Дикломек® (75 мг/3 мл)

• русский
• қазақша

• Скачать инструкцию медикамента

Саудалық атауы

Дикломек®

Халықаралық патенттелмеген атауы

Диклофенак

Дәрілік түрі

Инъекцияға арналған ерітінді, 75 мг / 3 мл

Құрамы

3 мл ерітіндінің құрамында

белсенді зат – 75 мг натрий диклофенагы,

қосымша заттар: маннитол, натрий метабисульфиті, бензил спирті, пропиленгликоль, натрий гидроксиді, инъекцияға арналған су.

Сипаттамасы

Түссіз немесе сәл сарғыштау мөлдір ерітінді

Фармакотерапиялық тобы

Қабынуға қарсы стероидты емес препараттар (ҚҚСП).

Сірке қышқылының туындылары. Диклофенак

АТХ коды М01АВ05

Фармакологиялық қасиеттері

Фармакокинетикасы

Б/і енгізгенде ең жоғары концентрациясына жету уақыты 20 минут. Плазмадағы белсенді заттың концентрациясы қолданылатын дозаның шамасына дозаға байланысты тәуелді болады. Жинақталмайды. Плазма ақуыздарымен байланысуы (негізінен альбуминмен) 99,7% құрайды. Плазмадан жартылай шығарылу кезеңі 1-2 сағат, синовиальді сұйықтықтан – 3-6 сағатты құрайды. Шамамен 60%-ы метаболиттер түрінде бүйрек арқылы шығарылады, 1%-дан азы өзгермеген күйде несеппен, қалған бөлігі метаболиттер түрінде өтпен шығарылады.

Фармакодинамикасы

Стероидты емес қабынуға қарсы препарат, фенилсірке қышқылының туындысы. Айқын қабынуға қарсы, ауыруды басатын және орташа қызу түсіретін әсер етеді. Әсер ету механизмі қабыну, ауыру және қызба патогенезінде басты рөл атқаратын простагландиндердің ізашары болып табылатын арахидон қышқылы метаболизмінің негізгі ферменті – ЦОГ белсенділігін бәсеңдетумен байланысты. Ауыруды басатын әсер екі механизмге негізделген: шеткергі (жанама түрде, простагландиндер синтезін бәсеңдету арқылы) және орталық (орталық және шеткергі жүйке жүйесінде простагландиндер синтезін тежеу есебінен).

Шеміршектердегі протеогликан синтезін тежейді. Ревматизм ауруларында тыныштықтағы және қозғалыстағы буындардың ауыруын, сондай-ақ буындардың таңертеңгі сіресуі мен ісінуін азайтады, қозғалыс көлемін ұлғайтуға ықпал етеді. Жарақаттан және операциядан кейінгі ауыруларды, сондай-ақ қабынбалы ісінуді азайтады. Тромбоциттер агрегациясын бәсеңдетеді. Ұзақ қолданғанда десенсибилизациялаушы әсер етеді.

Қолданылуы

- буын синдромында (ревмато­идтық артрит, подагра, остеоартроз)

- тірек-қимыл аппаратының дегенеративтік ауруларында (остеохондроз, шорбуынданатын спондилит)

- жұмсақ тіндер және тірек-қимыл аппаратының жарақаттан кейінгі қабынуында (байламдар, бұлшықеттер мен сіңірлердің созылуы, соғылулар)

- омыртқа жағынан ауыру синдромдарында

- невралгияда

- миалгияда

Қолдану тәсілі және дозалары

Препаратты тәулігіне 1 рет 75 мг дозада (3 мл) б/і (бөксе бұлшықетіне терең) тағайындайды. Қажет болғанда қайталап енгізуге болады, бірақ кемінде 12 сағат өткеннен кейін.

Дикломек инъекциясын 2 күннен артық қолданбау керек.

Ең жоғары бір реттік доза - 75 мг (3 мл).

Ең жоғарғы тәуліктік доза - 150 мг (6 мл).

Жағымсыз әсерлер

• гастралгия және эпигастрий аумағының ауыруы, жүрек айну, ауыздың құрғауы, тәбеттің төмендеуі немесе анорексия, кекіру, құсу, қыжыл, диарея, абдоминальді ауыру, метеоризм, асқазан-ішек жолының эрозиялы-ойық жаралы зақымдануы, ішек қабырғаларының тесілуі, асқазан-ішектен қан кету, қан кетумен жүретін спецификалық емес колит, іш қатулар, панкреатит, уытты гепатит, колит, стоматит, глоссит

• бас ауыру, бас айналу, құрысулар, асептикалық менингит, есте сақтаудың төмендеуі, депрессия, психотикалық реакциялар, шеткергі полинейропатия (гипостезия, діріл, қол мен аяқ бұлшықеттерінің ауыруы және әлсіздігі), ұйқышылдық, ашушаңдық, күйгелектік, қорқу сезімі, ұйқысыздық, әлсіздік және қажу сезімі

• уытты амблиопия, көру өткірлігінің төмендеуі, диплопия, скотома,

естудің төмендеуі және естудің басқа бұзылулары, құлақтың шыңылдауы және шуылдауы

• терінің қышынуы, тері бөртпесі (көбіне эритематозды және уртикарлы), анафилаксия және анафилактоидты реакциялар, анафилактикалық шок (әдетте қарқынды дамиды), бронхоспастикалық аллергиялық реакциялар

• сұйықтықтың іркілуі, гематурия, цистит, поллакиурия, протеинурия, интерстициальді нефрит, нефротикалық синдром, олигурия, анурия, жедел бүйрек жеткіліксіздігі, шеткергі ісінулер

• агранулоцитоз, гемолитикалық анемия, апластикалық анемия, іштегі қан кетумен байланысты постгеморрагиялық анемия, лейкопения, нейтропения, тромбоцитопения

• ентігу, артериялық гипертензия немесе гипотензия, аритмиялар, кардиалгиялар, төс артының ауыруы, мұрыннан қан кету

• бұлшықет ішіне енгізген орындағы ашыту, инфильтрат, асептикалық некроз, майлы тін некрозы

• тері гиперемиясы, көп формалы экссудативтік эритема, оның ішінде Стивен-Джонсон синдромы, уытты эпидермальді некролиз (Лайелл синдромы), фотодерматит, экхимоздар

• дисменорея

Қолдануға болмайтын жағдайлар

• диклофенак және препарат компоненттеріне жоғары сезімталдық

• бұрын аспиринге, аллергиялық реакциялардың демікпелік, уртикарлық және басқа типтерінің себебі болған өзге ҚҚСД-ға жоғары сезімталдығы байқалса, қолдануға болмайды

• пептикалық ойық жарасы бар емделушілерге және пептикалық ойық жара болуы немесе асқазан-ішек жолында қан кетуі мүмкін емделушілерге қолданбаған жөн.

• этиологиясы айқын емес қан түзілуі бұзылыстары

• жүктілік және лактация кезеңі

• 18 жасқа дейінгі балалар

• бауырдың, бүйректің, жүректің ауыр жеткіліксіздігі.

Дәрілермен өзара әрекеттесуі

ҚҚСП-ды бір мезгілде жүйелі қолдану жағымсыз құбылыстардың пайда болу жиілігін ұлғайтады. Препарат пен диабетке қарсы дәрілерді қолданғанда, соңғыларының тиімділігі өзгермейді. Алайда гипогликемия сияқты, гипергликемия жағдайларының да өршуі туралы жекелеген хабарламалар белгілі, онда Дикломекті қолданған кезде құрамында қант бар препараттардың дозасын өзгерту қажеттілігіне негізделген.

ҚҚСП бүйректегі простагландиндер синтезіне әсері циклоспориннің нефроуыттылығын күшейтуі мүмкін. ҚҚСП мен хинолон туындыларын бір мезгілде алған науқастарда құрысулардың өршуі туралы жекелеген хабарламалар бар.

Бірге қолданғанда сарысуда дигоксин мен метотрексат деңгейінің көтерілуі мүмкін, циклоспориннің нефроуыттылығы жоғарылауы ықтимал. Дикломек қан плазмасында литий немесе дигоксин деңгейін литийдің бүйректік клиренсін кеміту арқылы арттыра алады.

Препарат инсулинді немесе гипогликемиялық дәрілерді қолданатын емделушілер үшін, тіпті мұндай реттеуге ерекше себептер жоқ болса да, іріктеп дозалану керек.

Дикломек диуретиктердің белсенділігін бәсеңдете алады. Калий жинақтаушы диуретиктермен емдегенде диклофенак қан сарысуындағы калий деңгейін арттыруы мүмкін (калийдің деңгейін қадағалау керек). Жалпы концепцияға сай ампуладағы Дикломекті басқа инъекциялық препараттармен араластырмаған дұрыс.

Диклофенакты кортикоидтық препараттармен немесе басқа ҚҚСП-мен қосқанда жағымсыз әсерлер күшеюі мүмкін. Диклофенактың үлкен дозасын (200 мг және жоғары) қолданғанда уақытша тромбоциттер агрегациясы болуы ықтимал.

Басқа ҚҚСП сияқты, метотрексатпен бірге қолданғанда, дикломекті метотрексаттың қабылдануына дейін және одан кейін 24 сағат ішінде абайлап қабылдау керек.

Айрықша нұсқаулар

Дикломекпен емделген кезеңде асқазан-ішек аурулары бар емделушілерде асқазан-ішектік қан кетулердің пайда болуы немесе асқазан-ішек жолы ойық жарасының өршуі мүмкін.

Инъекциялық ерітіндінің құрамына кіретін натрий метабисульфитіне асқын сезімталдық реакцияларының дамуы ықтимал.

Препаратты қолданған кезде асқазан-ішек жолының ауруларына шағымданатын немесе асқазанның немесе ішектің ойық жаралы зақымдары жөнінде сыртартқылық мәліметтері бар науқастарға тиянақты медициналық қадағалау қажет.

Препаратты бауыр порфириясы бар науқастарға тағайындағанда сақ болу қажет, өйткені препарат порфирия ұстамаларына түрткі болуы мүмкін.

Дикломек, басқа да ҚҚСП сияқты, тромбоциттер агрегациясын уақытша тежеуі ықтимал. Сондықтан гемостаз бұзылулары бар емделушілерде сәйкес зертханалық көрсеткіштерді мұқият бақылау қажет.

Дикломекті бронх демікпесі бар науқастарға (ауру белгілерінің күшею қаупі бар болғандықтан), сондай-ақ аллергиялық риниті (соның ішінде маусымдық) және мұрын шырышының полипі бар емделушілерге бұлшықетішілік енгізгенде сақтық шараларын қадағалау қажет.

Дикломекті бұрын алған емделушілерде сирек жағдайларда, анафилактикалық және анафилактоидтық реакцияларды қоса, аллергиялық реакциялар дамуы ықтимал.

Препаратты қабылдаған емделушілер алкогольді тұтынуды қоя тұруы қажет.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Емдеу кезеңінде психомоторлық реакциялар жылдамдығы кемуі мүмкін.

Мұндай жағдайларда автомобильді басқаруға және басқа қауіптілігі зор қызмет түрлерімен айналысуға болмайды.

Артық дозалануы

Симптомдары: бас ауруы, қимыл-әрекеттік қозу, ашушаңдық, бас айналуы, құрысулар.

Емі: симптоматикалық ем.

Шығарылу түрі және қаптамасы

3 мл препараттан түссіз шыны ампулада.

4 немесе 5 ампуладан ұяшықты пластик қаптамада.

1 (4 ампула үшін) немесе 2 (5 ампула үшін) ұяшықты пластик қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеде.

Сақтау шарттары

Құрғақ, жарықтан қорғалған жерде, 25˚С-ден аспайтын температурада сақтау керек.

Мұздатып қатыруға болмайды!

Балалардың қолы жетпейтін жерде сақтау керек!

Сақтау мерзімі

3 жыл

Қаптамада көрсетілген жарамдылық мерзімі өткеннен кейін қолдануға болмайды.

Босатылу шарттары

Рецепт арқылы

Өндіруші

"ABDI IBRAHIM"

Хадымкой-Стамбул

Түркия

Тіркеу куәлігінің иесі

"ABDI IBRAHIM", Түркия

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

"Абди Ибрахим Глобал Фарм" ЖШС

Қазақстан Республикасы, Алматы қ., Жандосов к-сі 184 «г»,

тел: +7 (727) 309 74 07, 232 44 80

факс: +7 (727) 309 74 14, e-mail:Globalzavod@mail.ru

6