есеге артқаны және AUC - 3.7 есеге ұлғайғаны анықталды. Дулоксетин және оның метаболиттерінің фармакокинетикасы жеңіл және ауыр дәрежедегі бауыр жеткіліксіздігі бар емделушілерде зерттелмеген.

Бала емізуші аналар:

Бала емізуші әйелдер тобында зерттеулер жүргізгенде дулоксетин емшек сүтінен табылды және емшек сүтіндегі статистикалық концентрациясы плазмадағы мөлшерінің ¼ шамасын құрады. Дулоксетиннің емшек сүтіндегі мөлшері бір күнде екі рет 40 мг дозада қабылдағанда күніне 7 мг жуықты құрайды.

Фармакодинамикасы

Дюзела: гистаминергиялық, дофаминергиялық, холинергиялық және адренергиялық рецепторларға елеулі тектестігі болмаса да, серотонинді (5-НТ) және норадреналинді (ТФ) кері қармауды тежегіш, дофаминді кері қармауды әлсіз бәсеңсітетін - әсері біріктірілген антидепрессант болып табылады.

Дюзела ауыру синдромын бәсеңдететін орталықтық механизмге ие, бұл бірінші кезекте этиологиясы нейропатиялық ауыру синдромында ауыру сезіну шегінің жоғарылауымен білінеді. Депрессияны емдеудегі Дюзеланың әсер ету механизмі моноаминдерді кері қармауды басуымен түсіндіріледі, соның нәтижесінде ОЖЖ серотонинергиялық және норадренергиялық нейротрансмиссия жоғарылайды.

Қолданылуы

- ауыр дәрежелі депрессиялық эпизодтарда

- ересектердегі диабеттік шеткергі нейропатияның ауыратын түрінде

- жайылған үрейлі бұзылыстарда

- депрессиясыз фибромиалгияда

Дәрігердің қатаң тағайындауы бойынша қолдану керек.

Қолдану тәсілі және дозалары

Ішке. Капсуланы шайнамай және жаншымай, тұтас жұту керек. Капсуланы ашуға және капсуланың ішіндегісін тамақпен немесе сұйықтықтармен араластыруға болмайды.

Ауыр дәрежедегі депрессиялық эпизодтар

Дюзеланың ұсынылатын бастапқы дозасы ас қабылдауға байланыссыз күніне 1 рет 60 мг құрайды.

Кейбір емделушілерде жақсы нәтижеге қол жеткізу үшін күніне 1 рет 60 мг дозаны күніне екі қабылдауға ең жоғары 120 мг дозаға дейін арттыру керек.

Препаратты 120 мг жоғары дозада қабылдауды жүйелі бағалау жүргізілмеген. Әдетте емдік әсері емдеудің 2-4 аптасынан кейін байқалады.

Антидепрессиялық реакция бекігеннен кейін қайталануын болдырмау үшін емдеуді бірнеше ай бойына жалғастыру ұсынылады. Дулоксетинге сезімтал емделушілерде, сондай-ақ депрессияның қайталану эпизодтары тіркелген емделушілерде одан әрі қарай тәулігіне 60 мг-ден 120 мг дейін дозада ұзақ уақыттық емдеу қарастырылуы мүмкін.

Жайылған үрейлену бұзылыстары бар емделушілерде ұсынылатын бастапқы доза күніне бір рет 30 мг құрайды. Жауап жеткіліксіз болғанда доза 60 мг дейін ұлғайтылуы мүмкін, бұл көптеген емделушілерде әдеттегі демеуші ем болып табылады.

Қатарлас негізгі депрессиялық эпизодтары бар емделушілерде бастапқы және демеуші дозасы күніне бір рет 60 мг құрайды.

60 мг дозаға жауабы жеткіліксіз емделушілерде доза күніне 90 мг дейін немесе 120 мг дейін ұлғайтылуы мүмкін. Дозаны жоғарылату клиникалық жауап және толеранттылық негізінде бағалануы тиіс. Реакция бекітілгеннен кейін, қайталанудан аулақ болу үшін емдеуді бірнеше ай бойы жалғастыру ұсынылады.

Диабеттік шеткергі нейропатиядағы ауыру синдромы

Дулоксетиннің бастапқы және ұсынылатын демеуші дозасы күніне 60 мг құрайды. Дулоксетиннің плазмадағы концентрациясының индивидуалдық ауытқуы елеулі болуына байланысты, 60 дозаға жауабы жеткіліксіз емделушілерде дозалау бірдей бөлінген доза түрінде күніне 120 мг дейін ұлғайтылуы мүмкін.

Дәрілік препаратқа реакция 2 ай емдеуден кейін бағалануы тиіс. Осы уақыт аралығынан кейінгі қосымша реакция ықтималдығы аз болады. Емдеудің пайдасын қайта бағалап тұру (үш ай сайын бір реттен кем емес) ұдайы жүргізілуі керек.

Депрессиясыз фибромиалгия

Дулоксетиннің бастапқы дозасы бір апта бойына күніне 30 мг құрайды, бұл дозалау емделушінің дулоксетин дозасын күніне 60 мг дейін ұлғайтқанға дейін дәрілік препаратқа үйренуіне мүмкіндік береді. Дулоксетиннің плазмадағы концентрациясының индивидуалдық ауытқуы елеулі болуына байланысты кейбір емделушілер бастапқы дозаның еміне жауап беруі мүмкін. Дозалауды күніне 60 мг астам етіп ұлғайтудың қосымша артықшылығы болатынына тіпті дулоксетиннің ұсынылатын дозасымен емге жауап бермейтін емделушілерде де дәлел жоқ. Дулоксетиннің дозасын ұлғайту жағымсыз әсерлердің және қолайсыздықтардың деңгейі жоғарырақ болуына алып келеді.

Егде жастағы адамдар

Егде жастағы емделушілер үшін тек жасына байланысты доза түзету талап етілмейді. Алайда егде жастағы емделушілерді емдеу үшін, әсіресе 120 мг доза тағайындағанда сақтық шараларын қолдану керек.

Бүйрек жеткіліксіздігі бар емделушілерде: бүйрегінің әлсіз және орташа дәрежелі дисфункциясы бар емделушілерде (креатинин клиренсі 30-80 мл/мин) доза түзету талап етілмейді. Препаратты бүйрегінің ауыр жеткіліксіздігі (креатинин клиренсі 30 мл/мин аз) бар емделушілерде қолдану ұсынылмайды.

Бауыр жеткіліксіздігі бар емделушілерде: препаратты бауыр жеткіліксіздігіне алып келетін бауыр ауруы бар емделушілерде пайдалану ұсынылмайды.

Емдік жауабы әдетте емдеудің 2-4 аптасынан кейін байқалады. Антидепрессиялық реакциялар нығайғаннан кейін, қайталанулар болмас үшін, емдеуді бірнеше ай бойына жалғастыру ұсынылады.

Емдеуді тоқтату

Емдеуді күрт тоқтатудан аулақ болу керек. Тоқтату синдромы даму қаупін төмендету үшін дозаны азайту 1-2 апта бойына біртіндеп жүргізілуі тиіс. Препараттың дозасын төмендетуден кейін немесе емдеуді тоқтатқаннан кейін жақпаушылық симптомдары пайда болған жағдайда қабылдауды бұрын белгіленген дозалауда қайта жаңғыртуға болады.

Дәрігер дозаны төмендетуді жылдамдығы баяулатылған түрде жалғастыруы мүмкін.

Жағымсыз әсерлері

Бірен-саран жағдайлардан гөрі жиірек кездесетін жағымсыз реакциялар төмендегіше градациямен берілген: өте жиі (≥ 10%); жиі (≥ 1%, > 10%); кейде (> 0,1%, < 1%); сирек (> 0,01%, < 0,1%); тым сирек (< 0,01%).

Өте жиі

- бас айналуы (вертигодан басқа), бас ауыруы, ұйқышылдық

- ауыз құрғауы, жүрек айнуы

Жиі

- тәбет төмендеуі

- ұйқысыздық, ұйқы бұзылуы, мазасыздық, үрейлену, либидо төмендеуі, патологиялық оргазм

- тремор, парестезия

- көрудің бұлыңғырлануы

- тиннит1

- жүректің қатты қағуы

- қан тебу

- есінеу

- құсу, диспепсия, метеоризм, іш қатуы, диарея

- қатты терлеу, бөртпе

- бұлшықет-қаңқа ауыруы, бұлшықеттің тартылу сезімі, бұлшықет түйілуі

- эректильді дисфункция

- шаршағыштық

- іш ауыруы

- дене салмағының төмендеуі

Кейде

- ларингит

- гипергликемия (негізінен қант диабеті бар емделушілерде)

- ұйқы бұзылуы, бруксизм (ұйқы кезінде тістерін қайрау), бағдар жоғалту, апатия

- миоклонус, күйгелектік, зейін қою бұзылуы, летаргия, дизгевзия (дәм сезу бұрмалануы), дискинезия, аяқ шаршау синдромы, ұйқы сапасының нашар болуы

- мидриаз, көрудің бұзылуы

- вертиго/бас айналуы,құлақтың ауыруы

- тахикардия, суправентрикулярлық аритмия (негізінен жүрекше фибрилляциясы)

- артериялық қысым жоғарылауы, аяқ-қол мұздауы, ортостатикалық гипотензия2, синкопе/естен тану2

- тамақтың қысылуы, эпистаксис (мұрыннан қан кету)

- гастроэнтерит, кекіру, гастрит

- бауыр ферменттерінің деңгейі жоғарылауы (АЛТ, АСТ, сілтілік фосфатаза), гепатит3, бауырдың жедел зақымдануы

- түнгі тершеңдік, суық тер

- есекжем, жанаспалы дерматит, фотосенсибилизация, қанталаулар түзілуіне жоғары тенденция

- бұлшықет құрысулары

- несеп іркілуі, дизурия, несептің кешеуілдеп келуі, полиурия (оның ішінде түнгі полиурия), несеп ағынының төмендеуі

- эякуляция бұзылуы, эякуляция іркілуі, сексуалдық дисфункция, 1дәрежелі гинекологиялық қан кету

- сезімталдық бұзылыстары, тоңу, шөлдеу, қалтырау, дімкәстік, ысыну сезіну, жүрістің бұзылуы

- дене салмағының жоғарылауы, креатинфосфокиназа деңгейінің жоғарылауы

Сирек

- анафилактикалық реакция, өте жоғары сезімталдықтың бұзылуы

- гипотиреоз

- дегидратация, гипонатриемия

- мания, елестеулер, озбырлану және ызалану4

- конвульсиялар1

- глаукома

- стоматит, ауыздан жағымсыз иіс шығуы, қанды нәжіс

- несептің патологиялық иісі

- тризм (шайнайтын бұлшықеттердің тонустық жиырылуы)

- менопауза симптомдары, галакторея, гиперпролактинемия

- қанда холестерин деңгейінің жоғарылауы

Жиілігі белгісіз

- антидиуретикалық гормонның талапқа сай емес секрециялану синдромы(СНСАДГ)

- суицидальдық идеялар5, суицидальдық мінез-құлық5

- серотонинді синдром, экстрапирамидті бұзылыстар, акатазия, психомоторлық қозу

- гипертензия, гипертониялық криз

- асқазан-ішек қан кетулері

- сарғаю, бауыр жеткіліксіздігі

- ангионевротикалық ісіну, Стивенс-Джонсон синдромы

- кеуде қуысы ауыруы

- холестерин деңгейінің жоғарылауы

1 –сондай-ақ емдеу тоқтатылғаннан кейін де белгіленген

2 –емдеу басында белгіленген

3- Айырықша нұсқаулар бөлімін қараңыз

4- емдеу тоқтатылғаннан кейін бастапқы сатыларында ішінара белгіленген

5- емдеу кезеңінде және емдеу тоқтатылғаннан кейін бастапқы сатыларында белгіленген

Диабеттік нейропатиядағы ауыру синдромы бар емделушілер. Ашқарында қанда глюкоза деңгейінің елеусіз ұлғаюы бақылануы мүмкін, дулоксетин қабылдау аясында HbA1c және жалпы холестериннің деңгейінің елеусіз ұлғаюы бақылануы мүмкін.

Тоқтату синдромы

Бас айналуы, сезімталдық бұзылыстары (парестезияны қоса), ұйқы бұзылыстары (ұйқысыздық пен ауыр түстер көруді қоса), қажығыштық, ажитация немесе мазасыздық, жүрек айнуы және/немесе құсу, тремор, бас ауыруы, тітіркенгіштік, диарея, гипергидроз, вертиго Дюзеланы тоқтатудағы (әсіресе ол күрт тоқтатылғанда) жиірек болатын реакциялар болып табылады.

Серотонинді кері қармаудың іріктеп тежегіштерін (СКҚІТ) және серотонинді және норадреналинаді кері қармаудың тежегіштерін (СНКҚТ) қолдануда бақыланған тоқтату синдромының даму қаупі емнің ұзақтығын, дозалануын, және доза төмендетілуінің жылдамдығын қоса бірнеше факторларға байланысты болуы мүмкін. Симптомдары әдетте емдеуді тоқтатқаннан кейін бастапқы бірнеше күн ішінде туындайды, ал емделуші препараттың кезекті қабылдану ретін босатып алғанда – туындауы сирек.

Негізінен СКҚІТ және СНКҚТ үшін де, бұл білінулер әлсіз және орташа өзін-өзі реттейтін сипатқа ие, алайда кейбір емделушілерде ауыр және/немесе ұзақ (2-3 ай және одан көп) болуы мүмкін. Осыған байланысты, дулоксетинмен емдеуді жалғастыру қажет болмағанда, емделушінің қажет етуіне сай, препаратты тоқтатуды 2 аптадан кем емес уақыт бойына дозаны біртіндеп төмендетумен жүргізу ұсынылады.

Қолдануға болмайтын жағдайлар

• препараттың әсер етуші затына немесе қосымша компоненттеріне жоғары сезімталдық

• препаратты селективті емес қайтымсыз моноаминооксидаза тежегіштерімен (МАОТ) және селективті қайтымды МАОТ бір мезгілде қолдану

• бауыр жеткіліксіздігіне алып келетін бауыр аурулары

• CYP1A2 қуатты тежегіштерімен (флувоксаминмен, ципрофлоксацинмен немесе эноксацинмен) бір мезгілде қолдану

• ауыр бүйрек жеткіліксіздігі (креатинин клиренсі 30 мл/мин аз)

• потенциалды гипертониялық кризге алып келетін бақыланбайтын гипертензия

• компенсацияланбайтын жабық бұрышты глаукома

• жүктілік және лактация кезеңі

• 18 жасқа дейінгі балалар және жасөспірімдер

Дәрілермен өзара әрекеттесуі

ОЖЖ әсер етуші дәрілік препараттар. Дюзеланы басқа да ОЖЖ әсер етуші әсіресе алкоголь және седативті препараттарды қоса (мысалы, бензодиазепиндер, морфиномиметиктер, антипсихотиктер, фенобарбитал, седативті әсері бар антигистаминдік препараттар) әсер ету механизмі ұқсас препараттармен және заттармен бірге қолданғанда сақ болу керек.

Моноаминооксидаза тежегіштері. Серотонинді синдром даму қаупіне байланысты, Дюзеланы іріктемейтін қайтымсыз моноаминооксидаза тежегіштерімен біріктірілімімен немесе МАОТ пайдаланумен емдеуді тоқтатқаннан кейін 14 күн бойына қолдану ұсынылмайды. Дулоксетиннің жартылай ыдырау кезеңі негізінде, Дюзела қабылдауды тоқтатқаннан кейін МАОТ қабылдауды бастағанға дейін өтетін уақыт 5 күннен кем болмауы тиіс. Моклобемид сияқты іріктейтін қайтымды МАОТ үшін серотонинді синдром даму қаупі елеусіз. Алайда Дюзеланы іріктейтін қайтымды МАОТ бір мезгілде пайдалану ұсынылмайды.

Серотонинді синдром. СКҚІТ (серотонинді кері қармаудың іріктеп тежегіштері) (мысалы, пароксетин, флуоксетин) пайдалануды серотонинергиялық медициналық препараттармен бір мезгілде қолданатын емделушілерде серотонин синдромы туралы сирек жағдайларда айтылған. Дюзеланы серотонинді кері қармаудың іріктеп тежегіштері сияқты серотонинергиялық антидепрессанттармен, кломипрамин немесе амитриптилин сияқты үшциклды антидепрессанттармен (ҮЦА), шай қураймен (Hypericum perforatum), венлафаксинмен немесе триптан туындыларымен, трамадолмен, петидинмен және триптофанмен бір мезгілде қолданғанда сақтық шараларын жасау керек.

Дулоксетиннің басқа дәрілік препараттарға көрсететін әсері.

CYP1A2 метаболизденетін дәрілік препараттар. Дюзеланы (60 мг күніне 2 рет) бір мезгілде қолдану CYP1A2 метаболизденетін теофиллиннің фармакокинетикасына елеулі әсер етпеді. Дюзеланың CYP1A2 субстратының метаболизміне клиникалық елеулі әсер ету ықтималдығы аз.

CYP2D6 метаболизденетін дәрілік препараттар. Дюзела CYP2D6 орташа тежегіші болып табылады. Дюзеланы 60 мг дозада күніне 2 рет қабылдап жүріп, CYP2D6 субстраты дезипраминмен бірге бір рет қабылдағанда дезипраминнің AUC 3 есе жоғарылайды. Дюзеланы (40 мг күніне 2 рет) бір мезгілде қабылдау толтеродиннің (2 мг күніне 2 рет) AUC тұрақты бөлігін 71%-ға арттырды, бірақ оның белсенді 5-гидроксил метаболитінің фармакокинетикасына әсер етпеді және доза түзету жүргізуді талап етпейді. Дюзеланы, негізінен CYP2D6 жүйесімен метаболизденетін (рисперидон, нортриптилин, амитриптилин және имипрамин сияқты үшциклды антидепрессанттар) препараттармен бір мезгілге тағайындағанда, ішінара егер олардың емдік индексінің аясы тар болса (флекаинид, пропафенон және метапролол сияқты) сақтық жасау керек.

Антикоагулянттар және антиагреганттық дәрілер. Дулоксетинді пероральді қабылданатын антикоагулянттармен немесе антиагрегантты дәрілермен бір мезгілге тағайындағанда қан кету туындау қаупі ұлғаюы мүмкіндігінен сақтық жасау керек. Дулоксетин және варфаринді бір мезгілге тағайындағанда халықаралық қалыптасқан қатынастың (ХҚҚ) жоғарылауы мүмкін.

Пероральді контрацептивтер және басқа да стероидты дәрілер. Дәрілердің өзара әрекеттесуі бойынша спецификалық зерттеулері in vivo жүргізілмеген. Зерттеулер нәтижесі in vitro дулоксетиннің CYP3A катализдік белсенділігіне стимуляциялаушы әсер етпейтінін көрсетті.

Басқа дәрілік препараттармен өзара әрекеттесуі.

Антацидтер және Н2-антагонистер. Дулоксетинді құрамында алюминий- және магний бар антацидтермен немесе фамотидинмен бір мезгілге тағайындау дулоксетинді 40 мг дозада пероральді қабылдауға тағайындағаннан кейін дулоксетиннің сіңу деңгейіне немесе дәрежесіне елеулі әсер етпеді.

CYP1A2 тежегіштері. CYP1A2 дулоксетин метаболизміне қатысатындығына байланысты Дюзеланы CYP1A2 потенциалды тежегіштерімен бір мезгілде қабылдау дулоксетин концентрациясының жоғарылауына алып келу ықтималдығы бар. CYP1A2 тежегіші флувоксамин (күніне 1 рет 100 мг) дулоксетиннің орташа плазмалық клиренсін шамамен 77% төмендетті және AUC0-t 6 есеге арттырды. Дюзеланың CYP1A2 тежегіштерімен (флувоксамин, кейбір хинолонды антибиотиктер-ципрофлоксацин, энксацин) біріктірілімін пайдалану ұсынылмайды.

CYP1A2 индукторлары. Популяциядағы фармакокинетика талдауы шылым шегушілердің қан плазмасындағы дулоксетин концентрациясы шылым шекпейтіндердегімен салыстырғанда 50%-ға дерлік төмен екенін көрсетті.

Қан ақуыздарымен жоғары дәрежеде байланысатын препараттар. Дулоксетин қан ақуыздарымен елеулі дәрежеде байланысады (>90%). Сондықтан Дюзеланы қан палазмасы ақуыздарымен жоғары дәрежеде байланысатын басқа препарат қабылдайтын емделушіге тағайындау екі препараттың да бос фракциялары концентрациясының жоғарылауына алып келуі мүмкін.

Айрықша нұсқаулар

Моноаминоксидаза тежегіштері. Серотонинді кері қармау тежегіштерінің МАОТ біріктірілімін қабылдаушы емделушілерде кейде өліммен аяқталған, арасында гипертермия, сіресулер, миоклонус, өмірлік маңызы бар қызмет көрсеткіштерінің болуы мүмкін күрт ауытқулары бар шеткергі бұзылулар және делирий және комаға өтпелі айқын қозуды қоса психикалық статус өзгерулері сияқты күрделі реакциялар жағдайы анықталған. Бұл реакциялар МАОТ тағайындардан сәл бұрын серотонинді кері қармау тежегіштері тоқтатылған емделушілерде де бақыланған. Кейбір жағдайларда емделушілерде қатерлі нейролептикалық синдромға тән симптомдар бақыланған. Дюзела мен МАОТ біріктіріп қолданудың әсері адамдарда да, жануарларда да бағаланбаған. Сондықтан Дюзела серотониннің де, норэпинефриннің де тежегіші болып табылатындығы фактісін ескере отырып, Дюзеланы МАОТ біріктірілімінде немесе ең кемі МАОТ емін тоқтатқан соң 14 күн бойына қолдану ұсынылмайды. Дулоксетиннің жартылай шығарылу кезеңі ұзақтығына негізделіп, МАОТ қабылдар алдында Дюзела қабылдауды аяқтаған соң, ең кемі 5 күн үзіліс жасау керек.

Мания және эпилепсиялық ұстамалар. Дюзеланы сыртартқысында маниакалдық эпизодтар, биполярлық бұзылыстар және/немесе эпилепсиялық ұстамалары бар емделушілерге сақтықпен қолдану керек.

Мидриаз. Дюзела қабылдағанда мидриаз туындау мүмкіндігіне байланысты , Дюзеланы көзішілік қысымы жоғары емделушілерге немесе жабық бұрышты глаукома даму қаупі тобындағы адамдарға тағайындауда сақтық шараларын қолдану керек.

Артериялық қысым (АҚ) және жүрек жиырылуының жиілігі (ЖЖЖ). Кейбір емделушілерде дулоксетин қабылдау артериялық қысым артуымен және клиникалық елеулі гипертензия туындауымен байланысты. Бұл дулоксетиннің норадренергиялық әсеріне байланысты болуы мүмкін. Көбіне сыртартқысында гипертензия белгіленген емделушілерде дулоксетин қабылдауда гипертониялық криз жағдайы анықталған. Гипертензиясы және/немесе жүрек ауруы бар емделушілерде әсіресе емдеудің бірінші айында АҚ мониторинг жүргізу ұсынылады. Дулоксетинді жүрек жиырылу жиілігі ұлғаюынан немесе артериялық қысымы көтерілуі салдарынан жай-күйі нашарлайтын емделушілерде сақтықпен қолдану керек. Дулоксетинді оның метаболизденуін қиындататын дәрілік препараттармен тағайындағанда сақтық шараларын орындау керек. Дулоксетин қабылдағанда үнемі артериялық қысымы жоғарылауын сезінетін емделушілер үшін дозаны төмендетуді, болмаса біртіндеп препаратты тоқтату мәселесін қарастыру керек.

Бақыланбайтын гипертензиясы бар емделушілерде дулоксетин қабылдауды бастамау керек.

Бүйрек қызметі бұзылуы. Гемодиализде жүрген ауыр бүйрек жеткіліксіздігі (креатинин клиренсі 30 мл/мин аз) бар емделушілерде қан плазмасында дулоксетин концентрациясы артуы бақыланды. Дюзеланы ауыр бүйрек жеткіліксіздігі (креатинин клиренсі 30 мл/мин аз) бар емделушілерде қолдану ұсынылмайды.

Бауыр қызметі бұзылуы. Дулоксетинді емнің бірінші айларында тағайындағанда бауыр ферменттері белсенділігінің айқын жоғарылауын (қалып шегінен 10 есе жоғары), гепатит және сарғаю дамуын қоса бауыр зақымдануы мүмкін (негізінен гепатоцеллюлярлық).

Дулоксетинді бауыр зақымдануына байланысты дәрілік препараттармен ем қабылдаған емделушілерде сақтықпен қолдану керек.

Антидепрессанттармен біріктірілімі. Дюзеланы антидепрессанттармен біріктірілімде қолдану сақтықпен жүргізілуі тиіс. Дюзеланы селективті қайтымды МАОТ бірге қолдану ұсынылмайды.

Шайқурай. Дюзеланы және құрамында шайқурай (Hypericum perforatum) бар өсімдік препараттарын бір мезгілде қолданғанда қолайсыз әсерлер туындауы мүмкін.

Суицидалдық әрекеттер

Негізгі депрессиялық эпизодтар және жайылған үрейлену бұзылыстары. Психиатриялық жай-күйлер, оның ішінде депрессия, емделушіде суицидалдық ойлар туындау қаупі жоғарылауымен, өзіне зиян келтірумен, және өзіне қол жұмсаумен астасуы мүмкін. Бұл қауіп ремиссия тұрақты түрде басталғанға дейін сақталады. Емнің бастапқы бірнеше апталары бойына жай-күй жақсаруы бола қоймайтынына байланысты емделушіні жақсаруы басталғанға дейін мұқият бақылау керек. Сыртартқысында суицидалдық білінулер бар немесе ем басталғанға дейін суицидалдық ойлар болуы елеулі дәрежедегі емделушілер суицидалдық ойлар немесе мінез-құлық туындау қаупі бар үлкен топта болады және ем уақытында мұқият бақылауда болуы тиіс.

Плацебо-бақыланатын клиникалық зерттеулер мета-талдауы антидепрессанттарды қолданумен 25 жастан кіші жастағы емделушілерді емдегенде суицидалдық мінез-құлық туындау қаупі жоғары болатынын көрсеткен. Дулоксетинді тағайындағанда немесе емдеуді тоқтатқаннан кейін бірден суицидалдық ойлар немесе суицидалдық мінез-құлық туындағаны туралы хабарланған.

Емделушілерді дәрімен емдеу, оның ішінде жоғары қауіп тобындағылары бар, мұқият бақылаумен жүргізілуі тиіс, әсіресе емнің бастапқы сатыларында немесе дозалауды өзгерткенде. Емделушілер және оларды күтуші адамдар бақылау қажеттігі және клиникалық нашарлау симптомдары, суицидалдық ойлар немесе мінез-құлық, мінез –құлықта әдеттен тыс өзгерістер туындағанда дереу дәрігерге қаралу туралы ескертілуі тиіс.

Диабеттік нейропатиядағы ауыру синдромы. Фармакологиялық әсері ұқсас басқа да дәрілік препараттардағы (антидепрессанттар) сияқты, дулоксетинмен емдеу кезінде немесе емдеуді тоқтатқаннан кейін бірден суицидалдық ойлар немесе суицидалдық мінез-құлық қалыптасуына және қабылдауына ықпалы білінгені туралы бірен-саран жағдайлар хабарланған.

Қан кету. Серотонинді кері қармаудың іріктеп тежегіштерін және серотонинді кері қармаудың тежегіштерін және норадреналинді тағайындауда экхимозалар, пурпура және асқазан-ішек қан кетулері анықталған. Антикоагулянттар және/немесе тромбоциттер қызметіне әсер ететін дәрілік препараттарды қабылдайтын, сондай-ақ қан кетулер туындауына бейімділігі бар емделушілерді емдегенде сақ болу керек.

Гипонатриемия. Дюзеланы гипонатриемия даму қаупі жоғары емделушілерде, ішінара егде адамдарға, бауыр циррозы бар немесе дегидратациясы бар немесе диуретиктермен ем қабылдаушы науқастарға тағайындағанда сақтық жасау керек. Гипонатриемия антидиуретикалық гормонның талапқа сай емес секрециясы синдромынан (АДГТСС) туындауы мүмкін.

Егде жастағы адамдар. Егде емделушілерде ауыр депрессиялық эпизодтарды емдеуде берілген дозаны қолдану бойынша жеткілікті ақпарат болмауына байланысты Дюзеланы 120 мг дозада тағайындауда сақ болу керек. Жайылған үрейлену бұзылыстары бар егде емделушілерде Дюзеланы қолдану бойынша жеткілікті ақпарат жоқ.

Акатазия/психомоторлық қозу. Дулоксетинмен емнің бірінші апталарында көбіне тыныш тұру немесе отыру мүмкін болмауымен қатарлас жүретін субъективті жағымсыз немесе жанды жеген мазасыздықпен және қозғалыс қажеттігімен сипатталатын акатазия дамуы мүмкін. Аталған симптомдар дамыған емделушілерде дозаны ұлғайту зиян тигізуі мүмкін.

Құрамында дулоксетин бар дәрілік препараттар. Дулоксетин мына бірқатар көрсетілімдерде әртүрлі сауда маркаларымен қолданылады: диабеттік нейропатиядағы ауыру синдромын емдеуде, негізгі депрессиялық эпизодтарда, жайылған үрейлену бұзылыстарын, ширыққанда несепті ұстай алмауды емдеуде. Осы препараттардың бір мезгілге біреуінен артығын тағайындаудан аулақ болу керек.

Гепатиттер/ бауыр ферменттері деңгейінің жоғарылауы. Дулоксетинді емнің бірінші айларында тағайындағанда бауыр ферменттерінің қатты көтерілуін (қалып шегінен 10 есе жоғары), гепатит және сарғаю дамуын қоса бауыр зақымдануы мүмкін (негізінен гепатоцеллюлярлық). Дулоксетинді бауыр зақымдануына байланысты дәрілік препараттармен ем қабылдаған емделушілерде сақтықпен қолдану керек.

Сахароза. Дюзеланың ішекте еритін қатты капсулалары құрамында сахароза бар. Препаратты фруктоза жақпаушылығы, глюкоза-галактоза мальабсорбциясы немесе сахараза-изомальтозды жеткіліксіздігі сияқты сирек кездесетін тұқым қуалайтын мәселелері бар емделушілерге қабылдау ұсынылмайды.

Емдеуді күрт тоқтатудан абай болу керек. Емдеуді тоқтату ең кемінде бір-екі аптаның ішінде дозаны біртіндеп төмендетуден басталуы тиіс.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері.

Дулоксетиннің автокөлік жүргізу және механизмдерді басқару қабілетіне әсерін бағалау жүргізілмеген. Дюзеланы қабылдау тыныштандыратын әсер мен бас айналуымен қатарлас жүруі мүмкін. Осыған байланысты емделушілер тыныштандыратын әсер мен бас айналуы туындаған жағдайда көлік жүргізуд және механизмдерді басқару сияқты қауіптілігі зор қызметтерді орындаудан аулақ болуы тиіс.

Артық дозалануы

Бір препаратпен немесе басқа дәрілік заттармен біріктіріліп бір мезетте ішке дулоксетинді 5400 мг дозада қабылдауда артық дозалануының бірнеше жағдайлары хабарланған. Негізінен аралас артық дозаланудан, бірақ сондай-ақ тек дулоксетиннің өзін ғана шамамен 1000 мг дозада тағайындағанда бірнеше өлім жағдайлары тіркелген.

Артық дозалануы мынадай белгілермен және симптомдармен қатар жүруі мүмкін (дулоксетиннің өзін ғана немесе басқа дәрілік препараттармен біріктірілімде қолданғанда): ұйқышылдық, кома, серотониндік синдром, құрысулар, құсу және тахикардия.

Емі: спецификалық у қайтарғысы белгісіз. Серотониндік синдром туындаған жағдайда спецификалық ем жүргізілуі мүмкін (мысалы, ципрогептадинмен және/немесе температура бақылау). Тыныс жолдарының өткізгіштігін қалпына келтіру керек. Симптоматикалық және демеуші ем жүргізумен қатар жүрек қызметіне мониторинг жүргізу және негізгі өмірлік қызмет көрсеткіштеріне бақылау жүргізу ұсынылады. Асқазан лаважын жүргізу - егер ол препарат қабылдаудан кейін дереу орындалатын жағдайда болса немесе симптоматикалық емделушілерде қолданылуы мүмкін. Сіңуін шектеу үшін белсенділендірілген көмір пайдалы болуы мүмкін. Дулоксетиннің таралу көлемі үлкен болуына байланысты, қарқынды диурез, гемоперфузия және алмасу перфузиясын қолданудың пайдалы болу ықтималдығы аз.

Шығарылу түрі және қаптамасы

Алюминий фольгадан және поливинилхлоридті үлбірден жасалған пішінді ұяшықты қаптамада 10 капсуладан.

3 пішінді ұяшықты қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

Құрғақ жерде, 300С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Sun Pharmaceutical Industries Ltd, Үндістан

Заңды мекенжайы:

Acme Plaza, Andheri - Kurla Road,

Andheri (E), Mumbai 400 059, Үндістан

Өндірістің орналасқан мекенжайы:

Survey №214, Plot №20, Government Industrial Area, Phase II,

Silvassa – 396 230, U.T of D & NH, Үндістан

Тіркеу куәлігінің иесі

Sun Pharmaceutical Industries Ltd, Үндістан

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

050004, Алматы қ., Төлебаев к-сі, 38, 5 қабат

Тел. (727) 250-92-35, факс (727) 250-33-64

sunreports@intelsoft.kz, sunalmaty@intelsoft.kz