Бонефос® (800 мг)

• русский
• қазақша

• Скачать инструкцию медикамента

Саудалық атауы

Бонефос®

Халықаралық патенттелмеген атауы

Клодрон қышқылы

Дәрілік түрі

Үлбірлі қабықпен қапталған 800 мг таблеткалар

Құрамы

Бір таблетканың құрамында

белсенді зат - 1000,0 мг динатрий клодронатының тетрагидраты (800,0 мг сусыз динатрий клодронатына баламалы),

қосымша заттар: кремнефикацияланған микрокристалды целлюлоза, натрий кроскармеллозасы, стеарин қышқылы, магний стеараты,

Опадрай II ақ қабықтың құрамы:

Ішінара гидролизденген поливинилалкоголь, макрогол 3350, титанның қостотығы (Е171), тальк

Сипаттамасы

Сопақша пішінді, ақ түсті үлбірлі қабықпен қапталған, бір жағында сызық пен L/134 коды салынған таблеткалар.

Фармакотерапиялық тобы

Сүйек ауруларын емдеуге арналған перпараттар. Сүйектердің минералдануына және құрылымына әсер ететін препараттар. Бисфосфонаттар. Клодрон қышқылы.

АТХ коды  М05ВА02

Фармакологиялық қасиеттері

Фармакокинетикасы

Сіңуі

Клодрон қышқылының асқазан-ішек жолында сіңуі тез жүреді және шамамен 2 %-ды құрайды. Препараттың бір дозасын ішке қабылдағаннан кейінгі қан сарысуындағы ең жоғарғы концентрациясына 30 минуттан кейін жетеді. Клодрон қышқылының кальций мен басқа екі валентті катиондарға айқын туыстығының арқасында, клодрон қышқылының сіңуі препаратты тамақпен немесе құрамында екі валентті катиондар бар дәрілік заттармен қабылдағанда едәуір төмендейді. Клодрон қышқылын ішке ас ішкенге дейін 1 сағат бұрын қабылдағанда, салыстырмалы биожетімділігі 91 %-ды, 30 минут бұрын қабылдағанда – сәйкесінше 69 % құрайды (бұл кезде биожетімділігінің төмендеуінің статистикалық маңызы жоқ). Клодрон қышқылының асқазан-ішек жолындағы сіңу көрсеткіштеріндегі едәуір ауытқулар түрлі емделушілер арасында да, бір ғана емделушіде де байқалады. Бір ғана емделушідегі сіңу көрсеткіштеріндегі едәуір ауытқуларға қарамастан, клодрон қышқылының ұзақ емдеу барысында алынатын мөлшері тұрақты болып қалады.

Таралуы және шығарылуы

Клодрон қышқылының қан плазмасы ақуыздарымен байланысуы төмен. Таралу көлемі 20 - 50 л құрайды.

Клодрон қышқылының қан сарысуынан шығарылуы екі фазамен сипатталады: 2 сағатқа жуық жартылай шығарылу кезеңімен таралу фазасымен және өте баяу өтетін шығарылу фазасымен, өйткені клодрон қышқылы сүйек тінімен берік байланысады. Клодрон қышқылы ағзадан негізінен бүйрекпен шығарылады. Препаратты қабылдағаннан кейін бірнеше күн бойы 80 %-ға жуығы несепте анықталады. Сүйек тінімен байланысқан клодрон қышқылы (сіңген дозасының 20 %-ға жуығы), организмнен баяуырақ шығарылады. Бүйрек клиренсі плазмалық клиренсінің шамамен 75 %-ын құрайды.

Емделушілердегі сипаттамалар

Қан плазмасындағы клодрон қышқылының концентрациясы мен емдік әсерінің немесе жағымсыз реакцияларының арасында байланыс жоқ. Препараттың фармакотерапиялық профилі клодрон қышқылының бүйрек клиренсінің төмендеуін туғызатын бүйрек жеткіліксіздігін қоспағанда, жас шамасына, препараттың метаболизміне немесе функционалдық бұзылуларға байланысты емес.

Фармакодинамикасы

Клодрон қышқылы бисфосфонаттар тобына жатады және табиғи пирофосфаттың аналогы болып табылады. Бисфосфонаттардың сүйек тінінің минералды компоненттеріне туыстығы жоғары. In vitro бисфосфонаттар кальций фосфатының преципитациясын бәсеңдетеді, оның гидроксиапатитке өзгеруін бөгейді, апатиттер кристалдарының ірірек кристалдарға агрегациялануын кідіртеді және бұл кристалдардың еруін баяулатады.

Клодрон қышқылының негізгі әсер ету механизмі остеокласттар белсенділігін төмендету және олар негіз болған сүйек тіні резорбциясын азайту болып табылады.

Клодрон қышқылының адамдардағы сүйек тіні резорбциясын тежеу қабілеті гистологиялық, кинетикалық және биохимиялық зерттеулер үдерістерінде дәлелденген. Дегенмен, бұл үдерістің нақты механизмдері аяғына дейін зерттелмеген.

Клодрон қышқылы қан сарысуындағы кальцийдің концентрациясын, сондай-ақ кальций мен гидроксипролиннің несеппен шығарылуын азайта отырып, остеокласттардың белсенділігін бәсеңдетеді.

Клодрон қышқылын монотерапияда сүйек тіні резорбциясын тежеуге жеткілікті дозаларда қолданғанда, адамда сүйектің қалыпты минералдануы байқалған жоқ. Сүт безінің обырымен және көптеген миеломамен науқастарда сүйектердің сыну ықтималдығы төмендегені білінді.

Клодрон қышқылы біріншілік сүт безі обырында сүйектегі метастаздар дамуының жиілігін төмендетеді. Сүт безінің операбельді обырымен науқастарда сүйектегі метастаздардың алдын алу үшін қолданылғанда да, өлімнің төмендегені байқалды.

Қолданылуы

- қатерлі ісіктерден туындаған остеолизисте

- қатерлі ісіктерден туындаған гиперкальциемияда

- біріншілік сүт безі обырының сүйек метастаздары дамуының алдын алуда

Қолдану тәсілі мен дозалары

Клодрон қышқылы негізінен бүйрек арқылы шағарылады, Бонефоспен® ем жүргізу кезінде науқасқа сұйықтықтың жеткілікті мөлшерде баруын қамтамасыз ету қажет.

Ішке

800 мг-лік таблеткаларды екі бөлікке бөлуге болады, алайда екі бөлігін бір мезгілде қабылдау керек. Қабылдар алдында таблеткаларды үгітуге немесе ерітуге болмайды.

1600 мг тәуліктік дозасын таңертең бір рет ашқарынға, стақан сумен ішіп қабылдау ұсынылады. Препаратты қабылдағаннан кейін науқас бір сағат бойы тамақтанудан, сұйық ішуден (жай суды қоспағанда) және басқа дәрілік заттарды қабылдаудан бас тарта тұруы тиіс.

Тәуліктік дозасы1600 мг-ден асатын жағдайда оны екі бөліп қабылдайды. Бірінші дозасын жоғарыда ұсынылғандай қабылдау керек. Екінші дозасын ас ішу арасындағы аралықта, екі сағаттан кейін немесе тамаққа, сусын ішкенге (жай судан басқа) немесе қандай-да бір дәрілік затты ішке қабылдағанға дейін бір сағат бұрын қабылдау керек.

Бонефосты® сүтпен, тамақпен, сондай-ақ құрамында кальций мен басқа екі валентті катиондары бар препараттармен қабылдауға болмайды, өйткені олардың барлығы клодрон қышқылының сіңуін бұзады.

Бүйрек қызметі қалыпты ересек емделушілер

- Қатерлі ісіктерден туындаған остеолизис

Әр жағдайда дозалануы жекелей анықталады. Ұсынылатын бастапқы дозасы тәулігіне 1600 мг құрайды. Клиникалық көрсеткіштер бойынша ұлғаюы мүмкін, бірақ ең жоғарысы тәулігіне 3200 мг-ге дейін.    Емдеу ұзақтығы науқастың жай-күйіне байланысты болады. Остеолизис үдеген, гиперкальциемия немесе препаратты ары қарай қабылдаумен үйлесімсіз жағымсыз әсерлері пайда болған жағдайда, емдеуді тоқтату керек.

- Қатерлі ісіктерге байланысты гиперкальциемия

Қатерлі ісіктерден болған гиперкальциемияда Бонефостың® көктамырішілік инфузиясы ұсынылады. Көктамыр ішіне енгізу мүмкін болмағанда, Бонефос® препараты ішке, бастапқы 2400-3200 мг дозасында күн сайын тағайындалады. Жеке жауап беруге байланысты, қандағы кальцийдің қалыпты деңгейін сақтау үшін, дозасы біртіндеп күніне 1600 мг-ге дейін төмендетілуі мүмкін.

- Біріншілік сүт безі обырының сүйек метастаздары дамуының алдын алу

1600 мг-ден күн сайын ішке.

Бүйрек жеткіліксіздігі бар науқастар

Клодрон қышқылы негізінен бүйрек арқылы шығарылады. Сәйкесінше Бонефос® препаратын бүйрек функциясы бұзылған науқастарда сақтықпен қолдану керек.

Препаратты ұзақ уақыт бойы ішке, тәулігіне 1600 мг-ден асатын дозаларда қабылдамаған жөн.

Пероральді қабылдауда дозалары мына ұсынымдарға сәйкес төмендетілуі тиіс:

Жағымсыз әсері

Препаратты ішке қабылдағанда жиірек кездесетін жағымсыз әсері диарея болып табылады; бұл реакция әдетте жеңіл формада білінеді және көбінесе препаратты жоғары дозаларда пайдаланғанда туындайды.

Төменде атап көрсетілген реакциялар препаратты ішке қабылдағанда да, көктамыр ішіне енгізгенде де байқалуы мүмкін, дегенмен бұл реакциялардың туындау жиіліктерінің арасында айырмашылық болуы мүмкін.

Жиі (≥1/100, <1/10)

- симптомсыз гипокальциемия

- жүрек айнуы, құсу және диарея (көбінесе препаратты жоғары дозаларда пайдаланғанда) әдетте жеңіл формада

- аминотрансферазалар деңгейінің жоғарылауы, әдетте, қалып көрсеткіштері шегінде

Сирек (≥1/10000, <1/1000)

- клиникалық көріністерімен қатар жүретін гипокальциемия, сарысудағы паратиреоидтық  гормон концентрациясының жоғарылауы (әдетте, кальций деңгейінің төмендеуімен бірге), сарысудағы сілтілік фосфатаза концентрациясының жоғарылауы (метастаздары бар емделушілерде бауыр мен сүйектерде метастаздардардың болуынан, сілтілік фосфатаза деңгейі де жоғарылауы мүмкін)

- аминотрансферазалар деңгейінің бауыр функциясы бұзылуымен қатар жүрмейтін қалыпты көрсеткішінен екі есе артық жоғарылауы

- тері реакциялары түріндегі асқын сезімталдық реакциялары

Постмаркетингтік тәжірибе мәліметтері

• Көру мүшесі тарапынан

Постмаркетингтік бақылау үдерісінде Бонефосты® қолданғанда увеит пайда болу жағдайы баяндалды.

Басқа биофосфонаттарды қолданған кезде келесі реакциялар байқалды:

конъюнктивит, эписклерит және склерит.

Бонефосты® басқа биофосфонаттармен бірге қабылдаған тек бір емделушіде конъюнктивит байқалды.

Осы уақытқа дейін Бонефосты® қолдану аясында эписклерит мен склерит пайда болу жағдайы байқалған жоқ (биофосфонаттардың жағымсыз әсерлері).

• Тыныс алу жүйесі тарапынан

• ацетилсалицил қышқылына жоғары сезімтал, бронх демікпесі бар науқастардағы тыныс алу функциясының бұзылуы

• респираторлық бұзылулармен білінетін асқын сезімталдық реакциялары.

• Несеп шығару жүйесі тарапынан

• бүйрек функциясының бұзылуы (сарысудағы креатинин құрамының жоғарылауы және протеинурия), бүйректің айқын зақымдануы, әсіресе, Бонефостың® жоғары дозаларын көктамыр ішіне тез құйғаннан кейін

• сирек, әсіресе стероидтық емес қабынуға қарсы препараттарды, көбінесе диклофенакты біріктіріп қолданғанда өліммен аяқталған бірлі-жарым бүйрек жеткіліксіздігі жағдайлары байқалған

• Қаңқа-бұлшықет жүйесі тарапынан

Айрықша нұсқаулар

Қолдануға болмайтын жағдайлар

- клодрон қышқылына немесе кез-келген қосымша компонентіне жоғары сезімталдық

- басқа бисфосфонаттармен қатарлас емдеу

Дәрілермен өзара әрекеттесуі

Стероидтық емес қабынуға қарсы дәрілерді, көбінесе диклофенакты бір мезгілде тағайындағанда, Бонефосты® қабылдау мен бүйрек қызметі бұзылуының арасында байланыс бар екендігі туралы мәліметтер бар. Гипокальциемияның даму мүмкіндігі зор болғандықтан, Бонефосты® аминогликозидтермен бірге тағайындағанда сақ болу керек.

Эстрамустин фосфатын Бонефоспен® бір мезгілде қабылдау эстрамустин фосфатының қан сарысуындағы концентрациясының 80 %-ға дейін ұлғаюына алып келгені туралы хабарланған.

Клодронат екі валентті катиондармен нашар еритін кешендер түзеді, сондықтан тағам өнімдері мен құрамында екі валентті катиондары бар дәрілерді, мысалы антацидтік препараттарды немесе темір препараттарын бір мезгілде қабылдау клодрон қышқылының биожетімділігінің едәуір төмендеуіне алып келеді.

Айрықша нұсқаулар

Клодрон қышқылы негізінен бүйрек арқылы шығарылатындықтан Бонефоспен® ем жүргізу кезінде науқасқа сұйықтықтың жеткілікті мөлшерде баруын қамтамасыз ету қажет.

Бұл әсіресе, Бонефосты® көктамырішілік инфузия түрінде тағайындағанда, сондай-ақ гиперкальциемиямен және бүйрек жеткіліксіздігімен науқастар үшін маңызды.

Бонефос® препаратын бүйрек функциясы бұзылған науқастарда қолданғанда сақ болу керек.

Тістер экстракциясынан және/немесе ауыз қуысының жергілікті жұқпаларынан кейін (остеомиелитті қоса) көктамырішілік немесе пероральді бисфосфонаттарды алып жүрген қатерлі аурулары бар емделушілерде жақсүйегінің остеонекрозы дамыған жағдайлар сирек сипатталған. Бұл емделушілердің көпшілігі химиялық ем мен кортикостероидтарды да қабылдаған.

Осыған байланысты кез-келген бисфосфонаттармен емдеу басталғанға дейін, әсіресе қауіп тобындағы науқастарды емдеуде (мысалы, қатерлі онкологиялық аурулары бар, химиялық ем, сәулелік ем, кортикостероидтарды алып жүрген емделушілерде, ауыз қуысының гигиенасы жеткіліксіз деңгейде болса) ауыз қуысының санациясына бағытталған превентивті стоматологиялық емшараларды жүргізу ұсынылады.

Бисфосфонаттармен ем алатын науқастарда инвазивті стоматологиялық емшаралар жүргізбеген жөн.

Бисфосфонаттарды қолдану аясында, негізінен, остеопорозға ұзақ уақыт ем қабылдап жүрген емделушілерде ортан жіліктерінің атипиялық ұршықасты және диафизарлы сынуларының даму жағдайлары жөнінде мәлімделген. Бонефоспен® емдегенде мұндай жағдайлар байқалған жоқ.

Көлденең және қиғаш көлденең сынықтар ортан жіліктің кішкентай ұршық деңгейінен айдаршықүсті аймағына дейінгі кез келген жерінде болуы мүмкін.

Мұндай сынулар аздаған жарақаттардан кейін немесе жарақат жоқ кезде болады. Мұндайда кейбір емделушілерде сан немесе шап аймақтарында ортан жіліктің стресс-сынығының (шаршаудан сынуы) рентгенологиялық белгілерімен бірігуі ортан жіліктің толық сынуы дамығанға дейінгі апталар немесе айлар ішінде байқалды.

Сынықтар жиі екі жақты болады, сондықтан бисфосфонаттармен ем қабылдап жүрген және ортан жілік денесінің сынуын бастан кешкен емделушілерде екінші аяқтың ортан жілігін де тексерген жөн.

Сондай-ақ мұндай сынықтардың бітуінің нашар болатындығы мәлімделген.

Санның атипиялық сынуына күдігі бар емделушілерде бисфосфонаттармен емдеуді тоқтатуды олардың пайда/қаупі арақатынасына баға берілгеннен кейін шешу қажет.

Бисфосфонаттармен емделу кезінде емделушілер сан аймағындағы, ұршық буындарындағы немесе шап аймағындағы кез келген ауыруға көңіл аударғаны және ол жөнінде дәрігерге айтқаны жөн. Мұндай емделушілерде ортан жіліктің толық сынған-сынбағандығын анықтау қажет.

Егде жастағы емделушілерде қолданылуы

Егде жастағы емделушілерде дозасын түзету жөнінде арнайы ұсынымдар жоқ. 65 жастан асқан емделушілерді қамтыған клиникалық зерттеулер жүргізгенде, аталған топта спецификалық жағымсыз әсерлер байқалмаған.

Педиатрияда қолданылуы

Бұл препараттың балалық жастағы емделушілердегі қолданылуының қауіпсіздігі мен тиімділігі анықталмаған.

Жүктілік және лактация кезеңі

Клодронаттың плацентарлық бөгет арқылы өту-өтпеуі белгісіз. Сондай-ақ клодронаттың ұрық тарапынан бұзылулар тудыру немесе адамдағы ұрпақ өрбітуге ықпал ету мүмкіндігі туралы да мәліметтер жоқ. Клодронаттың жүкті әйелдерде қолдану туралы мәліметтер шектеулі. Осыған орай Бонефос® жүктілік кезінде қолданылмауы тиіс.

Клодронаттың ана сүтіне өту-өтпеуі белгісіз. Препаратты қабылдау кезінде бала емізуді тоқтату керек.

Дәрілік заттың көлік құралдарын және қауіптілігі зор механизмдерді басқару қабілетіне әсер ету ерекшеліктері

Белгісіз

Артық дозалануы

Ішке қабылдағанда анықталмаған.

Шығарылу түрі мен қаптамасы

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салынады. 6 пішінді ұяшықты қаптамадан мемлекеттік және орыс тілдеріндегі қолдану жөніндегі нұсқаулықпен бірге картон пәшкеге салады.

Сақтау шарттары

25°С-ден аспайтын температурада.

Балалардың қолы жетпейтін жерде сақтау керек!

Сақтау мерзімі

5 жыл

Қаптамасында көрсетілген жарамдылық мерзімі өткеннен кейін қолдануға болмайды!

Дәріханалардан босатылу шарттары

Рецепт арқылы

Өндіруші

Байер Ой, Финляндия

Bayer Oy, Pansiontie 47, 20101 Turku, Finland

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның атауы және мекенжайы:

«Байер КАЗ» ЖШС

Тимирязев к-сі, 42, «Экспо-Сити» бизнес орталығы, 15 пав.

050057 Алматы, Қазақстан Республикасы

тел. +7 727 258 80 40, факс: +7 727 258 80 39

e-mail: kz.claims@bayer.com